Diosan arunakapat yatiyapjjapuniñäni

“Tatitun arunakap [...] parlapunim.” (2 TIM. 4:2.)

¿QHANAÑCHTʼANISMATI?

¿Nayra cristianonakajj kunatsa taqe amuyump yatiyapjjpachäna?

¿Jaqenakar taqe amuyump yatiyir sarañatakejj kunanakas yanaptʼistaspa?

¿Kunatsa Diosan Reinopat yatiyañajj wakisipuni?

1, 2. ‘Diosan arunakap parlapunim’ siski uka arunakarjamajja, ¿kuna jisktʼanakas utji?

 JAN waltʼäwin uñjasir jaqenakar qhespiyasaw yaqhepajj irnaqapjje. Kuna chijir puriñas utji ukhajja jankʼakiw yanaptʼapjje. Sañäni, kunapachatï mä utajj nakhantaski ukhajja, jankʼakiw bomberonakajj yanaptʼañatakejj jalapjje. ¿Kunatsa? Janiw khitin jiwañapsa munapkiti.

² Jehová Diosan Qhanañchirinakapajj ukhamarakiw jaqenakar yanaptʼtanjja, jiwañat qhespipjjaspa ukwa muntanjja. Ukatwa Reino toqet suma yatiyäwinakjja taqe chuyma ukat jankʼaki yatiytanjja. Ukampis janirakiw yatiyañ laykukejj wal apurasktanti. Ukhamajj “Tatitun arunakap [...] parlapunim” sasajja, kuna toqetsa apóstol Pablojj parlaskäna uk amuytʼañäni (2 Tim. 4:2). Uka arunakarjamajj ¿kunjamsa phoqsna? ¿Kunatsa taqe amuyumpi yatiyir sarañasajj wakisi? Ukanak uñjarakiñäni.

¿KUNATSA DIOSAN ARUNAKAPAT YATIYAÑAJJ WAKISIPUNI?

3. ¿Diosan arunakapat yatiyasajj kunsa jikjjatsna?

³ Diosan suma arunakapat yatiyasaw jaqenakar qhespiñ yanaptʼsna, ukatwa jankʼak yatiyañ muntanjja (Rom. 10:13, 14). Jehová Diosajj akham siwa: ‘Nayatejj mä qhoru jaqeru jiwañapataki juchañchäjja, ukat uka jaqejj juchapa apanukuni, askiru, cheqaparu taqe kunsa lurarakini, ukhajja, janiw jiwkarakiniti. Ukat janirakiw mayampsa jucha luratanakapat amtaskjjaniti’ sasa (Eze. 33:14-16). Ukat Diosan Reinopat yatiyirinakarojj akham sasaw Bibliajj amtayi: “Jumapachpaw qhespiyasïta, ukhamarak khitinakatejj jumar istʼapktam ukanakarus qhespiyarakïtawa” sasa (1 Tim. 4:16; Eze. 3:17-21).

4. Diosan markap contra saytʼir kʼari yatichirinakat amuyasiñatakejja, ¿kun lurañas Pablon arunakaparjamajj wakisïna?

⁴ Kunatsa Pablojj Timoteor ‘Diosan arunakap parlapunim’  sasajj sispachäna uk amuytʼañatakejja, kuna toqetsa parlaskäna uk uñjañäni, akham sänwa: “Tatitun arunakap parlam; wakiski ukkhasa, jan wakiski ukkhas parlapunim. Amuytʼayam, ewjjtʼarakim, iwjjanaks churarakim, taqe llampʼu chuymampi yatichasa. Niya purininiwa kunapachatejj jaqenakajj jan aski yatichäwinak katoqañ munapkani uka urunakajja; ukampis jupanakan munañanakaparjamakiw walja yatichirinak thaqapjjani, kunjämtejj jupanakajj yatichayasiñ munapjje uk istʼañatakiki. Cheqa arunakatakejj mayswa uñtapjjani” sasa (2 Tim. 4:2-4). Ukat Diosan markap contra saytʼir jaqenakaw utjani sasaw Jesusajj sarakitayna (Mat. 13:24, 25, 38). Ukhamasti, kʼari yatichäwinakamp jan sallqjayasipjjañapatakiw Timoteojj jilat kullakanakar jankʼaki Diosan ‘arunakap parlañapäna’. Jan yanaptʼkaspäna ukhajja, jiwañaruw puripjjaspäna. ¿Jichhürunakat kamsaraksnasa?

5, 6. ¿Jaqenakajj kunanakaks istʼañ munapjje?

