¿Kunjamsa ewjjtʼirïta?

¿Akham sasin jisktʼasipjjerïtamti? “¿Kamachiristsa jan ukajj kunsa lurirista? ¿Uka fiestar sariristti? ¿Universidadan jukʼamp yatjjatañajajj walikïskaspati? ¿Jupamp uñtʼasiñajajj walikïskaspati?” sasa.

Inas maynejj mä amtar puriñatak ukham jisktʼasiristam ukat kuntï amtkani ukarjamaw amigonakapampisa familiapampisa jan ukajj Jehová Diosampisa walsa jan walsa apasini. ¿Amuyumarjamakiti jan ukajj Bibliarjamacha ewjjtʼäta? ¿Suma amtar puripjjañapatakejj kunjamsa yanaptʼirïta? Kunjjay jisktʼasiskstam, ukampis Proverbios 15:28 qellqatajj akham sasaw ewjjtʼistu: “Aski jaqejj janïra parlkasinjja suma amuytʼasisinwa arsu” sasa. Sum ewjjtʼañatakejj kunanakas yanaptʼistaspa ukwa Bibliarjamajj phesqa toqet amuytʼañäni.

1 Kunatsa jisktʼastam uk sum amuyañamawa.

“Maynin arunakapa jan sum istʼkasina arsuñajja, jan amuytʼanïña, mä pʼenqarakiwa.” (PRO. 18:13.)

Sum ewjjtʼañatakejja, kunatsa ukham jisktʼastam ukat jupajj kunsa amuyi uk sum yatiñamawa. Amuytʼañäni: utamar kawknämsa jankʼak purinirista sasin jisktʼasiñataki maynejj telefonot jawsaniristam ukhajja, ¿sum yanaptʼañatakejj kun yatiñamas wakisispa? ¿Kawkhankaskisa uk jan yatisajj yanaptʼasmati? Janiwa. Ukhamarakiwa maynir ewjjtʼañatakejja, kunatsa ukham jisktʼastam ukat kunsa jupajj amuyi uk yatiñamaw wakisi. Kunatsa ukham jisktʼastam uk jan sum yatkasin ewjjtʼasajj inas jukʼampik pantjasiyjjchisma (Luc. 6:39).

Uka toqet qhawqsa yatjjatjje uk yatiñamawa. Sum ewjjtʼañatakejja, khititï yanaptʼa mayktam uka pachparuw akham jisktʼarakisma: “¿Biblian kawkïr ewjjtʼanakapas mä suma amtar puriñatak yanaptʼiristamjja?”, “Kuntï lurañ munkta ukham lurasma ukhajja, ¿kuna askinakasa jan ukajj kuna jan walinakas utjaspa?”, “¿Uka toqet yatjjatjjtati?”, “¿Irpir chuymaninakasa, awk taykamasa jan ukajj Bibliat yatichirimas yanaptʼjjapjjtamti?” sasa.

Kamschïtamjjay ukarjamaw qhawqsa yanaptʼa katoqañatakejj chʼamachasiwayi, jan ukajj kuna ewjjtʼanaksa katoqjje uksa sum amuyjjäta. Maysa toqetjja, kuntï istʼañ munki uk istʼañatakikicha ukham jisktʼasisktam uksa amuyjjarakïtawa (2 Tim. 4:3).

  2 Jan amuytʼasisajj janiw jankʼak ewjjtʼañamäkiti.

“Sapa maynis jumanakatjja jankʼakïñapaw istʼañataki, ukampis janiw jankʼaki kunsa parlañapäkiti.” (SANT. 1:19.)

Yanaptʼañ munasaw awisajj jan amuytʼasis jankʼak ewjjtʼsna. ¿Jisktʼaskistu uka toqet janïr yatjjatkas ewjjtʼañajj askïspati? Proverbios 29:20 qellqatanjja akham siwa: “Jan amuytʼasis mäki parlir jaqet sipansa, mä jan yatiñan jaqewa suma parlaspajja” sasa.

