“Munañam lurañ yatichita”

“Munañam lurañ yatichita, nayan Diosajjätam layku.” (SAL. 143:10.)

AMTAÑATAKI

¿Davitajj Jehová Diosan amtaparjampun sarnaqañ munirïtap kunanakas jakäwipan uñachtʼayi?

¿Diosan munañap amuytʼañatakejj kunas Davitar yanaptʼäna?

¿Kunas Jehová Diosamp askit uñjatäskakiñatakejj yanaptʼistani?

1, 2. ¿Kunas Diosan munañapajja uk yatiñajj kunatakis yanaptʼistu, ukat kunsa David reyit yatjjataskañäni?

 JUMAJJ qollu qollnam mä thakhinjam saraskasma ukat uka thakhejj payar jaljtaspa ukhajja, ¿kawkïr thaknam sarañsa amtäta? Uk sum amtañatakejj inas qollu patar mistsusin kawkirus sapa thakhejj sari uk uñtchisma. Ukhamarakiw wali wakiskir mä amtar puriñatakejj lurañasa. Kuntï lurañ amtasktan uka toqet kunsa Diosajj amuyi ukwa sum amuytʼañasa, ukhamatwa munañap lurañäni, mä arunjja, thakhiparjam sarnaqañäni (Isa. 30:21).

² Israel marka apnaqer David reyejja, Diosan munañap lurasapuniw sarnaqerïna, ukaw jiwasatakejj wali yateqaskayajja. Ukhamasti kunanaksa jakäwipan luratayna ukanak mä qhawqha amtañäni, ukhamatwa Jehová Diosar taqe chuyma serviripan sarnaqäwipat yateqasiñäni (1 Rey. 11:4).

DAVITAJJ WALI RESPETOMPIW JEHOVÁ DIOSAN SUTIP UÑJÄNA

3, 4. 1) ¿Kunas Davitar Goliat chachamp nuwasiñatak chʼamañchtʼäna? 2) ¿Davitajj kunjamsa Diosan sutip uñjäna?

³ David waynitojj Filistea markankir Goliat guerrerompi nuwaskäna uka toqet amuytʼañäni. ¿Niya kimsa metroni ukat wali chʼamani jaqempi nuwasiñatakejj kunas chʼamañchtʼäna? (1 Sam. 17:4.) ¿Jan ajjsarirïtapa? ¿Diosar iyawsäwinïtapa? Paypachas ukatakejj wali wakiskirïkchïnjja, Jehová Diosaru ukat sutipar respetatapatwa ukham luräna. Davitajj colerataw akham jisktʼäna: “¿Khitiraki uka jan Diosar uñtʼiri filisteo chachasti, jakkir Diosan ejercitopar arnaqaniñapatakisti?” sasa (1 Sam. 17:26).

⁴ Davitajj Goliat chacharojj akham sänwa: “Jumasti espadampi, lansampi, flechanakampiw nayamp nuwasirejj juttajja ukampis nayajj jumampi nuwasirejj taqe chʼamani  Tatit Diosan sutipjjaruw juttjja. Jupasti Israelan ejercitopan Diosapawa, khitirutejj jumajj arnaqkta ukana” (1 Sam. 17:45). Davitajj Jehová Diosar confiyasaw Goliat jaqer mä qalampi qʼorawtʼas jiwayäna. Janiw ukhakejj Diosar confiykänti, jan ukasti taqe jakäwipanwa Diosar confiyäna ukat Sutipsa wali respetompiw uñjäna. Ukat israelitanakarojj akham sarakïnwa: “Jachʼa tukupjjam qollana sutipatjja” sasa (1 Crónicas 16:8-10 liytʼasiñapawa).

5. ¿Kunjamsa jaqenakajj Goliat chachjam Diosan sutip jiskʼachapjje?

