Jan ikipjjañäniti Jesusat yateqasipjjañäni

“Jan ikipjjamti, jan ukasti Diosatjja mayisipjjamaya.” (MAT. 26:41.)

¿KAMSASMASA?

¿Amuyumpit sarnaqasktan janicha ukjja kunjamsa oracionanakasajj uñachtʼayi?

¿Kunjamatsa Diosan arunakapat wali amuyumpi yatiyañ munatas uñachtʼaysna?

¿Llakinakampi jan aynachtʼañatakejj khitirus atinisiñasa, ukat kunjamsa uk uñachtʼaysna?

1, 2. 1) ¿Jesusan wali amuyumpi sarnaqatapatjja kunsa yaqhepajj sapjjaspa? 2) ¿Jucharar jaqenakajj mä jan pantjasir jaqet yateqassnati? Mä uñachtʼäwimpiw qhanañchtʼasma.

 JESUSJAM wali amuyumpi sarnaqañajj wali chʼamawa sasaw yaqhepajj amuyapjje. Jupajj jan juchan jaqënwa ukat kunas pasani uksa jayäkipanwa yatjjäna sasaw sapjje. Ukat yaqhepajj akham sasaw jisktʼasipjjaraki: “¿Cheqapuniti Jesusan wali amuyumpi sarnaqañapajj wakispachäna?” sasa (Mat. 24:37-39; Heb. 4:15). Uka toqenakat sumpach nayraqat amuytʼañäni. Ukatjja, kunatsa jiwasan wali amuyumpi sarnaqañasajj wakisiraki, mä arunjja, kunatsa jan ikiñasäki ukwa sum amuytʼarakiñäni.

² Ukampis ¿jucharar jaqenakajj mä jan pantjasir jaqet yateqassnati? Jïsa, yateqassnawa. Kunjamtï mä yateqerejj yatichiripat yateqaskejja, ukhamarakiw jiwasajj Jesusat yateqassna. Kunjamsa maynejj bicicleta apnaqañ yateqe uka toqet amuytʼañäni. Mä jan yatirejj janiw sum apnaqkaspati. Ukampis kunapachatï mayamp mayampsa yantʼaskaki ukhajja, jukʼat jukʼatwa apnaqañ yateqe. Ukat sumpach yateqañatakejja, ¿kunampi lurañas wakisispa? Khititejj bicicleta yäpar apnaqañ yatki ukampi yatichayasiñapawa. Ukatjja, kuntï jupajj siski ukarjam istʼañapawa, ukat kunjamsa yatichirejj sartayi, kawkitsa kathapi, kawksatsa sarjjati ukat kunjamsa saytʼayi ukanaksa sum uñchʼukiñaparakiwa, ukhamatwa bicicleta apnaqañ munirejj sum yateqani. Niya ukar uñtasitarakiw jiwasajj Jesusat yateqassna. Kunanaksa yatichäna ukat kunjamsa sarnaqäna ukanakat sum yatjjatañasawa, ukhamata cheqpach cristianjam sarnaqañataki.

3. 1) ¿Pachpa arunakaparjamajj kunatsa Jesusan wali pʼarjjtatäñapajj wakisïna? 2) ¿Kunanaksa aka yatichäwin uñjaskañäni?

³ ¿Cheqapunit Jesusan pʼarjjtatäñapajj wakisïna? Jïsa, wakisïnwa. Ukatwa katuntapkäna uka arumajj apostolanakapar akham säna: “Janiraki ikipjjamti [nayamp chika  uñnaqapjjam ukat amuyasipjjam, NM]” sasa. Ukatjja, “jan ikipjjamti, jan ukasti Diosatjja mayisipjjamaya, jan yantʼäwir puriñataki” sasaw sarakïna (Mat. 26:38, 41). Aka oraqenkkasajj wali pʼarjjtata sarnaqañatakiw jupajj chʼamachasïna, mä arunjja, janiw akapachan ikjkänti. Ukat jiwañapajj wali jakʼänkjjäna ukhajja, jukʼampiw amuyasïna, janipuniw kunäkipansa alajjpachankir Awkipat jitheqtañ munkänti. Ukat arkirinakapajj ukham amuyasipjjaspa ukwa munarakïna. Ukampis ¿jupanakajj uka urunakakit wali amuyump sarnaqapjjañapäna? Janiwa, uka qhepatsa janiw akapachan ikjapjjañapäkänti. Ukhamasti, kunatsa Jesusajj “jan ikipjjamti” sasajj sispachäna uk sumpach amuytʼañäni. Ukat kunanakansa jupat yateqasisajj wali amuyumpi sarnaqsna ukwa kimsa toqet uñjarakiñäni.

