Jan ajjsartʼasaw yatiyapjjäna

Uñisirinakan arknaqatpachas kunjamsa cheqa cristianonakajj Diosar taqe chuym loqtapjje ukajj wali qhanapuniw “Testimonio cabal” del Reino de Dios ukat Los testigos de Jehová, proclamadores del Reino de Dios siski uka libronakan uñachtʼayasi. Diosan arunakapat jan ajjsartʼas yatiyir sarañataki qollan ajayum churapjjeta sasaw Jehová Diosar mayistanjja, kunjamtï nayra cristianonakajj mayisipkän ukhama (Hech. 4:23-31).

Nayrïr jachʼa chʼajjwäwejj utjkäna uka tiemponjja, kunjamsa jaqenakar yatiyasïna uka toqet parlkasinjja, akham sasaw mä jilatajj qhanañchi: “Uka tiemponjja, taqe chuymapuniw Diosan loqtirinakapajj Estudios de las Escrituras siski uka qellqatanakat The Finished Mystery siski uka qhepïr libro lakirapjjäna. Ukat 1918 maranjja, Kingdom News (Noticias del Reino) siski uka tratadonakaw apsusiñ qalltawayarakïna. Nayrïri ukat payïri tratadonakanjja, kunatsa marka apnaqerinakajj The Finished Mystery siski uka libro jarkʼantapjjäna ukwa qhan uñachtʼayapjjäna. Ukat kimsïr traradojj apsusïna ukhasa, wal lakintapjjarakïna. Ukampis jaqenakar churañjja ajjsarapjjänwa” sasa.

Kunjamsa Diosan arunakapat yatiyañäni ukjja wali sumwa yattanjja, machaqanakarus wali sum yatichasiraki. Ukampis nayrajj janiw ukhamäkänti. Polonia markankir mä jilatajj kunjamsa 1922 maranjja, Estados Unidos markan yatiyañ qalltäna ukjja akham sasaw qhanañchi: “Janiw inglés aru parlañ sum yatkayätti, ukat qellqatanakajj kunjamas jaqenakar jaytasiñapa uksa janirakiw yatkayätti. Mä kutejja, usutanakar qollapki uka uta punkuruw purta. Leqʼentta ukhajja, mä enfermeraw mistuni. Nayajj walpun Diosan arunakapat parlañ munayäta, ukampis ajjsarañaw chuymar mantitu. Cheqas uka urjja janipuniw armkäti. Maletinat mä libro apsü sist ukhajja, enfermeran kayuparuw libronak antutta. Kunjam arunakampis yatiyawayta ukjja janiw amtaskti, ukampis mä libro jaytawayta. Uka cheqat sarjjta ukhajja, wali sumakiw chuymajan jikjjatasta, Jehová Diosaw wal yanaptʼawayitu. Ukat uka urojja, walja folletonakwa uka callen jaytawayta” sasa.

Ukat 1933 maranakatjja, akham sasaw mä kullakajj saraki: “Diosan Reinopat yatiyañatakejj walja jilat kullakanakaw jachʼa parlantenakani autonak apnaqapjjäna” sasa. Mä kutejja, California (Estados Unidos) siski uka markan yatiyañatakiw uka kullakajj mä chacha warmimpi saratayna. Kullakajj akham saskakiwa: “Kunapachatï uka markar puripjjta ukhajja, sapakiw jilatajj autop mä qollu patar apkatawayi. Nanakajj marka taypinwa qheparapjjta. Ukat grabacionajj qalltäna ukhajja, wali muspharkañänwa, Diosas alajjpachat parlankaspa ukhamaw istʼasïna. Kawkitsa parlani sasaw jaqenakajj wal thaqtapjjäna, ukampis janiw jikjjatapkänti. Ukat grabación tukuyipan utanakar visittʼapjjta ukhajja, walpun jaqenakajj Diosan arunakapat yatiñ munapjjäna. Qhepatjja, ukham yatiyañatakiw nayajj chʼamachasirakta, parlantenakani pä autompiw  yantʼta. Ukampis nayarojj janiw jaqenakajj istʼañ munapkituti. Cheqasa, munas jan munasaw Diosan arunakapat parlir grabacionanak pachpa utanakapan istʼapjjäna. Jaqenakar ukham yatiyañajj ajjsarañjamänwa, ukampis Jehová Diosan sutipa jachʼar aptañatakiw ukham chʼamachasiwayta. Nayajj ak amuyta, kunjamat yatiyañas wakisispa ukjja Jehová Diosaw tiempopar yatichasi” sasa.

