Envidiasiña kunjamsa amuy mayjtʼayistaspa

Napoleón Bonaparte, Julio César ukat Alejandro Magno. Uka kimsa chachanakajj wali uñtʼat munañani jaqëpjjänwa. Ukampis mä jan wali amuyuw uka kimsa jaqenakan chuymapan utjäna: wali envidiasirïpjjänwa.

Wali yatiñani, Bertrand Russell sat mä jaqejj akham sataynawa: “Napoleón chachajj wal Cesarat envidiasïna, Cesarasti, Alejandrot envidiasïna ukat Alejandrojj Herculesat envidiasirakïna, ukampis Herculesajj janiw utjkiti” sasa. Cheqansa, taqeniw envidiasiñar pursna. Qollqenïsasa, kun lurañ sum yatkasasa ukat nayrar sartkasas envidiasiskaksnawa.

Envidiasir jaqejj yaqhanak uñjasaw chuymapan llakisi ukat coleraraki, nayajj jupjamäskirista sasa. Biblia toqet parlir mä libronjja akham sasaw qhanañchi: “Envidiasir jaqejj janiw aleqakejj yaqhanakankir munkiti, jan ukasti, aparañ amtampiw chuymapan wal colerasi” sasa.

Ukampis ¿kunjamatsa envidiasiñajj utjpacha, kuna jan walirus puriyistaspa? Ukanak jichhajj amuytʼañäni. Ukat jan envidiasiñatakejj kun lurañas wakisispa uksa uñjarakiñäniwa.

¿KUNAS ENVIDIASIÑAR NUKTʼISTASPA?

Jucharar jaqjamajja, taqew envidiasiñ yattanjja. Ukampis chuymasan utjir jan wali amtanakaw envidiasiñarojj jukʼampi apistaspa (Sant. 4:5, MT). Apóstol Pablojj akham sasaw qellqatayna: “Janiw [...] maynimp maynimp jan waltʼayasiñataki, jiwaskamas janirakiw envidiäsiñasäkiti” sasa (Gál. 5:26). Ukhamasti, kunapachatï maynimp maynimpi jan waltʼayastan jan ukajj kunsa atip atipa lurtan ukhaw envidasiñanakajj chuymasar mantaspa. Ukaruw mä jilat kullakajj puripjjatayna, maynejj Cristina satawa, maynisti José satarakiwa. * Jupanakat jichhajj amuytʼañäni.

Cristinajj precursor regularjamaw irnaqtʼaski. Jupajj akham siwa: “Mayninakat envidiasiñaw chuymar jutitu. Kunsa mayninakajj jikjjatapjje ukat kunas nayan jan utjki ukak awisajj lupʼiskta” sasa. Mä urojja, tamanak tumptʼir jilatampi ukat esposapampiw Cristinajj manqtʼasiri saratayna. Ukatjja, “aka jilatampi kullakampejj janirakis nayampit Ernestompit jilïrïpkitejjä. Ukat nayrajj nänakjamakirakis precursorat loqtasipkänjjä” sasaw chuymapan lupʼitayna. Ukat akham sasaw arsutayna: “¡Esposojajj irpir chuymanirakiwa! Ukampis ¿kunjamatsa jumanakajj tamanak tumptʼirit irnaqapjjta? Nänakajj janirakis kunäpktsä” sasa. Cristinajj ukhamaw mayninakjamäñ munasajj taman aski luratanakapsa armasïna, janiw chuymapan kusisiñsa jikjjatjjänti.

Ukat ¿Joseyat kamsaraksnasa? Jupajj irpir chuymaninakan yanapiripjamaw wal irnaqtʼañ munäna. Ukampis yaqha jilatanakaruw nayraqat uttʼayapjjatayna. Uk uñjasajj walpun chuym usuyasitayna. Ukatjja, irpir chuymaninakat sarayki uka jilatatakiw wal coleratayna. Jupajj akham siwa: “Envidiasiñaw chuymar mantitu, ukatwa uka jilatarus uñisiñ qallta, jan wali amtampis kuns lurkaspa ukham amuyayäta. Kunapachatï envidiasiñajj chuymar mantasi ukhajja, amuysa chʼamaktʼayasiwa” sasa.

 BIBLIAN UTJKI UKA SARNAQÄWINAKAT KUNSA YATEQSNA

Envidiasir walja jaqenakatwa Biblian parli, jupanakat yatjjatasin amuyasiñasawa (1 Cor. 10:11). Kunjamatsa envidiasiñajj chuymasan qalltaspa ukat kuna jan walinakarus apistaspa ukanakwa qhan uñachtʼayi.

