“Amuyasipjjam fariseonakan levadurapata”

“Amuyasipjjam fariseonakan levadurapata [...], kʼari chuymanakapata” sasaw Jesusajj discipulonakapar ewjjtʼäna (Luc. 12:1). Uka arunakampejj kamsañsa munäna uk Mateo librow akham qhanañchi: “Fariseonakan [...] yatichäwipatwa parläna” sasa (Mat. 16:12).

Biblianjja, awisajj levadurajj jan wali luräwinakampi sasiwa. Cheqas fariseonakan kʼari yatichäwinakapasa ukat luratanakapas jupanakar istʼir jaqenakarojj mayjtʼayänwa. ¿Kunatsa yatichäwinakapajj jan walipunïnjja?

1 Jan juchani jaqëpkaspas ukham amuyasipjjäna ukat aleq jaqenakarus wal jiskʼachapjjäna

Mayni pachpa suma jaqe tukuñat Jesusajj mä uñachtʼäwipan parlkasajj akham sänwa: “Fariseojj saytʼasisin Diosat mayisïna, akham sasa: ‘Oh Dios, yuspagaransmawa nayajj janiw yaqhanakjamäkti, lunthata, jan wali jaqe, wachoqa juchan sarnaqeri, janirakiw aka impuesto apthapir jaqjamäktsa. Nayajj semananjja pä kutiw ayunta, churaraksmawa sapa tunkat maya kuntejj jikjjatta ukanakata’ sasa. Ukampis impuesto cobrirejj jayaruwa qheparjjäna, janirakiw alajjpachar uñtañs munkänti, jan ukasti jupapachakiw chuymap leqʼesïna, sarakïnwa: ‘Oh Dios, naya juchararat khuyapayasita’ sasa” (Luc. 18:11-13).

“Impuesto cobrirejj” altʼat chuymanïtap Jesusajj askit uñjäna. Kunattejj akham sänwa: “Aka impuesto cobririw Diosan perdonata utaparojj kuttawayjjäna; fariseosti janiwa. Khititejj jachʼa jachʼa tukki ukajja, jiskʼar tukuyatäniwa, jiskʼar tukki ukasti jachʼar aptatäniwa” sasa (Luc. 18:14). Impuesto cobririnakajj jan wali jaqet uñtʼatäpkchïnsa, Jesusajj jupar istʼapkäna ukanakar yanaptʼañatakiw chʼamachasïna. Impuesto cobririnakatjja, Mateompi Zaqueompiw arkirip tukupjjäna.

Kuns sum lurtʼañ yatitasata, taman lurañanak katoqatasata ukat mayninakan pantjasitanakapa jan ukajj ukhamanak uñjasaw awisajj jachʼa jachʼa tuksna. Jiwasatï ukhamätas amuyastanjja, jankʼakiw uka amuyunak apanukuñasa. Bibliansti siwa: “Khitintejj munasiñajj utjki ukajj llampʼu chuymaniwa, suma jaqewa, janiw envidiasirïkiti, janiw jachʼa jachʼa tukurïkiti. Janiw kuna jan walsa lurkiti, janirakiw kunsa jupatakiki munirïkiti, janiw coleraskiti, janirakiw colerasitapsa imjjäsiskiti. Janiw kunatejj jan walïki ukatjj kusisiñ yatkiti, jan ukasti kunatejj cheqapäki ukat kusisiñ yati” (1 Cor. 13:4-6).

“Cristo Jesusajj aka oraqerojj juchararanakar qhespiyiriw juti” sasaw Pablojj säna, ukjjarojj akham sarakïnwa: “Ukanakatsti nayaw nayrïrïtjja” sasa (1 Tim. 1:15). Jiwasajj Pablot yateqasiñasawa.

Amuykiptʼañataki:

¿Juchararätajät Jehová Diosakipuniw khuyapayasiñapat qhespiyitani sasin amuyasiskti? ¿Jan ukajj Jehová Diosar walja maranak servitajäta, taman walja lurañanak katoqatajata ukat kunsa sum lurtʼañ yatitajätti jachʼa jachʼa tuktjja?

  2 Fariseonakajj jupanakakis Diosar sum yupaychapkaspa ukham amuyayañ munapjjäna. Suma jaqet uñtʼatäñ munapjjäna, ukat wali sum aruntayasiñ munapjjarakïna.

