Yatiyañataki edición sencilla: ¿Kunatsa lurasiwayi?

WALJA maranakawa kuntï Yatiyañataki revistan Bibliat yatichäwinak apsusiwayki ukajj walja jaqenakaru oraqpachan yanaptʼawayi. Julio 2011 maranjja, Yatiyañataki edición sencilla inglés arutwa apsusiwayi. Ukat uka revistanjj akham sasaw qhanañchasïna: “Aka machaq revistajja, mä maraw yantʼasini, ukat wali askirjam yanaptʼani ukhajja, lurasiskakiniwa” sasa.

Jichhat aksarojja, uka revistajj lurasiskakiniwa sasaw wali kusisit yatiyanipjjsma. Ukat Yatiyañataki edición sencilla revistajj aka arunakan utjarakiniwa: español, francés ukat portugués.

¿KUNATSA WALI ASKIT UÑJAPJJE?

Yatiyañataki edición sencilla revista katoqasajja, Pacífico Sur uksa toqenkir jilat kullakanakajj akham sapjjewa: “Jichhajja, kuntï Yatiyañataki revistajj siski uk jukʼamp sumwa jilat kullakanakajj amuyapjje” sasa. Yaqha cartajj akham sarakiwa: “Yaqhep arunakajj kamsañs muni uk thaqhañataki ukat sum amuytʼañataki tiempo apsusipkayäta ukajja, jichhajj Biblian tʼaqanakap liytʼasin yatichäwimpi sum amuytʼañatakëjjewa”.

Estados Unidos markanjja, jachʼa yateqañ utat misturi mä kullakajj akham siwa: “18 maranakaw kunjamtï yatjjatʼatanakajj parlapki ukham parlawayta ukat qellqawayta. Amuyunakajasa ukat arsutajasa chʼamänwa amuyañajja. Ukat jan ukhamäñatak chʼamachasiñajwa amuyasta”. Jichhajj jupajj akham siwa: “Yatiyañataki edición sencilla revistajj walpun yanaptʼawayitu. Kunjam arunakampi qellqatäkiti ukajja, kunjamsa  taqenin amuykañ parlasispa uk uñachtʼäwayitu”.

Inglaterra markankiri mä kullakajja, Yatiyañataki edición sencilla revistat akham siwa: “Kunapachatï nayrïr revista liytʼkta ukhajja, kunjamtï mä awkejj wawapataki liytʼarapki ukhamsa Jehová Diosajj qhomjjartʼasin liytʼarapkitaspa ukhamwa amuyasiyäta”. Jupasti 1972 maranwa bautisasitayna.

Estados Unidos markankir Betelan irnaqtʼiri ukat 40 maranak jila bautisata mä kullakajja, uka revistajj Biblian yatichäwinakap jukʼamp sum amuytʼañwa yanaptʼawayitu sänwa. Amuytʼañataki, Yatiyañataki septiembre 15, 2011 revistan mä recuadropajja, Hebreos 12:1 qellqatan “walja iyawsañani jaqenakampi muyuntatätan” siski uka arunakatwa qhanañchi, uka arunakajj Jehová Diosan Qhanañchirinakapajj jan jaktʼkayätapwa amuytʼayi. Ukat jupajj akham siwa: “Uka tʼaqajj kamsañsa muni uk ukhaw sum amuyawayta” sasa. Ukat tantachäwinakat parlkasajj akham sarakiwa: “Mä wawatï Yatiyañataki edición sencilla revistat liytʼas arstʼki ukhajja, khitinakatï Yatiyañataki edición normal revistanïpki ukanakatakejj wali sumawa”.

Betelankir yaqha kullakajj akham sarakiwa: “Tantachäwinakan wawanakar arstʼir istʼañajj wali kusiskañapuniwa. Yatiyañataki edición sencilla revistaw taqe chuyma arstʼapjjañapatak yanaptʼawayi. Arstʼäwinakapajj walpun chʼamañchtʼitu”.

 1984 maran bautisasiri mä kullakajj akham sasaw uka revistat yuspäri: “Nayatakis qellqatäkaspa ukhamwa amuyasta. Kuntï liytʼkta ukjj sumpun amuytʼta. Jichhajja, taman yatjjataski ukhajj jan pächasisaw arstʼarakta” sasa.

AWK TAYKANAKAROJJ WALPUN YANAPTʼI

Mä kullakajj akham siwa: “Yatiyañataki revista wakichtʼaskasajja, kuntï sañ munki ukanak qhanañchtʼañajj chʼamänwa ukat tiempow munasirakïna”. Jupan wawapajj paqallq maraniwa. ¿Kunjamsa edición sencilla revistajj yanaptʼawayi? Jupajj akham saskakiwa: “Kunjamsa wawajajj tʼaqanak liytʼi ukat amuytʼi uk uñjasajj walpin kusista. Niyakejjay amuykaña arunakampi ukat jiskʼa oracionanakampi qellqatächejja, janiw liytʼañ ajjsarayaskiti. Taman arstʼañatakejj jupa sapakiw wakichtʼasjje ukat tantachäwins amuyumpiw arktaraki”.

Yaqha kullakajj akham sarakiwa: “Tantachäwin arstʼañapatakejj nänakaw nayrajj yanaptʼapjjerïta. Jichhajj jupakiw wakichtʼasjje. Mä qhawqha kutikiw yatichäwit qhanañchtʼapjjta. Kunattejj revistajj jupatakjamawa, jichhajj tantachäwinsa sumwa amuytʼaraki” sasa. Phuchhapasti llätunka maraniwa.

¿WAWANAKAJJ KAMSAPJJARAKISA?

Uka revistajj nänakatak qellqatawa sasaw walja wawanakajj amuyapjje. 12 marani Rebeccajj akham siwa: “¡Mirä amp suma, uka revista lurasipkakim! Kawkïr recuadrotï arunakat qhanañchtʼki ukajj wawanakatakejj suma amuykañapuniwa” sasa.

Paqallqo marani Nicolette kullakitajj niya ukhamwa amuyaraki: “Yatiyañataki revistat yatjjatañajj wali chʼamänwa nätakejja. Jichhajj tantachäwinjj jan khitin yanaptʼataw arstʼta” sasa. Llätunka marani Emma kullakitajj akham sarakiwa: “Nayarusa ukat sojjta marani jilajarus wal yanaptʼapjjetu. Jichhajj wali sumwa amuyapjjta. ¡Yuspärpuni!”.

Kunjamtï amuyawayktanjja, Yatiyañataki edición sencilla revistajj waljaniruw Bibliat amuytʼañ yanaptʼaski. Ukhamasti, uka revistajja, Yatiyañataki edición normal revistamp chikajj lurasiskakiniwa. Yatiyañataki revistajj 1879 maratwa waljanir yanaptʼaski.

[30 janan qhanañchäwipa]

“Yaqhep arunakajj kamsañs muni uk thaqhañataki ukat sum amuytʼañataki tiempo apsusipkayäta ukajja, jichhajj Biblian tʼaqanakap liytʼasin yatichäwimpi suma amuytʼañatakëjjewa”

[31 janan qhanañchäwipa]

“Kunjamsa wawajajj tʼaqanak liytʼi ukat amuytʼi uk uñjasajj walpin kusista”