Jupanakan utjkäna ukjja jan utjirininakaruw churapjjäna

KHÄ 49 maranjja, Pedro, Santiago ukat Juan apostolonakajj “jilïrinakäsinjja”, Pabloru ukat Bernabeampir mä luräwi churapjjäna. Jan judiöpkis ukanakar Diosan arunakapat yatiyasipkäna ukhajja, pisinkir cristianonakat amtasipjjañapänwa (Gál. 2:9, 10). ¿Kunjamsa uk phoqhapjjäna?

Pablon cartanakapaw uk qhanañchi. Akham sasaw Corintonkir cristianonakarojj qellqäna: “Ofrenda apthaptʼañ toqetjja, kunjämtï Galacia provinciankir iglesianakaru yatichanktjja ukhamaraki jumanakajj lurapjjam. Sapa semana qallta urunwa jumanakajj apaqjjapjjañama sapa maynisa kunjämtï ganaski ukhamarjama, ukatsti imapjjam, kunapachatï purinkä ukkhajja jan apthapipjjañamataki. [Ukat] purinkä ukkhasti Jerusalenaruw apayjjä khitinakjjay jumanakajj khitañatak ajllisipjjchïta ukanakampi, mä cartampi jumanakan ofrendanakam uka jilatanakatak apasa” (1 Cor. 16:1-3).

Diosan amuytʼayatäsin payïr carta qellqkasajja, kunatsa qollqemp yanaptʼañajj wakisi uk wasitatwa Corintonkirinakar akham amtayäna: “Taqenis mayakïñasaw munasejja. Jichhajj jumanakanjja utjasipktamwa kunatï mayninakan jan utjki uka churapjjañamataki” (2 Cor. 8:12-15).

Pablojj Romankir cristianonakar 56 maranakan qellqkäna ukhajja, yanaptʼanak apthapiñajj niyaw tukuyasjjäna. Ukat akham sänwa: “Jichhajj sarasktwa Jerusalenaru, ukankir jilatanakataki mä yanapa apasa. Macedoniankirinakajja, ukhamarak Acayankirinakasa mä ofrenda apthapipjje Jerusalenankkis uka pistʼat jilatanakataki” (Rom. 15:25, 26). Uka qhepatwa Pablojj kuntï lurañapäkäna uk tukuyjjäna, Jerusalenar kuttʼkäna ukat katuntapkäna ukhajja, Roma marka apnaqer Félix chacharojj akham sänwa: “Pachpa markajjaruw kuttʼjjta limosna churañataki ukhamarak Tatiturus ofrendanak churañataki” (Hech. 24:17).

Macedoniankir cristianonakat parlkasajja, Pablojj akham sänwa: “Tatitun markapar yanaptʼapjjañajjataki sasaw walpun achiktʼasipjjetu”. Nayrïr cristianonakajj ukham yanaptʼasir chuymanipjjänwa, ukatwa Corintonkïrinakarojj jupanakat yateqasipjjañapatak akham sasin chʼamañchtʼäna: “Sapa mayniw, kunjämtï chuymapanjja amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa. ¿Kunatsa tamanakajj taqe chuyma churapjjäna? Kunatejj janiw jupanakan utjki ukaki Diosan markapar churañ munapkänti, jan ukasti Diosar yuspärapjjatapwa uñachtʼayañ munapjjäna (2 Cor. 8:4; 9:7, 12). Jiwasajj ukham amtampirakiw yanaptʼsna. Ukhamtï lurañänejja, Jehová Diosajj bendicistaniwa. Ukaw maynirojj qamiriptayi (Pro. 10:22).

 [9 janan recuadropa]

KUNJAMANAKATSA ORAQPACHAN YATIYASISKAKIÑAPATAK YANAPTʼASMA

Jichhürunakanjja, apóstol Pablon tiempopanjamarakiw waljanejj qollqep ‘apaqtʼapjje’ ukat tamanakan “Diosan Arunakapat aka oraqpachan yatiyasiski ukar yanaptʼañataki” siski uka cajar uchapjje (1 Cor. 16:2). Tamanakajj sapa phajjsiw uka qollqjja markapan yatiyasiskakiñapatak uñjki uka sucursalar apayapjje. Yanaptʼañtï munstajja, Jehová Diosan Qhanañchirinakapan sucursalapajj markaman utjki ukaruw cheqak apayarakisma. Kuna sutimpis uñtʼatäpjje uk sum yatjjatañatakejj kawkïr sucursalatï markaman yatiyasiñapatak uñjki ukankirinakampiw parlañama. Direccionapjja, www.pr418.com cheqanwa Internetan jikjjatäta. Akhamanakatwa yanaptʼarakisma:

JAN KUNS MAYISA CHURAÑA

• Qollqe, joyanaka, jan ukajj yaqha suma yänakwa churasma.