¿KUNATSA JESUSAJJ AMUYASIPJJAM SASAJJ SISPACHÄNA?

4. ¿Kunatsa pʼarjjtat sarnaqañajj wakisi?

⁴ Aka Oraqenkkasajj janiw taqe kunpun Jesusajj yatkänti. Kunanakas qhepat pasani ukanaksa janirakiw taq yatkänti. Ukatwa Jehová Diosan colerasiñ urupat parlkasajj akham qhanañchäna: “Kuna horasäkanitejj jan ukajj kuna urükanitejj ukjja janiw khitis yatkiti, ni alajjpachankir angelanakasa ni Diosan Yoqapasa, jan ukasti Dios Awki sapakiw yati” sasa (Mat. 24:36). “Diosan Yoqapa” sasinjja jupa pachpatwa Jesusajj parlaskäna. Ukhamasti, kunürus akapachajj tukusini ukjja janïraw yatkänti. Ukat ¿jiwasat kamsaraksnasa? ¿Kunanakas qhepat pasani uk sumti yattanjja? Janiwa. Ukat kunapachas Jehová Diosan Yoqapajj akapach tukjir jutani uksa janiw yatktanti. Jutïr urunakat taqe kun yatsna ukhajja, janiw pʼarjjtat suyañajj wakiskaspati. Ukampis kunjamtï Jesusajj siskänjja, uka urojj mä akatjamatwa katjistani, mä lunthatar uñtataw purinini, ukatwa pʼarjjtat sarnaqañajj wakisi (Mateo 24:43 liytʼasiñapawa).

5, 6. 1) ¿Diosan Reinopat yatjjatasajj kuna toqet pʼarjjtatäñasasa? 2) ¿Supayajj kuns luraski, ukat uk yatisajj kunatsa walpun amuyasiñasa?

⁵ Maysa toqet jichhajj amuytʼarakiñäni. Jaqenakat sipansa jukʼamp sumwa Jesusajj jutïr urunakat yatïna. Niyakejjay pantjasir jaqëstanjja, janiw khitis jupjam yatksnati. Ukampis ¿kunjamatsa jutïr urunakat mä qhawqha yatjjattanjja? ¿Khitis Diosan Reinopatsa ukat kunsa uka Reinojj lurani ukanaksa yatichistu? Cheqas Jesusaw yatichawayistu. Ukat jiwasajj jupat yateqasisin jaqenakar ukham yatiyañasarakiwa. Yateqañ utanakansa, trabajonsa ukat utat uta yatiyir sarktan ukhasa, Diosan Reinopat jaqe masisar sum yatichañasawa. Khitinakas Diosan Reinopat istʼañ munapjjaspa uk wal amuyañasawa, janiw ikjañasäkiti. Jaqenakajj yatiñ munasipkaspa, ukat jiwasajj ukhamak pasaysna ukhajj janiw walïkaspati, jiwañaruw puripjjaspa (1 Tim. 4:16).

