Aka revista liytʼirinakan jisktʼäwinakapa

¿Pornografía sat qʼañu luräwinak uñchʼukiñajj sinti jan walipunïpachati? ¿Ukanak uñchʼukirejj tamat jaqsuyasispati?

▪ Jïsa, uka qʼañunak uñchʼukiñajj janipuniw akchʼas walïkiti, tamatsa jaqsutaw uñjassna. Ukhamajj janiw uka kasta videonaksa, peliculanaksa, revistanaksa munañasäkiti, wal amuyasiñasawa. Ukat Internetar mantasas wal amuyasiñasarakiwa.

Taqe cheqanwa uka qʼañunakajj utji. Maynejj Internetar mantasin kawkinsa ukanak uñjakispawa. Waljaniw jilïrinakatsa wayn tawaqonakatsa uka jan walin qʼañuchatajj uñjasipjje. Yaqhepajj jan munkasaw uka kasta fotonakampis jan ukajj videonakampis mä akatjamat jikintasipjje. Ukampis yaqhepajj amanut jan ukajj yatkasaw ukanak thaqapjjaraki. Jan khitin uñjkataw utansa, pachpa trabajonsa jan ukajj yaqha cheqanakansa ukanak munapayapjje. ¿Kunatsa jiwasan wal amuyasiñasajj wakispacha?

Mä kutejj akham sasaw Jesusajj säna: “Khititejj mä warmirojj munapayañataki uñtejja, niyaw chuymapanjja jupampi wachoqa juchjja lurjje” sasa (Mat. 5:28). Chiqas chacha warmjam munasiñajj walikïskiwa, ukampis casaratanakataki yaqhachatawa (Pro. 5:15-19; 1 Cor. 7:2-5). Ukampis pornografía sasin uñtʼat qʼañu luräwinakajj jan wali amuyunakwa chuymar apantistaspa. Ukat khititejj uka jan walinak uñchʼukki ukajja, Diosan kamachinakapwa pʼakintaski. Biblianjja akham sasaw qhan amtayistu: “Aka uraqin jucha lurañanakajj jumanakan [...] jan utjkjjpanti: jan khitis yaqhampi wachuqa juchan sarnaqpati, janirak qʼañu luräwinaksa lurpati, janirak jañchipan munañanakapsa, ni jan wali amtatanakapsa lurpati, janirak michʼäpasa (ukasti idolonakarus yupaychksna ukhamarakikiwa)” sasa (Col. 3:5).

 Ukat mä cristianojj mä kuti jan ukajj pä kutiki uñjaspa ukhajja, ¿kunas kamachaspa? Asaf chachar uñtataw jan walin uñjasispa. Jupajj akham sänwa: “Nayasti, mä jukʼampïsapänjja, tinkuriskäyätwa, kayunakajjajj niyapuniw lIustʼäna” sasa. Jïsa, khititejj jan isin warminak jan ukajj jan isin chachanak ukat jan phinqʼani chacha warminak uñjki ukhajja, janiw Dios nayraqatan qʼoma chuymanïkaspati ni Jupampis sum apaskaspati. Jan ukasti, Asaf chachjamaw tʼaqhesispa, jupajj akham sänwa: “Jan inaktʼasaw nuwat uñjasta, sapa willjtaw tʼaqhesiyat uñjasirakta” sasa (Sal. 73:2, 14).

Ukat maynitï tama taypin uka juchar purtʼaschi ukhajja amuytatasisin yanapa jankʼaki thaqtañapawa. “Mayniru jucharu tinkut jikjjatapjjsta ukajja, jumanakajj Diosankirinakjamajj yanaptʼapjjañamaw jupan saytʼasiñapatakejja. Uksti llampʼu chuymampi lurapjjañamawa, taqi amuyumpi” sasaw Bibliajj irpir chuymaninakar amtayi (Gál. 6:1). Jïsa, mayni jan ukajj pani irpir chuymaninakaw juchanirojj yanaptʼapjjañapa ukat jupamp chika Diosat mayisipjjañaparakiwa, ukhamatwa pantjasirejj perdón jikjjataspa (Sant. 5:13-15). Khitinakatejj uka qʼañunak maysar apanukuñataki yanaptʼayasipki ukanakajja Asaf chachjamaw akham sapjjaraki: “Nayasti Diosaruw jakʼachasi, ukaw nayarojj kusisiyitu” sasa (Sal. 73:28).

