Jehová Diosar taqe chuyma yupaychaskakiñäni

“Munat wawa[ja], uñtʼätawa awkimana Diosaparu, ukatsti taqe chuymarakiwa jupar servïta.” (1 CRÓ. 28:9.)

¿KAMSASAS AKA JISKTʼANAKAR QHANAÑCHTʼASMA?

¿Chuyma siski ukajj kamsañsa muni?

¿Chuymasajj kunjamäskisa uk amuyasiñatakejj kunas yanaptʼistani?

¿Jehová Diosar taqe chuyma yupaychaskakiñatakejj kunas yanaptʼistani?

1, 2. 1) ¿Biblianjja cuerpon kawkïr partepatsa jilpach parli? 2) ¿Chuyma sasajj kamsañsa muni uk sum amuytʼañasajj kunatsa wakisi?

 BIBLIANJJA awisajj cuerpon partenakapatwa parli, ukampis janiw cheqpach cuerpot parlkiti. Sañäni, Jeremías profetajj akham sänwa: “Aka arunak istʼam, jan amuytʼan marka, nayranïskiwa, ukampis janiw uñjkiti, jinchunïskaraki, ukampis janiw istʼkiti” sasa. Jehová Diosajj akham sasaw Ezequiel profetar säna: “Jerusalén marka muytam, kawkïrinakatejj aka markan jan wali luräwinakap layku wali llaktʼatäsipki ukanakaru mä chimpu paranakaparu uskurakim” sasa. Ukat Jesusajj akham sänwa: “Kupi nayramatejj juchar puriyirjamästam ukkhajja, apsusina jayar liwtam” sasa, ukatsti akham sarakïnwa: “Kupi amparamatejj jan waliru puriyirjamästamjja, khareqasim ukatsti jayar liwtam” sasa. Santiagojj akham sarakïnwa: “Lajjrajj mä ninampi sasiwa” sasa (Jer. 5:21; Eze. 9:4; Mat. 5:29, 30; Sant. 3:6).

² Biblianjja, cuerponkir mä partepatwa jilpach parli, ukasti “lloqowa”, uka aruw Bibliajj kuna arunakantï qellqaskäna ukanakan uñstäna. Ukampis aymar Biblianjja, “chuyma” sasaw uka arojj jaqokipasi, ukat waranqa jilaw uñsti. Sañäni, Diosar jan jitheqtas serviri Anajj akham sasaw Diosat mayisïna: “Tatitu, nayasti taqe chuymaw [hebreo arunjja, ‘lloqo’] juman kusista” sasa (1 Sam. 2:1). Biblianjja “chuymam imam” sasaw ewjjtʼistu, ukhamasti chuyma sasajj kamsañsa muni uk sum amuytʼañasawa (Proverbios 4:23 liytʼasiñapawa).

¿CHUYMA SASAJJ KAMSAÑSA MUNI?

3. ¿Bibliajj chuyma sasajj kamsañsa muni uk sum amuytʼañatakejj kun lurañasasa? Mä uñachtʼäwimp qhanañchtʼam.

³ Chuyma siski uka arojj kamsañsa muni uk janis Bibliajj diccionarionakjam qhanañchkchejja, kun sañsa  muni uk amuytʼañ yanaptʼistuwa. ¿Kunjamsa? Walja laphinakani mä jachʼa qoqat (alit) amuytʼañäni. Jumatï uka qoqan wali jakʼapar saytʼasismajja, inas mä qhawqha laphinakapaki uñjchisma, ukat qawqchʼasa kunjamasa ukanakjja janiw amuykasmati. Ukampis jitheqtasin jayat uñtasaw kunjamapunisa uk sum uñjasma. Ukhamarakiw chuyma siski uka arojj kamsañsa muni uk sumpach amuytʼañatakejja, Biblianjja kawkïr cheqanakansa uka arojj uñsti uk taqpach sum amuytʼañasawa.

