“Chʼamani saytʼasim jan ajjsaramti”

“Chʼamani saytʼasim, jan ajjsaramti [...]. Naya Tatitu Diosamaw jumampiskä.” (JOS. 1:7-9.)

¿QHANAÑCHTʼASMATI

¿Enoc ukat Noé chachanakajj kunjamsa jan ajjsarirïpjjatap uñachtʼayapjjäna?

Bibliajj qellqaskäna uka tiemponjja, ¿kunjamsa yaqhep warminakajj jan ajjsartʼirïpjjatapa ukat Diosar confiasipjjatap uñachtʼayapjjäna?

¿Kunjamtï yateqawayktan ukham jan ajjsartʼiri cristian wayn tawaqonakar jumajj uñtʼtati?

1, 2. 1) ¿Jan walir atipañatakis ukat askinak lurañatakis kunas wakisi? 2) ¿Kuna toqetsa aka yatichäwin yatjjataskañäni?

 JAN ajjsartʼir mä jaqejja, janiw llaythaskaspati. Yaqhepajj janiw kun lurañsa ajjsarapkiti, wali chʼamaniw saytʼasipjje. Ukampis yantʼat uñjasktan jan ukajj jaqenak taypin askinak lurañatak chʼamachastan ukhaw ajjsarirïtanti janicha ukajj qhan amuyasi.

² Diosan nayra loqtirinakapatjja yaqhepajj jan ajjsartʼasaw jan walinakar saykatapjjerïna sasaw Biblian qhanañchasi. Yaqhepajj janiw jiwañarus ajjsarapkänti. Ukat yaqhepasti jiwasjamarakiw kunayman jan walinakar saykatapjjäna. ¿Kunsa jupanakat yateqassna? ¿Kunas jan ajjsarirïñatakejj yanaptʼistaspa?

JANIW KUNS AJJSARAPKÄNTI

3. ¿Diosar jan istʼir jaqenakarojj kunaw pasani sasas Enoc chachajj säna?

³ Uma Juicio nayrajja, jan wali jaqenak taypin Diosar loqtañajj wali chʼamäpachänwa. “Adanat qheparojj paqallqörikäns uka Enoc chacha[t]” amtañäni. Jupajj jan ajjsartʼasaw Diosan arunakapjja akham sasin yatiyäna: “Uñjtwa Tatitur jupanakankirinakampi waranqa waranqanakampi jutaskiri, taqenir taripañataki, ukhamarak taqe jan wali luririnakarus juchañchañataki, ukhamarak taqe kunatejj ñanqha arunak jupataki arsupki uka jan wali juch luririnakarusa [juchañchañataki]” sasa (Jud. 14, 15). Uka arunakajj phoqasipuniniwa sasaw Enoc chachajj atinisïna. Ukatwa niyas phoqasir uñjkaspa ukham arsüna. Kunjamtï yatktanjja, Diosar jan istʼir jaqenakajj Uma Juicionwa jiwarjjapjjäna.

4. ¿Noé chachajj kunjam tiemponsa Diosan munañaparjamajj sarnaqawayäna?

⁴ Enoc chachan jiwatapat 650 maranak jila pasjjäna ukhajja, Noé chachaw nasitayna. Jupaw wawanakapamp chikajj mä arca luratayna. Uka urunakanjja, Diosar jan istʼasir angelanakaw alajjpachat saraqanipjjäna, jaqer tukusaw suma  uñnaqtʼani warminakampi wachoq juch lurapjjäna, ukat wawanakapajj nefilim sat wali jachʼa jaqenakaw jilarapjjäna. Ukatsti, oraqejj kunayman jan walinakampi phoqantatäjjänwa (Gén. 6:1-5, 9, 11). Ukhamäkchin ukhasa, Noé chachajj ‘Diosan munañaparjamapuniw sarnaqäna’ ukat ‘arunakapsa’ jan ajjsartʼasaw parlarakïna. Uka qhepatwa Uma Juiciojj 2370 nayrapach maran purïna (2 Pedro 2:4, 5 liytʼasiñapawa). Aka qhepa urunakanjja ukham jan ajjsartʼasaw sarnaqañasaraki.

