Sarnaqäwi

Jilïrinakaw wal yanaptʼawayapjjetu

Elva Gjerde kullakan arsutaparjama

Niya 70 maranak nayrajja, mä jaqew utar visittʼir jutäna ukat kuntï tatajar sawaykäna ukaw taqe jakäwij mayjtʼayawayi. Uka urut aksarojja, yaqhanakaw yanaptʼawayapjjarakitu. Ukhamarusa wali sumwa jupanakampi apasiwayta ukaw taqe kunat sipansa wali askejja. Kunatsa parlasipksma uk qhanañchtʼapjjäma.

SYDNEY (Australia) markanwa 1932 maran nasiwayta, awk taykajajj Diosan utjatap yatipjjänwa, ukampis janiw iglesiar sarapjjerïpkänti. Diosajj uñjasinktamwa, jan walinak lurätajja, castigätamwa sasaw mamajajj sirïtu, ukatwa Diosarojj wal ajjsarayäta. Ukhampachasa Bibliat wal yatjjatañ munirïta. Tiyajajj sapa semanaw visitir jutiri ukat Biblian utjki uka sarnaqäwinakat parlirïtu, ukatwa jupan jutañapjja wal suyirïta.

Tawaqetäkayäta ukhajja, tatajajj libronakwa liyiri, ukanaksti mä jilïri kullakaw mamajar churatayna. Uka libronakajj wali askïnwa tatajatakejja, ukatwa Jehová Diosan Qhanañchirinakapampi Bibliat yatjjatañatak iyawsäna. Mä kutejja, arumaw tatajajj mä jilatampi Bibliat yatjjatasipkäna, ukat jamasat ischʼukiskatajwa amuyasïna. Ukat wasitat ikir khitañ munkitäna ukhajja, “¿janit jiwasamp qontʼaskaspa?” sasaw jilatajj tatajar säna. Ukürutwa jakäwijajj mayjtʼawayi ukat Jehová Diosampis sum apasiñ qalltawayta.

Ukat mä qhawqha tiempotjja, tatajampejj tantachäwinakaruw sarjjapjjayäta. Ukat jupajj janiw nayrjamäjjänti, janirakiw colerasirïjjänti. Ukatwa mamajampi Frank jilajampejj nänakampi chika tantachäwinakar sarapjjäna. * Puspachaniw nayrar sartasin Jehová Diosan Qhanañchiripjam bautisasiwayapjjta. Ukat walja jilïr jilat kullakanakampiw sum apasiñ qalltawayta, jupanakaw jakäwijan yanaptʼawayapjjetu.

KUNSA LURÄJA UK AMTAWAYTA

Tawaqetäkchiyätsa, jilïr jilat kullakanakampïñ wal munirïta. Alice Place kullakaw familiajar Bibliat yatiyañ qalltäna, jupasti awichaj-jjamänwa. Jupaw yatiyañsa ukat bautisasiñajkam yanaptʼawayitu. 15 maraniw bautisasiwayta.

Ukatjja, Percy ukat Madge [Margaret] Dunham jilïr jilat kullakan amigaparakïyätwa, jupanakaw kuntï jakäwijan lurañajakäna uka amtañatak yanaptʼawayapjjetu. Nayarojj wal Matematicajj gustitäna ukat uk yatichañwa munarakiyäta. 1930 maranakanjja, Percympi Madgempejj Letonia markanwa misioneröpjjatayna. Europa toqenakan Payïri Jachʼa Chʼajjwäwejj qalltkäna ukhajja, Australia markankir Betelaruw invittʼapjjatayna, ukajj Sydney marka jakʼanakanwa jikjjatasïna.  Panpachaniw nayar munasipjjetäna ukat misionerjamajj kuna askinaksa jikjjatapjjatayna ukanakwa cuentʼapjjeri. Ukhamatwa Matemática yatichañat sipansa, Bibliat yatichañajj jukʼamp askïtap amuytʼawayta. Ukatwa, misioneräñatak amtawayta.

Dunham jilat kullakajja precursorañajatakiw chʼamañchtʼapjjetu, ukaw misioneräñajatak yanaptʼitasapänjja. Ukat 1948 maranwa, Hurstville (Sydney) tamankir tunka wayn tawaq jilat kullakanakamp chika precursorjam irnaqtʼañ qalltawayta, uka maranjja 16 maranïyätwa.

