¿Jumajj amttati?

¿Aka qhepa phajjsinakan mistkäna Yatiyañataki sat revista liytʼtati? Ukhamächi ukhajja, aka jisktʼanakar qhanañchtʼma:

¿Parlatasampi tama taypin ninampjam jan wiykatañatakejj kun lurañas wakisispa?

Sapa mayniw kunas chuymasan utji ukanakat amuyasiñasa. Mayninakat jan walinak amuyañat sipansa, kunatsa jilatat jan walinak parltan uk amuytʼasiñasawa. ¿Luratanakasat jachʼañchatäñ thaqhasati jan ukajj mayninakat sipansa wali aytatäñ munasincha mayninakar jiskʼachasktjja? Ukat mayninakar jiskʼachañajj jukʼampikiw jan waltʼayistaspa (8/15, 21 jana).

¿Akapachan tukusïwip janïr purinkipan kunas pasani?

Marka apnaqerinakajj akham sapjjaniwa: “Taqe kunas sumakïskiwa, janiw kunas paskaniti”. Ukat “Jachʼa Babilonia[wa]” akatjamat tʼunjatäni. Diosan markap contraw sartapjjani. Armagedón jachʼa chʼajjwäwiw utjani, ukatsti Supayampi sajjranakapampejj waranqa maratakiw manqhapacha chʼamakaru jaqontatäpjjani (9/15, 4 jana).

¿Akapachan tukusiñapajj kunürus jutani uk jan yatiñajj kunanakansa yanaptʼistu?

Uk jan yatiñajj Jehová Diosar munasitas uñachtʼayañataki ukat Jupar kusisiyañatakiw yanaptʼistu. Munañanakas maysar apanukusin Diosar taqe chuyma serviñataki ukat Juparu ukat Aruparu jukʼamp confiyañatakiw yanaptʼistu. Ukat yantʼanakas ukatakirakiw yanaptʼistu (9/15, 24 ukat 25 jananaka).

Arrepentisirinakan juchap Diosajj perdoniwa ukat armjjewa, ¿ukajj kamsañs muni?

Jehová Diosajja servirinakapar akham siwa: “Jucha luratanakapatsti janiw mayampsa amtaskjjarakïti” (Jer. 31:34). Jesusan loqtasitapjjaruw Jehová Diosajj juchanakas perdonistaspa. Kunapachatï maynin juchap perdonjje ukhajj armjjewa, mä arunjja, perdonkistu uka juchanakasat mutuyañatakejj janiw amtjjeti (10/1, 30 jana).

¿Rut warmin munasiñapat kunsa yateqassna? (Rut 1:16, 17.)

Noemí suegraparojj taqe chuymapuniw munasïna, ukatwa jan ajjsartʼayasisa jupamp chika saräna. Jiwañakiw jumat jaljtayitani sasaw säna. Rutajj Noemin markapan jakasiñsa, familiaranakapa ukat diosanakap jaytañsa janiw pächaskänti (10/1, 21 jana).

¿Kunatsa Jehová Diosajj “maynit maynikam khuyaptʼayasirïpjjam”, ukhamaraki jan uñtʼapkta ukanakarusa sasin sistu? (Efe. 4:32.)

Jehová Diosajj khuyaptʼayasiriwa, ukat kunjamtï Jesusajj siskänjja, alajjpachankir Awkisajj janiw khitinakatï Jupar wal munaski ukanakaruk munaskiti, jan ukasti ‘Jupar jan yuspäririrusa’ khuyapayasirakiwa (Luc. 6:35). Niyakejjay Diosar uñtasit luratästanjja, Jupjam khuyaptʼayasirirakïsnawa. Ukat janiw familiasarukejja, jan ukasti yaqhanakarojj khuyaptʼayaraksnawa (10/1, 11 jana).

¿Apocalipsis 1:16, 20 qellqatarjamajja, Jesusan kupi amparapankki uka ‘paqallqo warawaranakajj’ khitinakampi sasisa?

Alajjpachar sarañatak ajllit irpir chuymaninakampi sasiwa ukat tamanakankir taqe irpir chuymaninakajj ukham uñjatäpjjarakiwa (10/15, 13 ukat 14 jananaka).

Isaías 50:4, 5 qellqatarjamajja, ¿kunjamsa Jesusajj altʼat chuymanïtap uñachtʼayäna?

Uka jiskʼa tʼaqanakarjamajja, Taqe kunjjaru Munañani Jehová Diosan ‘yatichatajja’ janiw “maysarus uñt[añapäkän]ti”. Jesusajja, kuntï Awkipajj yatichkäna uk wali amuyumpi istʼasaw altʼat chuymanïtap uñachtʼayäna. Ukatsti Diosajj kunja altʼat chuymampitï jucharar jaqenakat khuyaptʼayasïna uksa Jesusajj wal yateqañ munarakïna ukat jankʼakirakïnwa (11/15, 11 jana).