Jupanakajj taqe chuymaw sarapjjäna Ecuador markaru

ITALIA markankir Bruno jilatajj kuns lurani ukwa amtañapäna. Kunattejj colegio tukuyjjäna ukhajja, suma notanakanïtapatjja, yatichirinakapasa ukat familiaranakapasa universidadar sarañapatakiw wal chʼamañchapjjäna. Ukampis Jehová Diosar jakäwip katuyaskäna ukhajja, Diosan munañap lurañaw nayrankani sasaw arsuwayatayna. Ukhamajj ¿kuna amtarus purïna? Jupajj akham siwa: “Kuntï arsuwaykta ukjja phoqhäwa ukat Jumar serviñaw nayrankani sasaw Diosar mä oracionan mayista. Ukatjja janiw mä luräwik sapüru lurañ munkti, jan ukasti yaqh yaqha luräwinakwa lurañ munta sasaw qhan sarakta” sasa.

 Mä qhawqha maranakatjja, Bruno jilatajj Ecuador markaruw sarjjäna. ¿Kunjamakis jichhajj jikjjatasi? Jupajj siwa: “Kuntï Diosar maykayäta ukat sipansa jukʼamp bendicionanakwa katoqta” sasa. Ecuador markar purisajja, jupjam yaqha markat jutir walja wayn tawaqonakampiw jikisirakïna.

JEHOVÁ DIOSAR CONFIYASIR WAYN TAWAQONAKA

Bruno jilatasa ukat walja wayn tawaqonakasa Diosan aka invitacionapar istʼasaw irnaqtʼasipki: “Jichhajj yantʼapjjarakita, nayaw jumanakaru alajjpach ventananak jistʼaranisina walja bendicionanak apayanipjjäma” sasa (Mal. 3:10). Diosar munasipjjatap laykuwa, kawkhantï Diosan Reinopat yatiyirinakajj munaski uka markanakar sarapjje, ukhamatwa chʼamapsa, qollqepsa, tiempopsa apstʼasipjje.

Yaqha markanakar puripjje ukhajja, uka markan “cosecha apthapiñajj waljätapa, ukampis irnaqerinakajj jukʼanikïtapa” jankʼakiw amuyapjje (Mat. 9:37). Alemania markat jutir Jaqueline kullakat parltʼañäni, jupajj wali kusisitaw Ecuador markankir sucursalar akham sasin qellqatayna: “Nayajj Ecuador markanjja, pä mara jilaw Diosatak irnaqaskta, ukat tunka kimsaniruw Bibliat yatichaskta, jupanakatjja pusiniw tantachäwinakar sarasipki. Nayatakejj ukajj wali kusiskañawa” sasa. Canadá markat jutir Chantal kullakajj akham sarakiwa: “Nayajj 2008 maranwa Ecuador markar sarta. Ukatsti, lamar qota jakʼankir lugararuw purta, ukansti mä tamakiw  utjäna. Jichhasti kimsa tamaw utj-jje ukat kimsa tunka jila precursoranakaw utjaraki. Ukat waljanir Biblian yatichäwinakaparjam sarnaqer uñjasajj walpun kusista. Jichhakiw Andes sat qollunak toqenkir mä markaru sarjjta, uka markasti lamar qotatjja 2.743 metronak altonkiwa. Ukanjja 75.000 jaqenakat jilaw jakapjje, ukampis mä sapa tamakiw utji. Jaqenakajj wali sumpun istʼapjje ukat nayajj wali kusisitaw irnaqtʼaskarakta” sasa.