4. 1) ¿Chuyma siski uka arojj kamsañsa muni? 2) ¿Mateo 22:37 qellqatarjamajj kamsañsa Jesusajj munäna?

⁴ Biblian chuyma sasinjja, kunjam jaqëtansa uk sañ muni, mä arunjja, kunanaksa muntan, lupʼisktan ukat kunanaksa sum lurtʼañ yattan, kuna amtanakanïtansa ukat kunatsa ukanak lurañ muntan taqe ukanak sañ muni (Deuteronomio 15:7; Proverbios 16:9; Hechos 2:26 liytʼasiñapawa). Ukampisa, awisajj janiw taqe ukanakpun sañ munkiti. Amuytʼañäni, Jesucristojj akham sänwa: “[Jehová] Diosamaruw munäta taqe chuymamampi, taqe almamampi, taqe amuyumampiraki” sasa (Mat. 22:37). “Chuyma” sasinjja, munasiñata ukat kunjamsa chuymasan jikjjatastan ukat kunsa muntan ukanakatwa parlaskäna. Jesusasti chuyma, alma, amuyu sasinjja, qhawqsa Diosar munastan ukwa qhanstayañ munaskäna, ukat uka munasiñasajj jakäwisansa, lupʼïwisansa qhanäñapawa (Juan 17:3; Efe. 6:6). Ukampis chuyma sasin sapaki uñstki ukhajja, kunjam chuyman jaqëtansa uk sañ muni.

¿KUNATSA CHUYMAS JARKʼAQAÑASA?

5. ¿Kunatsa Jehová Diosar taqe chuyma serviskakiñataki chʼamachasiñasa?

⁵ David reyejj akham sasaw yoqapar ewjjtʼäna: “Juma Salomón munat wawajjasti, uñtʼätawa awkimana Diosaparu, ukatsti taqe chuymarakiwa jupar servïta, ukhamarak suma amtampiraki, Tatitusti taqe chuymanakjja sumwa uñji, ukhamarak yatiraki kuna amtäwinaksa, lupʼïwinaksa” sasa (1 Cró. 28:9). Jehová Diosatï taqe chuymanak sum uñjchejja, jiwasan chuymasjja uñjarakiwa (1 Sam. 16:7; Pro. 24:12). Jehová Diosajj suma chuymanïtas uñjistani ukhakiw Jupan amigopäsna ukat jutïrinsa kusisita jakasiraksna. Ukhamasti Davitan ewjjtʼaparjam Jehová Diosar taqe chuyma serviskakiñatak chʼamachasipjjañäni.

6. ¿Jehová Diosar serviskakiñatakejj kun amtañasasa?

⁶ Cristianjamajj kuna lurañanakatï utjkistu ukanak sum phoqasaw Diosar taqe chuyma serviñ munatasjja uñachtʼaytanjja. Ukampisa, akapachajj Supayan apnaqatawa ukat jiwasas pantjasirirakïtanwa, ukanakaw Diosar taqe chuyma serviñ amtawayktan ukjja armayistaspa (Jer. 17:9; Efe. 2:2). Ukatwa Jehová Diosar taqe chuyma serviskakiñatakejj kunjamäskis chuymasajj uk amuyasiñasa. ¿Kunjamsa uk lursna?

7. ¿Chuymasajj kunjamäskisa ukjja kunjamatsa yatsna?

⁷ Kunjamtï mä alin tallo manqhapajj jan uñjaskejja, ukhamarakiw kunjam chuyman jaqëtansa ukajj jan uñjaskiti. Jesusajj Wali Uñtʼat Arstʼäwipan akham sänwa: kunjamtï achunakapajj mä alejj kunjamasa uk uñachtʼaykejja, ukhamarakiw mä jaqen luratanakapajj kunjam chuyman jaqesa uk uñachtʼayi sasa (Mat. 7:17-20). Uka luräwinakat may uñjañäni.

¿KUNJAM CHUYMANÏSKTANSA?