Adanampin ukat Evampin Caín sat jilïr yoqapat parltʼañäni. Kunapachatï Jehová Diosajj Abelan sacrificiop wali askit uñjäna ukat jupan sacrificiop jan katoqkäna ukhajja, wali colerataw Cainajj sullkapataki jikjjatasïna. Cheqasa, munaspäna ukhajj envidiasiñar atipaspänwa. Ukampis envidiasir chuymapampi atipjataw sullkapar jiwayatayna (Gén. 4:4-8). Ukatwa Biblianjja akham sispacha: “Janiw Cainjamäñasäkiti, jupajj Supayankirïnwa” sasa (1 Juan 3:12).

Joseyan tunka jilanakapat amtarakiñäni. Joseyajj awkipan wali munatänwa, uk uñjasaw jupar uñisipjjäna. Ukat kunapachatï Joseyajj samkanakap yatiyäna ukhajja, jukʼampiw uñisipjjäna. ¡Jiwayañatakiw uñjapjjäna! Qhepatjja, mä esclavot aljasaw jaya markar apayapjjäna, ukat jan phinqʼaniw awkiparus kʼarintapjjäna, wawamajj jiwjjataynawa sasa (Gén. 37:4-11, 23-28, 31-33). Walja maranak pasjjäna ukhakiw akham sasin amtasipjjäna: “Cheqpachansa jiwasanakajj jan walpun jilasampejj lurapjjayätanjja. Kunapachatejj rogtʼaskäna ‘Khuyaptʼayasipjjeta’ sasajja, ukapachasti jiwasajj janiw jupatjja khuyaptʼayaskäyätanti” sasa (Gén. 42:21; 50:15-19).

Coré, Datán ukat Abiram jaqenakat parltʼarakiñäni. Jupanakajj Moisesar ukat Aaronar uñtasaw wal envidiasipjjäna, jupanakjamäñ wal munapjjäna. Moisesajj jupakiw “jachʼa” jilïriñ muni sas kunaw parlapjjäna (Núm. 16:13). Ukampis ukajj janiw cheqäkänti (Núm. 11:14, 15). Moisesajj Jehová Diosan uttʼayataw loqtaskäna. Ukampis uka jan wal amtani jaqenakajj Moisés lantiw uttʼasiñ munasipkäna. Ukham envidiasisajj jiwañaruw puripjjäna, Jehová Dios kikpaw jupanakar tujkäna (Sal. 106:16, 17).

Envidiasiñajj kawkikamas maynir puriyaspa ukjja qhanpunwa Salomonajj uñjäna. Mä warmiw asu wawap jiwayasitayna, ukampis yaqha warmin wawapwa katuntasiñ munäna. Jiwat wawajj jumankiwa sasaw mayni warmir säna. Ukhamatwa mä juicior puripjjäna. Ukat kunapachatï Salomonajj jakaskir wawar kharjapjjam sasin säna ukhajja, janiw uka kʼari warmejj wawat sinttʼaskänti. Ukhamatwa uka wawajj khitinkisa ukajj yatisjjäna, ukat cheqpach taykaparuw Salomonajj churjjäna (1 Rey. 3:16-27).

¿Kunsa aka sarnaqäwinakat amuytanjja? Envidiasiñajj jan walinakaruw apistu. Uñisisiñasa, jan walinak lurañasa ukat jaqe masir jiwayañasa ukhamatwa utjaspa. Ukat kunjamtï uka sarnaqäwinakan uñjktanjja, khitinakarutï envidiapki ukanakajj janiw kuna jan walsa lurapkänti, ina chʼusatakwa tʼaqhesiwayapjje. Ukhamajj ¿kunas jan envidiasiñatakejj yanaptʼistaspa?

KUNANAKAS YANAPTʼISTASPA

Jilat kullakanakar taqe chuyma munasiña. Apóstol Pedrojj akhamwa cristianonakar säna: “Jichhajj jumanakajja, qollan ajayu toqe Tatitun arunakap istʼasinjja, almanakamjja qʼomachasjjapjjtawa jilatanakaru cheqpachan munañataki. Ukhamajj maynit maynikamaw munasipjjañama taqe chuyma, ukhamarak taqe chʼamampi”  sasa (1 Ped. 1:22). Ukampis ¿kunjamatsa cheqpach munasiñ uñachtʼaysna? Pablojj akham sarakiwa: “Khitintejj munasiñajj utjki ukajj llampʼu chuymaniwa, suma jaqewa, janiw envidiasirïkiti, janiw jachʼa jachʼa tukurïkiti. Janiw kuna jan walsa lurkiti, janirakiw kunsa jupatakiki munirïkiti” sasa (1 Cor. 13:4, 5). Uka kasta munasiñ uñachtʼaysna ukhajja, janiw kunäkipansa khitirus envidiaskañäniti (1 Ped. 2:1). Uka toqetjja Jonatán chachajj wali yateqaskañapuniwa. Davitar envidiasiñat sipansa, “jupa kipkarjamaw munasïna” (1 Sam. 18:1).