⁵ Jehová Diosan arunakap jiskʼachiri amuyunakajj taqe cheqanwa utji (2 Tes. 2:3, 8). Kuntï jaqenakajj istʼañ munapki ukanakakiw kawkins yatichasiski. Sañäni, jaqejj monot jutatätanwa sasaw wal parlapjje. Ciencia toqet parlkasas ukham sapkchejja, pachpa iglesianakanwa ukajj yatichasiraki. Ukat jaqenakajj Diosatsa jaqe masipatsa mayj amuyjjapjje. Maysa toqetjja, Diosajj janiw jiwasat amtasjjeti, ukhamajj Jupat armasjjañasarakiwa sasaw yatichapjjaraki. Ukampis ¿kunatsa millón millón jaqenakajj ajay toqet ikjayir uka kʼari yatichäwinak istʼapjjpacha? Ukham parlir istʼasaw “Janiw khitis cuenta maykistaniti” sasajj munañapar sarnaqapjje. Ukatwa uka arunakarojj sum istʼapjje. (Salmo 10:4 liytʼasiñapawa).

⁶ Jïsa, kunatï jupanakatak askïki ukakwa jaqenakajj istʼañ munapjje. Amuytʼaskakiñäni, ¿kuna amtanis iglesianakar sarapjje? Aka arunakwa istʼañ munapjje: “Kunsay luraskañäni, Diosajj taqeniruw munasistu” sasa. Cheqansa, iglesian pʼeqtʼir tatakuranakasa, pastoranakasa, kuntï jaqenakajj istʼañ munapki ukakwa yatichapjje. Akham sasaw sapjje: “Misanakarusa, tantachäwinakarusa ukat fiestanakarusa sarañamawa, ukhamatwa Diosajj bendicïtam” sasa. Ukampis taqe uka yatichäwinakan jan walir apirïtapjja, iglesiar saririnakajj janiw akchʼas amuyasipkiti, ikisipkiwa (Sal. 115:4-8). Ukhamasti, jupanakan ajay toqet sartapjjañapatakejj jiwasaw yanaptʼañasa, mä arunjja, Biblian cheqa yatichäwinakap yatichañasawa. Ukhamatwa Diosan Reinopatsa bendicionanak katoqapjjaspa.

KUNJAM YATIYAÑASASA

7. ¿Kunjamatsa jaqenakar taqe amuyumpi yatiysna?

⁷ Sum operañ yatir mä doctorajja wali amuyumpiw usutarojj operi, jan amuyumpi operkaspa ukhajja, jukʼampiw usuchjaspa, inas jiwayjjakchispa. Jaqenakar yatiyirejj ukhamarakiw taqe amuyumpi sarañasa. ¿Kunjams uk lursna? Kuna toqenakatsa yatiyañäni, kuns jisktʼañäni jan ukajj kunsa yatiñ munapjjaspa taqe ukanak sum amuyañasawa. Ukat kuna horanakas jaqenakajj tiemponïpjjaspa ukarjamaw tiempsa apstʼasiraksna (Rom. 1:15, 16; 1 Tim. 4:16).

8. ¿Kunas jiwasatakejj nayranki ukat kun amuytʼañas askïspa?

⁸ Diosan arunakap yatiyañajj jiwasatak wali askïchi ukhajja, ukarjamaw kun lurañs amttanjja (Génesis 19:15 liytʼasiñapawa). Amuytʼañäni, doctoramp uñjayasir maynejj saraspa ukat doctorajj akham saspa: “Aka usumatjja jankʼakiw qollayasiñama. Mä phajjsit jan kuns lurkäta ukhajja, jukʼampiw usuntäta” sasa. ¿Uk istʼasinjja uka ratpachat maynejj hospitalat wal jalsuwayaspa? Janiwa. Janiw nina jiwarayir bomberonakjam mäki jalsuwaykaspati. Jan ukasti, kuntï doctorajj iwjjtʼkani ukjja wali amuyumpiw istʼaspa, ukat utar purisajja, kuns nayraqat lurani ukwa sum amuytʼasispa.

9. ¿Éfeso markanjja, Pablojj taqe amuyumpiw yatiyäna sasinjja kunatsa sissna?

