¿Kunanakas imatäski?

“Colportoräñajj wali sumapuniwa”

KHÄ 1886 maranjja, La Aurora del Milenio mayïr librow Casa Bíblica de Allegheny (Pensilvania, Estados Unidos) ukhat Chicago (Illinois) uka cheqar patak libronak apapjjäna. Uka libronakajj librerianakan aljasiñapwa Charles Taze Russell jilatajj munäna. Ukatsti Bibliat apstʼat qellqatanaka aljiri wali uñtʼata jachʼa tiendaruw La Aurora del Milenio libro jaytapjjäna. Ukampis pä semanatjja, Casa Bíblica satäkäna ukaruw taqpach kuttʼayapjjäna. ¿Kunatsa?

Amuyatajja, evangelistat wali uñtʼat jaqew La Aurora del Milenio libro jupan libronakapampi chika uchat uñjasin colertʼasïna. Ukat akham sänwa: “Janitï aka libronak apsupkätajja, wali uñtʼat compañeronakajämpejj yaqha cheqaruw libronakaj apasjjapjjä” sasa. Qollqe jan aptʼasiñatakiw Aurora sat libronak kuttʼayapjjäna. Ukhamarusa, periodiconakan anuncionak mistuñapataki contratonaksa enemigonakaw saytʼayapjjäna. Ukhamasti, ¿kunjamsa uka libronakajj cheqa yatichäwinak yatjjatañ munapki ukanakar purispänjja?

Colportoranakaw yanaptʼapjjäna, Diosatak sapüru irnaqtʼirinakaw ukham uñtʼatäpjjäna. * 1881 maran Zionʼs Watch Tower sat revistanjja, waranqa jilat kullakanakaw Diosat sapüru yatiyapjjañapataki ukat Bibliat apstʼat qellqatanak aljapjjañapatak wakisi sasaw yatiyäna. Ukat mä qhawqha patakanakakis colportorjam servipkchïnjja, cheqa yatichäwinakajj taqe cheqaruw Bibliat apstʼat qellqatanakampejj purtʼasïna. Ukat 1897 marakamajja, La Aurora del Milenio librojj niya mä millonaw lakirasïna, ukatakejj colportoranakaw jilpach yanaptʼapjjäna. Jupanakat waljanejja, libronaka ukat Zionʼs Watch Tower sat revistanaka aljasin jiltʼki uka qollqempiw yanaptʼasipjjäna.

¿Jan ajjsartʼir colportoranakajj khitinakäpjjänsa? Yaqhepajj qʼajjo wayn tawaqonaka ukat jilïr jilat kullakanaka. Solteronaka, jan wawani ukat wawanakani familianakas utjarakïnwa. Colportor regularanakajja, jurnalaw Diosan arunakap yatiyapjjäna ukat auxiliaranakajj maya jan ukajj pä horaw sapüru yatiyapjjäna. Yaqhepajj usuntatäsasa jan ukajj ukhamanakan jikjjatasisasa janiw colportorapkänti. Ukampisa, 1906 maran apaskäna uka ­jachʼa tantachäwinjja, colportoräñatakejj “janiw wali yatiñanïñasa, wali yatjjattʼatäñasa ni mä angeljam parlañas wakiskiti” sasaw qhanañchasïna.

Aleq jaqenakakiw niya Oraqpachan yatiyapjjäna. Mä jilatajj paqallqo maranakwa 15.000 libronak jaytatäna. Jupajj akham sänwa: “Janiw libronak aljañatakik colportoräkti, jan ukasti, Jehová Diosata ukat cheqa yatichäwinak yatiyañatakiwa” sasa. Mä colportorajj kawkhanakarutï sarkäna uka cheqanakanjja Diosan cheqa yatichäwinakapajj jaqenakan chuymaparuw purtʼäna ukhamatwa Estudiantes de la Biblia sasin uñtʼatanakajj jiljjattaskakïna.

