Natán cheqa yupaychäwit arjjatasiri

Wali munañani ukat chʼamani mä jaqeru, pantjasitapa ukat jan wal sarnaqatap amuyasiñapataki ewjjtʼañajj chʼamakiwa. ¿Uka kasta mä jaqejj juchap imtʼasiñataki mä suma jaqer jiwayaspa ukhajja, ukanak yatkasin uka jaqer ewjjtʼir sarasmati?

David reyejj Betsabé (Bat-seba) sat warmimpiw wachoqa juchar purtʼasïna, ukhamatwa wawan uñjasiyäna. Juchap imtʼasiñatakejja chachaparuw jiwayayäna, ukat uka warmimpiw jaqechasjjäna. Walja phajjsinakaw janis kunas paskaspa ukham sarnaqaskäna, ukat reyjamajj lurañanakapamp phoqaskakïnwa. Ukampis Diosajj uka jucha luratapjja janiw ukhamak uñchʼukkänti, ukatwa Natán profetaparojj cheqañchañapatak khitäna.

Jumatejj Natán profetasamäna ukhajja, ¿uka mayitampi phoqañajj facilakïsapänti? Janiwa. Ukampis Jehová Diosar taqe chuyma servitapata ukat kamachinakap phoqañ munatap laykuw Natanajj Davitar juchañchir saräna. ¿Kunjamsa uka mayitamp phoqpachäna, ukat reyin arepentisiñapatakis kunsa lurpachäna?

WALI AMUYTʼASIRÏNWA

2 Samuel 12:1-25 qellqat liytʼañamajj wali askïniwa. Liytʼkasajj jumas Natán profetäkasma ukat Davitarus akham parljjaykasma ukham amuytʼañäni: “Mä markan pani jaqew utjäna. Maynejj qamirïnwa, maynisti pobreraki. Qamiristi walja ovejanakani ukhamaraki walja vacanakanïnwa, ukampisa pobrenjja mä sapa jiskʼa alat ovejapakiw utjäna. Jupa kipkaw uka jiskʼa ovej-jja uywasïna, jupampi chikaw jilsurakïna ukhamaraki wawanakapampi chikaraki; pachpa manqʼapwa manqʼarakïna, umañapatwa umasirakïna, jupampi chikaw ikisirakirïna.  Uka jaqesti jiskʼa ovejaparojj mä imill wawaparjamarakiw munasïna. Mä uruw mä thaki sarir jaqejj uka qamiri jaqeru sartʼarakïna. Ukampisa qamirejj sartʼiripatakejj janiw ovejapatsa ni vacapatsa kharstʼañ munkänti, jan ukasti pobre jaqen ukar sarasinjja uka jiskʼa ovejapwa aparanïna ukat kharsuraki sartʼiriparu churañatakejja” sasa (2 Sam. 12:1-4).

Niyakejjay David reyejj uwij awatirïchïnjja, kuntï Natanajj siskäna ukajj cheqäpachaw sasaw amuyäna. Qollan Qellqatanakat yatjjatiri mä jaqejj akham sänwa: “Natán chachajj inas jan arjjatirin uñjasipki ukanakar yanaptʼañatakejj Davitan ukar nayratpach saririchïna, ukatwa Davitajj yanaptʼa mayiriw jutarakikpacha sasin amuypachäna” sasa. Ukhamäkchïnsa, Natanajj Jehová Diosar taqe chuyma servitapa ukat jan ajjsarirïtapwa uñachtʼayäna. “¡Diosan sutipjjaruw arsta, kawkïri jaqetejj uk lurki ukajj jiwañapawa!” sasaw Davitajj säna. Ukatwa chuymar purtʼkir arunakamp Natanajj akham sasin juchañchäna: “¡Jumätaw uka jaqejja!” sasa (2 Sam. 12:5-7).