⁶ Jesusanjja yaqha toqet amuyasiñapaw wakisirakïna. Akapachan ikjaspäna ukhajja, Supayan amparaparuw jaltʼaspäna. Uka Uñisirejj kunayman yantʼanakampiw Jehová Diosat jitheqtayañ munäna. Ukat jan sinttʼasisaw arknaqarakïna. Kunjamat tinkuyañsa munapunïnwa (Luc. 4:13). Ukampis Jesusajj wali amuyumpiw sarnaqäna. Kuna yantʼanakar atipañatakisa ukat jan walinakar saykatañatakis wali wakichtʼatänwa. Ukat ¿jiwasat kamsaraksnasa? Bibliajj akham sistuwa: “Jumanakar uñisir Supayasti mä leonar uñtataw warartʼasisa sarnaqaski khitiru manqʼantañatakisa [jankʼakiwa]” sasa. Ukatwa “wali amuytʼasirïpjjam” sasajj ewjjtʼarakistu (1 Ped. 5:8). Ukampis ¿kunjamatsa wali amuytʼasirïtas uñachtʼaysna?

JAN IKJAÑATAKEJJ JEHOVÁ DIOSAR MAYISIPJJAPUNIÑÄNI

7, 8. ¿Diosar mayisiñ toqetjja kamsasas Jesusajj ewjjtʼistu, ukat kunsa jupat yateqassna?

⁷ Ajay toqet pʼarjjtatäñatakejj Jehová Diosar oración lurapjjapunim sasaw Bibliajj amtayistu (Col. 4:2; 1 Ped. 4:7). Amtañäni, “jan ikipjjamti”  sasinjja, “Diosatjja mayisipjjamaya, jan yantʼäwir puriñataki” sasaw Jesusajj sarakïna (Mat. 26:41). ¿Kunatsa ukham sispachäna? Niyakejjay mä jan walin uñjasipjjchïnjja, ¿uka yantʼar atipañatakikit wal amuyasipjjañapäna? Janiwa. Uka arunakapajj jichhürkamas wali wakiskiriwa, ukat sapürus uka arunakarjam phoqañasarakiwa.

⁸ Jehová Diosar mayisiñajj kunjamsa yanaptʼistaspa ukjja, qhanwa Jesusajj uñachtʼayäna. Mä kutejj arum paqaraw Awkipar mayisitayna (Lucas 6:12, 13 liytʼasiñapawa). Kunjamsa mayisïna uk niyas uñjksna ukham amuytʼañäni. Kawkirutejj purirïkäna uka Capernaum marka jakʼanwa Jesusajj jikjjatasi. Ukat niyarakiw Intejj jalantaski. ¿Kun lurañsa amtpacha? Galilea Qota jakʼankir mä qollu parkiruw sapaki makataski. Ukat niy chʼamaktʼjje ukhajja, jupan uñjkataw mecheronakajj Capernaum markansa ukat yaqha cheqanakansa jukʼat jukʼat aqtaraski. ¿Kunsa sapakejj lurani? Alajjpachankir Awkipampi parltʼasiñatakiw altʼasi, ukat janirakiw jupar khiti arjjayiris utjkiti. Minutonakas horanakas jankʼakiw pasaraki. Ukampis jupajj janiw amuyaskiti. Markanjja, jukʼat jukʼatwa mechanakas jiwarjjaraki, Phajjsis wali sum qhantʼaniraki ukat arum sarnaqer animalanakas istʼasirakiwa. Ukampis Jesusajj Awkipampi parlasiskakiwa. ¿Kuna toqetsa parlpacha? Kawkir arkirinakarus apostolat ajllini uk yatiñatakiw Awkipar wal mayispacha. Sapa maynis kunjam jaqëpjjesa ukat jupajj kunsa jupanakat amuyi, taqe ukanakwa Awkipar sum yatiypacha. Ukat sum ajlliñatakejj yatiñamampi yanaptʼita sasaw achiktʼasirakpacha.

9. ¿Jesusajj Diosar arum paqar mayiskäna ukajj kunanaksa jiwasar yatichistu?

