Jan waltʼayasir chacha warmitak yanaptʼa

“Casadonakarojja, ordentwa, janiw nayati, jan ukasti Tatituwa.” (1 COR. 7:10, MT.)

¿AKA JISKTʼANAKAR QHANAÑCHTʼASMATI?

¿Chacha warmirojj ‘Diosaw mayachi’ siski ukajj kamsañsa muni?

¿Kunjamsa irpir chuymaninakajj jan waltʼayasipki uka cristiano chacha warmirojj yanaptʼapjjaspa?

¿Kunjamsa Diosan uttʼayat matrimonior uñjañasa?

1. ¿Kunjamsa cristianonakajj matrimonior uñjapjjañapa, ukat kunatsa?

 KUNAPACHATÏ mä cristianojj casaraski ukhajja, Jehová Dios nayraqatanwa arsuwayi, uka arsutapsti janiw ukhamaki uñjañapäkiti, jan ukasti phoqhañapapuniwa (Ecl. 5:4-6). Casarasipki ukanakarojja Jehová Diosaw “mayachi”, kunattejj Jupaw matrimonio uttʼayawayi (Mar. 10:9). Matrimonionakataki leyinak markasan utjki ukajj casadonakar jaljtaykchisa, Jehová Dios nayraqatanjja mayachtʼatäsipkakiwa. Ukatwa janïr cristianökasina, jan ukajj cristianöjjasin casarasipki ukanakajj kunjamtï Diosajj matrimonior uñjki ukham uñjapjjañapa.

2. ¿Kuna jisktʼanakas aka yatichäwin qhanañchasiskani?

² Casadonakajj wali kusisitaw jakasipjjaspa. ¿Ukampis jan waltʼayasiñajj utjaspa ukhajj kun lurañas wakisispa? ¿Wasitat suman jakasipjjaspati? ¿Jan waltʼayasipki uka casadonakatakejj kuna yanaptʼanakas utji?

¿CHACHA WARMEJJ KUNJAMSA SARNAQAPJJANI?

3, 4. ¿Maynitï jan sum ajllisa casarasispa ukhajja kuna jan walinakansa uñjasispa?

³ Kunapachatï cristiano chacha warmejj sum jakasipjje ukhajja, kusisitaw jikjjatasipjje ukat Jehová Diosarus jachʼañchapjjarakiwa. Ukampis jaljtapjje ukhajja, wali llakkañawa. Ukhamasti, khitinakatï casarasiñ amtasipki ukanakajja, qalltatpachaw Diosan ewjjtʼanakaparjam sarnaqañataki chʼamachasipjjañapa. Yaqhep cristianonakajj khitimpis casarasini uk jan sum ajllisajja, chuymas pʼakintata ukat wali llakitaw jikjjatasipjje. Amuytʼañäni, yaqhep wayn tawaqonakajja, kuntï jaqechatäkasin phoqhapjjañapäki ukanak phoqhañatak janïr wakichtʼatäkasaw maynimp uñtʼasjjapjje. Yaqhepasti, Internetnamwa maynimp uñtʼasipjje ukat jankʼakiw casarasipjjaraki ukat anumpi phisimpjamaw jakapjje. Ukat yaqhepajj jaqechasiñatak  uñtʼaskasaw jachʼa juchar purtʼasipjje ukhamatwa chacha warmejj maynit mayni jan respetasis qalltapjje.

⁴ Yaqhep cristianonakajja, Biblian utjki uka ewjjtʼanakar jan istʼasaw Diosar jan yupaychirimpi casarasisajj llakinakan uñjasipjje, kunattejj janiw panpachanejj Jehová Diosar yupaychapkiti (1 Cor. 7:39). Jumatï ukhaman jikjjatastajja, Jehová Diosatwa perdonsa ukat yanaptʼapsa mayisiñama. Ukham pantjasitapat kuna jan waltʼäwinakatï utjki ukanak Diosajj janis askichkchejja, arrepentisipki ukanakarojj aguantañatakiw chʼam churi (Sal. 130:1-4). Ukhamasti, sapürupuni kunatï Jehová Diosar kusisiyki uk lurañatak chʼamachasim ukat “Tatitusti kusisiñapampiw [jumar] chʼamañch[askätam]” (Neh. 8:10).