⁹ Pablojj ukham amuytʼasir jaqënwa. Asia toqer sarasajj wali amuyumpiw Diosan arunakapat  nayajj yatiyta sasaw Éfeso markankir irpir chuymaninakar säna (Hechos 20:18-21 liytʼasiñapawa). Amuyatajja, puris jan purisaw uka markankir jaqenakar utat uta yatiyir saräna. “Ukatsti sapürurakiw Pablojj Tirano jaqen utapan Diosan arunakap parläna” sasaw Bibliajj qhanañchi, pä maraw ukham parläna (Hech. 19:1, 8-10). Taqe amuyump yatiyatapajj luratanakapansa wali qhanaw amuyasïna. Ukat ¿jiwasat kamsaraksnasa? “Tatitun arunakap [...] parlapunim” siskistu uka arunakajj janiw jiwasar qariyañatakïkiti. Jan ukasti, uk phoqañajj wali askiwa.

10. Khä 1914 marat nayrajja, ¿kunatakis jilat kullakanakajj chʼamachasipjjäna, ukat kunatsa jupanakar yuspärañasa?

¹⁰ Khä 1914 marat nayrajja, Diosan arunakapat yatiyañatakiw Bibliat Yateqerinakajj wal chʼamachasipjjäna. Kunjam chuymampis yatiyir sarañasa ukjja qhanpun uñachtʼayapjjäna. Jupanakajj wali jukʼanikipkchïnsa, kunatsa taqe amuyump yatiyir sarañajj wakisi ukjja sum amuyapjjäna. Ukat wali kusisitaw yatiyapjjäna. Walja periodiconakaruw arstʼäwinaksa apsupjjäna. Ukat fotonaksa, videonaksa uñachayapjjarakïnwa, ukajj “Foto-Drama de la Creación” satänwa. Ukhamatwa, Diosan arunakapjja millón millón jaqenakar yatiyapjjäna. Jupanakatï yatiyañataki jan chʼamachasipkaspäna ukhajja, janiw jiwasas Diosar uñtʼkasänti (Salmo 119:60 liytʼasiñapawa).

¿KUNANAKAS AKAPACHAN IKJAYISTASPA?

11. ¿Kunatsa sum irnaqkasin qarjjasiñajj utjaspa?

¹¹ Kunatï akapachan utjki ukanakar chuym uchsna ukhajja, Diosan arunakap yatiyañajj janis añch wakiskaspa ukhamwa amuyjjsna. Supayan apnaqat akapachajja, kunatï jan askïki uk munañaruw apistaspa, amtanakassa maysaruw uñtayaspa (1 Ped. 5:8; 1 Juan 2:15-17). Ukaruw yaqhep jilat kullakanakajj purtʼasipjje. Qalltanjja, taqe chuymaw Jehová Diosar loqtapjje, ukampis qhepatjja qarjjapjjakiwa. Ukaw nayra tiempojj mä jilatar pasatayna, Demas satänwa. Mä tiemponjja apóstol Pablomp chikaw wal irnaqäna, ukampis qhepatjja, “aka oraqen yänakaparuw jukʼampi munjjäna”. Ukatsti, Pablojj yanap wal munkän ukhaw jaytanukutayna (File. 23, 24; 2 Tim. 4:10).

12. ¿Kun lurañas jichhürunakan waktʼistu, ukat kuns jutïrin katoqañäni?

¹² Jiwasatï taqe amuyumpi Diosan arunakap yatiyañ munstan ukhajja, janiw akapachan yänakapampi apayasiñasäkiti. Jan ukasti, ‘wiñay jakaña katoqañatakiw’ chʼamachasiñasa (1 Tim. 6:18, 19). Kunjamtï yatktanjja, wiñayan wiñayapatakiw mä suma Paraíso oraqen jakasiñäni, ukanjja kuntï munktan ukwa lurañäni. Ukampis jichhajja, Diosan jachʼa urupata jaqenakar qhespiñ yanaptʼañasawa, uk lurañajj janiw mayampis utjkaniti.

13. ¿Diosan arunakap taqe amuyumpi yatiyañatakejj kunas yanaptʼistaspa?

¹³ Jaqenakajj akapachan wal ikirtʼasipki, janiw ajay toqet sartirjamäpkiti. Ukhamajj kunjamatsa jupanakar sartaysna uk wal amuyañasawa. Amtañäni, Diosar janïr uñtʼkasajja, ukhamarakiw jiwasajj ikiskayätanjja. Janiw kuna suytʼäwis jiwasan utjkänti. Ukampis Jehová Diosat ukat Jesucristot yateqasaw kunatï cheqäki uk uñtʼawaytanjja. Jichhajja jaqenakar ikit sartayañajj jiwasaruw waktʼjjarakistu (Efesios 5:14 liytʼasiñapawa). Pablojj akham sänwa: “Sarnaqäwinakamanjja sum amuyasipjjam. Yatiñ kankañampi jakapjjam, janirak jan yatirinakjamajja. Jan tiempjja ina chʼusaru tukuyapjjamti, urunakajj jan walëjjatap layku” sasa (Efe. 5:15, 16). Ukhamajja, aka ñanqha pachanjja, ‘jan tiempjja ina chʼusaru tukuyapjjañäniti’, jan ukasti ajay toqet wal chʼamachasipjjañäni.

