¿Kunanakas imatäski?

“Taqeniw uñtanipjjetäna”

Diosan arunakap sapürunjam yatiyir Charlotte White sat kullakajj Louisville (Kentucky, Estados Unidos) markar purkäna ukhajja, llantanakan maletampi sarir uñjasajja jaqenakajj wal muspharapjjäna.

KHÄ 1908 maran “auroramóvil” sat maletampi White sat kullakajj uka markar purkäna ukhajja, jaqenakajj wal uñchʼukipjjäna. Ukatwa kullakajj akham cuentʼarakïna: “Taqe jaqenakaw wal parlakipapjjäna, ukat nayarus taqeniw uñtanipjjetäna” sasa.

Uka tiemponjja, Jehová Diosan Qhanañchirinakapajj Bibliat Yatjjatirinaka satäpjjänwa, ukat Bibliat sum yatjjatasajj cheqa yatichäwinak jaqenakar yatiyaniñasaw wakisi sasaw amuyapjjäna. Uka tiempon waljaniw La Aurora del Milenio sat libronakampejj Bibliat sum yatjjatapjjäna. Viajiñ munapki ukat puedepki ukanakakiw jachʼa, jan ukajj jiskʼa markanakar sarapjjerïna, ukhamat “Bibliat Yatjjatirinakatak yanaptʼa”, mä arunjja, La Aurora del Milenio sat libronak wal yatjjatañ munapki ukanakar churapjjerïna.

Khä 1908 maranjja, White kullakampi ukat mayni jilat kullakanakampejj taqe chuymaw Diosan Reinopat La Aurora del Milenio sat librompejj yatiyapjjerïna, uka qellqatajj telampi suma lurtʼat sojjta libror jaljatänwa, ukat 1,65 dólar qollqerukiw uka tiempon aljasïna. Yatiykasajj janiw uka ratpach churapjjerïkänti, jan ukasti, khitinakas munapjje uk anottʼasisajj yaqhöruw apapjjerïna, jila partejj kunürutï jaqenakajj pago apsupjjerïkäna uküruw apapjjerïna. Ukat Diosan markap contra saytʼir mä jaqes jukʼa qollqekwa uka libronakat jaqenakajj churapjje sasaw quejasirïna.

Malinda Keefer kullakajja, 200 jan ukajj 300 libronak kunwa mä semanan mayipjjerïtu sasaw sirïna.  Waljaniw uka libronak munapjjäna, ukampis mä llakiw utjäna. Amuytʼañäni, uka sojjta libronakat qhep apsuski uka librokiw 740 jananakanïnjja. Ukat The Watch Tower sat revistansa, 50 libronakakiw 18 kilonakäjje, ukhamajj uka libronak apañajj “chʼama qariñawa”, jukʼampis kullakanakatakiw jathejja sasaw qhanañchasïna.

Uka sojjta libronak jaytañajj jan chʼamäñapatakejja, James Cole sat jilataw llantanakan mä jiskʼa armazón lurañ amtatayna, ukasti tornillonakamp maletar apkatañatakïnwa. Ukat maleta qʼepiñajj jan wakisjjepanjja, James jilatajj akham sänwa: “¡Jichhajj janiw jikhan pʼakjasjjäti!” sasa. Llantanakan maletajj Cincinnati (Ohio, Estados Unidos) markanwa 1908 maran Bibliat Yatjjatirinakan jachʼa tantachäwipan uñachtʼayasjjäna, ukat tantachasirinakas wal kusisipjjarakïna. Uka maletan La Aurora del Milenio sat libronakakiw jila partejj apnaqasïna, ukatwa ladonakankir tornillonakan Inglés arut Dawn-Mobile (auroramóvil) sasin qellqkatatänjja. Tiempompejj libronakan phoqtʼat maleta apnaqañajj janiw chʼamäjjänti, ukat mä amparampikiw apjjapjjäna. Sapa mayniw qawqchʼsa munani ukarjam jithitatayasapäna, ukhamarus uka maletajj jan asfaltat thaknäms sarakisapänwa. Diosan arunakap yatiyañ tukuyatarojja, goma llantanakap mä lador apkatawayjjasaw kayukisa, jan ukajj autotsa (tranvía) sarjjapjjerïna.

Diosan arunakap sapürunjam yatiyir kullakanakajj gratisakiw uka maletanak katoqapjjäna. Mayni jilat kullakanakajj 2,50 dólar qollqeruw katoqapjjerïna. Aka foton uñstir Keefer sat kullakajja, auroramóvil sat llantanakan maletap apnaqañ sum yatjjäna, ukatwa mä amparampik apasinjja, maysarojj libronakan phoqtʼat carterap aparakirïnjja. Minanakani Pensilvania sat markan walja jaqenakaw Bibliat yatjjatañ munasajj libronak mayipjjerïna, ukatwa libronak jaytañ urojj phoqachañkam kimsa jan ukajj pusi kuti libronak aptir kutʼapjjerïna, ukatakejj Allegheny sat puentnämwa viajapjjerïna.

Jichha tiempon viajañatak apnaqaski uka llantan maletanakjja, 1987 maranwa avionanak apnaqeri mä jaqejj uñstayäna. Ukampis 1908 maran niyaw Jehová Diosan servirinakapajj llantanakan maletanakapampejj Diosan arunakap yatiyjjapjjäna, ukat taqenirakiw uk uñjapjjäna.

[32 janan qhanañchäwipa]

Libronak jaytañ urojja, Keefer sat kullakajj kimsa jan ukajj pusi kutiw libronak aptir mä puentnäm kuttʼirïna

[32 janan qhanañchäwipa]

“Libronak jaytañajja janiw chʼamäjjänti”