Jesusasti sänwa: “Taqe kuns lurapjjewa jaqen uñjayasiñatakiki, munapjjarakiwa amparanakaparu, paranakaparu apaña mä qawqha Diosan arunakap jachʼa papelanakaru qellqsuta. Ukhamarakiw jachʼa flecon isinakampi isthapisipjje yaqha jaqenakat sipansa. Manqʼañ horasanakasti suma cheqankañ munapjjaraki, ukhamarak sinagoganakansa jilïrinakan qonuñanakapan qontʼasiñ munapjjaraki. Callenakansti taqe jaqenakampirakiw aruntayasiñ munapjjaraki ‘yatichiri’ sayasiñrak munapjje” sasa (Mat. 23:5-7). ¡Jesusajj janipuniw jupanakjamäkänti! Diosan Yoqapjamajj janis juchararäkchïnjja, wali altʼat chuymanïnwa. Ukat mä waynajj “suma yatichiri” siskäna ukhajja, jupajj akham sänwa: “¿Kunatsa ‘Suma’ sista? Janiw khiti jaqes sumäkiti, jan ukasti Dios sapakiw sumajja” sasa (Mar. 10:18). Mä kutejja, altʼat chuymanïñ yatichañatakiw Jesusajj discipulonakapar kayunakap jareqäna (Juan 13:1-15).

Cheqa cristianojj taqe chuymaw jilat kullakanakar yanaptʼañapa (Gál. 5:13). Irpir chuymanjam taman yanaptʼañ munapki ukanakaw ukhamäpjjañapa. Tama sarayirïñ munañajj walikïskiwa, ukampis mayninakar yanaptʼañatakiw ukhamäñ munañapa. Irpir chuymanïñajj janiw khitirus jachʼar aptkiti ni munañanirus tukuykiti. Tama sarayirinakajj taqeniw Jesusjam ‘altʼat chuymanïpjjañapa’ (1 Tim. 3:1, 6, NM; Mat. 11:29).

Amuykiptʼañataki:

¿Tama sarayirinakarukiti sum uñjtjja, inas ukhamat jupanakamp sum uñjatäñataki jan ukajj taman lurañanak katoqañatakisa? ¿Kunatï jachʼar aptkitaspa ukat sum uñjaykitaspa uka lurañanak jikjjatañatakikiti chʼamachastjja? ¿Mayninakat sipansa jukʼamp aytatäñti muntjja?

  3 Fariseonakan uñstayat leyinakasa ukat costumbrenakasa, Diosan Leyinakap phoqhañ munirinakaruw chʼam qariyäna.

Moisesajj katoqkäna uka Leyinakajja, israelitanakan Jehová Diosar yupaychapjjañapatakïnwa, ukampis janiw sapa mayajj kunjamsa lurasiñapa ukajj sumpun qhanañchaskänti. Sañäni, Leyirjamajj janiw sabadonjja trabajasiñapäkänti, ukampis kunanak lurañas trabajompi sasispa ukat kunanakas lurasiskaspa ukanakjja janiw sum qhanañchkänti (Éxo. 20:10). Ukatwa fariseonakajj sum qhanañchasiñapawa sasin yaqha leyinaka ukat costumbrenak uñstayapjjäna. Ukampis Jesusajj Leyirjamapuniw phoqherïna, janiw fariseonakan uñstayat leyinakaparojj istʼkänti (Mat. 5:17, 18; 23:23). Jan ukasti, Diosajj kunatsa uka Leyinak churäna ukanak sum amuytʼirïna ukat khuyaptʼayasirïñajj wali askïtapwa amuyarakïna. Discipulonakapajj pantjasipkchïnsa, Jesusajj munasiñampiw uñjaskakïna. Amuytʼañäni, katuntapjjañapäkäna uka arumajja, kimsa apostolanakaparuw “janiw ikipjjätati” säna, ukampis walja kutiw ikiskir katjäna. Ukhampachasa munasiñampiw jupanakar akham säna: “Cheqpachansa ajayojj lurañatakejj jankʼakiwa, ukampis janchejj tʼukhawa” sasa (Mar. 14:34-42).

Amuykiptʼañataki:

¿Amtajarukit ukhampun phoqhasiñapa sistjja? ¿Kuntï nayajj siskta ukajj leyïkaspas ukham phoqhasiñapti muntjja? ¿Mayninakarojj sum phoqhapjjañapti maytjja?

Fariseonakampin Jesusampin yatichäwinakapajj kunja mayjasa ukjja sapa mayni sum amuykiptʼañasajj askïspawa, ukhamarak kunan mejorañasas wakisispa uk amuykiptʼasiñas askirakiwa. Cheqas ukham lurañajj wal yanaptʼistani.

[28 janan fotopa]

Fariseonakajj Bibliat apstʼat textonakwa cajitanakar apapjjäna (Mat. 23:2, 5, NM)

[29 janan fotonakapa]

Jachʼa jachʼa tukur fariseonakat sipansa, tama sarayiri jilatanakajj altʼat chuymampiw mayninakar yanaptʼapjje

[30 janan fotopa]

¿Jesusat yateqasisati mayninakar munasiñampi uñjasktanjja?