“¿Khitirurak ajjsarästi?”

“Nuwasir tamas nayatak tantachasiskpan [...], janiw nayajj llakiskäti.” (SAL. 27:3.)

AKA QELLQATANAKARJAMAJJA, ¿KUNAS JAN AJJSARAÑATAK YANAPTʼISTANI?

Salmo 27:1

Salmo 27:4

Salmo 27:11

1. ¿Kuna jisktʼanakar qhanañchañatakis Salmo 27 qellqatajj yanaptʼistani?

 AKAPACHAN jan walinakajj jukʼampis jiljjattaskchejja, ¿kunatsa Diosan arunakapajj jukʼampi yatiyasiskaki? ¿Akapachan qollqet aynachtʼañas utjchejja, kunatsa jiwasajj yatiyaskakiñatakejj tiempsa chʼamsa taqe chuyma apsusiskaktanjja? Jaqenakajj kunas jutïrin pasani ukanakat walsa ajjsarayasipjjchejja, ¿kunatsa jiwasajj jan ajjsaras nayrar sarantaskaktanjja? David reyejj Diosan amuytʼayatäsin Salmo 27 qʼochu qellqkäna ukaw uka jisktʼanakar qhanañchi.

2. ¿Ajjsarañajj kunjamansa maynir jikjjatasiyaspa, ukampis khitirus jiwasajj confiytanjja?

² Davitajj akham sasaw qʼochuñ qalltäna: “Tatituw qhanajjasa, qhespiyasiñajjasa, ¿khitirurak ajjsarästi? Tatituw jakañajjar arjjati, ¿kunarurak ajjsarästi?” sasa (Sal. 27:1). Ajjsarañajja, maynirojj jan chʼamani tukuyi, ukhaman jikjjatasisajj janiw kunsa lurirjamäjjeti. Ukampisa, khititï Jehová Diosar confiyki ukajj janiw ukham ajjsarkiti (1 Ped. 3:14). Kunapachatï maynejj Jehová Diosar chʼamañchiriparjam uñjkani ukhajja, “sumankañanwa jakasini, ukatsti janiw ajjsarayaskaniti kuna jan waltʼañanakansa” (Pro. 1:33; 3:25). ¿Kunatsa?

“[JEHOVÁ] TATITUW QHANAJJASA, QHESPIYASIÑAJJASA”

3. ¿Kunatsa “Tatituw qhanajjasa” sasin sissna, ukat kuns lurañasa?

³ “Tatituw qhanajjasa” sasin Biblian siski ukajja, Diosaw kunatï cheqäki uk yatichistu sañwa muni (Sal. 27:1). Cheqpach qhanajj thakin kuna jan walinakatï utji jan ukajj kunas jarktʼistaspa ukwa uñachtʼayistu, ukampisa janiw ukanak chhaqtaykiti, ukatwa uñjktan ukarjamajj wali amuyumpi sarañasa. Jehová Diosajj ukhamarakiw kunanakatï akapachan pasaski ukajj kamsañsa muni uk yatiyistu, jan  walinakat amuyasiñasatakis ewjjtʼistu ukat Biblian utjki uka yatichäwinakampis yanaptʼarakistu, ukampis uka yatichäwinakarjamaw sarnaqañasa. Ukhamatwa wali amuyump kuns lurañäni ukat Salmo qellqerjamaw akham sañäni: “Arunakamajj timanakajjat jukʼamp yatiñan tukuyitu [...]. Taqpach yatichirinakajjat sipan jukʼamp amuyta” sasa (Sal. 119:98, 99, 130).

4. 1) ¿Kunatsa Davitajj ‘Jehová Tatituw qhespiyasiñajajja’ sasin taqe chuyma säna? 2) ¿Kunapachas Diosan servirinakapajj ‘Tatituw qhespiyasiñasajja’ sapjjarakini?

⁴ Kuntï Salmo 27:1 qellqatan siski ukarjamajja, kunjamsa Diosajj yanaptʼäna ukwa Davitajj amtpachäna. Diosaw “leonan amparapatsa, ukhamarak oson amparapatsa” qhespiyäna. Ukhamarakiw Goliat sat jachʼa jaqer atipañsa yanaptʼäna. Ukat Saúl reyejj lansampi jiwayañ munkäna ukhas sapa kutiw jarkʼaqarakïna (1 Sam. 17:37, 49, 50; 18:11, 12; 19:10). Ukatwa Davitajj taqe chuyma akham sispachäna: ‘Jehová Tatituw qhespiyasiñajajja’ sasa. ‘Jachʼa tʼaqhesïwinjja’, Diosajj ukhamarakiw servirinakaparojj qhespiyani, ukat Davitjamarakiw akham sapjjani: ‘Jehová Tatituw qhespiyasiñasajja’ sasa (Apo. 7:14, MT; 2 Ped. 2:9).

