¿Kunanakas imatäski?

Peregrinonakampi viajasa

“¡JANIW utat uta yatiyir sarkiristti!” Bibliat yatichktan ukanakat waljaniw yaqhanakar yatiyañat ukham sapjje. Ukampis wali experienciani ukat Bibliat yatichiri mä peregrino jilataw ukham säna.

Zionʼs Watch Tower revista liytʼirinakajj religionap jaytasajja, Bibliat kunatï cheqäki uk yatjjatañ munapki ukanakampïñwa munapjjäna. Uka revistajja, jupanakjam iyawsäwini jaqenakar thaqhapjjañapataki ukat Bibliat yatjjatañatak sapa kuti tantachasipjjañapatakiw chʼamañchtʼäna. Ukat 1894 marat aksaruw Sociedad Watch Tower ukajj kawkïr tamanakatï visittʼatäñ munapkäna ukanakarojj tamanak tumptʼir jilatanak khithäna, qhepatjja peregrino sasin uñtʼatäjjapjjänwa. Uka jilatanakarojja, altʼat chuymanïpjjatapata, Bibliat yatipjjatapata, suma yatichiri ukat arstʼirïpjjatapata, ukat Jesucriston loqtasïwipar iyawsapjjatapatwa ajllisïna. Jupanakajj maya jan ukajj pä urukiw tamanakar visittʼapjjerïna, ukat walja luräwinïpjjänwa. Uka jilatan arstʼäwip istʼapjjañapatak invitación churir sarasaw Bibliat Yatjjatirinakajj yatiyir mistuñ qalltapjjäna. Hugo Riemer jilatajj mä yateqañ utanwa mä arumajj arstʼäna, tukuyasajj chika aruma pasakamaw jisktʼanakarojj Bibliamp qhanañchäna, qhepatsti Oraqpachan Jilïr Irpirëjjänwa. Qaritäkchïnsa, kusisitänwa ukat “uka tantachäwejj wali askipunïnwa” sasaw qhanañchäna.

Watch Tower revistajja akham sasaw qhanañchäna: ‘Yaqhep jilat kullakanakan utapan tantachasisaw tamanak tumptʼirinakajj tamar chʼamañchtʼapjje’ sasa. Uka uta jakʼan jakiri Bibliat Yatjjatirinakajj arstʼäwi istʼiri ukat jisktʼanakar Bibliamp qhanañchaskäna uk istʼiriw sarapjjäna. Ukatsti manqʼasiñ horasaw purinjjarakïna. Maude Abbott kullakajj akham siwa: “Jiskʼäkayät ukhajj alwa arstʼäwiruw sarirïta ukat tukuyarojj mä jachʼa mesjjaruw manqʼañatak tantachtʼasipjjerïta. ¡Walja ukat suma manqʼaw utjäna! Jamonanaka, thejjet wallpa aychanaka, kunayman tʼantʼa ukat pastelanaka. Taqeniw sistʼasipjjerïta, ukat jaypʼurojj yaqha arstʼäwi istʼañatakiw tantachasipjjerïta. ¡Ukampis ikiw apjjattasiri!” sasa. Peregrinjam walja maranak serviri Benjamin Barton jilatajj akham siwa: “Taqe kasta manqʼanak churapkitäna uk manqʼeriskayätjja, ¡kawki tiempow jiwatäjjeriskayäta!” sasa. Mä qhawqha tiempo qhepatjja, khuyaptʼayasiri kullakanakarojj akham sasaw Brooklyn markankir oficinat mä carta apayasïna: peregrino jilatanakarojj “jan walja manqʼa” churapjjamti, ukat “sum samartʼapjjarakpan” sasa.

Uka jilatanakajj dibujonakampi, maquetanakampi ukat yaqha ukhamanakampiw yatichapjjerïna. R. H.  Barber jilatajj munkañwa arstʼirïna. W. J. Thorn jilatasti wali munasirïnwa, jupajj “nayra tiempon jakir jaqjamaw” parli sasaw sapjjerïna. Ukat Shield Toutjian jilatajj Ford modelo A autot sarkasajj mä akatjamatwa “¡saytʼam!” sasin artʼäna. Ukat autot thoqoqasajj panqaranak aptaniri ukat jupamp chik saririnakaruw Jehová Diosan luratanakapat parliri sapjjewa.