JAN WALI URUNAKAN JAKTANJJA

14-16. ¿Kunatsa jaqenakar ikit sartayañajj wali wakiskirejja?

¹⁴ Sinti jan wali urunakanpunwa jakjjtanjja. Kunanakatï Diosan arunakaparjamajj pasañapäki ukajja, 1914 marat aksaruw qhan phoqasiski. Ukhamajj jaqenakar taqe amuyumpi jan  ukajj jankʼaki yatiyir sarañasawa (Mat. 24:3-51). Janipuniw kunapachas ukham sinti jan walinakan uñjasirïktanti. Inamayakiw chʼaman markanakas sumankañäni sasajj kuna amtarus purisipki. Ukampis 2.000 bombanakaw mäki antutañatakejj uka markanakan wakichatäski. Ukat walja armamentonakaw ukhamak “chhaqharaskaraki” sasaw autoridadanakajj sapjjaraki. ¿Jaqe jiwarayir terroristanakat katusipkpacha? Uka toqet yatjjatatanakajja, akham sapjjewa: “Terroristanakatï uka bombanakampi chʼajjwañ qalltapjjaspa ukhajja, jan kunakiw jaqenakarojj tukjapjjaspa” sasa. Ukampis guerranakat sipansa, yaqha jan walinakaw utjaraki.

¹⁵ “Aka qhepa maranakanjja, tiempojj wali mayjapunëjjewa” sasaw 2009 maranjja mä qellqatajj qhanañchatayna (The Lancet ukat University College de Londres). Ukat akham sarakiwa: “Tiempon jan walëjjepansti, akat qhepa maranakarojj millón millón jaqenakaw jukʼamp jan walin uñjasipjjani, usunakasa wal yapjjattarakini” sasa. Jïsa, walja cheqanakanwa qotajj wal makataski, ukat yaqhep cheqanakansti umajj qʼal wañantjjaraki. Jallus mä qhawqha cheqanakwa wal purintjjaraki, ukat jachʼa thayanakasa, usunakasa ukhamarakiw sartaski. Ukat yänak jan utj-jjepansti chʼajjwäwinakakiw utjaski. Cheqansa, ukham sinti jan walinakaw jaqerojj suyaski.

¹⁶ Ukatjja, oraqpachan wali jachʼa chʼajjwäwinakaw utjaspa, ukhamatwa Biblian profecianakapajj phoqasiñ qalltaspa sasaw yaqhepajj amuyapjje. Ukampis kuna profecianakas phoqasiñapa ukjja janiw akchʼas amuyapkiti. Cheqasa, aka qhepa urunakat parlir profecianakajj phoqasiñ qalltawayi ukat jichhakamajj walja maranakäjjewa. Ukat Jesucriston alajjpachan apnaqaskatapas wali qhanaw amuyasiraki. Mä arunjja, akapachan tukusiñapajj wali jakʼankjjewa (Mat. 24:3). Biblian profecianakapajj qhanpun phoqasiski. Ukhamasti, jichhaw jaqenakar ikit sartayañajj wakisi, ukatpï yatiyir sarañasajja.

17, 18. 1) ¿Akapachan tukusiñapajj wali jakʼankjjatap yatisajj kun lurañatakis chʼamachasiñasa? 2) ¿Kunanak utjipansa yaqhepajj amuytatasipjjaspa?

¹⁷ Jehová Diosar munasitas uñachtʼayañatakisa ukat jaqenakar ikit sartayañatakisa wali jukʼa tiempokiw akapachan utj-jjestu. Ukat kuntï Pablojj Roma markankir jilat kullakanakar siskäna uka arunakarjam phoqañasawa, akham sänwa: “Taqe akanakjja amuyasipjjam, kuna urunakantejj jakktan uka, ikit sartasiñajja horasäjjewa. Jiwasan qhespiyasiñasasti sinti jakʼankiwa kunapachatejj suma arunakar iyawskäyätan ukkhat sipansa” sasa (Rom. 13:11).

