Sarnaqäwi

“Jakʼamansti wiñay kusisiñaw utjaraki”

Lois Didur sat kullakan arsutaparjama

Kunatakis ukham lurpachäta sasaw awisajj amtasiñ yattanjja. Nayajj 50 maranakaw sapürunjam Jehová Diosatakejj irnaqaskta. Ukampis Diosan jakʼapankañ amtatajatjja janipuniw kunapachas pisayaskti. ¿Kunatsa? Uk jichhajj cuenttʼapjjäma.

NAYAJJ 1939 maranwa nasta, Saskatchewan (Canadá) sat marka jakʼana. Pusi kullakanakajampi ukat mä jilajampiw granjan kusisita jakasipjjayäta. Mä urojja, Jehová Diosan Qhanañchirinakapaw jutapjjatayna, ukat “¿Diosajj sutiniti?” sasaw nayajj jiskttʼa. Ukat Salmo 83:18 qellqat uñachtʼayasaw Diosan sutip yatichapjjetu. Ukatjja jukʼampiw Diosatsa ukat arunakapatsa yatiñ munjjayäta.

Uka maranakajja, mä sapa utani escuelakiw utjäna. Ukaruw granjan jakasir wawanakajj caballota jan ukajj kayuki primerot octavkamajj sarapjjerïna. Ukat uka markankir familianakaw yatichirirojj taqe kuns churapjjerïna. Mä urojj John Didur sat yatichiriw purïna. Uka marajj papitujaruw yatichirir qorpachañajj waktʼäna.

Uka yatichirin Diosan arunakap wal yatjjatañ munatapjja janiw yatkayätti. Mä urojja, comunismo ukat socialismo ukaruw jachʼanchayäta, awkijajj ukanakaruw arjjatirïna. Ukat John sat waynajj munasiñampiw akham sapjjetu: “Janiw khitis yaqha jaqenakar apnaqañatakejj derechonïkiti, Diosakiw apnaqaspa” sasa. Ukhamatwa jupampejj parlañ qalltapjjta.

Jupajj 1931 maranwa nasitayna, ukhamajj kunanakas guerra tiempon utjäna ukjja yatïnwa ukat 1950 maran Corea markan guerrajj qalltkäna ukhajja, ¿Kunatsa jumanakajj uka guerran mitisipjjta? sasaw tatakuranakar jisktʼatayna. Ukat cristianonakajj jaqe jiwayir armjja aptasipkaspawa, janiw juchakiti sasaw jupanakajj sapjjatayna. Qhepatsti kikparakwa Jehová Diosan Qhanañchirinakapar jisktʼatayna. Jupanakajj Bibliampiw nayra cristianonakajj guerranakan mitisipjjerïnt janich uk uñachtʼayapjjatayna. Ukat Johnajj 1955 maranwa  bautisasïna, nayasti 1956 maranwa bautisasirakta. Jehová Diosarojj taqe chuymaw loqtañ munapjjayäta (Sal. 37:3, 4). Ukat julio phajjsinwa 1957 maran casarasjjapta.

Ukat jachʼa tantachäwinakajja, casarasipjjta uka phajjsirupuniw walja kut waktʼirïna. Matrimonior nänakjam respetir waranq waranq jaqenakamp tantachtʼasiñajj kusiskañänwa. Khä 1958 maran walja markanakat jachʼa tantachäwejj apaskän ukaruw sarapjjta, janiw mä kutis ukham jachʼa tantachäwirojj sarapjjerïkti. Phesqaniw Saskatchewan markat Nueva York markakamajj autot sarapjjta. Semanpachaw uru jornal viajapjjta, arumanakajj carpan ikipjjerïta. Ukat mä arumajja, mä jilatan utapan qorpachasipjjta, uka jilatampejj Bethlehem (Pennsylvania) markanwa uñtʼasipjjta. Ukhamatwa New York markarojj jareqtʼata ukat qʼoma puripjjta. Cheqansa, Diosar loqtañajj wali kusiskañawa, ukwa jachʼa tantachäwin yateqapjjta. Salmonak qellqerjamaw jikjjatasipjjayäta, jupajj akham sänwa: “Jakʼamansti wiñay kusisiñaw utjaraki” sasa (Sal. 16:11).