8. Mateo 6:33 qellqatarjamajja, ¿kunas chuymasan utji uk kunjamsa uñachtʼaytanjja?

⁸ Wali Uñtʼat Arstʼäwipanjja, kun lurasasa Jehová Diosar taqe chuyma yupaychañ munapjjatap uñachtʼayapjjaspa uka toqetwa Jesusajj istʼirinakapar parläna. Ukat akham sänwa: “Nayraqatajj Diosan reinopa munapjjam,  ukhamarak kunatejj cheqäki jupan nayraqatapanjja ukanaka, ukatsti taqe aka yänakajja jumanakarojj churatakïpjjätawa” sasa (Mat. 6:33). Kunanaksa jakäwisan nayraqatar uchtan ukarjamawa kunsa muntan, kunsa lupʼisktan ukat kunatsa uk lurañ muntan ukanak uñachtʼaytanjja. Ukhamasti, kunanaksa jakäwisan nayrar uchasktan uk amuyasiñaw Jehová Diosarojj taqe chuymati yupaychasktan janicha uk amuytʼasiñ yanaptʼistani.

9. ¿Jesusajj kamsasas pä jaqer säna, ukat kuntï uka jaqenakajj sapkäna ukajj kunsa uñachtʼayäna?

⁹ “Nayraqatajj Diosan reinopa munapjjam” sasin Jesusajj arkirinakapar ewjjtʼkäna uka qhepat kunas pasäna uka toqet jichhajj amuytʼañäni. Kunanaksa jakäwisan nayrar uchasktan ukaw kunas chuymasan utji uk amuytʼasiñ yanaptʼarakistani. Lucas librojj uka toqet akham sasaw parlañ qallti, Jesusajj “jan ajjsarasaw” Jerusalenar sarañ amti sasa. Uka markan wal tʼaqhesiñapsa yatiskchïnjja, Jesusajj jan pächasisaw saräna. Ukat apostolanakapampi “thak sar[kasajja]”, mä jaqeruw akham säna: “Arkita” sasa. Jupajj arkañsa munkchïnjja, akham sänwa: “Tata, nayraqat awkejjar imtʼasinjjä ukat arkäma” sasa. Ukat yaqha jaqerojj “Arkita” sasaw Jesusajj sarakïna, uka jaqesti “Tata, arkañ munsma, ukampis nayraqat utankirinakat khitharpayasinim sita” sasaw sarakïna (Luc. 9:51, 57-61). Kunjamtï amuyktanjja, uka jaqenakajj Jesusar jan arkañ laykojj kunaymanikwa parlapjjäna, ukampis Jesusajj taqe chuymaw Diosan munañap phoqañ amtäna. Uka jaqenakajj janiw Diosan Reinop nayraqat thaqapkänti, jan ukasti kuntï munapkäna ukanakwa nayraqat lurañ amtapjjäna. Ukhamatwa Diosar taqe chuyma serviñ jan munapjjatap uñachtʼayapjjäna.

10. 1) ¿Kunjamsa Jesusar arkañ munatas uñachtʼayawaytanjja? 2) ¿Lucas 9:62 qellqatan Jesusajj kamsänsa?

¹⁰ Uka jaqenakat sipansa, jiwasajj jan pächasisaw Cristor arkañ amtawaytanjja, ukat jichhürkamas Jehová Diosar sapür yupaychaskaktanwa. Ukhamatwa Diosar munasitas uñachtʼaytanjja. Ukampisa sumsa cristianjam taman phoqaskstanjja, chuymasajj mä jan walinwa uñjasispa. ¿Kunäspas uka jan walejja? Lucas libronwa Jesusajj akham sasin qhanañchi: “Khititejj arado kattʼatäkasin qhepar uñtki ukajja, janiw Diosan reinopatakejj askïkiti” sasa (Luc. 9:62). ¿Kunsa uka arunakat yateqsna?

“SUMÄKIS UK[PUNI] LURAPJJAM”

11. ¿Jesusajj parlkäna uka qhollirirojj kunas pasäna, ukat kunatsa?