JEHOVÁ DIOSAN YANAPTʼAPAT AMTASIPUNIÑÄNI

5, 6. 1) ¿Diosan yanaptʼapat amtañajj kunjamsa chʼamañchtʼistu? 2) ¿Diosajj kunjamsa servirinakapar yanaptʼäna ukanak amtañajj kunatsa chʼamañchtʼistu?

⁵ Kunatsa jan ajjsarirïñasäki ukjja, Salmo 27:2, 3 (liytʼasiñapawa) qellqatanwa mä wakiskir toqet qhanañchi. Diosajj kuna jan walinakatsa jarkʼaqäna ukwa Davitajj amtäna (1 Sam. 17:34-37). Ukanak amtañaw Davitarojj sinti jan walinakar saykatañatakisa chʼamañchtʼpachäna. ¿Kunjamsa Jehová Diosajj yanaptʼayätam uk amttati? ¿Ukanak amtañajj chʼamañchtʼtamti? Sañäni, ¿llakisiykayätam uka jan walinakat Jehová Diosar taqe chuyma mayisitamat kunjamsa Jupajj uk aguantañamatak chʼamsa ukat amuytʼasiñsa churawaytam uk amttati? ¿Jan ukajj kunanakatï Diosar kusisita ukat jukʼamp serviñatak jarkʼkayätam ukanakajj kunjamsa chhaqtawayjjäna uk amttati? ¿Diosar jukʼampi serviñamatakejj kunjamsa punkus jistʼartkaspa ukhamänjja uk amttati? (1 Cor. 16:9.) ¿Ukanakat amtasajj kunjamsa jikjjatasta? ¿Ukanak amtañajj Jehová Diosaw jan walinak askichañsa jan ukajj jukʼampi jan walinakan aguantañsa yanaptʼitani sasin jukʼampi confiyañatakejjay yanaptʼtamjja? (Rom. 5:3-5.)

⁶ ¿Wali chʼamani mä gobiernotï Jehová Diosan markapar chhaqtayañ munaspa ukhasti?  Aka tiemponjja waljaniw Diosan markapar chhaqtayañ yantʼawayapjje, ukampis uk lurañ munasajj aynachtʼapjjakiwa. Kunjamsa Diosajj servirinakapar nayrajj yanaptʼawayäna ukanak amtañaw kunatï jutïr urunakan paskani ukanakar jan ajjsarañatak yanaptʼistani (Dan. 3:28).

CHEQA YUPAYCHÄWIR ASKIT UÑJAÑÄNI

7, 8. 1) Salmo 27:4 qellqatarjamajja, ¿kunsa Davitajj Diosar mayïna? 2) ¿Diosan uttʼayat templojj kunasa, ukat kunjamsa uka templon yupaychtanjja?

⁷ Jan ajjsarirïñatakejj cheqa yupaychäwir askit uñjañaw wakisiraki (Salmo 27:4 liytʼasiñapawa). Davitan tiempopanjja, Jehová Diosan ‘utapajj’ tabernaculönwa. Ukampis templo lurasiñapatakejj Davitaw wakichäna, uka jachʼa utsti Salomón yoqapaw qhepat saytʼayjjäna. Walja maranak qhepatsti, Jesusajj akham sasaw qhanañchäna: Diosarojj janiw Jupan bendicita mä jachʼa utan yupaychañajj wakisjjaniti sasa (Juan 4:21-23). Hebreos 8-10 qellqatanakanjja, apóstol Pablojj yaqha templow 29 jichha pacha marat utj-jje sasaw qhanañchäna. Uka templojja, kunapachatï Jesusajj bautisasisin Awkipan munañap phoqhañatak uñstkäna ukhaw uttʼayasïna (Heb. 10:10). Uka templojj janiw cheqpach mä utäkiti, jan ukasti Jesucristojj juchanakasat qhespiyañataki jiwawayki ukar taqe chuyma iyawsasin Jehová Diosar jakʼachasiñasatak pachpa Diosajj uttʼayawayki ukawa. ¿Kunjamsa Diosarojj uka templon yupaychtanjja? “Taqe chuymampi, mä suma cheqa iyawsañampi” Jehová Diosar mayisisa, kuna suytʼäwtï Jupajj churkistu uk jan pächasis yatiyasa ukat jilat kullakanakar tantachäwinakana ukat Familiana Diosar Yupaychañataki Aruman chʼamañchtʼasa (Heb. 10:22-25). Cheqa yupaychäwir wali askit uñjañajja aka jan wali tiemponakanwa chʼamañchtʼistu.

