Libre sarnaqañ churiri Diosar yupaychañäni

“Diosar munañajja mandamientonakar phoqhañawa; mandamientonakapasti janirakiw jan phoqhañjamäkiti.” (1 JUAN 5:3.)

¿QHANAÑCHTʼASMATI?

¿Diosan leyinakapajj sintipunis jarkʼkistaspa ukham amuyañasatakejj kunsa Supayajj luri?

¿Khitinakampis sarnaqañäni uk kunatsa sum amuyasiñasa?

¿Libre sarnaqañ churiri Diosar jan jitheqtasa serviskakiñatakejj kunas yanaptʼistani?

1. ¿Jehová Diosajj librësin kunjamsa servirinakapar uñji, ukat Adanampi Evampirojj kunjamsa uk uñachtʼayäna?

 JEHOVÁ DIOSAKIPUNIW cheqpach librejja, ukampis janiw Jupa sapaki librëñ munasajj servirinakapar taqe kuntï lurapki ukanak uñchʼukkiti. Jan ukasti, servirinakapajj amtaparjam sarnaqeri chuymanïpjjewa, mä arunjja, sapa mayniw kunsa lurani ukat kuns muni uk lurañs amtaraki. Amuytʼañäni, Adanampi Evampirojj “aski ukhamarak ñanqha yatiñ churir qoqatjja janiw manqʼa[pjjä]tati” sasakiw säna (Gén. 2:17). Ukhamasti jupanakajj librëpjjaspänwa ukat Diosan munañapsa sumwa phoqhapjjarakispäna.

2. ¿Kunjamatsa Adanampi Evampejj juchar katuyasiwäpjje?

² ¿Kunatsa Jehová Diosajj Adanampir Evampirojj libre sarnaqasipjjañap jaytpachäna? Diosajj Jupar uñtasitwa jaqenakar luräna ukat conciencia churäna. Ukat Luririparu munasipjjatapajj sum sarnaqañataki yanaptʼaspa ukwa Diosajj munarakïna (Gén. 1:27; Rom. 2:15). Ukampisa, libre sarnaqasiñaru askirjam uñjañat sipansa ukat Luririparu yuspärañat sipansa Supayarukiw istʼapjjäna ukat jupanakakiw kunatï walïki ukhamaraki jan walïki uk amtapjjäna. Ukham lurasajj jukʼamp librëpkaspas ukhamwa amuyasipjjäna, ukampis pantjasipjjänwa. Kunattejj jucharukiw katuyasiwäpjje ukat wawanakaparus ukhamaraki, ukatwa tʼaqhesiñasa jiwañas utji (Rom. 5:12).

3, 4. ¿Diosan kamachinakapat kunjam amuyañassa Supayajj muni?

³ Niyakejjay Supayajj jan juchani pä jaqerusa ukat walja angelanakarus Dios contra saytʼayawaychejja, jiwasarojj ukhamarakwa pantjasiyistaspa. Kunjamtï nayrajj sallqjkänjja, ukhamwa sallqjaskaki. Diosan leyinakap phoqhañajj chʼamäkaspasa, taqe kunatsa jarkʼkistaspa ukat llakitas sarnaqaykistaspa ukham amuyañaswa muni (1 Juan 5:3). Jiwasatï ukham amuyirinakampi chikachasiñäni  ukhajja, ukhamarakwa amuyjjsna. 24 marani mä kullakajj akham siwa: “Jan wali amigonakamp chikachasisajj jupanakjamäjjayätwa ukat kuntï lurapkäna ukanakwa lurarakiyäta” sasa, jupasti wachoq jucharuw purtʼasïna. Jiwasatjja waljanirakiw jan wali amigonakamp wiytata jikjjatasiwaytanjja.

⁴ Cheqas tama pachpanwa jan wali amigonakajj utjaspa, ukajj wali llakkañawa. Mä wayna jilatajj akham siwa: “Yaqhep amigonakajajj Diosar jan serviri tawaqonakampiw uñtʼasiñatak parlapjjeri ukat walja tiempo jupanakampi chikachasisajj jupanakjamäjjarakiyätwa, ukwa amuyasiwayta. Janiw Jehová Diosampejj sum apasjjayätti: tantachäwinsa janiw taqe chuym istʼjjayätti ukat yatiyiris awisakiw sarirïta. Ukat suma amigonak thaqhañ wakisitapwa amuytʼasta, ukat ukhamwa lurawayta” sasa. Cheqasa, jan wali amigonakajj jan waliruw aptʼistaspa. Uk jichhajj Bibliankir mä sarnaqäwit amuytʼañäni (Rom. 15:4).

