“¿Mä foto apstʼapjjetasmati?”

Kimsa uru jachʼa tantachäwi tukuyarojja, Josué sat mä jilataw amigonakapampi Querétaro sat markaru pasiytʼir sarapjjatayna, jupasti Betel utanwa México markan irnaqäna. Ukat Colombia markat jutir mä chacha warmiw uka cheqan paseasipkatayna, chachasti Javier satänwa ukat warmejj Maru satarakïnwa. Jupanakajj mä foto apstʼapjjeta sasaw Josueyarojj mayipjjatayna. Josueyas amigonakapas suma isthaptʼatäpjjänwa, mä jiskʼa tarjetas tʼirkattʼasita ukhama. Uk uñjasinjja, “¿kawkitsa jutasipkta, mä fiestatti jan ukajj mä kusistʼäwitcha?” sasaw jisktʼapjjäna. Uk jisktʼatajj akham sasaw Josueyajj säna: “Janiw kuna fiestarus sarapkti jan ukasti mä jachʼa tantachäwitwa jutasipkta” sasa. Ukatsti Josueyajj domingo uru jachʼa tantachäwir jutapjjañapatakiw invittʼarakïna.

Ukat uka chacha warmejja janiw tantachäwir sarirjamapkänti, kunatejj janiw tantachäwitakjam isinak apanipkataynati. Ukampis Josué jilatajj sutipsa ukat Betel utar jawsaniñapatakis numeropsa churataynawa.

Ukat pusi phajjsi qhepatjja uka chacha warmejj telefonotwa Josueyarojj jawsapjjatayna. “Nänakajj Jehová Diosan qhanañchirinakapan tantachäwiparojj sarapjjtwa ukat jichhajj jukʼampwa Bibliat yateqañ munapjjta” sasa. Ukatsti, Bibliat yateqañjja qalltapjjapunïnwa, tantachäwinakarus sarjjapjjarakïnwa. Tunka phajjsi qhepatsti Jehová Diosan arunakap yatiyirejj mistjjapjjarakïnwa. Ukat mä qhawqha tiempotjja Toronto (Canadá) markaruw sarjjapjjäna, ukansti ajay toqetjja nayrar sarantasipkakïnwa ukat bautisasjjapjjarakïnwa.

Ukat qhepatsti, kunas Bibliat yatjjatañatakejj chʼamañchtʼatayna uk qhanañchtʼañatakiw Javierojj mä carta Josueyar qellqatayna akham sasa: “Janïr jachʼa tantachäwir sarkasajja, kunjamatsa Diosar sum uñtʼsna sasaw esposajjampejj parlasipkayäta. Ukat jumanakar suma isthaptʼata uñjasajja, kuna tantachäwitjjay jutapjjchi, uka tantachäwejj wali wakiskiripunipachawa sasaw amuyapjjta. Ukat tantachäwir sarasajja walpun muspharapjjta. Janis jupanakjam suma isthaptʼatäkapstjja, wali munasiñampiw katoqtʼapjjetu, ukhamarak qonuñanak thaqañsa yanaptʼapjjetu. Ukat Bibliat thaqtañsa munasiñampiw yanaptʼapjjarakitu” sasa.

Josueyatakejj Salomonan arunakapajj wali cheqapunipachänwa ukanjja akham siwa: “Alwatajja yapucham, jaypʼusa yapucharakim, janiw jumajj yatktati kunjamäkanitejj nayra, ukhamarak qhepa yapuchatasa, jan ukajj paypach satas mayak jilapjjchini” sasa (Ecl. 11:6). ¿Janit jumajj ukham yapuchkarakisma, jachʼa tantachäwi utjkani ukar invittʼasa jan ukajj taman taqenitak arstʼäwinak utjki ukar invittʼasa? Cheqansa, Jehová Diosajj jiwas toqew suma chuyman jaqenakarojj yanaptʼaspa. Kunjamtï Javier ukat Maru esposapampirojj yanaptʼawayki ukhama (Isa. 55:1).

[32 janan fotopa]

Chʼeqat kupiru: Alejandro Voeguelin, Maru Pineda, Alejandro Pineda, Javier Pineda ukat Josué Ramírez México sucursalana