JAN WALTʼÄWINAK ATIPJAPJJE

Yaqha markan servktan ukhajja, jan waltʼäwinakajj utjapuniwa. Yaqhep wayn tawaqonakajj janïr markapat mistkasaw jan waltʼäwinakan uñjasiwayapjje. Estados Unidos markat jutir Kayla kullakajj akham amti: “Yaqhep jilat kullakanakajj yanaptʼañ munasaw awisajj aynachtʼayapjjerïtu. Kunatsa nayajj precursorjam yaqha markar sarañ munirïta uk janiw amuyapjjerïkiti. Ukatwa awisajj pächasirïta, janich sarañajj walïkaspa” sasa. Ukhamäkipansa, Kaylajj saraskakïnwa. Kunas jupar yanaptʼäna ukjj akham sasaw qhanañchi: “Diosar wal oracionan mayista ukat jilïr jilat kullakanakampiw parltʼarakta, ukhamatwa Diosajj jukʼamp irnaqtʼañ munirinakarojj bendicirïtap amuyta” sasa.

Waljanitakejj yaqha aru yateqañaw chʼamarakejja. Irlanda markat jutir Siobhan kullakajj akham sarakiwa: “Jan arsurjamäkayäta ukhajj wal mayjtʼasirïta. Ukhamarusa wali paciencianïñwa yateqawayta, ukatjja taqe chuymaw uka aru yateqañatakis chʼamachasiwayta. Pantjasirïta ukhajj lartʼasjjakirïtwa” sasa. Estonia markat jutir Anna kullakajj akham sarakiwa: “Uka markajj juntʼükchïnsa, wali laqʼa thayäkchïnsa, chʼuchʼu umamp jarisiñäkchïnsa, español aru yateqañaw jukʼamp chʼamänjja. Ukat janiw yateqañ munjjayäti. Ukampis pantjasitanakajat llakisiñat sipansa, kuntï yateqkayäta ukanakat lupʼiñwa yateqawayta” sasa.

Yaqhepatakisti familiapa amigonakapa jaytañaw chʼamaraki. Estados Unidos markat jutir Jonathan jilatat parltʼañäni. Jupajj akham siwa: “Yaqha markar purisajj familiajat ukat amigonakajat amtasisaw llakisiyäta. Ukampis Bibliat yatjjataña ukat yatiyir sarañaw llakinak armañ yanaptʼitu. Ukatjja, tamanwa amigonak jikjjatjjarakta ukat kunanakatï yatiyäwinsa pasirïtu ukanakaw kʼuchiki jikjjatasiñatak yanaptʼawayitu” sasa.

 Yaqha markankañajj chʼamakiwa. Canadá markat jutir Beau jilatajj akham siwa: “Maynejj pachpa markapanjja, janiw luzatsa umatsa llakiskiti. Ukampis akanjja, jan yatiyasakiw luz apaqjjapjje ukat umsa llaweqapjje” sasa. Ukat yaqhep markanakanjja, jaqenakajj probrekiw sarnaqapjje ukat autot kawkïr sarañas chʼamakiwa. Ukat waljanejj janiw liytʼasiñsa qellqtʼasiñsa yatipkiti. Austria markat jutiri Ines kullakarojj kunjam chuymanïpjjes jaqenakajj uk yatiñaw yanaptʼawayi. Jupasti akham siwa: “Jaqenakajj utan katoqtʼasiri, munasiri, yanaptʼasiri ukat altʼat chuymanïpjjewa. Ukat Diosatsa wal yatjjatañ munapjje” sasa.

“WALJA BENDICIONANAK APAYANIPJJÄMA JILARKIRIRAKI”

Uka wayn tawaqonakajj Ecuador markan serviñatakejj wal chʼamachasiwayapjje. Ukampis Jehová Diosatwa yanaptʼa katoqawayapjje, “Jupajj chʼamaniwa kuntejj mayktan, lupʼkaraktan ukanakata jukʼampi lurañataki” (Efe. 3:20). Ukat “jilarkiriraki” churapjjäma sasin Diosajj siskäna uksa katoqawayapjjarakiwa (Mal. 3:10). Kunjamsa jichhajj jikjjatasipjje uk uñjañäni.