Diosar taqe chuym loqtir jilat kullakanakamp chikachasiña. Salmo 73 jalja qellqerejja, khitinakatï jachʼachasipki, qamirkipstapki ukanakaruw envidiasïna. ¿Kunjamatsa uka jan wali amuyupar atipjäña? “Diosan qollan utapar mantasinak amuyta, kunarutejj puripkan uka” sasaw jupajj säna (Sal. 73:3-5, 17). Ukhamajja, Jehová Diosar taqe chuym loqtapki ukanakamp chikachasisaw jupajj Diosan jakʼapankañajj wali askitap amuyasïna (Sal. 73:28). Jiwasatï tantachäwinakar jan faltasisa sarañäni ukhajja, ukhamarakiw Diosan jakʼapankañajj wali askïtap amuyañäni.

Askinak luraña. Kunapachatï Cainajj envidiasiña chuymapan qalltaskäna ukhajja, ¿Diosajj kamsasas ewjjtʼäna? ‘Askïki uk luram’ sasaw säna (Gén. 4:7). Uka ewjjtʼajja taqe cristianonakatakis wali askirakiwa. Jesusasti akham sarakïnwa: “Tatit Diosamaruw munäta taqe chuymamampi, taqe almamampi, taqe amuyumampiraki”. Ukat “jaqe masimarusti juma kipkarjam munarakim” sasa (Mat. 22:37-39). Kunapachatï Diosar taqe chuyma loqtañ muntan ukat jaqe masisar yanaptʼañ muntan ukhajja, chuymasan utjki uka envidiasiñajj janiw utj-jjaniti, ukat wali kusisitaw jekjjatasirakiñäni. Jiwasatï Jehová Diosar sirviñäni ukat jaqe masisar junjamats yanaptʼañatak chʼamachasiñäni ukhajja, walja ‘bendicionanakwa’ katoqañäni (Pro. 10:22).

“Kusisipjjarakim khitinakatejj kusisitäki ukanakampejja.” (Rom. 12:15.) Kunapachatï arkirinakapajj wali askinak lurapjjäna ukhajja, walik ukham lurapjjtajja sasaw Jesusajj jupanakar säna. Ukatjja, nayat sipansa jukʼampinakwa lurapjjäta sasaw sarakïna (Luc. 10:17, 21; Juan 14:12). Jehová Diosan loqtirinakapajj mä wawakiw sarnaqastanjja. Kunapachatï maynejj askinak jikjjati ukhajja taqeniw kusistanjja (1 Cor. 12:25, 26). Ukhamasti, mä jilatas jan ukajj kullakas aski luräwinak taman katoqani ukhajja, janiw envidiasiñasäkiti, antisas jupanakamp chikaw kusisiñasa.

CHʼAMACHASISKAKIÑÄNI

Envidiasir chuymar atipañajj wali chʼamäspawa. Cristinajj akham siwa: “Envidiasir chuymajj walpun atipañ munitu. Ukampis nayajj wal chʼamachasta, jaqe masit jan invidiasjjañatakejj chʼamachasiskaktwa” sasa. Joseyajj ukar uñtasitarakiw chʼamachasiski. Jupajj akham siwa: “Irpir chuymaninakat sarayiri jilatar jan uñisiñatakejj Jehová Diosaw wal yanaptʼitu, kuna askinaksa uka jilatajj luri uk amuyañatakiw chʼamachasta. Nayraqatajj Jehová Diosamp sum apasiñatakiw chʼamachasta, ukhamatwa envidiasiñarojj atipjawayta” sasa.

Jan armañäniti, envidiasiñajj “jan wali luräwinakan qhepap” arkañawa (Gál. 5:19-21). Ukhamasti, cristianjamajj uka envidiasiñar atipañataki wal saytʼasiñasawa. Atipañäni ukajja, wal kusisitaw Jehová Diosar loqtañäni ukat jupas wal askit uñjarakistani.

[Qhanañchäwi]

[17 janan qhanañchäwipa]

Kusisirinakampejj kusisipjjañäni