¹¹ Jesusan uñachtʼäwipajj Lucas 9:62 qellqatan jikjjataski ukajj kamsañsa muni uk sum amuytʼañatakejj mä qhollirirus uñjksna ukham amuytʼañäni. Qhollkasajja, kunjamsa utapan familiapasa ukat amigonakapas wali kusisita musicampi manqʼasisipkpacha ukäkwa lupʼiski. ¡Ukatwa jupanakampïñ wal muni! Sum qhollkasawa kunanaktï jaytaniwaykäna ukanakar kuttʼañ wal munjje, ukatwa chuymapampi atipayasisajj “qhepar uñ[ti]”. Satañ tiempotakejj walis lurañajj utjaskchejja, kuntï chuymapan munki ukampiw apayasi ukat janiw yapunitakis sum phoqjjeti.

12. ¿Lucas 9:62 qellqatan Jesusajj parlkäna uka qhollirejj jichhürunakan khitinakampi sasispasa?

¹² Jichhürunakanjja, khitinakas uka qhollirimpi sasispa uk amuytʼañäni. Qhollirejj mä cristianompi sasispawa, jupajj taman sumsa phoqhaskchejja, chuymapaw jan waltʼayirjamäspa. Jupajj Diosan arunakap yatiyirisa ukat tantachäwinakarus jan qheparasas saraskchejja, kunanakatï akapachan utjki ukanakat kawkïrinakatï gustki ukanakwa chuymapan wal muni, ukatwa ukäk lupʼiski. Walja maranakas Jehová Diosar taqe chuyma yupaychawaykchejja, kunanakatï akapachan utji ukanakamp kusistʼañ wal munasaw  chuymapampi apayasi, ukhamatwa “qhepar uñ[ti]”. Ukat Diosan arunakap yatiyañajj walis utjaskchejja, janiw “jakañ arunak” jaqenakar yatiyirjamäjjeti, ukat janirakiw cristianjamajj sum phoqjjeti (Fili. 2:16). Ukham lurasajj “Yapuni[ru]”, mä arunjja, Jehová Diosar jaytañajj llakkañapunïspawa (Luc. 10:2).

13. ¿Kunjamsa Jehová Diosar taqe chuyma servitas uñachtʼaysna?

¹³ Kuntï yateqawayktan ukajj qhanawa. Tantachäwinakar sarañasa, yatiyir sarañasa ukat cristianjamajj kuntï lurañasäki ukanak phoqañas wali askiwa. Ukampisa, Diosaru taqe chuyma serviñajj janiw ukanak phoqañakïkiti (2 Cró. 25:1, 2, 27). Mä cristianojj kunanaktï jaytawayki ukanak chuymapan munaskakispa, mä arunjja, kunanakatï akapachan utjki ukanak munaskakispa ukhajja, Jehová Diosampi sum apasiñwa aptʼasispa (Luc. 17:32). ‘Diosan Reinopataki askïñatakejja’, “jan wali lurañanakarusti uñisipjjarakim, sumäkis ukrak lurapjjam” siski uka ewjjtʼar istʼañasapuniwa (Luc. 9:62; Rom. 12:9). Ukhamasti, Supayan apnaqat akapachan kunanakatï utjki ukanakat taqeniw wal amuyasiñasa, ukanakajj sumäskchisa ukat munkañäkchisa, janipun ukanak laykojj Jehová Diosaru taqe chuyma serviñ aptʼasiñäniti (2 Cor. 11:14; Filipenses 3:13, 14 liytʼasiñapawa).

AMUYASIPJJAPUNIÑÄNI

14, 15. 1) ¿Kunampis Supayajj Jehová Diosar serviñat jitheqtayistaspa? 2) Kunjamsa Supayajj Diosat jitheqtayistaspa uk mä uñachtʼäwimp qhanañchtʼma.