DIOSAW YANAPTʼITANI SASAW SAYTʼASIPJJÄNA

5. ¿Moisesajj kunjamsa jan ajjsartʼirïtapsa ukat Diosar confiatapsa uñachtʼayäna?

⁵ Moisesajj Diosar confiasiri ukat jan ajjsartʼir jaqënwa (Heb. 11:24-27). Diosan ajllitaw jupajj 1513 maranjja Egipto markat israelitanakar qhespiyäna, ukat 1473 marakamaw Diosan markaparojj wasar pampan pʼeqtʼäna. Qalltan jupajj ajjsarayaskchïnsa, iyaw sasaw istʼäna (Éxo. 6:12). Ukatjja, Aarón jilapamp chikaw qhoru Faraonan ukar walja kuti saräna. Kunjamsa Jehová Diosajj tunka jan walinakampi Egipto markar tʼaqhesiyani ukat diosanakaps jiskʼachjani uk qhanañchiriw jan ajjsartʼas saräna. Ukatsti, Diosan markaparuw qhespiyarakïna (Éxodo 7 jaljat 12 jaljakama). ¿Khitis Moisesar yanaptʼäna? Jehová Diosaw jan ajjsarañapatakisa ukat Jupar confiasiñapatakis yanaptʼäna. Jiwasarojj ukhamarakiw yanaptʼistaspa (Deu. 33:27).

6. Marka apnaqerinakampi parlañ waktʼistani ukhajja, ¿kunas jan ajjsartʼañatakejj yanaptʼistani?

⁶ Jichhürunakanjja Moisesjam jan ajjsartʼiriñasarakiwa. Jesusajj akham sänwa: “Marka apnaqerinakan ukhamarak reyinakan nayraqataparus apapjjarakïtamwa nayan sutejj layku, ukhamatwa nayatjja jupanakar parlapjjätajja ukhamarak jan judiöpkis uka jaqenak nayraqatansa. Ukampis [...] jan llakisipjjamti kunanaktejj sapkäta ukanakatjja; kunapachatejj parlañäkani ukkhajja Diosaw jumanakarojj arsuyapjjätam” sasa (Mat. 10:18-20). Ukhamajj marka apnaqerinakamp parlañ waktʼistani ukhajja, qollan ajayuw respetompi ukat jan ajjsartʼas yatiyañatakejj yanaptʼistani (Lucas 12:11, 12 liytʼasiñapawa).

7. ¿Jan ajjsarañapatakisa ukat luräwinakap sum phoqañapatakisa kunas Josué chacharojj yanaptʼäna?

⁷ Moisesan jiwatapatjja, Josué chachaw Israel markarojj pʼeqtʼjjäna. Jupajj Leyinakat sapür yatjjatasaw Diosar confiasïna, ukat Moisesjam jan ajjsartʼir jaqerakïnwa. Israel markajj 1473 maran Suma Oraqer niya mantañampïskän ukhajja, “chʼamani saytʼasim” sasaw Diosajj jupar säna. Ukatjja, Diosan Leyinakap phoqhasaw sarnaqäna, taqe kunsa wali yatiñampiw apnaqäna, ukatsti taqe luräwinakapas sumarakiw sartäna. Diosasti juparojj akham saskakïnwa: “Jan ajjsaramti, janirak mayjtʼasimsa. Naya Tatitu Diosamaw jumampïskä kawkharutï sarkata ukkhanakana” sasa (Jos. 1:7-9). Uka arunakajj Josué chachar wal yanaptʼpachäna. Jehová Diosajj arunakapjja phoqapunïnwa, sojjta mara qhepatjja, cheqapuniw Suma Oraqerojj 1467 maran mantjjapjjäna.

JAN AJJSARTʼIR WARMINAKA

8. ¿Kunsa Rahab warmejj uñachtʼayäna, ukat kunsa yateqassna?