⁵ ¿Jumatakejj Jehová Diosaru Diosamarjam uñjañajj wali askiti? (Jer. 9:24.) Kunapachatï vecinonakamasa, amigonakamasa jan ukajj familiaranakamas Diosat jan wal parlapjje ukat Jupan servirinakapats phiskhasipjje ukhajja, ¿kuns lurta? ¿Diosaw yanaptʼitani sasin atinisisa sutip arjjattati? Cheqansa, ‘amuktʼañ horasajj’ utjiwa, ukampis Jehová Diosan Qhanañchiripätasata ukat Jesusan arkiripätasat janiw phenqʼasiñasäkiti (Ecl. 3:1, 7; Mar. 8:38). Suma arunakampi ukat munasiñampis jan sum katoqasir jaqenakar parlañasäkchejja, janipun israelitanakjamäñäniti, jupanakajj Goliat chachar uñjasajj “chʼama jiwtʼayasipjjäna, ukat wali ajjsarapjjäna” (1 Sam. 17:11). Jan ukasti, Diosan sutip jan pächasis jachʼañchañäni. Diosajj kunjamäkiti uk uñtʼapjjañapatakiw jaqenakar yanaptʼañ muntanjja. Ukatwa Bibliampi yatiytanjja, ukhamat kunja wakiskiris Diosar jakʼachasiñajj uk amuyapjjañapataki (Sant. 4:8).

6. ¿Davitajj Goliatamp nuwaskäna ukhajj kuna amtanïnsa, ukat jiwasatakejj kunas nayrankañaparaki?

⁶ Davitan Goliat chachampi nuwasitapatjj yaqha wakiskir yatichäwi yateqaraksna. Kawkintï nuwasiñapäkäna uka cheqar purisajja, Davitajj akham sasaw jisktʼäna: “¿Khititejj aka filisteo chacharu jiwaykaspa, ukhamarak israelitanakar jiskʼachatapsa apaqkaspa uka jaqerusti reyejj kunsa churaspa?”. Ukat israelitanakajj akham sasaw wasitat sapjjäna: “Khititejj juparu atipjaspa ukarusti reyejj walja yänakwa churani, phuchapsa warmipat churarakini” (1 Sam. 17:25-27). Ukampis Davitajj janiw yänak katoqañ munasakejj nuwaskänti, jan ukasti cheqpach Diosar jachʼañchañwa munäna (1 Samuel 17:46, 47 liytʼasiñapawa). ¿Jiwasasti? ¿Akapachan qamirïña ukat jachʼañchatäñti nayraqat muntanjja? Jiwasajj Davitjamäñ muntanjja, jupajj akham sasaw qʼochüna: “Tatitun jachʼa kankañap taqpachan jachʼañchapjjañäni, sutip jachʼar aptapjjañäni” sasa (Sal. 34:3). Ukhamasti Jehová Diosar atinisipjjañäni ukat taqe kunat sipansa sutip nayrar uchañäni (Mat. 6:9).

7. Jaqenakajj jan wal katoqapkistu ukhajja, ¿kunjamsa jan jaytas yatiyaskakiñatakejj iyawsäwis jukʼamp chʼollqheñchsna?

⁷ Goliat chachampi jan ajjsartʼas nuwasiñapatakejja, Davitajj Jehová Diosaruw taqe chuyma confiyäna ukat iyawsäwipas chʼollqherakïnwa. Uwij awatirïkäna ukhaw Diosar sapür confiyañ yateqäna, ukaw iyawsäwipan chʼollqhëñapatak yanaptʼäna (1 Sam. 17:34-37). Ukhamarakiw Diosan Arupat jan qhepharas yatiyaskakiñatakejj iyawsäwisan chʼollqhëñapajj wakisi, yamas jan munasiñamp katoqapkistu ukhaw ukajj wakisi. Iyawsäwinïñatakejja, Jehová Diosaruw taqe luräwinakasan confiyañasa. Amuytʼañataki, autot sarkasina khitinakatï jiwasamp chika qontʼatäsipki ukanakarojj Diosan Arupat yatiyaraksnawa. ¿Ukat utat uta yatiyir sarktan ukhajj jaqenakajj callenakankapki ukanakar janit yatiykaraksna? (Hech. 20:20, 21.)

