¿Jehová Diosar jachʼañchasktati?

“Diosajjay, Tatitojjay [...] sutimarusti wiñayatakiw jachʼañchä.” (SAL. 86:12.)

¿KAMSASAS QHANAÑCHTʼASMA?

¿Kunatsa juchararäkasas Jehová Diosar jachʼañchsna?

Oracionan maytʼasiñasa ukat tantachäwinakasa, ¿kunjamsa Jehová Diosar jachʼañchañatak yanaptʼistu?

¿Kunas kunäpan Jehová Diosar jachʼañchaskakiñatakejj kunas yanaptʼistaspa?

1, 2. ¿Kunatsa jaqenakajj kunjamas Jehová Diosajj uk uñachtʼaysna?

 NIYA taqeniw awk taykasar uñtasitätanjja, awisajj mä jukʼaksa jupanakjamätanwa. Ukatwa yaqhepajj mä jiskʼa yoqall wawar akham sapjje: “Tatam kikpakipunïtawa” sasa. Mä jiskʼa imill wawarojj akham sapjjarakiwa: “Mamamampejj mä chʼoqet qʼalljatäpkasmas ukhamäpjjtawa” sasa. Ukhamarusa, wawanakajj awk taykapar uñjasaw kun lurañsa yateqasipjje. ¿Jiwasajj janit alajjpachankir Jehová Dios Awkisat yateqaskaraksna? Jupar janis uñjkstanjja, kunjam chuymanisa ukajj luratanakapanwa qhan amuyasi, ukhamarakiw Biblia liyisasa, kuntï liytʼktan ukanakat lupʼisasa ukat Jesusan yatichäwinakapata, sarnaqäwinakapat yatjjatasas Diosarojj sum uñtʼaraksna (Juan 1:18; Rom. 1:20). Ukhamasti taqeniw Jehová Dios Awkisat yateqassna ukat kunjamäkitï Jupajj uk uñachtʼaysna.

² Adanampiru Evampiru janïr lurkasajja, Diosajj jaqenakan Jupjam chuymanïpjjañapsa, Jupar jachʼañchapjjañapsa ukat munañap phoqherïpjjañapsa sum yatïna (Génesis 1:26, 27 liytʼasiñapawa). Cristianjamajja Jehová Dios Awkisatwa yateqasiñasa, ukhamatwa kunjamas Jupajj uk uñachtʼaysna, ukham lurañjja wali askitwa uñjtanjja. Ukat kuna kasta jañchinïskstansa, kuna markatäskstansa jan ukajj qhawqha yatjjattʼatäkstansa, taqeniw Diosar jachʼañchsna. ¿Kunatsa? Kunattejj “Diosatakejj taqe kasta jaqes maya[kiwa]. Jupasti kuna kast jaqerus katoqakiwa, khitinakatejj jupar ajjsarki, ukhamarak aski lurapki taqe ukanakarusa” (Hech. 10:34, 35).

3. ¿Jehová Diosar servisajj kunjamsa jikjjatastanjja?

³ Alajjpachar sarañatak qollan ajayumpi ajllitanakajj Jehová Diosaruw jachʼañchapjje. Jupanakat maynïrejj apóstol Pablowa, jupasti akham sänwa: “Ukatpï jiwasanakajja, ajanunakasajj jan uka velompi imantatäjjatap laykojj mä  espejor uñtatjamaw Tatitun jachʼa kankañapatjja kʼajtanjja [mä arunjja, kunjam Diosasa uk uñachtʼaytanjja]. Ukhamarakiw jiwasajj jukʼampi jukʼampi [‘Jupjam’, NM] tukusktan jukʼampi qhanapajj jiwasankatap layku” sasa (2 Cor. 3:18). Kunapachatï Moisesajj Diosan tunka mandamiento arunakap pä tablan qellqat aptʼasita Sinaí qollut saraqankäna ukhajja, ajanupajj wal kʼajäna, jan ukajj qhanäna, kunattejja Diosaw jupamp parläna (Éxo. 34:29, 30). Cristianonakajj janiw Moisesjam Diosamp parlktanti ukat janirakiw ajanusas qhantʼkiti. Ukampisa, kunapachatï Jehová Diosajj kunjam Diosasa ukat jaqenakatakejj kuna amtanisa ukanak jaqe masisar yatiyktan ukhaw wali kusisitäsajj qhantʼksnas ukhamarakejja. Kunjamtï mä espejojj jayar qhantʼkejja, ukhamarakiw ajllitanakasa ukat yaqha uwijanakasa sarnaqäwisampi ukat Diosan arunakap yatiyasajj espejor uñtat qhantʼtanjja, mä arunjja, kunjam Diosasa uk uñachtʼaytanjja (2 Cor. 4:1). Ukatwa sapa maynejj akham jisktʼasiñasa: “¿Sarnaqäwijampi ukat jan jaytas Diosan arunakap yatiyasajj Jehová Diosajj kunjam Diosas uk uñachtʼayaskti?” sasa.