Pusi maraw yaqha markanakan precursorjam irnaqtʼawayta, uka markanakajj Nueva Gales del Sur ukat Queensland estadonkapjjänwa. Bibliat nayrïri yateqerijäjja, Betty Law satänwa (casadatjja, Betty Remnant). Jupajj nayat pä mara jilïrinwa ukat wali munasir jaqënwa. Tiempompejja Cowra sat markanwa panpachanejj precursorjam irnaqtʼapjjayäta, uka markajja, Sydney markat Inti jalanta toqer 230 kilometronak sarañankiwa. Ukampis mä jukʼa tiempokis panpachani irnaqtʼawayapjjstjja, jichhakamas amigäsipkaktwa.

Uka qhepatjja, precursor especialjamaw Narrandera markar khitapjjetu, ukasti Cowra markat Inti jalanta aynach toqer 220 kilometronak sarañankiwa. Ukat machaq compañerajajj Joy Lennox (casadatjja, Joy Hunter) kullakänwa. Jupasti taqe chuyma yatiyir precursoränwa, ukat nayat pä mara jilïrirakïnwa. Uka markanjja janiw yaqha jilata kullakanakajj utjkänti. Panpachanejja, Ray ukat Esther Irons sat chacha warmin utapanwa jakapjjayäta, jupanakajj yoqapampi ukat pä phuchhapampi chikaw Bibliat yatjjatañ munapjjäna. Semanpachajja, awkimp yoqampejj marka jakʼanakanwa mä granjan uwijanak uñjapjjäna ukat trigo yapuchapjjäna. Maysa toqetsti, Estherampi pä phuchhapampejj manqʼa aljapjjäna. Domingonakajja, Joy kullakampejj Irons familiataki ukat uka utan qorpachasiri 12 jaqenakatakiw manqʼa phayapjjerïta, jupanakajj ferrocarrilan trabajipjjäna. Ukhamatwa alquiler pagañatak irjjatasipjjerïta. Ukatjja, Irons familiampi Yatiyañataki revistat yatjjatañatakiw mesa qʼomachapjjerïta. Ray, Esther ukat pusi wawanakapampisti cheqa yupaychäwit saytʼasipjjäna, jupanakaw Narrandera taman nayrïr jilat kullakanakäpjje.

Ukat 1951 maranjja, Jehová Diosan Qhanañchirinakapan jachʼa tantachäwiruw Sydney markar sarta. Mä jachʼa carpanwa misioneröñ muniri precursoranakatakejj mä tantachäwi utjäna, ukanjja 300 jilaw tantachasipjjäna. Brooklyn Betelankir Nathan Knorr jilataw parltʼapjjetäna, ukat kunatsa suma yatiyäwinakajj Oraqpachan yatiyasiñapajj wali wakiskiri uk sumwa qhanañchtʼapjjetäna. Kuntï siskäna uk taqeniw wali muspharat istʼapjjta. Tiempompejja, uka precursoranakatjja waljaniw Pacífico del Sur ukat yaqha cheqanakan Diosan Reinopat yatiyapjjäna. 1952 maranjja, Australiankir 17 jilat kullakanakaruw 19 yatichäwiru Galaad escuelar invittʼapjjetu. Misioneräñ munkayäta ukajj 20 maranïkayäta ukhaw phoqhasïna.

CAMBIAÑAJAW WAKISÏNA

Kunanaktï Galaad escuelan yateqawaykta ukajj janiw Bibliat jukʼamp yateqañatakik yanaptʼawaykituti, jan ukasti suma amuytʼasirïñatakiw yanaptʼawayitu, janiw nayrjamäjjayätti. Tawaqösajj taqe kunas sumpun lurasiñapwa munirïta ukat mayninakas ukham lurapjjañapwa munarakirïta. Mä kutejja, Knorr jilatar wayna betelitanakampi pelota anatir uñjasajj walpun muspharta.

Galaad escuelan yatichapkäna uka yatjjattʼat jilatanakajj kunjamsa nayajj amuyayäta uk sumwa amuyapjjpachäna. Ukat wali munasiñampiw jan ukham amuyañajatak yanaptʼapjjetu. Jehová Diosajj  jan pantjasis sumpun phoqhañas jan mayitapjja jukʼat jukʼatwa amuytʼasiwayta. Ukat compañeronakajajj yanaptʼawapjjarakituwa. Mä kutejja akham sasaw mä kullakajj situ: “Elva, Jehová Diosajj janiw mä chicote eqtʼasit uñchʼukinkistuti, ukhamasti jan juma pachpajj jan pantjasis taqe kun sumpun lurañ suyamti” sasa. Uka arunakajj chuymarupuniw purtʼawayitu.