¿JALJTAÑAMPÏPKI UKHAJJ KUNSA LURAPJJASPA?

5. Chacha warmitï jan waltʼayasis wali llakit sarnaqapjjchejja, ¿kunanak amuyañas jan walïkaspa?

⁵ Chacha warmejj jan waltʼayasisin wali llakit sarnaqapki ukanakajja, inas akham jisktʼaschispa: “¿Jan jaljtañataki chʼamachasiñajati wakisispa? ¡Nayra tiemporuk kuttʼirista, janipuniw jupampi casaraskiristi!” sasa. Ukat inas jaljtañ munasajj akham amtaskchi: “¡Wasitatwa librëjjeristjja! ¿Janit divorciaskiristjja? Janis Biblian kamachinakaparjamäkchejja, ¿jaljtasin janit wasitat kʼuchiki jakaskiristjja?” sasa. Ukhamanak amtañat sipansa, ukat janik ukhamäkaspänti sasin lupʼiñat sipansa, cristianonakajj Jehová Diosan yanaptʼap mayipjjañapa ukat ukarjam lurañatakiw chʼamachasipjjañapa.

6. Jesusan arunakapajj Mateo 19:9 qellqatan jikjjataski ukajj kamsañsa muni uk qhanañchtʼma.

⁶ Mä cristianotï divorciaschejja, Bibliarjamajj inas wasitat jan casaraskchispati. Jesusajj akham sänwa: “Khititejj warmiparu jan wachoqa juch lurkipana apanukojja, ukat yaqhampi casarasirakejja, uka jaqejj wachoqa juchwa luri” sasa (Mat. 19:9). “Wachoqa jucha” sasinjja casadöcasin yaqhampi sarnaqaña ukat yaqha qʼañu luräwinakan sarnaqaña sañ muni. Ukatwa maynejj adulterio jucha jan utjkipan divorciasiñ munchi ukhajj oración luras sum amuytʼasiñapa.

7. ¿Cristiano chacha warmejj jaljtapki jan ukajj divorciasipki ukhajj kunsa mayninakajj amuyapjjaspa?

⁷ Mä chacha warmejj jaljtapjje jan ukajj divorciasipjje ukhajja, Diosamp jan sum apasitapwa uñachtʼayapjje. Apóstol Pablojj akham sänwa: “Ukampis maynitejj utapjja jan sum apnaqañ yatkchi ukajja, ¿kunjämrak Diosan iglesiap [jan ukajj tamap] sum apnaqaspasti?” sasa (1 Tim. 3:5). Kunapachatï panpachanejj cristianöpjjtwa sapki ukat jaljtapjje jan ukajj divorciasipjje ukhajja, khitinakatï jupanakar uñjapki ukanakajja, janiw yatiyapki ukarjam sarnaqapkiti sasaw amuyapjjaspa (Rom. 2:21-24).

8. ¿Diosar serviri chacha warmitï jaljtaña jan ukajj divorciasiñ amtasipkchejja, kuna jan walis pasaskpacha?

 ⁸ Cristiano chacha warmitï Biblian ewjjtʼanakapar jan istʼas jaljtaña jan ukajj divorciasiñ amtasipkchejja, Diosar yupaychañan aynachtʼasipkatapwa uñachtʼayapjje. Inas jupanakat maynejj jan ukajj panpachanis Diosan ewjjanakap jan istʼas sarnaqasipkchi. Jupanakatï Jehová Diosar ‘taqe chuyma’ confiyapjjchejja jan waltʼäwinak utjki ukanakjja askichirjamäpjjañapawa (Proverbios 3:5, 6 liytʼasiñapawa).

9. ¿Jan jaljtañatak chʼamachasipki uka cristianonakajj kuna askinaksa jikjjatawayapjje?