Diosan Arupanjja kamsisa ukarjampuni ewjjtʼañatak chʼamachasiñamawa. Ukat akham jisktʼasirakisma: “¿Akapachankir amuyunakampiti apayasisktjja?” sasa (1 Cor. 2:12, 13). Kunapachatï, Pedrojj Jesusan tʼaqhesiñapa ukat jiwañap yatjjäna ukhajja, akham sasaw Jesusar ewjjtʼäna: “Tata, jumata khuyapayäsim; jan kuna laykusa ukajj jumaru purpati” (MT) sasa. ¿Kunsa Pedron uka arunakapat yateqsna? Taqe chuyma yanaptʼañ munkasasa, maynejj pantjasispawa, janiw Diosan arunakaparjam parlkaspati, jan ukasti jaqenakan amuyuparjamakiw parlaspa (Mat. 16:21-23). Ukhamasti, janïr arskasin sum amuytʼasiñajj wali wakiskiripuniwa. Wali yatjjattʼatäkañänisa, Jehová Diosakiw taqe yatiñkankañanejja (Job 38:1-4; Pro. 11:2).

3 Diosan Aruparjam ewjjtʼasaw altʼat chuymanïtam uñachtʼayañama.

“Ja[niw] kuns nayan munañajjat lur[kti]. Nayajj arstwa kuntejj Awkejj yatichkitu uka.” (JUAN 8:28.)

¿“Nayatï jumïristjja akham lurirista...” sañajj walïspati? Kunjamsa uka jan waltʼäwejj askichasiñapa ukajj qhanäskchisa, Jesusatwa altʼat chuymanïña yateqasiñasa. Jesusajj taqe jaqet sipansa jukʼamp yatiñanïnwa, ukampis akham sänwa: “Janiw naya pachpatakti parlktjja; [...] Awkejjaw situ kuntejj arsuñajjäki, yatichañajjäkaraki ukjja” sasa (Juan 12:49, 50). Jesusajj Awkipan munañaparjamapuniw kuns yatichirïna ukat ewjjtʼarakirïna.

Lucas 22:49 qellqatarjamajja, kunapachatï Jesusar katuntañ munapkäna ukhajja, “Tata, ¿espadampit nuwantapjjäjja?” sasaw discipulonakapajj jisktʼapjjäna. Yamas maynejj espadampiw mä soldador jiñchu thoqoqayäna. Mateo 26:52-54 qellqatarjamajja, ukhaman jikjjataskasasa kunäkitï Diosan munañapajj ukwa Jesusajj discipulonakapar amuytʼayäna. Génesis 9:6 qellqatan utjki uka kamachinaksa ukat Salmo 22 jaljana ukat Isaías 53 jaljan jikjjataski uka profecianaksa Jesusajj sum yatïna. Ukatwa suma ewjjtʼanak churäna, ukaw jaqenakar qhespiyäna ukat Jehová Diosarus kusisiyarakïna.

  4 Bibliat apstʼat qellqatanakampi yanaptʼayasiñamawa.

“¿Khitiraki amuyasiri, cheqap uywatasti, khitirutï uywiripajj utapankirinakjjaru uchawayi, horasaparu manqʼa jupanakaru churañapatakejja?” (MAT. 24:45, MT.)

Amuyasiri Cheqapa Uywatarojj Jesusaw Bibliat yatichañapatak uttʼayawayi. Jumar mä wakiskir toqet ewjjtʼaña ukat amuytʼayañ waktʼktam ukhajja, ¿Bibliat apstʼat qellqatanakan kamsisa uk yatjjatañatakejj tiempo apstʼasisktati?

Yatiyañataki revistan sapa mara diciembre phajjsin qhepa janapanwa, kuna yatichäwinakas apsusiwayi ukanakajj utji, ukanakat yatjjatañaw sum ewjjtʼañatak yanaptʼätamjja. Ukatjja, Watchtower Library * español arut utjki ukat jukʼamp thaqtañatakisa maynimpiw yanaptʼayasirakisma. Ukan utjki uka yatichäwinakat jan yatjjatañajj janipuniw walïkaspati. Uka yatichäwinakaw yanaptʼa munirinakar ewjjtʼañatakis yanaptʼistani. ¿Bibliat apstʼat qellqatanakan utjki uka ewjjtʼanak thaqtañapatakisa ukat Diosan Aruparjam amuytʼasiñapatakisa yaqhanakar yanaptʼasmati? Kunjamtï mä mapajj kawkinsa jikjjatastan uk yatiñatakisa ukat kawkirutï puriñ munktan ukar puriñatakis yanaptʼkistojja, ukhamarakiw Bibliat apstʼata qellqatanakajj kuns lurasktan uk amuytʼasiñatakisa ukat wiñay jakañar apiri thakit jan saranukuñatakis yanaptʼistu.