Amuytʼañäni, ¿kunatsa Natán chachajj ukham sasin parljjayañ qalltpachäna? Cheqas kunapachatï maynir munasiñajj utjki ukhajja jucha uñtʼasiñajj chʼamakïspawa. Ukat pantjasktan ukhajj jankʼakiw kunatsa ukham lurtan uk arsusiñ yattanjja, jan ukajj pantjaskasas walikïskiw sasaw saraktanjja. Ukatwa kuntï lurkäna ukajj jan walïtap David pachpa amuyasiñapatak Natanajj yanaptʼäna. Pachpa David reyiw qamir jaqen luratapar jan walit uñjäna. Uk amuyasaw Natanajj jumätaw uka jaqejja sasin Davitar qhan sarakïna. Ukhamatwa David reyejj kuntï lurkäna ukajj jachʼa juchätapa ukat cheqañchatäñap wakisitapsa amuyasjjarakïna. Ukat ukham luratajjampejj Jehová Diosan chuymap ustʼaypachäta, juchañchatäñajajj wakisiwa sasaw sisjjarakïna (2 Sam. 12:9-14; Sal. 51).

Ukhamasti Bibliat yatichkasajj yateqerin chuymapar purtʼañataki, ukat jupa pachpa amuyasiñapataki yanaptʼañaw wakisispa, ukwa aka qellqatajj yatichistu. Natán profetajj David reyirojj respetänwa. Ukat Davitajj kunatï cheqäki uk munirïtapjja yatirakïnwa, ukatwa qamir jaqet parlasin amuytʼayäna. Jichhürunakanjja suma chuyman jaqenakajj kunatï cheqapäki uk munapjjarakiwa, ukhamasti ukaw kunsa Jehová Diosajj amuyi uk amuytʼapjjañapatakejj jaqenakar yanaptʼarakispa. Ukampis janiw wali qʼomäksnas ukat Jehová Diosarojj wali sumsa yupaychksna ukham tukuñasäkiti, jiwasajj kunatejj walïki ukat jan walïkaraki ukjja janiw amuyusarjamakejj amtktanti, jan ukasti, Bibliarjamaw kuns lurtanjja.

Taqe kunat sipansa, Natanatakejj Jehová Diosar taqe chuyma istʼañaw nayrankäna, ukatwa rey Davitamp jan ajjsartʼas parlir saräna (2 Sam. 12:1). Ukham istʼasirïñaw Jehová Diosan cheqa yatichäwinakap arjjatañatak yanaptʼarakistani.

CHEQA YUPAYCHÄWIT ARJJATASIRÏNWA

Amuyatajj Natanampi Davitampejj wali suma amigopjjänwa, kunattejj Natán sasaw mä wawaparojj sutiyäna (1 Cró. 3:1, 5). Natán sutejj Biblian nayraqat uñstki ukhajj Davitampïskatapwa uñachtʼayi. Cheqas panpachaniw Jehová Diosar wal munasipjjäna. David reyisti Jehová Diosatak mä templo lurañ munta sasaw Natanar yatiyäna, ukhamatwa jupar confiasitap uñachtʼayäna. Davitasti sänwa: “‘Nayajj mä suma cedro palacion jakastjja, Diosan arcapasti mä cortinanak manqhanakwa jikjjatasi’ sasa. Natán profetasti sarakïnwa: ‘Kuntejj amtktas taqe ukanakjja luramaya, [Jehová] Tatitusti jumampïskarakiwa’ sasa” (2 Sam. 7:2, 3).

Niyakejjay Natanajj Jehová Diosar taqe chuyma yupaychchïnjja, Davitajj cheqa yupaychäwitak templo luraña amtkäna ukhajja, Natanajj wal kusisïna ukat yanaptʼañatakiw amtarakïna. Amuyatajja, Jehová Diosajj kunsa amuyi uk arsuñat sipansa, Natanajj amuyupakwa arspachäna, kunattejj uka arumpachaw Diosajj mä yatiyaw reyir yatiyaniñapatak khitäna; janiw Davitajj templo lurañapäkänti, jan ukasti wawanakapat mayniw lurañapäna. ‘Tronomajj wiñayataki uttʼayatäñapatakejja’, Jehová Diosaw mä arustʼäwir jumampi manti sasaw Diosan mayitaparjam Natanajj Davitar yatiyaniñapäna (2 Sam. 7:4-16).

Kunjamtï amuyaskejja, templo lurañ toqet Natanajj kuntï qalltan Davitar siskäna ukajj janiw Diosan munañaparjamakänti. Ukampis uka profetajj wali altʼat chuymanïnwa ukatwa Jehová Diosan amtap phoqasiñapatakejj taqe chuyma yanaptʼarakïna. Pantjasitanakasat Diosajj cheqañchistani ukhajja, Natán profetat yateqasiñäni. Jupajj qhepakamaw  profetjam irnaqtʼaskäna, ukhamatwa Diosatakjam sum sarnaqaskakitap amuytanjja. Jehová Diosan templopan toctʼapjjañapatakejj 4.000 musiconakaruw Davitajj apnaqäna, ukat jupar yanaptʼapjjañapatakejj Gad ukat Natán profetanakaruw Diosajj qollan ajayupamp amuytʼayäna (1 Cró. 23:1-5; 2 Cró. 29:25).