⁹ Ukhamajj ¿kunsa Jesusat yateqassna? ¿Walja horanakapunit Diosar mayisiñasäspa? Janiwa. Mä kutejja, akham sasaw arkirinakapar sumat säna: “Ajayojj [...] jankʼakiwa, ukampis janchejj tʼukhawa” sasa (Mat. 26:41). Ukampis jupat yateqasiñajj waliw utji. Amuytʼañäni, familiansa, tamansa ukat Diosar loqtañ toqetsa kunayman amtanakar puriñaw awisajj wakisi. Ukampis ¿janïr kun lurkasat Diosar mayistanjja? ¿Jilat kullakanakatakis mayiraktanti? Ukat ¿taqe chuymat Dios Awkisar mayistanjja, jan ukajj pachpa arunakakcha sapa kutis sasktanjja? Maysa toqet amuytʼarakiñäni, Jesusatakejj Awkipampi sapaki parltʼasiñajj wali askipunïnwa. Akapachanjja jan tiemponikiw sarnaqtanjja, kunatejj wali wakiskirïki ukanakas awisajj armasiñjamawa. Ukampis Jehová Diosar mayisiñataki tiempo apstʼasiñäni ukat taqe chuymaraki oración lurañäni ukhajja, ajay toqet wali pʼarjjtataw Jupar loqtañäni (Mat. 6:6, 7). Ukhamatwa Dios Awkisarojj jukʼampi jakʼachasiñäni ukat Jupampejj wali sum apasirakiñäni. Ukat kunatï Jupat apaqkistaspa ukanakatsa amuyasirakiñäniwa (Sal. 25:14).

JAQENAKAR YATIYAÑATAKEJJ WAL AMUYAÑASAWA

10. Kunjamatsa jaqenakar yatiyaspa ukjja wali amuyumpiw Jesusajj thaqhäna sasajja, ¿kunatsa sissna?

¹⁰ Kunjamtï yatktanjja, yaqhep trabajonakajj janiw wali amuyutakïkiti, yaqha toqenakat lupʼisas lurasksnawa. Ukampis yaqhep trabajonakajj wali amuyutakirakiwa. ¿Diosan arunakapat yatiyañ toqet kamsaraksnasa? Kunjamatsa jaqenakar yatiyaspa ukjja wali amuyumpiw Jesusajj thaqhäna. Amtañäni, mä kutejj Sicar markar purisaw mä phuju jakʼan samaraskäna. Arkirinakapajj manqʼa aliriw sarapjjatayna. Ukhamaruw Samaria markanakir mä warmejj um waysusiri purïna. ¿Kunsa Jesusajj luräna? Jupajj wali qaritäskänwa, ukhamajj mä rato samartʼä sasaw iktʼaspäna, jan ukajj jan uñjiriw tukuspäna. Ukampis jankʼakiw Diosan arunakapat uka warmir parlañ qalltäna. Tiempopsa janiw ina chʼusar aptʼaskänti. Ukhamatwa uka warmir yatiyasajj walja jaqenakar purtʼäna (Juan 4:4-26, 39-42). ¿Kunsa jupat yateqassna? Kawkin sarnaqkasasa Diosan arunakapjja yatiyañasapuniwa, kunjamatsa istʼañ munapjjaspa uk wal amuyañasawa.

11, 12. 1) ¿Jaqenakan jarkʼañ munatajj Jesusajj kamsänsa? 2) Jesusajj taqe kunanwa wali amuyumpi sarnaqäna sasajja, ¿kunatsa sissna?

 ¹¹ Awisajj pachpa jaqenakaw Jesusar qheparayañ munapjjäna. Mä kutejj walja milagronakwa Capernaum markan luratayna ukat walja usutanakwa qollatayna. Uk uñjasaw jaqenakajj jupar qheparayañ munapjjäna, janiw antutañ munapkänti. Ukampis Diosan arunakapat yatiyirejj yaqha cheqanakar sarañaparakïnwa, janiw mä markanaki yatiyañapäkänti. Ukatwa jupajj akham säna: “Diosajj khitanituwa Israel markan chhaqatäkis uka ovejanakar thaqeri” sasa (Mat. 15:24). “Wakisirakiw nayanjja Diosan reinopat yaqha markanakaru yatiyir sarañajjajja, ukataki khitanitarakïtwa” sasaw säna (Luc. 4:40-44). Jïsa, Jesusatakejj Diosan munañapa phoqañaw nayrankäna, janiw kunäkipansa maysar uñtkänti.