¹⁸ Kuna profecianakas phoqasiski uk uñjasaw yaqhepajj amuytatasipjje. Ukat yaqhepasti, marka apnaqerinak uñjasarakiw amuytatasipjje, janirakis nuwasiñsa, jiwayasiñsa, qollqet pistʼañsa ukat chʼajjwañanaksa tukjapkitejjä, Oraqes wali qʼañuchatakïskarakisä sasaw sapjje. Ukat yaqhepasti, pachpa familiapan jan walinak uñjasaw amuytʼasipjjaraki, inas usuntañasa, qollqet pistʼañasa ukat divorciasiñas utjchi. Jan ukajj familiat maynejj jiwjje ukhaw amuytatasipjjaraki. Ukhamasti, utat uta sarkasajj taqe jupanakar yanaptʼañatakiw chʼamachasiñasa.

KUN LURAÑASAS WAKISISPA

19, 20. ¿Kunsa walja jilat kullakanakajj jaqenakar yatiyañatakejj lurapjje?

¹⁹ Akapachan tukusiñapajj wali jakʼankjjatap yatisajja, walja jilat kullakanakaw Diosan arunakapat yatiyañatakejj jukʼamp tiempo apstʼasipjje. Ecuador markankir mä chacha warmit parltʼañäni, jupanakajj wayn tawaqosipkiwa. “Mantengamos el ojo sencillo” sat pʼeqenchäwin mä uru jachʼa tantachäwiruw 2006 maran sarapjjatayna. Ukan istʼasajja, kunatï jakañatak munaski ukanakampik jakasjjañäni sasaw amtapjjatayna. Ukatsti, kunanaksa inak imasipki taqe ukanakjja mä papelaruw qellqtʼasipjjatayna. Ukat kimsa phajjsitsti, mä qhawqha yänak aljasaw manunak phoqapjjatayna, ukat jakapkäna uka jachʼa utat sarjjasajj mä tantiy utanakwa jakjjapjjäna. Ukat mä qhawqha tiempotsti, precursor auxiliarjam irnaqtʼañ  qalltawayapjje. Ukatjja, tamanak tumptʼir jilatar jisktʼasajja, kawkintï yatiyirinakajj munaski uka tamar yanaptʼiriw sarapjjäna.

²⁰ Estados Unidos markan jakasir mä jilatajj akham sasaw qellqatayna: “Chacha warmpachaw 2006 maran utjir mä jachʼa tantachäwir sarapjjta. Ukhakamajj 30 maranakaw niy bautisatajjapjjayäta. Uka jachʼa tantachäwinjja, kunatï munaski ukampik jakasipjjam sasaw qhanañchtʼasïna. Ukat utar autot kuttʼkasajja, kunjamsa uk phoqsna sasaw amuytʼasipjjta (Mat. 6:19-22). Nänakajj wali utjirinïpjjayätwa, machaq autonakani, kimsa utani, mä lanchani ukhamwa jakasipjjayäta, ukat utjasiñatak wakichtʼat autos utjarakïnwa. Ukampis jan amuytʼasir cristianöpkiristsa ukham sarnaqapjjatätjja. Jichhajja Jehová Diosar jukʼamp loqtañäni sasaw amtawayapjjta. Ukatwa 2008 maranjja precursor regular apstʼasipjjta, jichhajj phuchhajamp chikaw loqtasipkta. Jilat kullakanakamp chik irnaqtʼañajj wali kusiskañapuniwa. Kawkhantï yatiyirinakajj wal munaski munaski uka cheqanakan irnaqtʼasajj suma experiencianakwa jikjjattapjjta. Ukajj Jehová Diosar jukʼamp jakʼachasiñatakiw yanaptʼapjjetu. Jaqenakajj cheqa yatichäwinak amuyasasa, Diosar uñtʼasasa wali kusisitaw jikjjatasipjje, uk uñjasajj nänakas wal kusisipjjarakta” sasa.

21. ¿Kun yatiñas taqe amuyumpi Diosan arunakapat yatiyañatakejj yanaptʼistu?

²¹ Kunas akapachampejj pasani ukjja yatjjtanwa, ‘taripäwi urunwa, jan wali jaqenakajj tukjatäpjjani’ (2 Ped. 3:7). Ukat Diosan arunakapat yatisajj taqe chuymaw jaqenakar yatiyir sartanjja. Jachʼa tʼaqhesiñ urojj wali jakʼankjjewa ukat Paraíso oraqesa niyarakiw purinjjani sasaw yatiytanjja. Cheqansa, taqe chuymaw jaqenakar ikit sartañ yanaptʼtanjja. Ukhamatwa Jehová Diosar ukat jaqe masisar munasitas uñachtʼaytanjja.

[Jiskt’anaka]