JAQENAKAN “CHUYMAPA ENGAÑARAKÏNA”

5, 6. ¿Kunjamsa Absalonajj walja israelitanakar engañjäna, ukat amtapajj phoqhasïnti?

⁵ Biblianjja, jan walir purtʼayir jaqenakat parlarakiwa. Ukanakat maynejj David reyin Absalón yoqapänwa. Jupasti suma uñnaqtʼani chachänwa. Ukat kunjamtï Supayajj kunatï jan jupankkäna uk munkänjja, ukhamarakiw Absalonajj awkip lanti reyïñ munäna. * Jan wali amtampiwa jupakis israelitanakat llakiskaspa ukat reyejj janis markachirinakat llakiskaspa ukham jaqenakar amuyayäna. Ukat kunjamtï Supayajj Edén Jardinan kʼariskänjja, ukhamarakiw Absalonajj wali suma jaqëkaspas ukham tukusin tatapat kʼarinak parläna (2 Sam. 15:1-5).

⁶ ¿Absalonan amtapajj phoqhasïnti? Phoqhasïnwa sisnawa, kunattejj Biblian akham siwa: “Absalonajj taqe khitinakatejj reyin ukar cheqa uñjäwi mayiri sarkän uka israelitanakarojj [...] chuymapa engañarakïna” sasa (2 Sam. 15:6). Ukampis jachʼa jachʼa tukutapatjja, jan waliruw purtʼasïna. Ukatsti jupasa ukat khitinakarutï engañkäna uka jaqenakatsa waljaniw jiwapjjäna (2 Sam. 18:7, 14-17).

7. ¿Kunatï Absalón chachar paskäna ukanakat kunsa yateqsna? (14 janankir foto uñjjattʼäta.)

⁷ ¿Kunatsa israelitanakajj Absalonampi engañayasipjjakïna? Inas kuntï Absalonajj jupanakar siskäna uk munapjjchïna, jan ukajj inas suma uñnaqtʼapampi apayasipjjchïna. Kunjamächinjjay uk janiw yatktanti. Ukampisa, jupanakajj janiw Jehová Diosarusa ni Jupan ajllit reyirus taqe chuyma arkapkänti. Jichhürunakanjja, Supayajj “Absalonjam jaqëpki” ukanakampiw Jehová Diosan servirinakapar sallqjañ munaskaki. Yaqhepajj akham sapjjewa: ‘Diosan kamachinakapajj janiw libre jakasiykistuti’ jan ukajj ‘¡Diosar jan servirinakapï wali kusisit jakasipjjejja!’ sasa. ¿Uka arunakajj wali kʼaripuniwa sasin Jehová Diosar taqe chuyma yupaychaskaktanti? ¿“Kawkïr leyitejj qhespiyat [jan ukajj libre] sarñaqasiñ churkistu” uka leyikiw cheqpach libre sarnaqayistaspa sasat taqe chuyma confiytanjja? (Sant. 1:25). Ukhamächi ukhajja, uka leyerojj wali askit uñjataswa uñachtʼayañäni ukat cristianjam librësajj janipuniw munañasaruk kuns lurañäniti (1 Pedro 2:16 liytʼasiñapawa).

8. ¿Jehová Diosan kamachinakapar jan istʼas sarnaqañajj llakinakak apanitap kunanakas uñachtʼayistu?

⁸ Supayajj wayn tawaqonakaruw jukʼampi sallqjañ muni. 30 marani mä jilatajj akham siwa: “Waynitükasajja, Diosan kamachinakapajj janis libre sarnaqaykitaspa ukat janis jan walinakat jarkʼaqkitaspa ukham amuyirïta” sasa. Ukhamatwa wachoqa juchar purtʼasitayna. ¿Ukat jukʼampi kusisitäpachänti? Janiwa. Jupa pachpaw akham qhanañchi: “Walja maranakaw wal juchañchasiyäta ukat chuymajans wali llakitaw jikjjatasiyäta” sasa. Ukat mä  kullakajj tawaqetäkäna uka tiempot amtasajj akham siwa: “Wachoq juchar purtʼasta ukhajj wali llakita ukat chuymas kawkstʼataw jikjjatasiyäta. Ukhat jichhakamajj 19 maranakaw pasawayjje, ukampis uka jan walinakajj janiw pʼeqejat chhaqtkiti” sasa. Ukat yaqha kullakajj akham sarakiwa: “Jan walinak lurasajja, khitinakarutï nayajj wal munasta ukanakar chuym ustʼayaskataj amuyasajja, Diosar yupaychañ toqetsa, amuyunsa ukat chuymajansa wali aynachtʼataw jikjjatasiyäta. Jehová Diosampi jan askit uñjatäñajj wali llakkañapuniwa” sasa. Juchar purtʼasisajj kuna jan walinakansa uñjasisma uk jan amuyasis lurañamwa Supayajj muni.