• Janiw kuns maykäti sasin mä cartan qhanañchtʼasaw apayañama.

MÄ AMTAMPI CHURAÑA

• Qollqwa churasma ukat wakiskani ukhajj kuttʼayasirakismawa.

• Uk churkasajja, wakiskani ukhajj kuttʼayapjjetätaw sasin mä cartan qhanañchtʼañama.

SUM AMUYTʼASISAW CHURASIÑAPA

Diosan Reinopat oraqpachan yatiyasiñapatakejja, janiw qollqe ukat valoran yänaka churasak yanaptʼksnati, jan ukasti yaqha toqenakatsa yanaptʼaraksnawa. Uk jichhajj uñjañäni. Ukanakat kawkïrimpiy yanaptʼañ munsta uk janïr lurkasajja, markaman utjki uka sucursalankirinakampiw nayraqat parltʼañama. Markanakanjja leyinakasa ukat impuestonakas janiw kikpäkiti, ukatwa sum amuytʼasiñatakejj uka toqet yatjjattʼatanakampi yanaptʼayasiñama.

Seguronaka. Jubilasitamat qollqsa ukat seguro de vida satäkis uksa Jehová Diosan Qhanañchirinakapan sucursalaparuw katuyjjasma.

Bancor qollq imasitama. Bancor qollq imasitanaksa, qollqe imasit certificadsa ukat jubilasiñat qollqsa fideicomiso ukaruw uchasispa, jan ukajj Jehová Diosan Qhanañchirinakapan sucursalaparuw banconakatak leyejj utjki ukarjama churasispa, ukhamat churirejj jiwjjaspa ukhajj uka qollqe irtjjapjjañapataki.

Accionanakampi bononakampi. Ukanakjja, Jehová Diosan Qhanañchirinakapan sucursalaparuw jan kun mayisak churasma, jan ukajj uka sutjjaruw mä contrato lurasma, ukhamata churirejj jiwjjaspa ukhajj uka qollqe irtjjapjjañapataki.

Utanaka ukat oraqenaka. Aljañjamäki uka utanaksa ukat oraqenaksa Jehová Diosan Qhanañchirinakapan sucursalaparuw jan kun mayis churasispa, jan ukajj churiritï uka utan utjaschejja, jiwañkam ukan utjasiñatak mayirakispawa.

Qollq churasajj mä renta mayirakisma. Mä amtar purisaw qollqsa jan ukajj títulos valores satäkis ukanaksa Jehová Diosan Qhanañchirinakapan sucursalapar churasispa, ukatsti khititï churki jan ukajj renta katoqañataki ajllitäki ukajja, jiwañkamaw maran mä kuti renta katoqe. Ukham churasajj impuesto pagañats iraqtʼatäspawa.

Testamentonaka ukat fideicomisonaka. Utanaksa, oraqenaksa jan ukajj qollqsa, notario nayraqatanwa mä testamento Jehová Diosan Qhanañchirinakapan sucursalapar churasispa, jan ukajj fideicomiso contratsa uka sutjjaruw jupanakan katoqañapatak jaytasirakispa. Ukham lurasajja impuesto pagañatsa iraqtʼatarakïspawa.

“Sum amuytʼasisaw churasiñapa” siski ukarjamajja, kun churañatakis maynejj sum amuytʼasiñapa. Jehová Diosan Qhanañchirinakapajj oraqpachan yatiyasipki ukar yanaptʼañ munirinakatakejja, Donaciones planificadas para favorecer el servicio del Reino en todo el mundo sat folletow wakichasi, uka folletojj español ukat inglés arut utji. Ukat jichhasa jan ukajj jutïrinsa kunjamanakatsa qollqsa jan ukajj yänaksa churasispa ukwa uka folleton qhanañchasi. Kunanaktï ukan qhanañchki ukajj inas jan ukhamapunïkchiniti, kunattejj sapa markanwa leyinakasa ukat impuestonakasa mayjajja. Uka folleto liytʼasajja, uka toqet yatjjattʼatanakaruw jisktʼasiñama. Ukhamanakatwa waljanejj Diosar yupaychañataki ukat kuna jan waltʼäwinakas utjki uka luräwinakan yaqhanakar yanaptʼasiñapatak churapjjaraki, ukat ukham churasajj kuna impuestonakatï pagañäki uksa iraqtʼatäpjjarakiwa. Uka folletotï markaman utjchejja, tamamankir secretario jilataruw mayisma.

Uka toqet jukʼampi yatiñ munstajja, Oficina de Donaciones Planificadas satäkis ukaruw qellqtʼasma, jan ukajj jawstʼasma, direccionapajj akjjar qellqtʼatäskiwa, jan ukajj kawkïr sucursalatï markaman yatiyasiñapatak uñjki ukankirinakaruw jawstʼarakisma.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Teléfono: (845) 306-0707