DAVITATAKEJJ DIOSAN MUNAÑAP PHOQHAÑAW NAYRANKÄNA

8, 9. Davitajj kunjamtï Saular uñjkäna ukanjja, ¿kunjamsa Diosan munañap lurañajj wali wakiskirïtap uñachtʼayäna?

⁸ Davitajj kunjamsa Saúl reyir uñjäna ukanwa Jehová Diosar confiyatap amuyaraksna,  Saulajj Israel markan nayrïr reyipänwa. Jupajj Davitar uñisiñatwa jiwayañatak kims kuti lansampi jaqtʼäna. Ukampis Davitajj janiw waktʼayaskänti ukat janiw ukhamat ukhams kuttʼaykarakïnti. Qhepatsti Davitajj jayaruw sarjjäna (1 Sam. 18:7-11; 19:10). Ukatsti, Saúl reyejj 3.000 jaqenakwa taqe Israel markat ajllirasin wasararu Davitar thaqher saräna (1 Sam. 24:2). Mä urojja, Saulajj jan yatkasaw kawkhantï Davitasa ukat jaqenakapas imantasipkäna uka pachpa putur mantäna. Ukanwa Davitajj jupar jiwayañ munir reyirojj jiwayaspäna. Ukhamarusa Diosan munañaparjamajj Davitaw Saúl lantejj Israel markan reyipat uttʼasiñapäna (1 Sam. 16:1, 13). Davitatï jaqenakaparu istʼasapäna ukhajja, Saularojj jiwayaspänwa. Ukampis jupajj akham sänwa: “¡Tatitojj jan aytaykitpati amparajja nayan reyejj contra! ¡Jïsa, jupajj reyiwa. Tatituw juparojj ajllisiraki reyïñapataki!” sasa (1 Samuel 24:4-7 liytʼasiñapawa). Saulajj Diosan uttʼayat reyjamaskakïnwa, ukat Davitajj janirakiw tronopat apaqañ munkänti, kunattejj Jehová Diosaw reyirjam uñjaskakïna. Ukat Saulan isip khuchhoqasakejja, jan kun kamachtʼañ munatapwa uñachtʼayäna (1 Sam. 24:11).

⁹ Saular qhep qhep uñjkäna ukhasa, Davitajj wasitatwa Jehová Diosan uttʼayat reyipar respetompi uñjäna. Davitampi ukat Abisai chachampejj kawkhantï Saúl reyejj jikjjataskäna ukharuw puripjjäna ukat ikiskir jikjjatapjjäna. Diosaw uñisirimar katuytam sasaw Abisai chachajj säna, ukat nayaw pachpa lansapampi jiwayäjja siskchïnsa, Davitajj jarktʼänwa (1 Sam. 26:8-11). Niyakejjay Davitajj Diosan yanaptʼayasiñ munchïnjja, janiw Abisai chachan jariyatajj Diosan munañaparjam lurañ amtkäna uk mayjtʼaykänti.

10. ¿Kunjamanakansa jikjjatassna, ukat maynin amuyupampi jan apayasiñatakejj kunas yanaptʼistani?

¹⁰ Inas jiwasajj ukhaman jikjjatasiraksna, inas maynejj Diosan munañap phoqhaskakiñasatak yanaptʼañat sipansa, jupan amuyuparjam lurañasatak wiytchistaspa. Ukat Abisai chachjamarakiw Diosan munañaparjam janïr sum amuytʼaskasin kuns lurayañ munchistaspa. Janïr ukar iyawskasajja, kuntï maynejj lurayañ munkistu uka toqet kunsa Diosajj amuyi uk sum amuytʼasiñasa ukat munañaparjam sarnaqaskakiñwa amtañasa.

11. ¿Kunjamsa Davitajj Diosan munañap lurañajj wali wakiskirïtap uñachtʼayäna, ukat kunjamsa jupat yateqassna?

¹¹ Davitajj akham sasaw Diosar mayisïna: “Munañam lurañ yatichita” sasa (Salmo 143:5, 8, 10 liytʼasiñapawa). Davitajj amuyupar confiyañata jan ukajj jaqenakan amuyupamp apayasiñat sipansa, Diosampi yatichatäñwa  munäna. Ukatwa akham säna: “Taqpach luräwinakamat lupʼta, amparamamp luratanakamat amuykipta” sasa. Jiwasajj Davitjamarakiw kunas Jehová Diosan munañapajj uk Bibliat sum yatjjatasa ukat kunjamsa jaqenakar Diosajj uñjäna uka sarnaqäwinakat lupʼis yatjjatsna.