Galaad escuela tukuyasajja, phesqaniruw Namibia (África) markar khitapjjetu. Ukat taqenejja, jankʼakiw 80 jaqenakar Bibliat yatichañ qalltapjjta. Nayatakejja misionerjam uka markankañajj wali sumänwa, ukampisa Galaad escuelankir mä compañerojaruw munayäta, juparusti Suiza markaruw khitapjjäna. Ukhamasti mä mara qhepatjja uka markaruw sarjjta ukat jupampi casarasta. Ukanwa jupampi chikajj tamanak tumptʼirjam yanaptʼapjjayäta.

JAN WALTʼÄWINWA UÑJASTA

Phesqa maraw tamanak tumptʼirjam yanaptʼawayapjjta, ukat Suiza markankir Betelaruw invittʼapjjetu. Ukankañajj wali kusiskañapunïnwa, kunattejj walja jilïr jilat kullakanakaw utjäna ukat Diosar yupaychañ toqetsa suma saytʼatäpjjänwa.

Ukampis mä qhawqha tiempotjja, mä jan waltʼäwinwa jikjjatasta. Esposojajj nayaru ukat Jehová Diosaruw traicionapjjetütu. Ukatjja apanukuwayjjetuwa. Ukajj walpin chuyma ustʼayitu. Janitï Betelankir jilïr jilata kullakanakajj wali munasiñampi yanaptʼapkitasapänjja, janiw nayrar sartkiriskayäti. Kunapachatï parlkayäta ukhajj wali munasiñampiw istʼapjjerïtu ukat sapakïñ munatajjsa respetapjjeriwa. Chuymachtʼkiri arunakapasa ukat kuntï nayatak lurapkäna ukanakasa, jan sinti llakisiñataki ukat Jehová Diosar jukʼampi jakʼachasiñatakiw yanaptʼawayitu.

Ukat kunayman yantʼanak aguantawayir jilïr jilat kullakanakajj kuntï nayrajj sapkitäna ukwa amtasta. Mä kutejja, Madge Dunham kullakajj akham sitänwa: “Elva, Jehová Diosaru servisajja kunayman jan waltʼäwinakanwa uñjasïta, ukampis khitinakarutï wal munaskta ukanakatwa jachʼa yantʼanakajj jutani. Uk pasani ukhajja, Jehová Diosaruw jukʼampi jakʼachasiñama. Juparuw servisktajja janiw jaqenakarojja, uk janipuniw armañamäkiti” sasa. Jan waltʼäwinakan jikjjatasiyäta ukhaw uka ewjjtʼanakajj wal yanaptʼawayitu. Chachajan pantjasitapajj janipuniw Jehová Diosat jitheqtaykitaniti sasaw amtawayta.

Qhepatjja, Australia markaruw kuttʼawayjjta, familiaj jakʼan precursorjam serviñataki. Ukat barcot sarkasinjja, pasajeronakaruw Bibliat yatiyta. Jupanakatjja Noruega markankïr Arne Gjerde sat chachaw sum istʼäna. Ukat qhepatjja Sydney markaruw visittʼir juti. Ukatjja jankʼakirakiw Bibliat yatjjatasin bautisasiwayi. Ukat 1963 maranwa jupampi casarasta, ukat pä mara qhepatjja mä wawanïjjapjjayätwa, Gary sutini.

YAQHA JAN WALTʼÄWIN UÑJASTA

Arnempi Garympi nayampejj wali kusisitaw jakasipjjayäta. Mä qhawqha tiempotjja, Arnejj awk taykajan nänakamp chika jakapjjañapatakiw uta jachʼaptayäna. Ukampisa, sojjta maranak casadosipkayäta ukhaw yaqha jan walin uñjasipjjta: Arnejj pʼeqer canceraniwa sasaw sapjjetu. Walja tiempow radioterapia tratamientompïskäna, ukat nayajj sapüruw hospitalar uñjir sarirïta. Qalltanjja waliptaskänwa, ukampis qhepatjja jukʼampikiw pʼeqet aynachtʼjjäna. Mä qhawqha semanakiw  jakani sasaw sapjjetu. Ukampis Arnejj waliptjjänwa ukat utar kunaw kuttʼanjjäna, ukanwa jukʼat jukʼa waliptañapatak yanaptʼawayta. Tiempompejja wasitatwa sarnaqjjäna ukat tamansa irpir chuymanjam yanaptʼjjäna. Jupajj kʼuchi chuymanïnwa, ukaw waliptañataki yanaptʼawayi, ukat ukarakiw sum uñjaskakiñajatakejj yanaptʼawayitu.