PRECURSORJAMAW QALLTAWAYAPJJTA

Precursorjamaw 1959 maran irnaqjjapjjta, Saskatchewan markanwa mä jiskʼa utan jakasjjapjjta, uka utajj qollu patankänwa. Ukhatjja wali sumaw chʼojjña pampanakajj uñtasïna. Ukawjanakanwa Diosan arunakapat yatiyapjjerïta.

Mä urojja, sucursalat mä cartaw purinïna, John esposojajj tractorampiw trabajaskäna, ukar jikjjatiriw jallsuwayta. Uka cartanjja Red Lake (Ontario) markan precursor especialjam loqtañatakiw invitapjjetäna. Ukampis janiw uka mark uñtʼapkäyätti, ukatwa mapanak apsunisajj thaqapjjta.

Chʼojjña pampan jakasir yatitäpjjayätwa, ukampis sarapkayät uka markajj janiw ukhamäkänti. Montenakakiw utjäna, ukat qori minanak jakʼanjja jiskʼa markanakaw utjarakïna. Puripjjta uka urojj qorpachasiñ utwa thaqhapjjta. Ukat mä warmimp parlasipkäyät ukhajja, mä jiskʼa imillaw istʼasipkitütu. Ukat jankʼakiw mamapar awisir jalatayna. Ukat mamapajj “utajan aka arumajj qorpachasipjjam” sasaw qheparayapjjetu. Ikiñ utapajja sótano manqhankänwa, perqapas pisopas janiw tukuyatäkänti. Qheparmantejja, tronconakat lurat utwa jikjjatapjjta, uka utajja pä cuartonikïnwa, janiw qʼoma umas utjkänti chʼusakïnwa, mä qherikiw juntʼuchasiñatak utjäna. Merqʼe yänak aljapki ukatwa mä qhawqha yänak alasinipjjta, ukampejj kusitakiw jikjjatasipjjta.

Jakʼanki uka tamajja, 209 kilometronak sarañankänwa. Qori minan trabajirinakajja, jila partejj Europatäpjjanwa. ¿Arujat qellqat Biblianak janit apanipkasma? sasaw sapjjetana. Mä jukʼa tiempotjja kimsa tunkaniruw Bibliat yatichjjapjjta, ukat jankʼakiw nayrar sartapjje, sojjta phajjsitjja mä jiskʼa tamaw uttʼayasjjarakïna.

Mä kutejja, Bibliat yateqer mä maman esposopaw tatakurar telefonot jawsatayna “warmijar amuytʼayarapita” sasa. Ukat purinisajja tatakurajj Diosajj kimsa diosanakat mayar apthapitawa, ukwa jumanakajj yatichapjjañama sasaw sapjjetu. Ukat yateqerejja, católica Bibliap apsunisajj ¿kawkhans ukham yatichi uk uñachtʼayita? sasaw tatakurar säna. Tatakurajj mesat maysaruw Biblia jaqtäna, janiw kuns uñachtʼaykämati sasa. Ukat sarjjasajja, “aka jaqenakarojj takis takis alisnukupjjañamawa, janiw mayaps katoqapjjätati” sasaw ucraniano arut säna. Esposojan ucraniano aru amuyatapjja tatakurajj janiw yatkänti.

Mä qhawqha tiempotjja Red Lake markatjja sarjjapjjtwa, esposojarojj tamanak tumptʼirjam irnaqañapatakiw wakichapjjañapäna. Mä mara qhepatsti esposojajj kimsa uru jachʼa tantachäwin bautisasirinakatak  arstʼaskän ukhajja, ¡uka yateqerin esposopaw bautisasirinakamp chik qontʼatäskäna! Amuyatajja, kuntï tatakurajj lurkäna uk uñjasaw Bibliat yatjjatpachäna.

TAMANAK TUMPTʼIRJAMAW IRNAQAPJJAYÄTA

Tamanak tumptʼirjamajja, walja familianakan utapanwa qorpachasipjjta. Qhepatjja jupanakampejj suma amigojjapjjtwa. Mä kutejja, mä jilïr kullakaw altus utapar qorpachapjjetu, ukanjja janiw kunamp juntʼuchasiñas utjkänti, juyphi pacharakïnwa. Kullakajj wali alwatwa cuartor kʼachitat mantanisin mä jiskʼa estufa naktayirïna. Ukat mä jukʼa ratutjja juntʼuchat umwa mä bañadorar jareqasipjjañäjatak asantanirïna. Jupatsti llampʼu chuymanïña, khuyaptʼayasirïñwa yateqta.