JEHOVÁ DIOSAR JACHʼAÑCHAÑWA MUNTANJJA

4, 5. 1) ¿Kunatsa taqenejj apóstol Pabljam jikjjatasiraktanjja? 2) ¿Juchajj kunja jan walisa?

⁴ Sarnaqäwisanjja taqe kunanwa Jehová Diosar respetatasa ukat jachʼañchatas uñachtʼayañ muntanjja, ukampis kunatï cheqäki uksa lurañ munkstanjja, janiw ukarjampun phoqktanti. Apóstol Pablos ukhamanwa jikjjatasïna (Romanos 7:21-25 liytʼasiñapawa). Kunatsa ukhaman jikjjatastan ukjja akham sasaw Pablojj qhanañchäna: “Taqeni jucha lurapjjatap laykusti Diosampejj janiw katoqatäpkiti” sasa (Rom. 3:23). Niyas taqeniw Adanan juchap katoqawaytanjja ukatwa juchamp apnaqatätanjja (Rom. 5:12; 6:12).

⁵ ¿Kunas juchajja? Taqe kunatï Jehová Diosan kamachinakap conträki, amtanakap conträki ukat munañaparjam jan sarnaqañäki ukanakawa. Juchajj Jehová Diosatwa jitheqtayistu. Ukat kunjamtï mä jaqerojj flechtʼasin jan waktʼayañapatak kunas pantjaykejja, ukhamarakiw juchajj kunjamas Diosajj uk uñachtʼayañat pantjasiyistu. Awisajj jan amuyasisaw pantjasna, jan ukajj amanutwa ukham luraraksna (Núm. 15:27-31). Juchajj munañaparjamaw apnaqañ munistu ukat ukarakiw Jehová Dios Awkisat jayarstʼayistu (Sal. 51:5; Isa. 59:2; Col. 1:21). Jaqenakat jila partew Jehová Diosat jayarstʼatäpjje, ukatwa kunjamas Diosajj uk jan uñachtʼayirjamäpkiti. Ukhamasti juchjama jaqer jan waltʼayirejj janipuniw utjkaspati.

6. ¿Kunatsa juchararäkasas Jehová Diosar jachʼañchsna?

⁶ Jehová Diosaw “suytʼañ churiri Diosajja”, ukat juchararäkstansa Jupaw mä suytʼäwi churistu (Rom. 15:13). Jesucristo Yoqapar mä sacrificion loqtasaw juchat kutsuyawayjjestu. Kunapachatï jiwasajj uka sacrificior confiytan ukhajja, janiw ‘jukʼampi juchar sirvjjtanti’ ukhamatwa Jehová Diosajj kunjamas uk uñachtʼaysna (Rom. 5:19; 6:6; Juan 3:16). Jiwasatï Diosamp sum apasiskakiñänejja, jichhürunakan Jupajj bendicistaniwa ukat jutïrinsa jan juchaniruw tukuyistani ukat wiñay jakañ churarakistani. Juchararäkstansa Jehová Diosajj janiw yaqhachkistuti, jan ukasti Jupajj kunjamasa uk uñachtʼayirjamätasjja yatiwa. ¿Janit ukajj kusisiykistu?

KUNJAMSA JEHOVÁ DIOSAR JACHʼAÑCHSNA

7. Diosajj kunjamas uk uñachtʼayañ munstanjja, ¿kunsa amuykiptʼasiñasa?

⁷ Jehová Diosar jachʼañchañatakejja, sapa mayniw juchararätas amuyasiñasa (2 Cró. 6:36). Kuna jan walinaksa lurasktan uk niyak amuytʼasajja, ukanak apanukuñatakiw chʼamachasiñasa. Ukhamatakwa Diosar jachʼañchsna. Pornografía sat qʼañunak uñchʼukiñar yatintatäksnas ukham amuytʼañäni, ¿kun lurañasas wakisispa? Irpir chuymaninakampi yanaptʼatäñ  wakisitapwa amuyasiñasa ukat jupanakampiw yanaptʼayasiñasa (Sant. 5:14, 15). Jiwasatï Jehová Diosar jachʼañchañ taqe chuyma munstanjja, yanaptʼwa nayraqat thaqhañasa. Ukhamasti, Jehová Diosan servirinakapajj kamachinakaparjamati sarnaqasktan janicha uk sapa kutiw amuykiptʼasiñasa (Pro. 28:18; 1 Cor. 10:12). Kunjamas Diosajj uk uñachtʼayañ munstanjja, kuna jan walinakarutï chuymasajj apkistu ukanak apanukuñasawa.