⁸ Jan ajjsartʼir warminakajj nayratpachas utjapunïnwa. Maynejj Jericó markanwa jakäna, Rahab satänwa. Diosar jan uñtʼkasajja, jan wali sarnaqer marmïnwa. Ukampis Diosaw qhespiyitani  sasaw jan ajjsartʼasa Josué chachajj uñaqerinak khitkäna ukanakarojj uñisirinakapat imantäna. Ukat reyin minkʼanakapsa maysaruw khitanuküna. Kunapachatï Jericó markajj tʼunjat uñjasïna ukhajja, jupasa, familiapasa qhespipjjänwa. Kunjamtï yatktanjja, Rahab warmejj jan wali luräwinakap apanukjjänwa. Qhepatjja, Mesiasajj jupan familiapatwa jutäna (Jos. 2:1-6; 6:22, 23; Mat. 1:1, 5). Uka jan ajjsartʼir warmejj taqe chuymaw Diosar confiasïna, ukatwa uka suma bendición katoqäna.

9. ¿Kunjamsa Débora, Barac ukat Jael jupanakajj jan ajjsartʼirïpjjatap uñachtʼayapjjäna?

⁹ Josué chachajj 1450 maran jiwjjäna uka qhepatjja, juesanakaw Israel markarojj apnaqjjapjjäna. Uka tiemponjja, Canaán markankir Jabín sat reyiw israelitanakar 20 maranak wal tʼaqhesiyäna. Uk uñjasinjja, Jabín sat reyimpi nuwasir saram sasaw Jehová Diosajj Barac sat mä juesar säna, Débora sat mä warmi toqew yatiyäna, uka warmisti mä profetänwa. Iyaw sasaw Barac chachajj Tabor sat qollunak toqer tunka waranqa chachanakamp saräna. Ukatsti, nuwasiñatakiw wakichasipjjäna. Jabín reyin ejercitoparojj Sísara chachaw pʼeqtʼaskäna, jupajja Cisón sat jawir jakʼaruw ejercitopampi ukat 900 nuwasiñ carronakampi purintapjjäna. Ukäñkamasti, Barac chachampi ejercitopampejj uka jawir toqeruw saraqasipkarakïna, ukhaw Jehová Diosajj mä akatjamat jallu purintayäna, ukat oraqejj ñeqʼe mayjtakëjjänwa. Janiw carronakas unjjtirjamäjjänti. Ukhamatwa Sisaran ejercitoparojj atipjapjjäna, “janiw maynis jiltʼkänti”. Ukat Sisarajja, kayukiw jaltjjasin Jael sat warmin utapar purïna. Ukatsti, uka warmejj mä chʼakurumpiw Sisaran pʼeqepat martillompi leqʼintasin jiwayäna. Ukhamatwa kuntï Deborajj Baracar siskäna ukajj phoqasïna, jupajj akham sänwa: “Aka nuwasiñana atipjkäta ukajj janiw juman jachʼa jachʼa tukuñamatakïkaniti” sasa. Ukhamajj mä warmiruw jachʼañchasïna. Barac, Débora ukat Jael jupanakajj jan ajjsartʼasaw saytʼasipjjäna. Ukatsti, Israel markanjja, “pusi tunka marawa samarañajja utjana” (Jue. 4:1-9, 14-22; 5:20, 21, 31). Qhepatjja, walja chachanak warminakaw ukham saytʼasipjjarakïna.

ARUNAKASAJJA YAQHANAKAR CHʼAMAÑCHASPAWA

10. ¿Kunjamsa arunakasajj mayninakar chʼamañchaspa?

¹⁰ Arunakasajj kunjamsa yaqhanakar chʼamañchaspa uk uñjañäni. Jesusan nasiñapatak niya 1.000 maranak faltkäna uka nayra pach (n.p.) tiemponjja, David reyejj Salomón yoqaparojj akham säna: “Chʼamañchasim, janirak mayjtʼasimti, ukhamarak jichhajj lurañaru uskusim! ¡Janipun chʼam thayjtayasimti, ni ajjsaramsa, Tatitu Diosajjasti jumampïskatap layku! Jupasti janiw jaytanukkätamti, ni apanukkätamsa, taqe lurañanakajj Tatitur serviñataki templona tukusiñapkama” sasa (1 Cró. 28:20). Salomonajj iyaw sasaw Jerusalén markan Jehová Diosan templop lurayäna.