Bruno: “Ecuador markar purisajja, chʼumi (selva) toqeruw servir sarta. Ukatjja, sucursal jachʼaptayapkäna ukansa yanaptʼarakiyätwa, jichhasti Betelanwa yanaptʼaskarakta. Italia markankaskayäta ukhajja, Jehová Diosatak nayraqat irnaqañwa amtawayta ukat Jupaw wali kusisit serviñatakejj yanaptʼawayitu, ukatjja kunayman luräwinakanwa yanaptʼawayarakta”.

Beau: “Ecuador markanjja, Diosatak wal irnaqtʼaskta, ukhamatwa Jehová Diosampejj jukʼamp sum apasirakta. Walja bendicionanakwa katoqawayta. Suma lugaranaksa uñtʼawayaraktwa, ukham cheqanak uñtʼañ walpun muniriyäta”.

Anna: “Nayjam solter kullakajj janiw misionerjam jakkaspati sasaw amuyayäta. Ukampis jichhajj ukham jakasiñ yateqawaytwa. Jehová Diosajj wal bendiciwayitu, ukat Bibliat yaqhanakar yatichasasa, Tantachasiñ Utanak lurañ yanaptʼasasa ukat suma amigonak jikjjatasas wali kusisitätwa”.

Elke: “Austria markan jakkayäta ukhajja, Jehová Diosarojj maynirukis Bibliat yatichirista sasaw mayisirïta. Jichhasti tunka phesqaniruw yatichaskta. Kunja kusisitas jaqenakajj yateqapjje uk uñjasajj wal kusista”.

Joel: “Jan uñtʼkta uka cheqanakan Jehová Diosar serviñajj wali khusapuniwa. Ukanwa Jupar jukʼamp confiyañ yateqawayta ukat kunjamsa Diosajj chʼamachasitajat bendicitu uk uñjasajj wal kusista. Estados Unidos markat purinkta ukhajja, kawkhanktï jichhajj ukanjja sojjta yatiyirinakakiw utjäna. Ukampis mä mara pasatatjja, pä tunka mayanïjjapjjayätwa. Ukat Jesusan jiwäwip amtañatakejj patak tunkaniw tantachasipjjta”.

JUMASTI, ¿KUNS LURÄTA?

Jehová Diosan Qhanañchiripästajja, kawkhantï Diosan Arupat yatiyirinakajj munaski uka cheqar ¿sarasmati? Cheqansa, ukham sarañatakejj sum amtañamawa. Ukampisa, Jehová Diosaru ukat jaqe masisaru munasiñaw chuymaman utjañapa. Uka munasiñatejj chuymaman utjchi ukat mayitanakarus phoqharaksta ukhajja, Diosaruw oracionan uka toqet parltʼañama. Ukat ¿janit awk taykamampi ukat taman irpir chuymaninakampi uka toqet parltʼarakisma? Jumajj Jehová Diosar ukham serviñjja amtarakismawa.

[3 janan qhanañchäwipa]

“Diosar wal oracionan mayista ukat jilïr jilat kullakanakampiw parltʼarakta, ukhamatwa Diosajj jukʼamp irnaqtʼañ munirinakarojj bendicirïtap amuyta.” (Kayla Estados Unidos)

[6 janan recuadropa/fotopa]

Kunjamsa yaqha markan serviñatak wakichasisma

• Bibliat sapak yatjjatañaru yatintatäñamawa

• Diosan Apnaqäwipat Yatiyañataki agosto 2011, 4-6 jananak liytʼäta

• Yaqha markanakan servir jilat kullakanakampi parltʼam

• Kawki markarutï sarañ munkta uka markan kunjamas jakasipjje uk yatjjatam

• Kuna arsa parlapjje uka aru mä jukʼa yatjjatam

[6 janan recuadropa/fotopa]

Gastotakejj kunjamsa yaqhepajj qollqe jikjjatapjje

• Maranjj mä qhawqha phajjsiw markapan trabajtʼapjje

• Utapa jan ukajj negociopa alquilasa

• Internet toqe trabajasa

[4, 5 jananakan fotonakapa]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)