Ukampis yaqhepajj janiw “wachuqa juchan sarnaqañanaksa, ni yaqha juchanaksa, ni qʼañu lurañanaks” jaytapkiti sasaw Pablojj säna (2 Cor. 12:21). * “Qʼañu luräwinaka” sasin jaqukipatäki uka griego arojja, “ajjtaskañ sinti qʼañu sañ muni” sasaw Marvin R. Vincent yatjjatʼat jaqejj qhanañchi. Cheqansa, pornografía sat qʼañu luräwinakatjja yaqhepajj sinti jan walipuniwa. Janiw qʼara chichi jaqenakaki uñachtʼayapkiti. Jan ukasti, chacha pura jan ukajj warmi pura wachuq juch luraskir wali khuchi jaqenakwa uñachtʼayapjje. Walja chachanak warminakaw uka qʼañunak mä cheqan tantachasisin lurapjje, uywanakampi lurañsa janiw ajjsarapkiti, wawanakar kunaw ukham jan walinak lurayapjje, warminakar usuchjañsa janiw akchʼas ajsarapkiti ukat waljaniw maynirus sarjjatapjje, ukham sinti jan walinakwa uñachtʼayapjje. Kunjamtï Pablojj siskejja, “amuyunakapasti chʼamaktʼatawa, [...] ukatsti kunayman qʼañu luräwinakaruw katuyasipjje, ukanaksti jan ajjsarasaw lurapjjaraki” (Efe. 4:18, 19).

Ukat Gálatas 5:19 qellqatanjja, may kutimpiw Pablojj “qʼañu lurañanaka” sasajj qillqatayna. Ukampis uka arunakajja, “kunatï walïki uka contra jan walinak luraña sañ muni” sasaw Biblia tuqit yatjjattʼat mä jaqejj qhanañchi. Jïsa, cristianonakajj ukham amuyaraktanjja, aka alayan parlktan uka jan walinakatjja ajjtasiñasawa, janipuniw akchʼas munañasäkiti. Khitinakatejj uka jan walinakan sarnaqapki ukanakajja janiw Diosan Reinopan katuqatäpkaniti sasaw Pablojj Gálatas 5:19-21 qillqatan amtayistu. Ukhamajj mä cristianotï uka ajjtaskañ jan walinakar yatinuqtaspa jan ukajj kutin kutini walja tiempo uñchʼukiskaspa ukhajja, ¿kunas kamachaspa? Jan arrepintiskaspa ukat jan jaytañ munkaspa ukhajja, tamat jaqsutaw uñjasispa, cristian tamajj qʼomäñapawa, janirakiw qollan ajayurus llakisiyañ munktanti (1 Cor. 5:5, 11).

Yaqhep cristianonakajj uka jan walinakaruw awisajj yatintapjje. Ukampis amuytatasisaw irpir chuymaninakampi yanaptʼayasipjje, ukat jan mayampi uñtjjañatakiw wal chʼamachasipjje. Amtañäni, akham sasaw Jesusajj Sardis tamankir jilat kullakanakar amtayäna: “Chʼamañchtʼarakim kunanakatejj utjaski ukanakarojja, niya jiwarirjamäkchi ukasa. [...] Amtasimay kuna yatichäwtï katoqkta ukjja, ukarjamaraki arkam, ukatsti arrepientisirakim. Janitejj pʼarjjtaskätajja, jan amtat horasaruw mä lunthatjama akatjamat jutä” (Apo. 3:2, 3). Ukhamasti, pornografía sat qʼañu luräwinakan ‘ninapat’ qhespiñasawa, qʼañuchastan ukhajj arrepintisiñasawa (Jud. 22, 23).

Ukatjja sapa mayniw wal amuyasiñasa, janipuniw pornografía sat jan wali qʼañu luräwinakampi qʼañuchasiñ munktanti. Wali jayat amuyasiñasawa.

[Qhanañchäwi]

[30 janan qhanañchäwipa]

Mä cristianotï uka juchar purtʼaschi ukhajja, amuytatasisin yanapa thaqtañapawa