KUNSA LEYINAKAJJ SAÑ MUNÄNA UK DAVITAJJ SUM AMUYÄNA

12, 13. Kimsa chachanakajj uma wayunirapipkäna ukjja, ¿kunatsa Davitajj wartäna?

¹² Diosan leyinakapajj kuntï sañ munki uk Davitajj sum amuyäna ukat ukarjamaw sarnaqañ munarakïna, ukanakaw jiwasatakejj wali yateqaskayajja. Kunapachatï Davitajj “Belén [...] phuchʼupata uma” wal umtʼañ munatap yatiyäna ukhajj kunas pasäna uka toqet amuytʼañäni. Uka markajj filisteonakan katuntatänwa, ukhampachasa Davitan kimsa jaqenakapajj jan ajjsartʼasaw uka markar mantapjjäna, ukat uma waytʼataw kuttʼanipjjäna. Ukampis “Davitajj janiw umtʼañ munkänti, jan ukasti Tatitutakiwa mä ofrendjama waranuküna”. ¿Kunatsa? Davitajj akham sasaw qhanañchäna: “¡Diosajj jan munpati nayan umtʼañajja! Aka jaqenakan wilanakapsa umtʼkirista ukhamäspawa, jupanakajj jakañanakapsa niya aptʼasisa aptanipjjatap layku” sasa (1 Cró. 11:15-19).

¹³ Niyakejjay Davitajj Diosan leyinakap uñtʼchïnjja, wila jan manqʼañätapa ukat Jehová Diosataki wartasiñapätap sum yatïna. Ukat kunatsa ukham lurasiñapäna uksa sum amuyarakïna. “Taqe jakirinakasti kuna wilatejj jupanjja utjki” ukampi jakapjjatapsa sum yatirakïna. Ukampis ukajj janiw wiläkänti, umänwa. ¿Kunatsa jan umtʼañ munkäna? Kunattejj Diosan leyipajj uka toqet kamsisa uk sum Davitajj uñtʼäna. Niyakejjay uka kimsa chachanakajj jakäw niy aptʼasirjam mantapjjchïnjja, uka umajj uka chachanakan wilapäkaspasa, mä arunjja, qollanäkaspas ukham uñjäna. Ukatwa umtʼañat sipansa, oraqer wartäna (Lev. 17:11; Deu. 12:23, 24).

14. ¿Kunas Davitarojj Diosatakjam sarnaqañ yanaptʼäna?

¹⁴ Jehová Diosan Leyipajj chuymapar puriñapatakiw  Davitajj chʼamachasïna. Ukatwa akham qʼochüna: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Jupajj Diosan Leyipat yatjjatäna ukat uka leyit wal lupʼïna. Ukat Diosan kamachinakaparus wal confiyäna. Ukatwa uka kamachinakarjam sarnaqañatak jankʼakïna, janiw qellqatarjamak sarnaqkänti jan ukasti Moisesajj Ley katoqkäna ukajj kamsañs muni ukarjamaw sarnaqäna. Jiwasajj ukhamarakiw Bibliat yatjjatktan ukanakat lupʼiñasa ukat chuymasar imañasa. Ukhamatwa kunanaktï yateqawayktan ukarjam sarnaqañäni ukat Jehová Diosar kunas kusisiyi ukarjam kun lurañs amtarakiñäni.

15. ¿Kunjamsa Salomonajj Diosan leyipar jan respetatap uñachtʼayäna?