Walja irpir chuymaninakaw jilat kullakanakarojj uka yanaptʼanakat yatjjatañ yatichawayapjje ukhamatwa Diosan Aruparjam amuytʼasiñ yanaptʼapjjaraki. Ukat jilat kullakanakajj kuna jisktʼanïsas jupanak pachpa yatjjatañ yateqapjje, ukatjja yaqha toqenakatsa jukʼamp yatjjatasipkakiwa, ukatsti Jehová Diosan arunakaparojj jukʼampwa confiasipjjaraki. Ukat “kunatejj walïki, jan walïkaraki uk uñtʼañsa yatjjapjjarakiwa” (Heb. 5:14).

5 Kunsa lurañapa ukjja janiw sañamäkiti.

“Sapa mayniwa luräwinakapat llakisiñapa.” (GÁL. 6:5.)

Kawkïr ewjjtʼarjamas lurani ukjja sapa mayniw amtjjañapa. Arunakaparjamati sarnaqañäni janicha ukjja, sapa mayni amtañasatakiw Jehová Diosajj jaytistu (Deu. 30:19, 20). Awisajja, kun lurañatakis walja ewjjtʼanakaw Biblian utjaspa, ukampisa kuns lurani ukjja sapa mayniw amtjjañapa. Kuna toqetjjay jisktʼapjjchïtam ukat jisktʼasirejj qhawqha maranisa ukarjamaw akham jisktʼasiñama: “¿Nayarut uka toqet ewjjtʼañajj waktʼitu?” sasa. Awisajj irpir chuymaninakan ewjjtʼapjjañapatak jaytañaw wakisispa, jisktʼasiritï waynitüchi jan ukajj tawaqetächi ukhajja, awk taykapar jaytañaw wakisirakispa.

[Qhanañchäwi]

[8 janan recuadropa/fotopa]

Familiana Diosar Yupaychañataki Aruman yatjjatañataki

Familian yatjjatañatakejja, kunanaktï jichhak jisktʼapkistu ukanakat yatjjatañajj askïspawa. ¿Kuna yatichäwinakasa ukat Biblian kawkïr kamachinakapasa mayninakar yanaptʼaspa uk thaqtapjjasmati? Amuytʼañäni, inas mä jilatasa jan ukajj mä kullakas maynimp jaqechasiñ amtaskaspa ukat jupampi uñtʼasiñajj walikïskiti sasin jisktʼasiristam. Yatiyañataki revistan sapa mara diciembre phajjsin qhepa janapan utjki ukanwa “Taman yatjjatañataki yatichäwinaka” jan ukajj “Cristianonakajj kunjamäpjjañapasa” siski uka cheqat thaqtasma. Ukat Watchtower Library CD-ROM español arut utjki ukanwa, “Concertar citas” jan ukajj “Matrimonio” pʼeqeñchäwirjam wali wakiskir yatichäwinak jikjjatarakisma.

[9 janan recuadropa]

Jehová Diosajj kuna yanaptʼanaktï markap toqejj churkistu ukanakaw suma ewjjtʼanak katoqañatakisa ukat sum ewjjtʼañatakis yanaptʼistani. Eclesiastés 12:11 qellqatajj akham siwa: “Yatiñanin säwi arunakapajj wali ari puntanïkaspas ukhamawa, mayaru suma apthapitasti suma chʼaktʼata chʼakurunakäkaspas ukhamawa, mä sapa awatirin uchata” sasa. Suma ukat wali munasiñampi ewjjtʼanakajja, “wali ari punta[ni]” lawar uñtataw suma chuymani jaqenakarojj suma thakir irpi. Nayra maranakanjja animalanakar irpañatakiw uka kasta lawajj apnaqasïna. “Suma chʼaktʼata chʼakhuruna[kasti]” sum saytʼayañatakiw wakisi. Ukhamarakiw suma ewjjtʼanakajj maynin askipatak yanaptʼaspa. Ukat amuytʼasir jaqenakaw ‘mayaru suma apthapita’ ewjjtʼanakat amuykiptʼapjje, uka ewjjtʼanakasti “mä sapa awatirin” arupawa, mä arunjja, Jehová Diosatwa juti.

Ukhamasti, ewjjtʼkasajj Diosan arunakap arsuñasawa. Wakisirjamäni ukhajja, sum istʼasin sum ewjjtʼañajj wali askïniwa. Ukat Bibliarjam ewjjtʼañäni ukhajja, istʼasiritakejj askïniwa ukat wiñay askipatakiw yanaptʼarakini.