⁹ Niya jaljtañampïsipkäna uka chacha warminakatjja waljaniw jan waltʼäwinakap askichasin sumak jakasjjapjje. Jan jaljtañataki chʼamachasiwayapki uka cristianonakajj askinakwa jikjjatawayapjje. Kunapachatï panpachani Diosar jan yupaychapki ukhaw ukajj pasaspa. Apóstol Pedrojj akham sasaw qellqatayna: “Jumanakajj warminaka, chachanakamar istʼasa sarnaqapjjam, ukhamata inas kawkïri chachas jan Tatitur iyawskchi ukajj jumanakan sarnaqäwinakam toqe Tatitutaki jikjjatatäñapataki jan kuna arumpisa, jan ukasti jumanakan suma sarnaqatam uñjasaki” sasa (1 Ped. 3:1, 2). Diosar jan serviri chachasa jan ukajj warmisa, chachapan jan ukajj warmipan sum sarnaqatap uñjasaw Jehová Diosar yupaychjjaspa. Ukat kunapachatï casadonakajj jan waltʼäwinakap askichasin nayrar sartasipkaki ukhajja, Jehová Diosaruw jachʼañchapjje, ukat warmitakisa chachatakisa ukat wawanakapatakisa wali kusiskañarakiwa.

10, 11. ¿Kuna jan waltʼäwinakas chacha warmi sarnaqañan utjaspa, ukampis khitin yanaptʼapatsa mä cristianojj jan pächasiñapäki?

¹⁰ Diosar kusisiyañatakejja, soltero jilat kullakanakajj waljaniw mä cristianompiki casarasipjje. Ukampisa, awisajj mä akatjamatwa jan waltʼayasiñajj utjaspa. Chachatsa warmitsa, awisajj jan walinakan uñjasisaw chuym usuyasisin wal llakisipjje, ukat janiw sumsa amuytʼasjjapjjeti. Jan ukajj inas jupanakat maynejj Diosan arunakap jan yatiyjjchiti. Diosar taqe chuyma yupaychiri ukat wawani Lidia * kullakat amuytʼañäni, jupasti jan kun kamachtʼirjamaw kunjamsa esposopajj jukʼat jukʼat Diosan markapat jayarstʼaskäna ukat tamatsa jaqsuyasïna uk uñjäna. Ukhaman uñjasisajj inas mä cristianojj matrimoniopan tukusiskatap amuyasin jaljtañ amtchispa, ukampis ¿kunsa lurañapa?

¹¹ Inas jumajj akham jisktʼaschisma: “¿Kunas kunäpan jan jaljtañatak chʼamachasiskakiñajäspati?” sasa. Janiw khitis kunsa lurañamäki uk sapkiristamti. Jan waltʼäwinsa jikjjataskchïtajja, janiw jankʼaki jaljtañajj wakiskaspati. ¿Kunatsa? Kunattejj Jehová Diosajj khitinakatï matrimoniopan phoqhañ layku tʼaqhesipki ukanakarojj wali askitwa uñji (1 Pedro 2:19, 20 liytʼasiñapawa). Ukat matrimoniopan jan waltʼäwinakap askichañatak taqe chuyma chʼamachasipki uka cristianonakarojj Jehová Diosajj Arupampi ukat qollan ajayupampiw yanaptʼi.

YANAPTʼAÑATAKEJJ JANKʼAKÏPJJEWA

12. ¿Irpir chuymaninakarutï yanap mayiñänejja kunsa jupanakajj jiwasat amuyapjjani?

¹² Chacha warmitï jan waltʼayasipjjstajja, wali experienciani cristianonakaruw yanap mayisma. Irpir chuymaninakajja, munasiri  awatirinakjamäpjjewa ukat wali munasiñampiw Biblian ewjjtʼanakaparjam yanaptʼapjjätam (Hech. 20:28; Sant. 5:14, 15). Chacha warmi sinti jan waltʼayasitanakam yatiyatamata ukat yanaptʼa mayitamat janis respetjjapjjeristam ukham janiw amuyañamäkiti. Jan ukasti, kunatï Jehová Diosar kusisiyki uk lurañ munapjjatam amuyasajj jukʼampiw munasipjjätam ukat yanaptʼapjjarakïtam.

13. ¿1 Corintios 7:10-16 qellqatan kuna ewjjtʼanaksa jikjjattanjja?