⁸ Oraqpachanwa Jehová Diosan taqe chuyma servirinakapajj sapürutjam Diosat jukʼampi yatiyasipki, yaqha arunak yateqapjje ukat kawkhanakantï Diosan Reinopat yatiyasiñapatak yanaptʼirinakajj munaski uka cheqanakar sarapjje. Ukham lurasajja, kuntï salmistajj Diosar maykäna ukwa jupanakajj mayipjjaraki: Diosamp askit uñjatäña ukat kunas kunäpan Jupar taqe chuyma serviskakiña (Salmo 27:6 liytʼasiñapawa).

DIOSAW YANAPTʼISTANI SASIN CONFIYAÑÄNI

9, 10. ¿Salmo 27:10 qellqatan siski ukajj kunsa amuytʼayistu?

⁹ Davitajj Jehová Diosan yanaptʼapar taqe chuyma confiyatap akham sasaw qhanañchäna: “Awkejjas, taykajjas apanukchitanejja, Tatituw nayarojj uywaskitani” sasa (Sal. 27:10). Kuntï 1 Samuel 22 jaljan siski ukarjamajja, Davitan awk taykapajj janiw apanukupkataynati. Ukampis jichhürunakanjja, walja jilat kullakanakaw familiapan uñisita jan ukajj apanukuta uñjasiwayapjje, ukhamäkchisa cristiano tamanwa yanaptʼa jikjjatawayapjje.

¹⁰ Kunapachatï yaqhanakajj taqe chuyma servirinakapar jaytanukupki ukhajja, Jehová Diosajj yanaptʼañatakejj jankʼakiwa. Ukhamasti ¿janit kuna jan walin uñjasipkani ukhas yanaptʼkani? Amuytʼañäni, familiatak kunatï wakiski uk apañatak llakisktan ukhajja, ¿Jehová Diosaw yanaptʼitani sasin confiytanti? (Heb. 13:5, 6.) Taqe chuyma servirinakapajj kunjamansa jikjjatasipjje ukjja Jehová Diosajj sum yati.

11. ¿Jehová Diosar taqe chuyma confiyatas uñjasajj kamsapjjesa jaqenakajja? Mä experienciampi qhanañchtʼam.

¹¹ Liberia markankir Victoria kullakat amuytʼañäni, Bibliat yateqasin bautisasiñataki chʼamachasiskäna ukhajja, uñtʼatapaw kimsa wawanakapar kuna apanukuwayjjäna. Victoriajj janis utanïkchïnsa ni trabajonïkchïnsa janiw ukharuk aynachtʼkänti, jan ukasti bautisasiwayapuniwa. Ukat mä jukʼa tiemporojja, 13 marani phuchhapaw walja qollqeni mä billetera  jikjjatasïna. Qhawqha qollqes utjäna uk jan jaktʼasaw dueñopar jankʼak jawsapjjäna, jupajj soldadötaynawa. Soldadojj akham sänwa: taqenitï Jehová Diosan Qhanañchirinakapjam honradöpjjaspa ukhajja, oraqpachanwa sumankañajj utjaspa sasa. Ukat Victoriajj Bibliampiw kunjamsa Diosan amtaparjamajj mä suma paraison jakasiñajj utjani uk qhanañchtʼäna. Ukham honradöpjjatap uñjasajja, soldadojj wal muspharäna ukatwa kuttʼayapkäna uka qollqepat iraqasajj waljpacha churawayäna. Cheqas Jehová Diosan Qhanañchirinakapajj oraqpachanwa honrado jaqet uñtʼatätanjja, kunattejj Diosaw kunatï wakiski uk churistani sasaw confiytanjja.