KHITIS REYÏÑAPA UK SUM AMUYÄNA

Davitjjarojja, Salomón wawapaw reyïñapäna uksti Natanajj sum yatïna. Ukat Davitan jiwañapajj jakʼankjjäna ukhajja, Adoniasaw reyit qontʼasiñ munäna, ukatsti Natanajj jankʼakiw kun lurañas wakisispa uk amtäna. Kunjamtï lurirïkänjja ukhamarakiw wali amuyumpi ukat taqe chuyma lurarakïna. Nayraqatjja Salomón wawajaw nayjjarojj reyïni siskäna uk Davitar amtayaniñapatakiw Betsabé warmir arjjayäna. Ukat jupa pachpaw rey Davitan ukar sarasin cheqapunit Adoniasajj juma lanti reyëjjani sasin jisktʼäna. Kunatï paskäna uk amuyasajja, chuymankipstat Davitajj Natanaru ukat mayni servirinakapampiruw Salomonar reyit uttʼayapjjañapatak khitäna, ukhamat Adoniasan jan wali amtapajj jan phoqasiñapataki (1 Rey. 1:5-53).

ALTʼAT CHUYMAN QELLQERÏNWA

Natán ukat Gad profetanakaw 1 Samuel librot 25 jaljat 31 jaljakama ukat 2 Samuel libromp qellqapjje sasaw amuyasi. Uka libronakajj Diosan amuytʼayat qellqatawa, ukanakat Bibliajj akham sasaw qhanañchi: ‘David reyin sarnaqäwipasti, qalltata tukuykamajja, Samuel profetan qellqatapana, ukat Natán profetana ukhamarak Gad profetan qellqatanakapan jikjjatasi’ sasa (1 Cró. 29:29, NM). Ukat “Salomonan [...] sarnaqäwipatsa”, mä cheqajj Natán profetan qellqatarakiwa (2 Cró. 9:29). Ukhamajj Davitan jiwjjatapat reyin utapan irnaqtʼaskakpachänwa.

Kuntï Natán profetat yatktan ukanakatjja, jila partejj inas jupan qellqatächi. Ukampis yaqhep cheqanakjja janiw taqpach qhanañchkiti. Ukhamasti Natán sat qellqer profetajj janiw wali aytat jaqer tukuñ munkänti. Bibliat parlir mä diccionarionjja, janiw nasïwipatsa ni familiapatsa Qollan Qellqatan qhanañchaskiti sarakiwa. Ukat janirakiw kunjamas jakasïna uk yatkaraktanti.

JEHOVÁ DIOSAR TAQE CHUYMA CONFIASITAPAW YANAPTʼÄNA

Biblianjja Natán profetat mä jukʼak qhanañchi, ukampisa wali altʼat chuymanïtapa ukat Diosan amtap phoqasiñapatakis taqe chuyma yanaptʼatapaw qhan amuyasi, ukat Jehová Diosajj wali suma luräwinak churarakïna. Natán profetajj Jehová Diosaruw taqe chuyma servïna ukat kamachinakaparus taqe chuymarakiw istʼäna, ukanakat yateqasiñatak chʼamachasiñasawa.

Jichhürunakanjja, janiw wachoq jucha lurir mä reyir ewjjtʼir sarañasasa ukat munañaparuk marka apnaqañ munapki ukanakan amtap saytʼayañasas wakiskpachäniti. Ukampisa Jehová Diosan yanaptʼapampejj taqe chuymaw jan jitheqtas Jupar yupaychsna ukat aruparjamas phoqaraksna. Ukhamarakiw kunatï cheqäki uk yaticharaksna, ukat cheqa yupaychäwsa jan ajjsartʼas wali amuyump arjjataraksna.

[25 janan fotopa]

Khitis reyjam apnaqañapa uk sum yatisaw Natán profetajj Betsabé warmir wali amuyump arjjayäna