¹² Ukampis ¿Dios chuymätwa, yatiyir sarañajawa sasat Jesusajj jan tiemponi sarnaqäna? Janiwa, awisajj amigonakampi kusistʼañatakis tiempo apstʼasirakïnwa. Ukat kunanak lurañas wakisirakispa, kunsa jaqenakajj munapjje ukanaksa sum amuyäna. Mä arunjja, wali amuyumpiw sarnaqäna, janiw mä qhawqha lurañanakampikejj apayaskänti. Ukat familianakajj kunjamsa jikjjatasipjje uksa wal yatirakïna. Amtpachätanwa, wawanakar ichjjartʼañatakis tiempopajj utjänwa (Marcos 10:13-16 liytʼasiñapawa).

13. Jesusajj taqe kunwa amuyumpi phoqäna sasajja, ¿kunatsa sissna, ukat kunsa jiwasajj yateqassna?

¹³ ¿Ukampejj kunsa Jesusajj yatichistu? Taqe kunsa amuyumpi phoqañasawa, janiw mä toqeruk sarasin yaqhanakat armasiñasäkiti. Ukat kuntï Diosajj lurapjjam siski ukanakjja janiw qheparuk jaytañasäkiti, janiw akapachar arkasin saranukuñ munktanti. Ukat inas yaqhep amigonakas jan ukajj familiaranakas akham sapjjchispa: “Sintik irnaqjjaraktajja, mä jukʼa samartʼañamawa. Kunjamsa yaqhanakajj sarnaqapjje uk uñtasin ukham sarnaqasiskam” sasa. Ukampis cheqapuni Jesusan kayunakap arkañ munstan ukhajja, janiw Diosan arunakapat yatiyañjja armasiñasäkiti, jan ukasti, ukaw taqe kunat sipansa nayrankañapa (Juan 4:34). Ukat ukham lurtan ukhajja, wali chʼamañchtʼataw ajay toqen jikjjatastanjja ukat chuymas chuymarakïtanwa. Ukampis “cristianötwa” sasin jan kunatakis tiemponi sarnaqsna, ukat jaqe masisarus yaqhacharaksna ukhajj janiw walïkaspati. Antisas Jesusat yateqasisin amuyumpi sarnaqañäni, ukat Jehová Diosarus kusisit chuymampi loqtarakiñäni (1 Tim. 1:11, NM).

LLAKINAKAMPI JAN AYNACHTʼAÑATAKEJJ AMUYASIPJJAÑÄNI

14. ¿Llakinakan uñjasisajj kuna toqetsa amuyasiñasa, ukat kunatsa?

¹⁴ Kunjamtï uñjawayktanjja, Jesusajj wali jachʼa llakinakan uñjasisaw “jan ikipjjamti” sasajj arkirinakapar säna (Marcos 14:37 liytʼasiñapawa). Jïsa, kunapachatï jan walinakan uñjasktan ukhaw Jesusan arunakapajj wal yanaptʼistaspa. Ukampis llakinakan uñjasisajj waljaniw aka wakiskir arunakat armasipjje. Proverbios libronjja akham sasaw pay kuti amtayistu: “Jaqen amuyatapatjja sarnaqäwinakapajja walikjamakiwa, ukampis tukuyapajja jiwañakiwa”  sasa (Pro. 14:12; 16:25). Ukhamasti, jan walinakat mistuñatakejj amuyusaruki atinissna ukhajja, jukʼampiw aynachtʼsna ukat jaqe masirus aynachtʼayaraksnawa.

15. ¿Qollqejj kunjamsa familiani jilatanakar pantjasiyaspa?