Iglesia pʼeqtʼirinakajj wal jupanakar uñisipjjäna ukat aljañatakik muyurïpkaspa ukhamwa uñjapjjäna. 1892 maranjja, Zionʼs Watch Tower revistan akham sänwa: “Tatitojj altʼat chuymanïpjjatamsa wal chʼamachasipjjatamsa wali askit uñji, ukampis jila parte jaqenakajj janiw ukham uñjapktamti, janirakiw Tatitun khitataparjam uñjapktamti” sasa. Janiw “taqe kunas sumapunïkänti” sasaw mä colportorajj säna. Bicicletata jan ukajj kayukiw sarapjjäna ukatakejj suma zapatonïpjjañapänwa. Ukat qollqe pistʼayasipkäna ukhajja, libronakat manqʼañanak churapjjäma satajj iyaw sapjjerïnwa. Uru jurnala Diosan arunakap yatiyasajja, carpanakaparu, jan ukajj alquilasipkäna uka utanakar kuttʼapjjäna, ukat qaritäpkchïnsa kusisitaw samartʼapjjäna. Qhepatsti “colportoranakatak llantanakani utaw” utj-jjäna, jupanak pachpaw uk lurapjjäna, ukaw qollqe imasiñatakisa ukat tiempo jan ina chʼusar aptʼañatakis yanaptʼäna. *

Jachʼa tantachäwipajj Chicago markan 1893 maran apaskäna, ukanwa colportoranakataki arstʼäwinakajj utjañ qalltawayäna. Ukanwa suma experiencianakasa, kunjamanakatsa Diosan arunakap yatiyasispa ukat wali wakiskir ewjjtʼanakas churasïna. Mä kutejja, Russell jilatajj akhamwa taqe chuyma yatiyirinakarojj ewjjtʼäna: “Alwajj sum manqtʼasiwayapjjäta, chika alwajj mä vaso leche umjjattʼapjjäta ukat wali lupïnejj chʼuchʼu uma umjjattʼapjjäta” sasa.

Kunapachatï colportoranakajj yatiyir sarañataki mä compañero thaqapkäna ukhajja, jachʼa tantachäwinakan qʼello cintaniw sarnaqapjjerïna. Machaq colportoranakajj yatjjattʼatanakampiw jupanakat yateqasiñatak sarapjjerïna. Ukajj wali askïnwa, kunattejj jan yatjjattʼat mä colportorajj akham sasaw ajjsarañat mä warmir säna: “¿Janejjay aka ­libronak munktatejja?” sasa. Ukampisa, uka warmejj munänwa ukat qhepatjja bautisasjjänwa.

Mä jilatajj akham jisktʼäna: “¿Kunas jukʼampi wakiskirejja: walja qollqenïsin yatiyasiskakiñapatak 1.000 dólar sapa mara churaña, jan ukajj colportorjam irnaqtʼañacha?” sasa. Juparojj akham sapjjänwa: “Ukanak luratamjja Tatitojj wali askitwa uñjaspa, ukampis juma pachpa tiempo apstʼasis servisma ukhajj jukʼampi bendicionanak katoqasma” sasa. Mary Hinds sat colportora kullakajja, “ukham servisajj waljaniruw yanaptʼasi” sänwa. Ukat Alberta Crosby kullakajja, ajjsarirïkchïnsa, akham sänwa: “Colportoräñajj wali sumapuniwa” sasa.

Jichhürunakanjja, colportorjam taqe chuyma servirinakan wawanakapasa uka khitinakarutï Bibliat yatichawayapki ukanakasa, jupanakjamarakiw servisipki. Mä colportora jan ukajj precursoratï familiaman jan utjkchejja, ¿janit jumanakat maynejj ukham serviñ amtapkarakisma? Diosataki sapüru irnaqtʼañajj wali sumätapwa uñjarakïta.

[Qhanañchäwinaka]

[31 janan fotopa]

Ghana markan A. W. Osei sat colportora, 1930 maranakana

 [32 janan fotonakapa]

Alaya: Inglaterra markan Edith Keen ukat Gertrude Morris colportoranaka, 1918; aynacha: Stanley Cossaboom ukat Henry Nonkes, Estados Unidos markana, libronak lakiranipkäna uka chʼusa cajonanak jakʼana