¹⁵ Davitan Salomón yoqapajj Jehová Diosat walja bendicionanak katoqawayäna, ukampis qhepat Diosan leyipar janiw respetjjänti. Amuytʼañäni, Israel markan reyinakapajj janiw “walja warminakanïñapäpkiti” siskäna uka kamachir janiw istʼkänti (Deu. 17:17). Jupajj yaqha markankir warminakampiw casarasïna. Ukat chuymanëjjäna ukhajja, uka “warminakapajj chuymapjja yaqha diosanak toqeruw uñtayapjjäna”. Kunanaksay amuyaskchïnjja, “Salomonana luratanakapajj jan walï[nwa] [Jehová] Tatitun nayraqatapana, jupasti janiw cheqpacha chuymampi Tatiturojj David awkipjama arkkänti” (1 Rey. 11:1-6). ¡Kunja wakiskirisa Diosan Arupan jikjjataski uka leyiparjama ukat kuntï uka leyinakajj sañ munki ukarjam sarnaqañajja! Sañäni, maynejj jaqechasiñ amtki ukhaw Diosan Arupar istʼañapajj wali wakiskirejja.

16. Diosar ‘iyawsirimpiki’ casarasipjjam siski uka kamachejj kamsañs muni uk amuytʼañajja, ¿kunatakis yanaptʼistani?

¹⁶ Diosar jan serviritï munapayaskchistojja, ¿arsutasajj Davitjam amuyatasti jan ukajj Salomonjam amuyatascha uñachtʼayani? Cheqpach cristianojja Diosar ‘iyawsirimpikiw’ casarasiñapa (1 Cor. 7:39). Mä cristian jilatatï jan ukajj kullakatï casarasiñ amtchejja, Diosan yupaychiripampikiw casarasiñapa. Biblian uka kamachipajj kamsañs muni uk amuyañäni ukhajja, janiw Diosar jan yupaychirimpejj casaraskañäniti ni munapayatas iyawskañäniti.

17. ¿Pornografía sat qʼañu luräwinakat jitheqtañatakejj kunas yanaptʼistani?

¹⁷ Davitajj Jehová Diosan yanaptʼap thaqhapunïnwa uk yateqasiñajja, pornografía sat qʼañu luräwinak jan uñchʼukiñatakiw yanaptʼistani. Aka qellqatanak liytʼam, uka kamachinakajj kamsañs muni uk amuytʼam ukat uka toqet kunsa Jehová Diosajj amuyi uk amuytʼarakim (Salmo 119:37; Mateo 5:28, 29; Colosenses 3:5 liytʼasiñapawa). Diosan kamachinakapat lupʼiñajj pornografía sat qʼañu luräwinakat jitheqtañatakiw yanaptʼistu.

KUNSA DIOSAJJ AMUYI UK AMTAPUNIÑÄNI

18, 19. 1) Davitajj pantjasirïkchïnsa, ¿kunas Diosampi askit uñjataskakïñatak yanaptʼäna? 2) ¿Kun lurañs jumajj amtta?

¹⁸ Davitajj walja toqenakatsay yateqaskayäkchejja, walja jachʼa juchanakwa luräna (2 Sam. 11:2-4, 14, 15, 22-27; 1 Cró. 21:1, 7). Ukampisa, pantjasitanakapat taqe chuymaw arrepentisïna. Ukatwa jupajj “cheqa chuymamampi[w]” Dios nayraqatan sarnaqäna sasin sissnajja (1 Rey. 9:4). ¿Kunatsa? Kunattejj Diosan munañaparjam sarnaqañatakiw Davitajj chʼamachasïna.

¹⁹ Jiwasajj pantjasirïkstansa, Jehová Diosampejj askit uñjatarakïsnawa. Ukatakisti, Diosan Arupat jan jaytas yatjjatapuniñäni, kuntï yateqtan ukjjat lupʼipuniñäni ukat yateqatasarjampun sarnaqapjjañäni. Ukhamtï lurañänejja, salmo qellqerjamarakiw Jehová Diosar akham mayisiñäni: “Munañam lurañ yatichita” sasa.

[Jiskt’anaka]

[5 janan fotopa]

Davitajj Saular jiwayaspänwa, ukampis ¿kunatsa jan jiwaykäna?

[6 janan fotopa]

Kimsa jaqenakapajj wayunirapipkäna uka uma Davitan jan umtʼatapatjja, ¿kunsa yateqsna?