Jan walinakatakwa Biblia apnaqapjje, amuyasiñäni

“DIOSAN arupasti jakaskiwa, jachʼa chʼamanirakiwa.” (Heb. 4:12.) Diosan arupajj jaqen chuymapar purtʼañataki ukat jan wali luräwinak jaytañ yanaptʼañatak chʼamanïtapwa apóstol Pablojj qhanañchaskäna.

Apostolanakan jiwjjapjjatap qhepatjja, Diosan markap contra saytʼirinak utjatapatwa jaqenakajj Biblian yatiyäwinakapajj chʼamanïtapat jan wal amuyjjapjjäna (2 Ped. 2:1-3). Tiempompejja, Bibliarojj jan walinakat jarkʼaqasiñataki chʼamanïkaspa ukhamwa tatakuranakajj uñj-jjapjjäna. Ukat Harry Y. Gamble sat yatjjattʼat yatichirejja, “jan walinakat jarkʼaqasiñataki cristianonakan qellqatanakapata” parlkasajj akham sänwa: 200 maranakanjja, Orígenes (Iglesian Awkipa) chachajj “qollan qellqatanakajj maynir waliptayaspawa: layqasiñ arunakatï chʼamanïchejja, Diosan Arupajj jukʼampiwa” sasaw amuyayäna. Gamble chachajj akham saskakiwa: Juan Crisóstomo, khititï niya 400 maranakana jakkäna ukajj akham qellqäna: “Kawkïr utantï evangelionakajj utjki ukarojj janiw sajjranakajj jakʼachaskiti” sasa. Ukat evangelionakwa wali chʼamani illäkaspas jan ukajj amuletökaspas ukham warkuntasipjjerïna. Ukatsti akham sasaw qhanañchi: Agustín de Hipona sat chachajja, “pʼeqe usunak apaqañatakejj Juan libro chʼijmañaru uchasiñajj wali askitwa uñjäna”. Kunjamtï amuyktanjja, Qollan Qellqatanakjja jan walinakat jarkʼaqasiñatakiw apnaqapjjerïna. Ukampisa, ¿Bibliaru mä illarjam uñjañajj walikïskpachati?

Jichhürunakanjja, waljaniw Biblia jan walitak apnaqapjje. Jupanakajja, Biblia aleqak janatattʼas kawkïr tʼaqtï nayraqat uñjapki ukwa liytʼapjje ukat ukaw kuntï lurañasäki uk sistani sasaw amuyapjje. Ukat Gamble chachajj akham siwa: Agustín de Hipona chachajj uta jakʼapanjja akham sirwa mä wawaru istʼatayna: “Ak liytʼam, ak liytʼam” sasa. Ukat Biblia janjtʼasisis kawkïr tʼaqtï uñstki uk liytʼam sasinsa Diosajj jupar siskaspa ukhamwa amuyäna.

¿Jan waltʼäwinakan jikjjatasis Diosar mayisipki ukat Bibliap janjtʼasis kawkïr cheqtï uñsti uk liytʼañaw yanaptʼitani siri jaqenakar uñtʼtati? Suma amtampis uk lurapkchïnjja, cheqa cristianonakajj Biblian yanaptʼap janiw ukham thaqhapjjañapäkiti.

Jesusajj akham sasaw arkirinakapar säna: “Qollan Ajayu khitanini, jumanakar yanapañapataki” ukat ukaw “jumanakar taqe kuns yatichapjjätam, amtayapjjarakïtamwa kuntejj nayajj jumanakaru sapjjsma ukanaka” sasa (Juan 14:26). Ukhamasti, Bibliat yanaptʼa jikjjatañatakejja, yatjjatañasawa, janiw kawkïr cheq janjasakejj jikjjatksnati.

Jan walinakat jarkʼaqasiñataki, jan waltʼäwinaka askichañataki ukat jutïrit yatiñatakiw waljanejj Biblia apnaqapjje. Ukampisa, yatiri tukuñasa ukat layqasiñas janiw walïkiti sasaw Bibliajj qhanañchistu (Lev. 19:26; Deu. 18:9-12; Hech. 19:19). “Diosan arupasti jakaskiwa, jachʼa chʼamanirakiwa” ukat yanaptʼarakistaspawa, ukampisa sumwa apnaqañasa. Bibliajj janiw ukhamatak yanaptʼkistaspati. Jan ukasti Bibliat yatjjatañaw sum jakasiñatak yanaptʼistani. Uka yatichäwinakaw waljanirojj kunatï walïki jan walïki uk amuyañ yanaptʼawayi, ukat jan wali luräwinak apanukuñsa, kusisita familianïñsa ukat Jehová Diosamp sum apasiñs yanaptʼawayi.