8. Juchararäkstansa, ¿kun lurañatakis chʼamachasiñasa?

⁸ Aka Oraqenjja, Jesús sapakipuniw taqe kunsa Jehová Diosar kusisiykir luräna ukat Awkipajj kunjamas uksa sum uñachtʼayarakïna. Jiwasajj janis Jesusjam jan juchanïkstanjja, jupat yateqasisin sarnaqañatak chʼamachasiñasawa (1 Ped. 2:21). Jehová Diosar jachʼañchañataki chʼamachasitasa ukat ukarjam luratasa Jupajj sum yati, ukat bendicirakistuwa.

9. ¿Jehová Diosar jachʼañchañatak chʼamachasipki uka cristianonakatakejj Biblia liyiñajj kunja wakiskirisa?

⁹ Kunjamsa Jehová Diosar sum jachʼañchsna uk amuytʼasiñatakiw Bibliajj yanaptʼistu. Ukatwa Biblia liyiñasapuni ukat kuntï liyktan ukanakatsa lupʼiñasaraki (Sal. 1:1-3). Sapüru Biblia liyiñajja, cristianjamajj kunanakansa mejorañasa uk amuyasiñatakiw yanaptʼistani (Santiago 1:22-25 liytʼasiñapawa). Bibliat jukʼampi yateqtan ukhajja, Diosarojj jukʼampiw confiytanjja ukat jachʼa juchanakar jan puriñasatakis yanaptʼarakistuwa, ukhamatwa Jehová Diosar kusisiytanjja (Sal. 119:11, 47, 48).

10. ¿Jehová Diosar sum serviñatakejj kunjamsa oracionajj yanaptʼistu?

¹⁰ Jehová Diosar jachʼañchañatakejja, “janirak Diosat oracionan mayisiñjja armasipjja[ñäni]ti” (Rom. 12:12). Jehová Diosar sum serviñatakejj Jupatwa yanaptʼa oracionan mayisiñasa. Jupar confiyañatakisa ukat yantʼanakar atipjañatakisa qollan ajayupwa mayisiñasa. Ukatjja Arupat sum yatichañatakisa yanaptʼap mayisiñasarakiwa (2 Tim. 2:15; Mat. 6:13; Luc. 11:13; 17:5). Kunjamtï mä wawajj tatapar atiniskejja, ukhamarakiw jiwasajj Jehová Dios Awkisaru atinisiñasa. Kunapachatï Jupar sum serviñataki yanapa mayktan ukhajja, Diosajj yanaptʼapunitaniwa sasaw confiyañasa. Mayisitanakajajj Jehová Diosar colerayaniwa sasin janipuniw amuyañasäkiti. Jan ukasti, jan pächasisaw Jupar yupaychañatakisa, yuspärañatakisa ukat jan waltʼäwinakan aguantañatakis mayisiñasa. Ukatjja Jupar yupaychkasajj sutip jachʼañchañatakiw yanaptʼapa mayisiñasa (Sal. 86:12; Sant. 1:5-7).

11. ¿Jehová Diosajj kunjamäkitï uk uñachtʼayañatakejj kunjamsa tantachäwinakajj yanaptʼistu?

¹¹ Jehová Diosajja, markapar uñjapjjañapatakejj ‘Amuyasiri Cheqapa Uywataruw’ (MT) uttʼayi (Mat. 24:45-47; Sal. 100:3). Jupanakajja, Jehová Diosajj kunjamasa uk uñachtʼayañasatakiw taqenir yanaptʼañ munistu. Cheqas kunaymanitwa yanaptʼapjjestu, mä yanaptʼajj tantachäwinakawa. Kunjamtï mä sastrejj isi askichtʼarapkistaspajja, ukhamarakiw tantachäwinakajj suma cristianöñatakis askichtʼkistapa ukhamajja (Heb. 10:24, 25). Ukatwa tantachäwinakar tiempoparu puriñajj wakisipuni. Jiwasatï qhepa qhep puriskañänejja, janiw Diosan yatichäwinakap taqpach katoqksnati.

JEHOVÁ DIOSAT YATEQASIÑÄNI

12. ¿Kunjamsa Diosat yateqassna?