11. ¿Jan ajjsartʼiri mä imill wawan arunakapajj kunjamsa Naamán chachar yanaptʼäna?

¹¹ Ukat 900 nayrïr pach maranakanjja, jan ajjsartʼir mä imill wawan arunakapaw lepra usuni  Naamán chachar yanaptʼatayna. Uka imill wawarojj Siria markankir soldadonakaw Israel markat katuntasin apapjjatayna. Ukat Naamán chachan utapanwa esclavot serviskäna. Kunjamsa Jehová Diosajj Eliseo toqejj milagronak luräna uk yatisajja, patronajajj Israel markar saraspa ukhajja, Diosan profetapaw juparojj qollaspa sasaw Naamán chachan warmipar säna. Ukat Naamán chachajj iyaw sasaw saräna, ukhamatwa lepra usupatjja qollasïna, ukat qhepatsti Diosaruw loqtjjarakïna (2 Rey. 5:1-3, 10-17). Jumatejj waynäsksta jan ukajj tawaqösksta, ukat Jehová Diosarojj uka imill wawjam munasiraksta ukhajja, yatichirimarusa, yateqer masinakamarusa, ukat yaqhanakarus jan ajjsartʼas yatiyañatakejj Jehová Diosaw yanaptʼaskätamjja.

12. ¿Ezequiasan arunakapajj kunjamsa markachirinakar yanaptʼäna?

¹² Kunapachatï mayninakajj jan walinakan uñjasipki ukhaw suma arunakamp chuymachtʼañajj wakisispa. Khä 700 nayra pach maranakanjja, Asiria markankir soldadonakaw Jerusalén markar jutasipkäna, ukatwa Ezequías reyejj markachirinakar akham säna: “¡Chʼamañchasipjjam, ukhamarak jan ajjsarapjjamti! Asiriankiri reyin nayraqatapanjja jan ajjsarapjjamti, ni mayjtʼasipjjamsa, ukhamarak walja ejercitojj jupamp chika jutapkani ukanakatsa, jiwasanakansti jupanakat sipansa jukʼampi utjatap layku. Jupasti jaqenakan chʼamapampikiwa, ukampis Tatitu Diosasaw jiwasampiski, nuwasiwinakasana jiwasaru yanaptʼañapataki” sasa. “Ezequías reyin arunakap istʼasinjja, jaqenakajja chʼamañchasipjjänwa.” (2 Cró. 32:7, 8.) Jan walinakan uñjastan ukhaw uka kast arunakajj jiwasarusa, jilat kullakanakarusa wal chʼamañchtʼistaspa.

13. Acab reyin Abdías mayordomopajja, ¿kunsa jan ajjsartʼas luräna?

¹³ Awisajja, amuktʼasaw jan ajjsarirïtas uñachtʼayaraksna. Khä 900 nayra pach maranakanjja, Acab reyin Abdías sat mayordomopaw Jehová Diosan patak profetanakaparojj imantäna, ‘payar jaljasaw pä putur imantäna’, ukhamat Jezabel warmejj jupanakar jan jiwarayañapataki (1 Rey. 18:4). Jichhürunakanjja, ukhamarakiw Jehová Diosan jan jitheqtir loqtirinakapajj cristiano masinakaparojj imantapjje, janiw uñisirinakapar kuns yatiyapkiti.

ESTER REINAJJA JAN AJJSARTʼIRÏNWA

14, 15. ¿Kunjamsa Ester reinajj Diosar confiasitapa ukat jan ajjsartʼiritapa uñachtʼayäna, ukat kuna askinaksa jikjjatäna?