9. 1) ¿Kunsa Jehová Diosata, leyinakapata ukat kamachinakapat jisktʼasiñasa? 2) ¿Kunatsa Diosar sum uñtʼañajj wakisi?

⁹ Wayn tawaqonakasa ukat jilïrinakas jan walinakan uñjasisaw munañanakampi atipayasiñajj jan walïtap yateqawayapjje, ukajj wali llakkañapuniwa (Gál. 6:7, 8). Ukatwa sapa maynejj akham sasin jisktʼasiñasa: “¿Kuna jan walinakampis Supayajj sallqjañ munitu uk amuyasiskti? ¿Jehová Diosarojj amigojarjamati uñjasktjja, ukat kuntï Jupajj siski ukajj cheqawa ukat nayan askijwa muni sasat taqe chuyma confiytjja? ¿Jehová Diosajj janipuniw kunatï nayatakejj askïki ukat kusisiykitaspa ukanakat jarkʼkitaspati sasati taqe chuyma atinistjja?” sasa (Isaías 48:17, 18 liytʼasiñapawa). Jiwasatï uka jisktʼanakarojj “jïsa” sañ munstanjja, janiw mä jukʼak Jehová Diosarojj untʼañasäkiti, jan ukasti sumwa uñtʼañasa. Ukat jiwasar munasiñapatwa leyinakapsa ukat kamachinakapsa churistu, janiw libre sarnaqañat jarkʼkistuti sasaw confiyañasaraki (Sal. 25:14).

 AMUYTʼASIRI UKAT ISTʼASIR CHUYMANÏÑATAK DIOSAR MAYISIÑÄNI

10. ¿Kunatsa Salomón wayna reyit yateqasiñatak chʼamachasiñasa?

¹⁰ Waynäkasajja, Salomonajj altʼat chuymampiw Diosarojj akham säna: ‘Nayajj mä wawa waynakïtwa. Janiw mantañsa ni mistuñsa yatkti’ (NM) sasa. Ukatsti Diosarojj yatiñkankaña ukat istʼasir chuyma mayisïna (1 Rey. 3:7-9, 12). Ukham taqe chuyma mayisitapjja Jehová Diosajj istʼänwa. Waynäkstansa jan ukajj jilirïkstansa, ukhamarakiw jiwasarojj istʼistani. Janis mä milagro toqejj amuytʼasir chuym churkchistanejja, jiwasatï Bibliat sum yatjjatañäni, qollan ajayup mayisiñäni ukat markap toqe yatichkistu ukanak chuymar katoqasiñäni ukhajja, wali amuytʼasiri ukat yatiñan chuyma churistani (Sant. 1:5). Taqe ukanakampiw Diosajj wayn tawaqo servirinakaparojj Jupan ewjjanakap jan istʼiri jaqenakat sipansa ukat akapachankir “yatiñaninakatsa” jukʼampi yatiñanir tukuyi (Luc. 10:21; Salmo 119:98-100 liytʼasiñapawa).

11-13. 1) Salmo 26:4, Proverbios 13:20 ukat 1 Corintios 15:33 qellqatanakatjja, ¿kuna askinaksa yateqsna? 2) ¿Kunjamsa uka qellqatanakan ewjjtʼaparjam sarnaqsna?

¹¹ Jehová Diosar uñtʼañatakejja, Bibliat yatjjatañasa ukat ukarjam amuykiptʼañas wali wakiskiripuniwa. Uk amuytʼañatakejja, amigonak ajlliñat Bibliajj ewjjtʼkistu uka qellqatanakat yatjjatañäni. Salmo 26:4 qellqatajj akham siwa: “Janiw kʼari jaqenakampejj qontʼaskti, janirakiw chʼojjña chuyman jaqenakampis chikachaskti” sasa. Proverbios 13:20 qellqatajj akham sarakiwa: “Suma yatiñan jaqenakamp chika sarnaqerejja, suma yatiñanirakïniwa; jan amuytʼan jaqenakamp chika sarnaqeristi, jan waltʼañaruwa purirakini” sasa. Ukat 1 Corintios 15:33 qellqatajj akham saskakiwa: “Jan wali jaqenakampi sarnaqañajj suma luräwinaka chhaqhayañawa” sasa.

