¿Jumajj amttati?

¿Aka qhepa phajjsinakan mistkäna Yatiyañataki sat revista liytʼtati? Ukhamächi ukhajja, aka jisktʼanakar qhanañchtʼma:

¿Ñikʼutapati Sansonar chʼam churäna?

Sansonan chʼamapajj janiw ñikʼutapankkänti, jan ukasti Jehová Diosatak yaqhachatjamajja Diosamp wali sum apasitapwa ñikʼutapajj uñachtʼayäna. Ukampis kunapachatï Dalilajj ñikʼut khuchhoqkäna ukhatwa Jehová Diosampejj jan sum apasjjänti (4/15, 9 jana).

Kunjamtï yaqhep luräwinakajj cuerposan kʼumaraki jikjjatasiñatak yanaptʼkistojja, ¿kunanak lurañas chuymasan sum jikjjatasiñatakejj yanaptʼistaspa?

1) Manqʼasiña. Kunjamtï kʼumaräñatakejj sum alimentasiñajj wakiskejja, ukhamarakiw Diosar yupaychañ toqet chʼamañchtʼasiñasa. 2) Ejercicio luraña. Diosan arunakap yatiyañapuniw chuymasan sumak jikjjatasiñatak yanaptʼistani. 3) Jan sinti qariña. Jan aynachtʼañatakejja, jilat kullakanakamp jukʼamp chikachasiñaw yanaptʼistani, jupanakajj jiwasat llakisipjjewa (4/15, 16 jana).

¿Armagedón qalltañapatakejj kuna profecianakas phoqhasiñapa?

“Taqe kunas sumakïskiwa, janiw kunas paskaniti” sasaw marka pʼeqtʼirinakajj oraqpachan sapjjani. Ukjjarusti walja gobiernonakaw oraqpachankir kʼari religionanak contra saytʼapjjani. Ukat kʼari religionanakar tʼunjasinsti, Supayajj akapach gobiernonakampiw Jehová Diosan markapar tukjañ munani (4/1, 9 jana).

¿Kunapachas Joseyajj jiwjjpachäna?

Jesusajj 12 maranïkän ukhajja, Joseyajj jakaskänwa. Ukampis Jesusajj waynaskän ukhaw Joseyajj jiwjjpachäna. Amuytʼañäni, Jesusajj janïr jiwkasajja, Juan sat apostolaparuw taykap jaytawayarakïna (Juan 19:26, 27). Joseyatï jakaskaspäna ukhajja, janiw uk lurañajj wakiskaspänti (7/1, 27 jana).

¿Colportoranakajj khitinakänsa?

Khä 1931 marat nayrajja, khitinakatï jichhürunakan precursoranakjam uñtʼatäpki ukanakaw “colportorjam” uñtʼatäpjjäna (5/15, 31 jana).

Jesusajj jiwatanak taypit jaktayatänwa sasajj ¿kunatsa sistanjja?

Jesusan 500 arkirinakapaw jaktanit Jesusarojj uñjapjjatayna sasaw apóstol Pablojj qellqatayna (1 Cor. 15:6). Ukhamarusa, Diosaw Jesusarojj jiwatanak taypit jaktayi sasaw jan ajjsartʼayasisa yatiyapjjäna (7/1, 7 jana).

¿‘Taqe aka reinonaka’ sasin Daniel 2:44 qellqatan siski ukanakajj khitinakasa?

Daniel profetajj qhanañchkäna ukarjamajja, reinonaka sasinjja metalanakat lurat jachʼa jaqen partenakapampi saski uka reinonakata jan ukajj gobiernonakatwa parlaski (6/15, 17 jana).

¿Bibliankir profeciarjamajj kunapachas angloamericanajj taqe markanakjjar chʼamani paqallqöri markar tuküna?

Nayrïr Jachʼa Chʼajjwäwin Gran Bretaña markampi Estados Unidos markampejj mayachtʼasipkäna ukhaw taqe markanakjjar chʼamanïtapajj qhan amuyasïna (6/15, 19 jana).

¿Kunatsa jiwatar imjjañataki arstʼäwinjja Salmo 116:15 qellqatajj jiwiritakïkaspas ukham jan liytʼasiñapäki?

Ukanjja akham siwa: “[Jehová] Tatitutakejj wali llakisiñawa, iyawsirinakapar jiwir uñjañajja” sasa. Uka arunakarjamajja, Jehová Diosajj taqe servirinakaparuw wali askit uñji, ukat janiw jiwapjjañapjja ukhamak uñjkaspati. Diosajj janipuniw servirinakapan tampacha jiwapjjañap ukhamak uñchʼukkaniti (5/15, 22 jana).