12. Trabajo jan ukajj qollqe aptʼaskasas Diosar serviskakisajja, ¿kunsa uñachtʼaytanjja? Mä experienciampi qhanañchtʼam.

¹² Jichhajj Sierra Leona sat markan jakasiri Thomas jilatat parltʼañäni, jupasti janiw bautisatäkänti. Mä colegionwa yatichirit trabajañ qalltäna, ukampis niya mä marat taqpach papelanakap mistuñapkamajj janiw pagop katoqkaspänti. Ukatsti, niya marpachat pago apsusjjañatakejj colegio apnaqeri tatakurampiw parlañapäna. Jupasti, Diosan Qhanañchirinakapajj kunanaktï yatichapkta ukanakajj janiw aka colegiotakejj askïkiti sasaw säna. Ukat colegion trabajiskakïtati, jan ukajj Biblian yatichäwinakap katoqkta ukarjamach sarnaqaskakïta, uk mä pit ajllisim sasaw säna. Thomas jilatajj trabajopsa ukat niya mä mara pagopsa apanukuwaykchïnjja, yaqha trabajo jikjjatasjjäna, ukansti radionaka ukat celularanak askichäna. Kunjamtï Thomas jilatan experienciapasa ukat ukham yaqha experiencianakas uñachtʼaykejja, trabajo jan ukajj qollqe aptʼasiñjja janiw sinti ajjsarktanti, jan ukasti taqe kun Luriri ukat markapar arjjatiri Jehová Diosaruw jukʼampi confiytanjja.

13. ¿Pisin jakasir markanakan kunjamsa Diosan arunakapat jukʼamp yatiyasiski?

¹³ Pisin jakasir markanakanjja, jilat kullakanakajj Diosan arunakap yatiyañatakejj jukʼamp tiemponïpjjewa. ¿Kunatsa? Mä sucursalat akham sasaw qellqanipjjäna: “Khitinakatï Bibliat yateqañ munapki ukanakatjja waljaniw jan trabajonïpjje, ukhamatwa Bibliat yatjjatañatakejj urun jukʼamp tiemponïpjje. Ukat jilat kullakanakas jukʼamp yatiyañatakejj tiemponïpjjarakiwa. Kuna cheqanakantï pobrenakajj jukʼamp utjki ukanakanjja, kunatï pasaski ukanak uñjasajj qhep qhepa urunakankatas sum amuyapjje” sasa. Mä markanjja, sapa yatiyiriw mä kimsanir Bibliat yatichapjje. Mä misionerojj 12 maranak jilaw uka markankjje, jupajj akham siwa: “Niyakejjay jilat kullakanakat waljanejj kunanakatï wakiski ukanakampiki jakasipjjchejja ukat janirak tiempo apaqanakanïpkchejja, Diosan arunakap yatiyañatakisa ukat Bibliat yatichañatakis jukʼamp tiemponïpjjewa” sasa.

14. ¿Kunjamanakatsa ‘walja jaqenakjam’ uñtʼatäpki ukanakajj Diosamp jarkʼaqatapjjaspa?

¹⁴ Jehová Diosaw markapar jan walinakat  yanaptʼañsa, jarkʼaqañsa ukat qhespiyañsa arsuwayi, ukat uka arsutaparojj phoqhapuniniwa sasaw confiytanjja (Sal. 37:28; 91:1-3). ‘Jachʼa tʼaqhesïwitjja’ (MT) “walja jaqenaka[w]” qhespipjjani (Apo. 7:9, 14). Ukatwa uka “walja jaqenaka[n]” aka qhepa urunakan jan tukjatäpjjañap yattanjja. Jupanakan taqe yantʼanakan aguantapjjañapataki ukat Diosamp sum apasisipkakiñapatakisa walja yanaptʼanakaw utjani. Ukat ‘jachʼa tʼaqhesïwejj’ tukuyañampïkani ukhajja, Jehová Diosaw markaparojj arjjatani.

“TATAY, THAKIM UÑACHTʼAYITA”

15, 16. ¿Jehová Diosan ewjjtʼapar istʼañajj kunjamsa yanaptʼistu? Mä experienciampi qhanañchtʼam.