¹² ¿Kunsa uka qellqatanakajj yatichistu? 1) Jehová Diosajj sum sarnaqañasataki ukat Juparus sum yupaychañasatakiw amigonakas sum ajlliñas muni. 2) Khitinakampitï sarnaqktan ukarjamawa walinsa jan walinsa jikjjatasiñäni. Maysa toqetjja, Jehová Diosajj chuymasar purtʼañ munatapwa uka ewjjtʼanakajj uñachtʼayistu. Janiw Diosajj “jan aksa ni uksa luramti” siskistuti, jan ukasti qhana arunakampiw kunatï cheqäki uk ewjjtʼistu. Ukat akhamsa siskistaspa ukhamawa: “Ukajj ukhamawa, akasti akhamarakiwa. ¿Jichhajj kuns luräta? ¿Kunas chuymaman utji?” sasa.

¹³ Uka kimsa ewjjtʼanakajja, qellqaskäna uka tiempotakisa ukat jichha tiempotakisa wali askïskakiwa. Uk amuytʼañatakejj akham jisktʼasiñäni: “¿Chʼojjña jan ukajj kʼari chuymani jaqenakat kunjamsa jitheqtiristjja? ¿Kunanakas jupanakampi chikachasiñaru apitaspa? (Pro. 3:32; 6:12.) ¿‘Yatiñan jaqenakan’ amigopäpjjam sasin Jehová Diosajj siskistu uka jaqenakajj khithinakäpjjesa? ¿Ukat ‘jan amuytʼan jaqenakajj’ khitinakäpjjarakisa? (Sal. 111:10; 112:1; Pro. 1:7.) ¿Jan wali jaqenakampi chikachasisajj kuna “suma luräwinak[sa]” aptʼasiristjja? ¿Jan wali jaqenakajj Diosar jan yupaychiri jaqenak taypinakti utji? (2 Ped. 2:1-3)” sasa. Kunjamsa uka jisktʼanakar qhanañchtʼtan uk amuytʼañajj wali askïspawa.

14. ¿Kunjamsa Familiana Diosar Yupaychañataki Arumanjja jukʼamp sum yatjjatsna?

¹⁴ Kunjamtï uka kimsa qellqatanakat amuytʼaniwayktanjja, ukhamarakwa kunanakatï jiwasatakisa ukat familiasatakis wali wakiskirïki ukanakat kunsa Jehová Diosajj amuyi uk yatiñatakejj Bibliankir yaqha qellqatanakat amuykiptʼañasa. * Ukjja, Familiana Diosar Yupaychañataki Arumanwa awk taykanakajj familiapampi yatjjatapjjañapa. Yatjjatkasajja, ak amtapjjapunim: Jehová Diosajj munasiñatwa leyinakapsa ukat kamachinakapsa churistu uk  amuytʼañwa familiat sapa maynir yanaptʼapjjañama (Sal. 119:72). Ukhamatwa familiajj mayachtʼatäni ukat Jehová Diosarus jukʼampi jakʼachasipjjani.

15. ¿Kunjamatsa yatiñani ukat istʼasiri jaqer tukuskatas amuyassna?

¹⁵ ¿Kunjamatsa yatiñani ukat istʼasiri jaqer tukuskatas amuyassna? Mayajj akäspawa: Diosar taqe chuyma yupaychiri nayra jaqenakajj kunjamsa amuyapjjäna ukat kunjamsa jiwasajj amuyasktan ukwa amuykiptʼasiñasa. Sañäni, David reyejj akham qellqäna: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Salmo 119 qellqerejj akham sarakïnwa: “Yatichäwimarojj walpun munasta: ¡Sapüruw ukjjat lupʼiskta!” sasa (Sal. 119:97). Diosan Arupar munasiñajj janiw ukhamatak uñstkiti, jan ukasti Diosar mayisitasata, Bibliat sum yatjjatatasata ukat ukanakat lupʼitasata ukhamaraki kuna bendicionanaktï Diosan kamachinakapar istʼasajj katoqtan ukarjamaw uka munasiñajj utji (Sal. 34:8).