Tamanak tuptʼirjamajj jukʼampiw Diosar jakʼachasipjjta. Alberta sat markan irnaqasajja alay toqenkir mä markaruw tumptʼir sarapjjañäjäna, uka markanjja minanakaw utjäna, ukat mä kullakakiw jakasïna. Diosan markapajj wali sum uka kullakar uñjäna. Ukat sapa sojjta phajjsitwa mä jachʼa tamakaspas ukham semanpach visitapjjerïta, ukat tantachäwinaksa apapjjerïta. Jehová Diosajj kunjamsa ovejitanakapar uñji ukwa uka kullakajj amtayapjjetäna.

Qorpachapjjetän uka familianakarojj qellqapjjapunirïtwa. Ukanakajj esposojaruw amtayitu, mä kutejj mä cajaruw carta qellqañ papelanak regalitäna. Jilat kullakanakampi qellqat toqe parlasiñajj askipunïnwa, jichhakamaw uka cajj wali munat imasiskta.

Toronto markan tamanak tumtʼirjam irnaqtʼasipkäyäta ukhaw Canadá sucursalat mä jilatajj jawsanipjjetu, “¿Betelar sarañ munapjjasmati?” sasa. Ukat “sarapjjasmat janich ukjja qharurpachaw yatiyapjjetäta” sapjjetuwa. Qhepharmantpachaw munapjjtwa sasajj yatiyapjjta.

BETEL UTANWA IRNAQAWAYAPJJTA

Precursorjama, tamanak tumptʼirjam irnaqtʼasajj Jehová Diosan jakʼapan irnaqtʼañajj kunja wakiskiris uk qhan amuyapjjta. Ukat 1977 maran Betelar purisajj ukhamarakiw amuyapjjta. Ukat ajllit jilatanakar uñtʼañajj wali askïnwa, kunjam jaqëpjjesa, qhawqsa Diosan arunakap munapjje uksa uñjapjjaraktwa.

Betelan irnaqañajj wali askipunïnwa. Isinaksa janiw maletar imasjjapjjti, jan ukasti roperoruw imasjjapjjta, ukat mä tamanwa jilat kullakanakamp tantachasjjapjjta. Betelan irnaqañajj kusiskañänwa, yamas visittʼirinakar sucursal uñtʼayañajj kusiskañapunïnwa. Kunjamsa Betelan irnaqasi ukanakwa qhanañchirïta, ukat Betelat kamsapjjänsa uk istʼañas, jisktʼanakapar qhanañchtʼañas wali askïnwa.

Maranakajj jan kunakiw pasjjäna, 1997 maranjja, Sucursal Sarayirinakataki Escuelar Patterson (Nueva York) markar sarañatakiw esposojar invitapjjäna. Ukat Qhepatsti, Ucrania markar sarañ munapjjasmati sasaw jisktʼapjjetu, ukatak sum amuytʼasipjjam, Diosats maytʼasipjjarakim sasaw iwjjtʼapjjetu. Ukampis uka arumpachaw sarañatakejj amtapjjta.

UCRANIA MARKARUW SARJJAPJJTA

San Petersburgo (Rusia) markan 1992 maran walja markanakat jachʼa tantachäwejj apaskäna ukat Kiev (Ucrania) markan 1993 maran apaskäna ukarus sarapjjarakwa. Uksankir jilat kullakanakarojj wal munasipjjäyäta. Jichhajj Lviv (Ucrania) markaruw puripjjta. Uka markanwa mä nayra altus utan jakasipjjta. Ventanatjja mä jiskʼa jardinaw uñjasïna, ukanjja mä jachʼa wila orqo wallpampi ukat qachu wallpampiw utjäna. Saskatchewan markajans jakaskirist ukham amuyasiyäta. Uka cheqan jakir tunka payan jilat kullakanakaw markjja maysat maysa Betelar sarañatak sapa alwa pasapjjerïta.

 Ucraniankir jilat kullakanakamp jakasiñajj wali sumänwa. Jupanakajj Diosar iyawsapjjatap laykuw carcelan jistʼantata, arknaqata uñjasipjjäna. Ukampis janipuniw Diosat jitheqtapkänti. “Walik ukham aguantapjjtajja” satajja, “Jehová Diosaw aguantañ yanaptʼapjjetu” sapjjeriwa. Janiw jaytjata uñjasipkänti. Jichhakamasa, “Jehová Diosar yuspäram” sasaw kun yanaptʼatas sañ yatipjje. Ukhamatwa, Diosan wali askinak apayanitap uñachtʼayapjje.