¹⁵ Jan ajjsaras sarnaqaskakiñatakejja, Jehová Diosan yatichäwinakap katoqaskakiñasawa. Davitan mayisitapaw uk uñachtʼaykistu, jupasti akham sänwa: “Tatay, thakim uñachtʼayita, cheqa thakiman irpita, timanakan nayatak utjatap layku” sasa (Sal. 27:11). Uka arunakarjam sarnaqañajja, Jehová Diosajj markap toqe ewjjtʼkistu ukar jankʼak istʼaña ukat ukarjam sarnaqaña sañ muni. Ukat kunatï wakiski ukanakampik jakasipjjam siski uka ewjjtʼar istʼasin manunakat mistupjje ukat jan wakiski ukanaksa alj-jjapjje uka jilat kullakanakaw uka ewjjtʼar istʼañajj kunjamsa aka jan wali tiemponakan yanaptʼawayi uk qhanañchtʼapjjaspa. Ukat kunanakatï jan sinti wakiskirïki ukanak sum uñjañatakis janiw sinti trabajapjjañapäkiti, ukatwa Diosan arunakap jukʼamp yatiyañatakejj tiemponïpjje. Ukhamasti sapa mayniw akham jisktʼasiñasa: “¿Biblia liytʼasasa ukat Amuyasiri Cheqapa Uywatajj apayanki uka qellqatanak liytʼasas jankʼakiti chʼamäkipansa uka ewjjtʼanakar istʼasajj ukarjam sarnaqtjja?” sasa (Mat. 24:45, MT).

¹⁶ Jehová Diosamp yatichayasiñäni ukat ewjjtʼkistu ukarjam sarnaqañäni ukhajja, janiw kunatsa ajjsarkañäniti. Estados Unidos markankir mä jilatajja, precursoräsipkakiñapataki familpachar yanaptʼañatakejj mä trabajwa supervisorapar mayïna, ukampis jupajj universidadat titulonïsma ukhakiw uka trabajo katoqasma sasaw säna. Jumatï ukhaman jikjjatasismänjja, ¿precursoräñat sipansa kunatarak universidadar jan sarkpachätjja sasati amtasismäna? Pä semana pasatarojja, uka supervisorajj trabajot jaqsutaw uñjasïna, ukat yaqha gerentew kunjamsa trabajañ munäna uk jisktʼäna. Jilatasti jankʼakiw akham sasin yatiyäna: Jehová Diosan Qhanañchirinakapjamajj esposajampejj sapürunjamaw Diosatak irnaqtʼapjjta sasa. Ukat gerentejj jankʼakiw akham sarakïna: “¡Mayninakat sipansa mayjätamjja amuyjjayätwa! Tatajajj jiwañampëjjäna ukhajja, pä kullakaw tatajatak Biblia liytʼirejj sapür jutapjjeri. Ukatwa Diosan Qhanañchirinakapar yanaptʼirjamäkä ukhajj yanaptʼapunïwa sasin amtawayta”. Qhepärmanthisti, jilatajj kawkïr trabajtï supervisorajj jan churañ munkäna uka trabajonëjjänwa. Ukhamasti, kunapachatï Diosan Reinop nayrar uchktan ukhajja, kunatï jakañatak wakiski ukjja Jehová Diosajj churapunistuwa (Mat. 6:33).

IYAWSÄWINÏÑA UKAT SUYTʼÄWINÏÑAW WALI WAKISKIREJJA

17. ¿Kunatï jutïrin paskani ukanak jan ajjsarañatakejj kunas yanaptʼistani?

¹⁷ Iyawsäwinïñasa ukat suytʼäwinïñasa kunja wakiskirisa ukjja akham sasaw Davitajj qhanañchäna: “Nayasti jakañ oraqen Tatitump kusisiñatakiw suytʼaskta” sasa (Sal. 27:13). Amuytʼañäni: jan kuna suytʼäwinïksna ukat Salmo 27 qellqatan siski uks janirak yatksnati ukhajja, ¿jakäwisajj kunjamäspasa? Ukhamasti, kunanakatï Armagedonan paskani ukanak aguantañatak chʼama churañapatakisa ukat jarkʼaqañapatakisa Jehová Diosar taqe chuyma mayisiskakiñäni (Salmo 27:14 liytʼasiñapawa).

[Jiskt’anaka]

[23 janan fotopa]

Diosajj kuna jan walinakatsa jarkʼaqäna ukanak amtasaw Davitajj chʼamañchtʼat jikjjatasïna

[25 janan fotopa]

¿Akapachan qollqet aynachtʼañajj utjki ukhajj Diosan arunakap jukʼamp yatiyaskakiñatak tiempo apsusktänti?