¹⁴ Ukatjja, 500 nayra pach maranakanjja, Ester sat mä reinaw utjäna, jupajj jan ajjsartʼasaw mä jan walir saykatäna, Diosarus wal confiasirakïna. Hamán sat mä jan wali jaqew uka markankir judionakar qʼal tukjañ amtäna. Ukatwa judionakajj llakisiñat ayunapjjäna ukat taqe chuymaw Jehová Diosar mayisipjjarakïna (Est. 4:1-3). Uk istʼasajja, Ester reinajj judío masinakapat wal llakisïna. ‘Mä leyiw utji ukat uka leyinjja judionakaruw qʼal tukjañ munapjje. Ukat rey nayraqatan judionakar qhespiyañatak achiktʼañamawa’ sasaw Mardoqueo primopajj mä qellqat aptʼayatayna. Ukampis janiw khitis ukhamakejj reyin ukar mantañapäkänti, jan jawsat mantirinakajja jiwayataw uñjasipjjerïna (Est. 4:4-11).

¹⁵ Mardoqueojj akham sänwa: “Janitejj kunsa kamskata ukajja judionakan qhespiyasiñapajja yaqha toqetwa jutani. Ukampis jumasa, ukhamarak awkiman familianakapasa jiwarayatasipkakïtawa. ¡Inasa jumajja reinaru purisksta jiwasanakaru akham llakisiña horasana yanaptʼañataki!” sasa. Uk istʼasajja, judionakar Susa markan jankʼaki tantachthapim sasaw Esterajj Mardoqueor säna. Ukat ‘nayajj uka pachparakiw luräjja’, “ukatjja nayajj reyimpi parliriw saräjja, ukhama lurañajja leyirjamajj janis walïskpan. Ukampis jiwayapjjetanejja, jiwayasipkakitpana” sasa (Est. 4:12-17). Ester reinajj kunjamsa judionakar jan ajjsartʼas yanaptʼän ukajja, wali sumaw sutip apir libronjja qhanañchasi. Jichhürunakanjja, ukhamarakiw ajllit cristianonakampi ukat mayni cristian jilat kullakanakampejj jan waltʼäwinakan chʼamani saytʼasipjje. Ukat ‘mayisitanakar istʼiri’ Jehová Diosaw jupanakar yanaptʼaraki (Salmo 65:2 ukat 118:6 liytʼasiñapawa).

 “CHʼAM KATJJATAPJJAM”

16. ¿Cristiano wayn tawaqonakajj kunsa Jesusat yateqasipjjaspa?

¹⁶ Jesusajj 12 maranïkän uka tiempot jichhajj parltʼarakiñäni. Mä urojja, awk taykapajj “templon ley yatichirinak taypin qontʼatäskiri [Jesusarojj] jikjjatapjjäna, jupanakaru istʼaskiri ukhamarak jisktʼaskiri”. Ukat “taqe jupar istʼirinakasti walpun muspharasipjjäna jupan yatiñapatjja ukhamarak jisktʼanakar arusjjatatapatsa” (Luc. 2:41-50). Wawäkasinsa jan ajjsartʼasaw ley yatichir wali aytat jaqenakarojj jisktʼäna, Awkijaw yanaptʼitani sasaw jan ajjsartʼasa jupanakamp parläna. Cristiano wayn tawaqonakajj ukhamarakiw iyawsäwip toqet yaqhanakar jan ajjsartʼas parlapjjaspa (1 Ped. 3:15).

17. ¿Kunatsa Jesusajj chʼam katjjatapjjam sasajj arkirinakapar sispachäna, ukat kunatsa uka arunakajj jiwasatakis askiraki?

¹⁷ “Chʼamachtʼasim” sasaw Jesusajj jaqenakar sirïna (Mat. 9:2, 22). Ukatjja, “horasajj puriniwa, jichhpacharakiw jumanakajj saräwinakamarjama willinuktawayjjapjjarakïta, nayarusti sapakwa jaytapjjetäta. Ukampis janiw nayajj sapakïkti jan ukasti Awkiw nayampïski. Akjj sapjjsmawa jumanakajj samarañ jikjjatapjjañamataki nayaru iyawsatanakam layku. Akapachanjja jumanakajj tʼaqhesipjjätawa, ukampis chʼam katjjatapjjam, nayajj akapacharojj atipjtwa” sasaw arkirinakapar säna (Juan 16:32, 33). Jichhürunakanjja, ukhamarakiw akapchanjja wal uñisipjjestu, ukampis janiw ajjsarktanti. Jiwasatï akapachampi jan qʼañuchasiñ munkstan ukhajja, Jesusat yateqasiñasawa. Jupajj akapacharojj atipjänwa, jiwasajj ukhamarakiw atipjsna (Juan 17:16; Sant. 1:27).