Ucrania markanjja, walja jilat kullakanakaw tantachäwinakar kayuk sarapjje. Ukat mä hora jila sarasajja, jupanak pura parltʼasisaw sarañ yatipjje, ukhamatwa chʼamañchasipjje. Lviv markanjja 50 jila tamanakaw utji, ukat 21 tamanakajja, mä cheqan lurat walja Tantachasiñ Utanakanwa tantachasipjje. Domingonakajj wali munkañaw jilat kullakanakajj uka cheqar wal purintapjje.

Uka cheqan wali yatitäpkiristsa ukham amuyasipjjta. Jilat kullakanakajj munasiñampiw katoqtʼasipjje ukat yanaptʼasipjje. Nayajj uka markan parlapki uka arjja janiw sum yatkti, ukhamajj wali pacienciampiw uñjapjjetu. Awisajj wali muspharataw jikjjatasipjje.

Kunjamsa jilat kullakanakajj sum uñjasipjje ukwa 2003 maran Kiev markan walja markanakat jachʼa tantachäwejj apaski ukhajj qhan uñjawayta. Trenat saraqasipkäyät ukhaw mä jiskʼa imillajj jamasat akham situ: “chhaqtwa, awichitäj thaqaskta” sasa. Tʼirkatat tarjetanak uñjasaw Jehová Diosan Qhanañchiripapjjewa sasajj jan ajjsartʼas amuki jakʼachasipjjetu. Ukat tamanak tumptʼir jilatan esposapaw Chhaqayasitanaka imapki ukjar irpi, ukat awichapampis jikisjjarakïnwa. Walja jaqenakas utjkchïnjja, kunjamsa uka wawajj jilat kullakanakar atinisi uk uñjañajj chuyms chʼalljjtayituwa.

Sucursal utachañ tukuyasjje ukhajja mayo 2001 maranjja, walja markanakatwa jilat kullakanakajj Ucrania markar purinipjje. Ukat Domingo alwajj estadionan sucursal dedicañataki tantachäw tukuyatarojja, walja jilat kullakanakaw sucursal uñjir kayuk sarapjje. ¡Janipuniw uk armkäti! Wali pacienciampiw sumat purnoqtapjjäna. Jehová Diosar serviñajj wali sumapuniwa uk qhan uñjawayta.

MÄ JACHʼA LLAKIN UÑJASTA

Cáncer usunitawa sasaw esposojar 2004 maran doctoranakajj sapjje. Ukatwa Canadá markan qollayasiñapatak kuttʼjjapjjta. Mä kuti quimioterapia lurapki ukhajj niyapuniw jiwjje, walja semanaw tʼaqhesiwayi. Ukat amuytatasjje ukhajja, janiw parlañsa puedkänti. Tumptʼir jutapjje ukhajja, qhawqsa yuspäri ukajj qhanaw nayrapan amuyasïna.

Ukampis janiw waliptirjamäkänti, mä qhawqha tiempotjja jiwjjakiwa. Nayajj wali llakitaw qheparta. Jupampejj Jehová Diosarojj kusisitaw loqtawayapjjta. Ukatjja, Ucrania markar kuttʼañwa amtta. Ukanjja Betelan irnaqer jilat kullakanakasa, tamankir jilat kullakanakas wal yanaptʼawayapjjetu.

Esposojampejj Jehová Diosar ukham loqtasajj janiw pisayasipjjerïkti. Wali kusisitaw jakasiwayapjjta, wali suma amigonaksa jikjjatapjjaraktwa. Cheqansa, Jehová Diosan khuyapayasiñapat yateqañajj janiw tukuskiti, ukat wiñayaw jupar loqtañ munta. Nayatakejja Jehová Dios jakʼan irnaqañajj wali askipuniwa.

[6 janan qhanañchäwipa]

“Jehová Diosar loqtasajj janipuniw esposojampejj pisayasipjjerïkti”

[3 janan fotopa]

Casarasipjjt uka uru

[4 janan fotopa]

Red Lake, Ontario markanwa precursorjam irnqatʼawayta

[5 janan fotopa]

Panpachaniw 2002 maran Ucrania markankasipkta