Ukat mä qhawqha maranaka qhepatjja, 1986 maranwa wasitat usuntawayi. Uka tiempotakejj awk taykajajj jiwatäjjapjjänwa, ukhamasti Sydney markat montes Azules sat cheqaruw sarjjapjjta, amigonakajajj ukankapjjänwa. Uka qhepatjja Gary yoqajajj Karin kullakampiw casarasïna, jupasti suma tawaqönwa ukat Diosarus taqe chuymaw yupaychäna. Mä qhawqha phajjsitjja, jupanakampi chikaw mä utar sarjjapjjta. Uka utasti kawkhantï Arnempi nayampi jakapkayäta uka cheqatjja mä qhawqha callenak sarañankänwa.

Arnejj usuntasin 18 phajjsiw ikiñankäna, ukat jupar uñjañatakejj utankakiyätwa. Sapüruw Bibliatsa, qellqatanakatsa pä hora yatjjatayäta, ukanwa chuymachtʼkiri ewjjtʼanak jikjjatayäta. Ukat khitinakatï niya ukhaman jikjjatasipjjatayna uka jilïr jilat kullakanakaw visittʼasajj wal chʼamañchtʼawayapjjetu. Arnejj abril, 2003 maranwa jiwawayjje, jiwatat jaktañajj utjapuniniwa sasaw sirïna.

¿KHITIS WAL YANAPTʼAWAYITU?

Tawaqökayäta ukhajj taqe kunsa sumpuni phoqhapjjañapwa munirïta, ukampisa jakäwinjja, janiw kunjamtï jumajj munkta ukhampun taqe kunas phoqhaskiti ukwa yateqawayta. Jakäwijanjja walja askinakwa jikjjatawayta ukat jan walinakansa jikjjatasirakiyätwa: pä chacha aptʼasiwayta, maynirojj jan wali sarnaqatapata, maynirusti usuntatapata. Jakäwijanjja, waljaniw yanaptʼawayapjjetu ukat chʼamañchtʼawayapjjetu. Ukampis taqenit sipansa “Jilïri chuymani” Jehová Diosaw yanaptʼawayitu ukat jichhas yanaptʼaskakituwa (Dan. 7:9). Jupaw Arupampi askirjam sarnaqañatak yanaptʼawayitu ukat misionerjam serviñsa mä regalökaspas ukham churawayitu. Jan waltʼäwinakan jikjjataskayäta ukhaw nayat khuyaptʼayasisajj ‘chuymachäwipampejj kusisiyitu’ (Sal. 94:18, 19). Ukhamarusa, familiajasa ukat cristiano jilat kullakanakas munasiñampipuniw yanaptʼawayapjjetu. Ukat sapa mayniw aka arunakarjam phoqhawayapjje: “Mä amigojj taqe horasan munasiripuniwa; llakisiñansti mä jiljamaw chuymachasi” (Pro. 17:17). Jupanakat waljanejja jilïrinakapjjänwa.

“Chuymani jaqenakajj suma yatiñanïpjjewa, walja maranaka jakataw jupanakarojj uka yatiñ kankaña churi” sasaw Job chachajj säna (Job 12:12). Jakäwijat lupʼkta ukhajja, uka arunakajj cheqapunïtapwa amuyta. Jilïrinakan suma ewjjtʼanakapaw nayrar sartañatak yanaptʼawayitu ukat jupanakampi suma apasiñaw chʼamañchtʼawayarakitu. Ukham amigonakanïsajj wali kusisitaw jikjjatasta.

Jichhajja 80 maranakanëjjtwa. Ukat kunanakansa nayjam jilïrinakar yanaptʼasispa uksa sum amuyta, ukatwa jupanakar visittʼapunta ukat yanaptʼarakta. Ukat wayn tawaqonakampïñajj wali askirakiw nayatakejja. Jupanakaw chʼamañchtʼapjjetu, ukat jupanakjam kusisitaw jikjjatasirakta. Yanaptʼayasiñataki jan ukajj ewjjtʼayasiñatak thaqhapkitu ukhajja, wali kusisitaw jupanakar yanaptʼasajj jikjjatasta.

[Qhanañchäwi]

[14 janan fotopa]

Joy ukat nayampi, Narrandera markan precursorapkayäta uka marana

[15 janan fotopa]

Suiza markankir betelitanakampïsktwa, 1960 marana

[16 janan fotopa]

Arne esposojaruw uñjaskta