18, 19. ¿Pablojj kunjamsa Diosar confiasitapsa ukat jan ajjsarirïtapsa uñachtʼayäna?

¹⁸ Apóstol Pablojj ukhamarakiw yantʼanakan uñjasïna. Mä urojja, Jerusalenankir judionakaw niy jiwayapjjatayna, ukampis romano soldadonakaw qhespiyapjjäna. Ukat uka arumasti, “Tatituw Pablorojj uñstäna. Ukat juparojj sarakïna: ‘Chʼamañchtʼasim, Pablo. Kunjämtejj aka Jerusalén markan nayat parlktajja, ukhamarakiw Roma markan parlañamajja wakisi’ sasa” (Hech. 23:11). Cheqas ukwa jupajj luräna.

¹⁹ Corinto markanjja ‘jachʼar tukut apostolanakaw’ tamarojj mayjtʼayasipkäna. Ukampis Pablojj jan ajjsartʼasaw uka jaqenakarojj saykatäna (2 Cor. 11:5; 12:11). Nayarojj Jesucristow khitasinitu sasaw qhan uñachtʼayäna, ¿kunjamsa? Walja kutiw carcelar llawintapjjetu, asutʼjapjjetu, thakinakansa tʼaqhesta, ukat kunayman chijinaksa pasarakta, manqʼat jan manqʼata, umats pharjata, ukat jilat kullakanakat llakisisas jan ikita ukhamaw sarnaqta sasaw säna (2 Corintios 11:23-28 liytʼasiñapawa). ¿Janit jupat yateqaskaraksna? ¡Diosaw qollan ajayupampejj juparojj yanaptʼäna!

20, 21. 1) Jan walinakan uñjasisajj kunatsa jan ajjsarañasäki uk mä uñachtʼäwimp qhanañchtʼma 2) ¿Kunanakansa jan ajjsarañasäki, ukat kunsa amtañasapuni?

²⁰ Cheqansa, janiw taqenis ukham tʼaqhesiñanakan uñjasktanti. Ukampis jan walinakar saykatañatakejj taqeniw chʼamachasiñasa. Amuytʼañatakejj Brasil markan jakasir mä waynat parltʼañäni. Jupajj jan walinak lurir masinakapampiw chikachasïna. Ukat Bibliat yatjjatasajja, jan walïtap amuyasajj janiw jupanakamp chikachasiñ munjjänti. Ukampis uka grupot mistsurinakarojj jiwayapjjerïnwa. Uk yatisajja, Jehová Diosaruw maytʼasïna, ukat uka grupon pʼeqtʼiriparuw Bibliamp qhanañchir saratayna, kunatsa jupanakamp jan chikachasjjani uk yatiyäna. Ukhamatwa uka grupot mistjjäna, janiw jiwayapkänti. Ukatsti, Jehová Diosan Qhanañchiripjamaw loqtjjäna.

²¹ Diosan arunakap yatiyañatakejj janiw ajjsarañasäkiti. ¿Cristiano wayn tawaqonakat kamsaraksnasa? Yateqañ utanakan jan ajjsartʼas yatiyapjjañapawa. Ukatjja, jachʼa tantachäwinakaru jan faltasis sarañatakejj trabajot permiso mayisiñsa janirakiw ajjsarañasäkiti. Cheqas yaqha toqenakat parlaskaksnawa. Ukampis kuna jan walinakan uñjasisas Jehová Diosar taqe chuyma mayisiñäni ukhajj istʼistaniwa (Sant. 5:15). Jupaw qollan ajayup toqejj jan ajjsarañatakisa, ukat chʼamani saytʼasiñatakis yanaptʼistani.

[Jiskt’anaka]

[11 janan fotopa]

Enoc chachajj jan wali jaqenak taypinwa Diosan arunakap yatiyäna

[12 janan fotopa]

Jael warmejj jan ajjsartʼirïnwa