¹² Diosajj kunjamäkitï uk uñachtʼayañatakejj Jupat yateqasiñasawa (Efe. 5:1). Kunjamtï Diosajj amuyki ukham amuyasaw Jupat yateqasitas uñachtʼaysna. Jiwasatï munañasaruk sarnaqaskañäni ukhajja, janiw Diosarojj respetjjsnati ukat jiwas pachpaw jan waltʼayasna. Ukhamasti Supayan apnaqat akapachan jakasajja, kunanaktï Jehová Diosajj uñiski ukanak uñisiñasarakiwa ukat kunanaktï Jupajj munaski ukanak munasiñasarakiwa (Amós 5:15; 1 Juan 5:19). Taqe kunsa Jehová Diosar jachʼañchañataki lurañäni ukhakiw Juparojj sum serviñäni, ukajj chuymasankañapapuniwa, janiw armañasäkiti (1 Corintios 10:31 liytʼasiñapawa).

13. ¿Kunatsa juchar uñisiñasa, ukat kunsa lurañasa?

 ¹³ Jehová Diosajj jucharojj uñisiwa, ukhamasti jiwasajj uñisiñasarakiwa. Jiwasatï jucharojj uñisiñänejja, kunanakatï juchar purtʼasiykistaspa ukanakat jayarstʼañasawa. Sañäni: apóstata tukuñajja, mä arunjja, tamat jitheqtjjasin Diosan markap contra saytʼañajj jachʼa juchawa, ukatwa uka juchat jitheqtañasa. Khitinakatï apostatäpki ukanakajj janiw Jehová Diosar jachʼañchapkiti (Deu. 13:6-9). Ukhamasti uka kasta jaqenakatsa ukat cristianötwa sasin Diosar jan respetapki ukanakatsa jitheqtañasawa, familiarasäkchi ukhas janipuniw jupanakampi chikachasiñasäkiti (1 Cor. 5:11). Kuntï yatichkta ukajj janiw cheqäkiti sasin apostatanakampi ukat Diosan markap contra jan walinak parlapki ukanakampi jiskhisiñajj inamayakiwa. Ukat Internetansa libronakansa kunarak yatichapjjesti sasin uñañasa ukat liyiñasa Jehová Diosar yupaychañanwa aynachtʼayistaspa (Isaías 5:20; Mateo 7:6 liytʼasiñapawa).

14. ¿Kunsa Jehová Diosat yateqasiñasa ukat kunatsa?

¹⁴ Munasiñ uñachtʼayasawa Jehová Diosat yateqasiraksna (1 Juan 4:16-19). Maynit maynikama munasiñamp uñjasisaw Jesusan arkiripätassa ukat Jehová Diosar servirïtassa uñachtʼaytanjja (Juan 13:34, 35). Pantjasir chuymanïtanwa, ukatwa awisajj munasiñ uñachtʼayañajj chʼamäspa. Ukhampachasa, munasiri chuymanïñatakiw chʼamachasiñasa. Jiwasatï munasirïñäni ukat cristianjam suma jaqëñäni ukhajja, janiw maynir chuym ustʼaykañäniti, ni jachʼa juchanakarus purtʼaskañäniti (2 Ped. 1:5-7).

15. ¿Munasirïñajj kunjamsa jaqe masisampi sum apasiñatak yanaptʼistu?

¹⁵ Munasiñajj jaqe masisar sum uñjañatakiw yanaptʼistu (Rom. 13:8-10). Casadonakajj chacha warmi wal munasipjjchejja, janipuniw yaqhampejj sarnaqapkaniti. Ukat irpir chuyman jilatanakarutï munasiñäni ukat kuntï taman lurapki ukarus respetañäni ukhajja, ewjjanakapjja taqe chuymaw katoqasiñäni ukat ukarjamaw lurarakiñäni. Wayn tawaqonakatï awk taykapar munasipjjchejja, respetapjjaniwa ukat arunakaparus istʼapjjarakiniwa, ukat janirakiw jupanakat jan walinak parlapkaniti. Jaqe masisarutï munastanjja, respetompipuniw jupanakar uñjañäni ukat janirakiw jachʼa jachʼas tukkañäniti (Sant. 3:9). Tama irpir chuyman jilatanakatï Diosan tamapar munasipjjchejja, munasiñampirakiw uñjapjjani (Hech. 20:28, 29).

16. ¿Diosan arunakap yatiyañatakejj kunatsa munasirïñajj wali askejja?