¹⁴ Jehová Diosaru wal munasisaw jakäwis Jupar katuyasiwaytanjja. Ukhatpachaw Diosar taqe chuyma serviskakiñ amtawaytanjja. Ukhamäkchisa, Supayajj kunjamatsa chuymas jan waltʼayañ munaskakiwa (Efe. 6:12). Supayajj Jehová Diosar yupaychañ jan mäki jaytirjamätas inas sum amuychi. Ukampis kunjamsa “akapach yänaka[mpejj]” Jehová Diosar taqe chuyma serviñat jukʼat jukʼat jitheqtayispa uk sum yati (Marcos 4:18, 19 liytʼasiñapawa). ¿Kunjamsa Supayajj ukham lurasin waljanir Diosat jitheqtaypacha?

¹⁵ Uk sum amuytʼañatakejja, mä costalan pusi arroba chʼoqe utjkiristam ukham amuytʼañäni. Yapu lurañamkamaw phuchhamajj pusi chʼoqe iraqtʼasin phaytʼasis manqʼasi. Utar purjjasajja,  ¿qhawqha chʼoqes iraqata uk amuyasmati? Janiw amuykasmati. Qhepürusti phuchhamajj sojjta chʼoqe iraqtʼasiraki. ¿Jumajj amuyasmati? Janirakiw amuykasmati. ¿Kunatsa? Kunattejj jukʼat jukʼatwa chʼoqejj iraqatänjja, ukatwa jumajj iraqatätap jan amuyktati. Ukhamarakiw Supayajj akapachampejj Jehová Diosar taqe chuyma serviñat jukʼat jukʼata jan amuykayaki jitheqtayistaspa (Mat. 24:42; 1 Ped. 5:8).

DIOSAT MAYISIÑAJJ WALI WAKISKIRIPUNIWA

16. ¿Kunanakampitï Supayajj aynachtʼaykistaspa ukanakat amuyasiñatakejj kunas yanaptʼistaspa?

¹⁶ ¿Kunanakampitï Supayajj aynachtʼaykistaspa ukanakat amuyasiñatakisa ukat Jehová Diosaru taqe chuyma serviskakiñatakisa kunas yanaptʼistaspa? (2 Cor. 2:11.) Jehová Diosat mayisiñaw yanaptʼistani. Apóstol Pablojja, “Supayan kʼari arunakaparu atipjañataki” suma saytʼatäpjjam sasaw cristianonakar chʼamañchtʼäna. Ukat akham sasaw ewjjtʼarakïna: “Akanaksti oracionampipuni lurapjjam, Diosar mayisina qollan ajayu toqe. Uk lurañatakisti jankʼakïpjjam” sasa (Efe. 6:11, 18; 1 Ped. 4:7).

17. ¿Jesusajj kunjamtï Awkipat mayiskäna ukajj kunsa yatichistu?

¹⁷ Supay contra saytʼatäñatakejja, Jesusatwa yateqasiñasa. Jupajj Awkipatpunwa oracionan yanap mayisirïna, ukaw Diosaru taqe chuyma serviñ munatap uñachtʼayäna. Jiwayañatak janïr katuntapkäna uka arumajj kunjamsa Jesusajj Awkipat mayisïna uk amuytʼañäni. Lucasajj akham sänwa: “Wal tʼaqheskasasti, jukʼamp chʼamampiw oración luräna” sasa (Luc. 22:44). Ukat nayrajj ukham chʼamampis Awkipat mayisirïkchïnjja, uka arumajj jukʼamp yantʼataw uñjasiñapäna, ukatwa “jukʼamp chʼamam[pi]” oräna ukat Awkipajj istʼarakïnwa. Ukhamasti, Diosat mayisitanakasajj janiw sapa kuti pachpa chʼamampipunïkiti, ukwa Jesusan mayisitapajj amuytʼayistu. Ukhamasti, sinti yantʼanakan uñjaskañäni ukat Supayas jan sintʼasis wal yantʼistani ukhaw “jukʼamp chʼamam[piw]” yanaptʼap Jehová Diosar mayisiñasa.