Khä 1930 ukat 1940 maranakanjja, fonografompi ukat Bibliat apstʼat arstʼäwinakampiw wal yatiyasirakïna. Mä kullakajj akham siwa: “Mä urojja, mä tawaq kullakaw utat uta fonógrafo sat maquinampi yatiyaskäna. Ukat mä utar purisin fonógrafo aqtayäna ukhajja, walpun utanejj colertʼasïna. Ukatjja, may takintasaw fonógrafo jay liwtaraqäna. Ukat janirakiw disconakajj kamachaskänsa, walikïskänwa. Ukampis uka jakʼanjja kimsa chachanakaw mä auton manqʼtʼasisipkäna. Kunas pasi uk uñjasajja, nanakar antisas istʼayasipkita sasaw kullakitar sapjjäna, ukat walja qellqatanakwa mayipjjarakïna. Ukhamatwa kullakitajj chuymachata jikjjatasiwayi” sasa. Ukham jan walinak aguantañajj wali chʼamäpachänwa.

Ukat kullakajj akham saskakiwa: “Ukat 1940 maranjja, revistanakampiw callenakan yatiyañ qalltapjjarakta. Ukampis uka nayrajj marchanakjam wakichasaw thakinakar mistupjjerïta. Akham arunakwa jaqenakan uñjapjjañapatakejj qellqsuwayapjjerïta: ‘Religionanakajj mä sipitawa, jan waliruw apasi’ ukat ‘Diosampir Jesucristo Reyimpir servipjjam’ sasa. Ukatjja, walja tratadonakwa jaqenakar inaki lakirapjjäna. Ukham waljani yatiyir sarañajj ajjsarañjamänwa, ukampis ukhamatwa Diosan sutipsa ukat markapsa uñtʼayapjjta” sasa.

Yaqha kullakajj akham sarakiwa: “Thakinakan revista jaqer jaytañajj wali chʼamänwa. Uka tiemponjja, janiw Jehová Diosan Qhanañchirinakapat jaqejj kuns yatiñ munkänti [...]. Ukhamajj esquinanakan revistanak aptʼasita sayañas ajjsarañjamänwa. Ukampis sapa sábado urunakaw revistanakas aptʼasita ukham jachʼat arnaqasipjjerïta. Awisajj iyaw sasaw jaqenakajj katoqasipjjeri. Ukampis awisajj colerat jaqenakan muyuntataw uñjasipjjarakirïta, ukat jaltjjapjjerïtwa” sasa.

Payïr jachʼa chʼajjwäwejj utjkäna uka tiemponjja, ukhamarakiw Jehová Diosan Qhanañchirinakapajj jan ajjsartʼasa jaqenakar yatiyapjjäna. Ukat 1940 maran diciembre phajjsin mayïr urut qalltasinjja 1941 maran enero phajjsin 12 urukamajj walpun yatiyasiwayi. Mä arunjja, 43 urunakaw Estados Unidos markan wal irnaqtʼasiwayi. 50.000 jilat kullakanakaw millón millón folletonak jaqenakar jaytapjjatayna. Uka urunakajja, “Jan Ajjsartʼaña” sasinwa sutiyasiwayi.

Uka tiemponjja kunanakas pasawayi, kunjamsa jaqenakar jan ajjsartʼasin yatiyasiwayi ukjja wali sumwa chuymankipstat jilat kullakanakajj amtasipki. Walja maranakaw akham sapjjerïna: “Punkukamaw nuwasirejj sarañäni” sasa. Ukhamatwa jan ajjsartʼas yatiyir sarapjjatapjja uñachtʼayapjjäna. Akat uksarojj kunjam yatiyañay wakischini ukjja janiw yatktanti. Ukampis kunürutï akapachajj tukuskani ukhakamaw jan ajjsartʼas yatiyañäni, Jehová Diosaw yanaptʼistani sasaw jupar wal atinistanjja.

[9 janan qhanañchäwipa]

Kawkin yatiykasas jan ajjsartʼrïñasawa