¹⁵ Familiani jilatanakat parltʼañäni. Kunjamtï Diosan Arupan qhanañchaskejja, familiataki trabajapjjañapawa (1 Tim. 5:8). Ukampis ¿kunas awisajj pasaspa? Inas maynejj suma trabajonakar mantasin kunatejj nayrankañapäki ukanak maysar apanukchispa. Sañäni, Diosar familiampi yupaychañasa, tantachäwinakar sarañasa ukat yatiyir sarañasa armatakëjjaspawa. Mä arunjja, familiataki irnaqañätwa sasaw maynejj Jehová Diosat jitheqtaspa. Ukar jan puriñatakejj kuntï Proverbios 3:5, 6 qellqatajj siski ukarjam sarnaqañasawa, ukanjja akham siwa: “Tatitur taqe chuymamampi katuyasim; juman chʼikhi kankañamarukejj jan alkatasimti. Taqe luräwinakamanjja Tatitutjja amtasipunim, ukatsti jupajj cheqa thakinjamwa irpaskätam” sasa.

16. 1) ¿Jesusajj khitin yatiñaparus atinisïna, ukat jiwasajj kunsa jupat yateqassna? 2) ¿Jan waltʼäwinakan uñjasisajj kunsa familiani cristianonakajj Jesusat yateqasipjjaspa?

¹⁶ Jesusat amtapjjañäni, jupajj wali yatiñani ukat jan pantjasir chʼikhi jaqëkchïnsa, janiw amuyuparukis ni chʼamaparukis atiniskänti. Supayan yantʼatajj akham sasaw walja kuti säna: “Diosan arupanjja qellqatawa” sasa (Mat. 4:4, 7, 10). Uka yantʼanakar saykatañatakejj alajjpachankir Awkiparuw atinisïna. Ukhamatwa altʼat chuymanïtapsa uñachtʼayäna. Ukampis Supayajj janiw akchʼas jupjamäkiti. Altʼat chuymanïñajj janiw jupatakejj kuna askïkisa. ¿Jiwasat kamsaraksnasa? ¿Taqe chuymat Jehová Diosar atinistanjja? Familiani cristianonakajj Jesusat yateqasisin amuyump taqe kun phoqapjjañapawa. Jan walinakan uñjasisajj Jehová Diosar atinisipjjañapawa. Cheqansa, waljaniw ukham sarnaqasipki. Jupanakatakejj Diosar loqtañaw nayranki, ukat kunatejj familiataki munaski ukanakampi phoqañsa janirakiw armasipkiti. Ukhamatwa familiar sum uñjapjje. Ukat ukarjamaw Jehová Diosajj yanaptʼaraki, kunjamtï Arupan siski ukhama (Mat. 6:33).

17. ¿Kunatsa sapa maynis Jesusjam amuyumpi sarnaqañ muntanjja?

¹⁷ Kunjamtï uñjawayktanjja, Jesusajj wali amuyumpipuniw sarnaqawayäna, janiw mä akchʼas ikjkänti. Ukat jiwasatejj jutïrin qhespiñ munstan ukhajja, jupat yateqasisin sarnaqañasawa. Amtapjjapuniñäni, kunayman toqetwa Supayajj ikjayañ munistu, Jehová Diosat jitheqtasin akapachan qʼal thayarsna ukwa muni (1 Tes. 5:6). Ukampis Supayar jan kusisiyañatakejj wali amuyumpi sarnaqañasawa, kunjamtï Jesusajj wali pʼarjjtata sarnaqkäna ukhama. Diosar taqe chuym mayisiñsa, jaqenakar sum yatiyañsa ukat jan walinakan Jehová Diosar atinisiñsa janipuniw armañasäkiti. Ukhamatwa aka qhep qhepa jan wali urunakansa wali kusisita jakasiñäni. Ukat Jesusajj akapachar tukjir jutani ukürkam wali amuyumpi sarnaqaskakiñäni, mä arunjja, jan tiemponi loqtaskir katjistani ukhajja, wali kusisiñampiw Jehová Diosajj walja bendicionanak churistani (Apo. 16:15).

[Jiskt’anaka]

[6 janan fotopa]

Mä phuju jakʼanwa Jesusajj Diosan arunakapat yatiyaski, ¿kunsa jiwasajj yateqassna?

[7 janan fotopa]

Familiar ajay toqet yanaptʼasajj wali amuyumpi sarnaqataswa uñachtʼaytanjja