¹⁶ Diosan arunakap yatiyktan ukhajja, munasiñ chuymanïtasajj qhanäñapawa. Jaqenakajj janis istʼañ munapkchi ukat janirak yäqapkchistojja, Jehová Diosar munasiñatwa arunakap yatiyaskaktanjja. Ukatjja, Diosan Reinopat sum yatiyañatakiw wakichtʼastanjja ukat chʼamachasiraktanjja. Jehová Diosaru ukat jaqe masisarutï munastanjja, janiw jariyatakisa, ni sarakchëjjay kamachkarakiristjja sasin sarañasäkiti, jan ukasti wali askitwa uñjañasa ukat kusisitaw taqe chuyma Diosan arunakap yatiyir sarañasa (Mat. 10:7).

JEHOVÁ DIOSAR JACHʼAÑCHASKAKIÑÄNI

17. Juchararätas laykojja Jehová Diosajj kunjamas uk janiw uñachtʼayksnati, ¿uk yatiñajj kunjamsa yanaptʼistu?

¹⁷ Yaqha jaqenakat sipansa, juchachasiñajj kunja jan walis ukjja sumwa jiwasajj amuytanjja. Ukatwa Jehová Diosar jachʼañchañatakejj jan wali amuyunakas apanukuñataki chʼamachasiñasa. Kuna jan walinak lurañas chuymasan utji uk amuyasiñaw concienciasajj sumäñapatak yanaptʼistani, ukarakiw kuna jan wali amuyunakatï chuymaru ukat pʼeqeru jutkistani ukhajj jankʼaki amuyasiñatak yanaptʼistani (Rom. 7:22, 23). Jaqjamajj janiw chʼamasampikejj jan walinakar atipksnati, ukampisa kunatï askïki uk lurañatakejj Jehová Diosaw chʼam churistani (2 Cor. 12:10).

18, 19. 1) ¿Supayaru ukat sajjranakaparu atipjañatakejj kunas yanaptʼistani? 2) ¿Kun lurañsa taqe chuyma amtañasa?

¹⁸ Maysa toqetjja, Jehová Diosar jachʼañchañatakejj Supay contra ukat sajjranak contraw  nuwastanjja, ukat atipjañatakejj kuna ‘armanaktï Diosajj churkistu ukanakaw’ yanaptʼistani (Efe. 6:11-13). Jehová Dios sapakiw jachʼañchatäñapa, ukampis Supayaw jachʼañchayasiñ wal muni. Ukatwa kunaymanit Jehová Diosat apaqañ munistu. Ukat kunapachatï mä chachasa, warmisa jan ukajj mä wawasa juchararäkasas Jehová Diosar taqe chuyma serviskaki ukat jachʼañcharaki ukhajja, Supayajj mä phenqʼapuniw qʼal aynachtʼi. ¡Diosar taqe chuyma servirinakajj waranqa waranqanïtanwa! Ukhamasti, kunjamtï angelanakajj Jehová Diosar jachʼañchapki ukhamwa jachʼañchañasaraki, jupanakajj akham sapjjewa: “Tata, nanakan Diosajja, jumajj askïtawa jachʼañchäwi, gloria, ukhamarak munañanïña katoqañatakejja. Jumaw taqe kuns ina chʼusat lurtajja, munañamatarakwa taqe kunas jakaskaraki, juman uskutarakiwa” sasa (Apo. 4:11).

¹⁹ Kunas kunäpan Jehová Diosar jachʼañchañ taqe chuyma amtapjjañäni. Cheqpachansa, Jehová Diosar taqe chuyma jachʼañchañataki ukat kunjamäkiti uk uñachtʼayañataki waljani chʼamachasipjjatap uñjasajja, Jupajj wal kusisi (Pro. 27:11). Ukat Davitjamarakiw sistanjja, jupasti akham sasaw Jehová Diosar taqe chuyma qʼochüna: “Diosajjay, Tatitojjay, taqpach chuymajjampiw yupaychäma, sutimarusti wiñayatakiw jachʼañchä” sasa (Sal. 86:12). Jehová Diosaru taqe chuyma servirinakapajja, taqeniw Diosajj kunjamasa uk sum uñachtʼayaña ukat wiñay wiñay jachʼañchañ muntanjja. ¡Ukasti wali sumapunïniwa! ¿Jehová Diosajj kunjamasa uk wiñayatak uñachtʼayañ munasmati? Ukhamächi ukajja, ¿jichjatpachti sarnaqäwimampejj uk uñachtʼayaskta?

[Jiskt’anaka]

[27 janan fotonakapa]

¿Akanak lurasajj Jehová Diosar jachʼañchasktati?