18. 1) ¿Kunsa sapa maynejj jisktʼasiñasa, ukat kunatsa? 2) ¿Kunanakas chuymasan sum jikjjatasiñatakejj yanaptʼistaspa? ( 16 janankir recuadro uñjjattʼäta.)

¹⁸ ¿Kunatakis oracionasajj yanaptʼistani? Apóstol Pablojj akham sänwa: “Taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa” sasa (Fili. 4:6, 7). Chuymatpacha ukat sapa kutiw orañasa, ukaw Jehová Diosar taqe chuyma serviskakiñatakejj yanaptʼistani (Luc. 6:12). Ukatwa sapa maynejj akham sasin jisktʼasiñasa: “¿Chuymatpacha ukat sapa kutiti Jehová Diosat mayisisktjja?” sasa (Mat. 7:7; Rom. 12:12). Uka jisktʼarjamajj kamschiñäniy ukaw kunjam chuymampis Jehová Diosar yupaychasktan uk amuytʼasiñ yanaptʼistani.

19. ¿Jehová Diosar taqe chuyma yupaychaskakiñatakejj kun lurañsa amtäta?

¹⁹ Kunjamtï yatjjatawayktanjja, kun lurañas jiwasatakejj nayranki ukaw Jehová Diosarojj kunjam chuymampis yupaychasktan uk amuyasiñatakejj yanaptʼistani. Diosar taqe chuyma serviskakiñ amtawayktan ukampi phoqaskakiñatakejja, kunanaktï Jupar serviñatak apanukuwayktan ukanakar kuttʼañ munañata amuyasiñasawa ukat Supayan yantʼanakapatsa wal amuyasiñasaraki. Ukhamasti, janipuniw kunäkipansa Diosar taqe chuyma serviñat jitheqtañäniti (Lucas 21:19, 34-36 liytʼasiñapawa). Ukat Davitjamarakiwa “chuymajarusti sutim waqaychir [yupaychiri] tukuyam” sasin Jehová Diosar sapa kuti mayisiñasa (Sal. 86:11).

[Jiskt’anaka]

[16 janan recuadropa]

KUNANAKAS ‘CHUYMAS IMAÑ’ YANAPTʼISTU

Kunjamtï yaqhep luräwinakajj cuerposan kʼumaraki jikjjatasiñatak yanaptʼkistojja, ukhamarakiw chuymasan sum jikjjatasiñatakejj akanak lurañajj yanaptʼistu:

1 Manqʼasiña. Kunjamtï kʼumaräñatakejj sum alimentasiñajj wakiskejja, ukhamarakiw mä cristianojj Bibliat sapaki yatjjatasa, lupʼikiptʼasa ukat tantachäwinakar sarasa Diosar serviskakiñatak chʼamañchtʼasiñapajj wakisi (Sal. 1:1, 2; Pro. 15:28; Heb. 10:24, 25).

 2 Ejercicio luraña. Kʼumaräñatakejja ejercicionaka, mä arunjja, gimnacianaka sapa kuti lurañaw wakisi. Mä cristianotakejj ukhamarakiw Diosan arunakap yatiyir sarañapapunejj wakisi, awisajj inas jukʼamp chʼamachaschini, ukham lurasaw chuymapan sumak jikjjatasini (Luc. 13:24; Fili. 3:12).

3 Jan sinti qariña. Sinti qarktan ukhajj cuerposajj aynachtʼiwa, ukhamarakiw mä cristianon chuymapajj aka jan wali pachan jakasa ukat trabajisajj aynachtʼat jikjjatasispa. Ukanakampi jan aynachtʼañatakejja, jilat kullakanakamp jukʼamp chikachasiñaw yanaptʼani, jupanakajj maynit mayni yanaptʼasirïpjjewa ukat Jehová Diosarus taqe chuymaw servipjjaraki (Sal. 119:63; Pro. 13:20).