¿Kunanakas imatäski?

“Janipuniw ukham suma yatiyäwejj istʼasirïkiti”

“¿KUNATAKIS ukanakajja?” sasaw George Naish jilatajj 18 metronak arkuntat lawa uñachtʼayasajj jisktʼäna, Saskatoon (Saskatchewan, Canadá) markana. Nayrïr Jachʼa Chʼajjwäwinwa jachʼa torrenak lurañatak apnaqasïna sasaw sapjjäna. “Uka lawanakampejj radiotaki mä antenaw luratäspa sasaw amuyta. Ukhamatwa mä radio toqe Diosan Arup yatiyañ amtapjjta” sasinwa qhepat Naish jilatajj säna. Ukat mä mara qhepatjja, 1924 maran CHUC radiojj istʼasjjänwa. Canadá markan uka radiow Diosar yupaychañat yatiyirejj nayrïr radiönjja.

Europa toqejj qhawqchʼäkänti niya ukchʼarakïnwa Canadá markajja, ukhamasti radio toqe yatiyañajj wali askipunïnwa. “Radiot yatiyasaw jan jikjjatapkirïta ukanakarojj cheqa yatichäwinakajj purtʼäna. Ukat niyakejjay radiojj jichhak uñstkchënjja, kunanakatï ukan yatiyaskäna uk walpunwa jaqenakajj istʼañ munapjjäna” sasaw Florence Johnson kullakajj saraki. Jupasti Saskatoon markan utjkäna uka radionwa irnaqäna. 1926 maratakejj Bibliat Yatjjatirinakajja (uka sutimpiw Jehová Diosan Qhanañchirinakapajj uñtʼatäpjjäna), Canadá markan pusi markanakanwa jupanakan sarayata radiot yatiyasipkäna. *

¿Kunanakas uka radion istʼasïna? Niya jila partejja, uka jakʼan utjki uka tamankir jilat kullakanakajj instrumentonakampi qʼochupkäna ukat awisajj mä jiskʼa orquestamp kun qʼochupkäna ukanakaw istʼasïna. Ukat jilatanakajj arstʼäwinak arstʼapjjarakïna ukat Bibliat maynimpis parltʼapjjarakïnwa. Amy Jones kullakajj ukanwa parlakiptʼatayna, ukat akham siwa: “Utat uta yatiykasajj aruntasirïta ukhajj akham sasaw awisajj sapjjerïtu: ‘¡Ah! Jumarojj radionwa istʼsma’ sasa”.

Halifax (Nueva Escocia) markanjja, Bibliat Yatjjatirinakajj mä wakichäwi uñstayapjjäna. Ukanjja Biblian yatichäwinakapatwa parltʼapjjerïna ukat istʼirinakajj jisktʼañatakiw telefonot jawsanipjjäna. “Uka wakichäwejj wali istʼatapunïnwa, telefonot jawsanirinakajj waltʼatapunïnwa ukat  janiw taqenirojj jaysañjamäkänti” sasaw mä jilatajj säna.

Apóstol Pablon tiempopanjamarakiw yaqhepajj istʼapjjäna ukat yaqhepajj janiraki (Hech. 17:1-5). Yaqhepajj sumwa Diosan arunakap katoqasipjjäna. Kunapachatï Hector Marshall jaqejj Estudios de las Escrituras sat librot radion parlir istʼatayna ukhajj jankʼakiw sojjta librpacha mayitayna. “Escuela dominical ukan yatichañatakiw yanaptʼitani sasaw amuyayäta” sänwa qhepatjja. Tiempompejja, nayrïr libro liytʼañwa tukuyjjäna, ukat iglesiapsa jaytanukjjänwa. Jupajja taqe chuyma ukat jan jitheqtasapuniw Diosan arunakap 1998 marakam yatiyawayi, uka maranwa jupajj jiwawayi. Nueva Escocia markan Inti jalsu toqenjja, “Diosan Reinopaw jaqenakar mä suytʼaw churi” sas pʼeqeñchan arstʼäwi radion istʼasitapat mä uru qhepatjja, J. A. MacDonald sat coronelajj akham sasaw uka cheqankir mä jilatar säna: “Cabo Bretón islankirinakajj wasürojj wali suma yatiyäwpunwa istʼapjje, janipuniw ukham suma yatiyäwejj istʼasirïkiti” sasa.

Maysa toqetjja, tatakuranakajj wali coleratäpjjänwa. Halifax markanjja, yaqhep catoliconakajj kawkhankantï Bibliat Yatjjatirinakan radiopajj uka cheq phallayañwa yantʼapjjäna. Ukat religionanakan pʼeqtʼirinakampi wiytatajja, akham sasaw marka apnaqerinakajj 1928 maran arsupjjatayna: ‘Janiw uka radion utjaskakiñapatak Bibliat Yatjjatirinakar licencia churasjjaniti’. Ukat arjjatasiñatakejja, ¿Khitis samanan dueñopajja? sas pʼeqeñchtʼat qellqatwa jilat kullakanakajj lakirapjjäna, ukajja kuna jan waltï apnaqerinakajj jupanakar lurasipkän ukwa yatiyäna. Ukhamäkchïnsa, janipuniw Bibliat Yatjjatirinakarojj wasitat licencia churañ munapkänti.

¿Canadá markankir jilat kullakanakajj ukham luratajj janit yatiyañ munjjapjjäna? Isabel Wainwright kullakajj akham siwa: “Qalltanjja, enemigonakasas atipjkaspa ukhamänwa. Ukampisa, radiot yatiyasiñapajj Jehová Diosan munañapaspäna ukhajja, janiw ukajj paskaspänti, uk sum amuyayäta. Ukhamajj Diosan Reinopat suma yatiyäwinakap jukʼamp suma yatiyañaruw uchasipjjañajäna”. Radio toqnama yatiyañar atinisiñat sipansa, Canadá markankir Bibliat Yatjjatirinakajj utat utwa yatiyañ qalltapjjäna. Tiempopanjja, radiojj Diosan Arupat yatiyañatakejj wali askipunïnwa. (Canadá markat imatanaka.)

[Qhanañchäwi]

[32 janan fotonakapa]

1) Edmonton (Alberta) markan utjki uka radio 2) Mä jilataw Toronto (Ontario) markan utjki uka radion transmisorap uñjaski 3) CHUC radiot yatiyapki uka cheqa, Saskatoon (Saskatchewan) markana

[32 janan qhanañchäwipa]

“Telefonot jawsanirinakajj waltʼatapunïnwa ukat janiw taqenirojj jaysañjamäkänti”