Peregrino jilatanakajj jan waltʼäwinakanwa jikjjatasipjjarakïna, yamas chuyman jilatanakatakejj  jukʼamp chʼamakïnwa. Ukampisa, utat uta yatiyasiñapatak sarayirit uttʼayatäpkäna ukhajja, yaqhepajj aynachtʼapjjänwa, kunattejj ukar yatinoqtañajj chʼamakïnwa. Watch Tower marzo 15, 1924 inglés revistan akham sänwa: “Cheqpach cristianonakajj Diosan Reinopatwa yatiyapjjañapa. Uka amtampiw peregrino jilatanakarojj khithasi” sasa.

Amuyatajja, Diosan markapan mayjtʼäwinak utjkäna ukaw yaqheparojj aynachtʼayäna, kunattejja ukham serviñ jaytapjjänwa, yaqhepasti yaqha religión uttʼayasipjjäna. Robie D. Adkins jilatajj akham qhanañchi: “Suma arstʼäwinak churiri mä peregrinojj wali llakitaw akham arsüna, ‘taman arstʼañakwa yatta. ¡Janiw utat uta yatiyir sarkiristti!’” sasa. Ukat akham saskakiwa: “Juparojj Columbus (Ohio) markan 1924 maran jachʼa tantachäwejj apaskäna ukanwa wasitat uñjta. Ukanjja, jilat kullakanakajj wali kusisitäpjjänwa, jupasti mä jachʼa qoqa jakʼan saytʼataskänwa, ukat wali aynachtʼatänwa. Ukat janipuniw uñjawayjjti, qhepatjja Diosan markapatwa jitheqtjjäna” sasa. Ukampis “walja jilat kullakanakajj wali kusisitaw libronak autonakapar apañatakejj jupa jakʼa pasapjjäna” ukat utat uta yatiyañsa wal munapjjäna (Hech. 20:20, 21).

Peregrinonakajj Diosan arunakap utat uta yatiyañ yatichapjjañapäna, ukampis yateqer jilat kullakanakjamaw ajjsarasipjjpachäna, ukhampachas taqe chuymaw Bibliat yatiyapjjäna. Maxwell G. Friend (Freschel) jilatajj germana aru parläna, jupajj Diosan Arup yatiyañat akham qellqäna: “Peregrinjama utat uta yatiyañajja nätakejj mä bendicionawa” sasa. John A. Bohnet jilatajj akham sarakïnwa, taqe jilat kullakanakajj Diosan Reinopat yatiyañ wali askit uñjapjje. Ukatsti “yatiyirejj taqe chuymaw sarañ munapjjäna” sasa.

Uka jilatanakajj walja maranakaw jilat kullakanakar sum yanaptʼawayapjje. Diosar walja maranak serviri Norman Larson jilatajj akham siwa: “Peregrinonakan tamar visittʼapjjatapajj wali askïtap jiskʼatpachaw amuyawayta [...]. Jupanakaw suma thakhir sarañajätakejj yanaptʼawayapjjetu” sasa. Jichhürunakanjja, taqe chuyma yatiyir sarasinwa tamanak tumptʼirinakajj akham sañ yanaptʼasipkakistu: “Nayajj utat uta sariristwa” sasa.

[32 janan qhanañchäwipa]

Peregrino jilatan visitapajj wali kusiskañänwa

[31 janan fotopa]

Benjamin Barton jilatajj 170 tamanakaruw 1905 maran saräna

[32 janan fotopa]

Walter J. Thorn jilatajj wali munasiri ukat suma jilatänwa, juparojj munasiñatwa munat Awki sapjjerïna

[32 janan fotopa]

J. A. Browne jilatarojj Jamaica markaruw 14 gruponakar chʼamañchtʼañapatak peregrinjam 1902 maran khitapjjäna

[32 janan fotopa]

Peregrino jilatanakajja, Diosar yupaychapjjañapataki, cristianjam mayachtʼatäñataki ukat Diosan markapar jakʼachasipjjañapatakiw jilat kullakanakar yanaptʼapjjäna