CRISTIANJAM LIBRE SARNAQASIÑATAK CHʼAMACHASIÑÄNI

16. ¿Cheqpacha librëñatak chʼamachaskasajj kunsa amtañasa?

¹⁶ Nayratpachawa walja markanakajj librëñatakejj guerran nuwasiwayapjje. ¿Janit jiwasajj librëñatak jukʼampi chʼamachasiñasajj wakiskaspa? Ak amtapuniñäni: Janiw Supayaruki ukat jupan apnaqat aka jan wali pacharuk saykatktänti, jan ukasti kʼarintir chuymasaru, mä arunjja, pantjasir chuymasaruw saykataraktanjja (Jer. 17:9; Efe. 2:3). Ukampisa Jehová Diosan yanaptʼapampejj taqe ukanakaruw atipjsna. Ukat jan walinakar sapa kuti atipjasajj walja askinakwa jikjjatsna, ukanakat payajj akäspawa: nayraqatjja Jehová Diosaruw kusisiyañäni (Pro. 27:11). Ukatsti, kunjamsa libre sarñaqasiñ churir leyejj yanaptʼistu uk amuyasajja, janipuniw wiñay jakañar apir kʼullkʼu thakhit saranukuñ munkañäniti. Ukat jutïrinjja, Jehová Diosan amtaparjamajj taqe chuyma servirinakapajj jukʼampi librëjjañäniwa (Sant. 1:25; Mat. 7:13, 14).

17. ¿Juchachaskañäni ukhajj kunatsa jan aynachtʼañasäki, ukat kuna yanaptʼsa Jehová Diosajj churistu?

¹⁷ Cheqas taqeniw awisajj juchachastanjja (Ecl. 7:20). Ukat juchar purtʼasiñäni ukhajja, janiw aynachtʼañasäkiti ni janis kunatakëjjsna ukham amuyasiñasäkiti. Jan ukasti, nayrar sartaskakiñasawa, ukatakejj inas irpir chuymaninakampi yanaptʼayasiñajj wakischini. Santiagojj akham sänwa: “Jupanakajj iyawsañampi orapjjanejja, uka usutajj qhespitäjjaniwa. Tatitusti juparojj sartayjjarakiniwa, juchanïchi ukkhasti perdonatarakïniwa” sasa (Sant. 5:15). Amtapuniñäni, Jehová Diosaw wali khuyaptʼayasirejja ukat Juparakiw suma chuymanïtasat tamapar irpanistu ( Salmo 103:8, 9 liytʼasiñapawa). Ukhamasti, Diosarutï taqe chuyma serviskakiñänejja, janipuniw Jupajj jaytkistaniti (1 Cró. 28:9).

18. Jesusan mayisïwipajj Juan 17:15 qellqatan jikjjataski ukarjamajja, ¿Jehová Diosampi jarkʼaqatäñatakejj kunsa lurañasa?

¹⁸ Jiwayañataki janïr katuntapkäna uka arumajja, akham sasaw Jesusajj 11 apostolanakapatak Jehová Diosar mayisïna: “Jan walita jupanakaru jarkʼañamwa [maysma]” sasa (Juan 17:15, MT). Kunjamtï Jesusajj apostolanakapar sum uñjkänjja, ukhamarakiw jichhürunakanjj arkirinakapar uñjaski. Ukatwa akham sasin taqe chuyma confiysnajja: “Jehová Diosajj servirinakapar aka jan wali tiemponakan jarkʼaqasaw Jesusan uka mayisitap istʼani” sasa. Ukat Bibliajj akham sarakistuwa: “Tatitusti [...] arjja[tiwa], khitinakatejj cheqa jan pantjasis jakapki ukanakaru. Jupajj cheqa sarnaqer jaqerojj imiwa, aski jaqerojj arjjatarakiwa” sasa (Pro. 2:7, 8). Ukham cheqa jan pantjasisa sarnaqañajj chʼamakiwa, ukampisa khitinakatï ukham sarnaqapkani ukanakakiw wiñay jakaña ukat cheqpach libre sarnaqasiñ katoqapjjani (Rom. 8:21). Ukhamasti, ¡janipuni kunäkipans jan walir saranukuñäniti!

[Qhanañchäwinaka]

[Jiskt’anaka]

[14 janan fotonakapa]

Jichhürunakanjja, ¿khitinakas Absalonjamäpjje, ukat kunjamsa jupanakat amuyassna?