¹³ Kunapachatï Diosar jan serviri chachani jan ukajj warmini cristianojj irpir chuymaninakar yanaptʼa mayki ukhajja, Pablon ewjjtʼanakaparjamaw irpir chuymaninakajj yanaptʼapjje. Pablojj akham sänwa: “Khitinakatejj casadöjjapjje ukanakarojj sistwa warmejj jan chachaparojj apanukpati. Akasti Diosan mandamientopawa, janiw nayan arojjakïkiti. Ukampis mä warmitejj chachapar apanuku ukajja, sapakiw jakjjañapa, jan ukajj pachpa chachapampiw wasitat chikjjañapa. Ukhamaraki chachajj janiw warmipampejj jaljtañapäkiti [...]. Iyawsiri warmi, ¿kunjämatsa jumajj yatta jan iyawsiri chachamaru qhespiyañjja? Ukhamaraki iyawsiri chacha, ¿kunjämatsa jumajj yatta jan iyawsiri warmimaru qhespiyañjja?” sasa (1 Cor. 7:10-16). Diosar jan servir chachasa jan ukajj warmisa Jehová Diosan serviripäjje ukajj mä bendicionapuniwa.

14, 15. ¿Kuna jan walinak utjipansa maynejj jaljtañ amtaspa, kunatsa Diosar oracionan maytʼasisajj sum amuytʼasiñapa?

¹⁴ ¿Kuna jan walinak utjipansa mä kullakajj “chachaparojj apanu[kuspa]”? Yaqhepajja, chachapajj familiar jan manteniñ munjjatapata, sinti nuwasirïtapata, jan ukajj Diosar jan yupaychañapataki wal jarkʼatapatwa jaljtapjje.

¹⁵ Jaljtaniti janicha ukjja sapa mayniw amtjjañapa. Ukampisa, cristiano chachasa jan ukajj warmisa, Jehová Diosaruw oracionan mayisiñapa ukat ukarjamaw sum amuytʼasiñapa. Sañäni, ¿Jehová Diosar jan sum yupaychjjatapatjja Diosar jan servir chachapati jan ukajj warmipat juchani? ¿Jan ukajj cristianöki ukakicha Bibliat jan yatjjatjjasina ukat tantachäwinakaru ukhamarak Diosan arunakap yatiyir jan sarjjatapat aynachtʼaski?

16. ¿Kunatsa divorciasiñ jan jankʼaki amtañasäki?

¹⁶ Jehová Diosampi sum apasitasjja wali askitwa uñjtanjja ukat matrimonio uttʼayatapatsa wal yuspäraraktanjja, ukatwa divorciasiñ jan jankʼaki amtañasäkiti. Jehová Diosan Qhanañchirinakapjamajj sutip jachʼañchañatakiw nayraqat chʼamachastanjja. Ukhamasti janipuniw yaqhampi casarasiñ munasakejj jaljtañ amtañasäkiti (Jer. 17:9; Mal. 2:13-16).

17. ¿Kunapachas Diosajj maynir “samarat sarnaqañaru jawsa[spa]”?

¹⁷ Diosar jan yupaychirimpi casarat mä cristianojja, casarasipkäna ukham munasiskakiñatakiw chʼamachasiñapa. Ukampis taqe chuyma  chʼamachasiskipansa Diosar jan servir chachapasa jan ukajj warmipasa jaljtañpun munchejja, janiw jupa pachpajj juchañchasiñapäkiti. Pablojj akham sasaw qellqäna: “Jan iyawsiri chachajj jan ukajj jan iyawsiri warmisa, mä iyawsiri chachatjja jan ukajj mä iyawsiri warmitsa jaljtañpun munchi ukajj jaljtaskpan sam. Ukatsti jilatasa jan ukajj kullakasa librëjjewa, Diosajj samarat sarnaqañaru jawsatap layku” sasa (1 Cor. 7:15). *

JEHOVÁ DIOSAR CONFIYAÑAMAWA

18. Jan waltʼäwinak askichañatak wal chʼamachaskasas jaljtapjjchejja, ¿kuna askinaksa jikjjatapjjaspa?

¹⁸ Matrimonion utjki uka jan waltʼäwi askichañatakejja, Jehová Diosaruw yanaptʼa mayisiñama ukat Juparupuniw confiyañama (Salmo 27:14 liytʼasiñapawa). Lidia kullakan matrimoniopat parlaniwayktan uk amtañäni, jupajj walsa askichañatak chʼamachasiwaykchejja, qhepat divorciasipjjänwa. ¿Ukham chʼamachasisajj inamayakiti tiempop aptʼasiwayi? “Janiwa” sasaw uka kullakajj qhanañchi. Ukat akham saskakiwa: “Khitinakatï chʼamachasitajj uñjawayapki ukanakajja, chʼamañchtʼataw jikjjatasiwayapjje ukat concienciajansa sumakiw jikjjatasta. Ukat janiw ukakïkiti, uka maranakajj phuchhajaruw Jehová Diosar taqe chuyma yupaychañapataki, bautisasiñapataki ukat Diosat jan jitheqtañapatak yanaptʼawayi”.

19. ¿Matrimonion jan waltʼäwinakap askichañataki wal chʼamachasisajj kuna askinaksa jikjjatasispa?

¹⁹ María sat mä kullakajja, Jehová Diosar atinisitapata ukat matrimoniopan jan waltʼäwinak askichañatak wal chʼamachasitapatsa, wali kusisitaw jikjjatasi. Jupajj akham siwa: “Esposojajj janiw familiar manteniñ munkänti ukat nayarojj Diosar yupaychañansa aynachtʼayirjamänwa, ukatwa jaljtañ munayäta. Jan sum amuytʼasis negocionak janïr qalltkipanjja, jupajj irpir chuymanjamaw taman yanaptʼaskäna. Jukʼat jukʼatwa tantachäwinakar jan sarjjänti ukat janiw parlasjjapjjayätti. Terroristanakaw markajan sartapjjäna ukasti walpun sustjitäna, ukatwa taqenit jitheqtjjayäta. Ukat sumpacha amuytʼasisajja matrimoniojan jan waltʼäwinak utjañapatakejj nayas juchanirakiyätwa. Chachajampejj wasitatwa sum parlasjjapjjayäta, Bibliatsa wasitatwa familjamajj yatjjatjjapjjayäta ukat tantachäwinakarus sarjjapjjayäta. Irpir chuymaninakajj wali munasiñampiw yanaptʼapjjetäna. Ukhamatwa chacha warmejj wasitat suman jakasjjapjjayäta, ukat tiempompejja esposojajj mayampiw taman lurañanakampejj yanaptʼjjäna. Jan walinakansa jikjjatasiwayapkstjja, qhepatjja wali kusisitaw jikjjatasiwayapjjta” sasa.

20, 21. ¿Kun lurañatakis chacha warminakajj chʼamachasipjjañapa?

²⁰ Casadöskstansa jan ukajj solteröskstansa, taqeniw Jehová Diosar yanaptʼa mayiñasa ukat confiyañasaraki. Chacha warmi jan waltʼayasiñanak askichañatakejj taqe chuymaw chʼamachasiñasa ukat amtapuniñäni, casadonakajj “janiw paninïkjjapjjeti jan ukasti mayakëjjapjjewa” (Mat. 19:6). Jiwasatï Diosar jan serviri chachanïkasasa jan ukajj warminïkasasa Jehová Diosar taqe chuyma serviskakiñänejja, inas chachasasa jan ukajj warmisasa Diosar yupaychjjarakchispa, ukasti wali kusiskañapunïspawa.

²¹ Kunjamanjjay jikjjatasiskstan ukampis wali amuyumpipuni sarnaqañatak chʼamachasiñäni, ukhamatwa Diosar jan servirinakas sarnaqäwisar wali askit uñjapjjani. Chacha warmi jan waltʼayasiñatï utjchejja, taqe chuymaw Diosarojj yanaptʼa mayisiñasa ukat kuntï lurañ amtasktan uk sumpun amuykiptʼasiñasawa, Biblian utjki uka ewjjtʼanakat lupʼiñasawa ukat irpir chuymaninakarus yanaptʼa mayiñasaraki. Ukat taqe kunat sipansa sarnaqäwisampejj Jehová Diosar jachʼañchañataki ukat Jupan uttʼayat matrimonior repetompi uñjañatak chʼamachasiñasawa.

[Qhanañchäwinaka]

[Jiskt’anaka]

[10 janan qhanañchäwipa]

Jan jaljtañatak chʼamachasiwayapki uka cristianonakajj askinakwa jikjjatawayapjje

[9 janan fotopa]

Jan jaljtañataki chʼamachasipki uka chacha warminakarojj Jehová Diosajj bendiciwa

[11 janan fotopa]

Diosan markapanwa yanaptʼatasa ukat chuymachtʼatas jikjjatastanjja