1, 2. 1) ¿Kunanakas jan waltʼäwinakar saykatañatak yanaptʼistani? 2) ¿Kunas iyawsäwejja? Uk mä uñachtʼäwimpi qhanañchtʼam.

 JEHOVÁ DIOSAN servirinakapajj taqe jaqenakjamarakiw jan walinakan jikjjatastanjja, ukat kunatï cheqäki uk luratas laykojj inas tʼaqhesirakstan, ukampis kusisitätanwa (1 Ped. 3:14; 5:8, 9; 1 Cor. 10:13). Uka jan walinakat mistuñatakejja, iyawsäwinïña ukat jan ajjsarirïñaw wakisi.

² ¿Kunas iyawsäwejja? Apóstol Pablojj akham sänwa: “Iyawsañajja: ‘Katoqäwa’ sas taqe chuymampi suytʼktans ukawa, ukhamarak cheqpachapuni iyawsañasa kuntejj jan uñjtan ukajj cheqätapa” sasa (Heb. 11:1). “Katoqäwa sas taqe chuymamp suytʼktans” sasin griego arut jaqokipatäki uka arunakajj niya jila partejja, alañataki, aljañataki documentonakanwa uñstirïna, ukasti kunatï alatäki uk katoqañataki mä garantiyänwa. Ukhamarakiwa, Jehová Diosan arsutanakapajj phoqhasipuniniwa sasin iyawsapki ukanakajja, kuntï suyapki uk katoqañatakejj mä garantiyanïpjjewa. Ukhamajj iyawsäwinïtas laykojja, kuntï Jehová Diosajj arsuwayki ukajj jutïrin phoqhasipuniniwa sasaw atinistanjja, ukat janis uñjkstanjja, kuntï Arupan siskistu ukajj cheqätapwa amuyaraktanjja.

3, 4. 1) ¿Kunas jan ajjsarirïñajja? 2) ¿Kunas chʼollqhe iyawsäwinïñataki ukat jan ajjsarirïñatak yanaptʼistani?

³ ¿Kunas jan ajjsarirïñajja? Jan walinakana jan ukajj jan waltʼäwinakan jikjjataskasas jan ajjsaras parlaña ukat kun lurañatakis chʼamanïña sañ muni. Jan ajjsarir jaqëñäni ukhajja, aka jan wali tiemponakansa, chʼamañchtʼata ukat suma saytʼatañäniwa (Mar. 6:49, 50; 2 Tim. 1:7).

⁴ Taqeniw iyawsäwinïña ukat jan ajjsarirïñ muntanjja. Ukampisa, ¿jan iyawsäwinïtasa ukat ajjsarirïtas amuyastan ukhajj kuns lursna? Diosan Arupa mä arunjja Bibliajja iyawsäwini ukat jan ajjsariri walja jaqenakatwa parli. Jupanakat yatjjatañaw chʼollqhe iyawsäwinïñataki ukat jan ajjsarirïñatak yanaptʼistani.

5. ¿Josué chachan sum pʼeqtʼañapatakejj kunas wakisïna?

⁵ Kuntï 3.500 maranak nayrajj paskäna uka toqet amuytʼañäni. Jehová Diosajj israelitanakar Egipto markat qhespiyatapatjja, 40 maranakaw pasjjäna. Moisés profetaw jupanakar pʼeqtʼäna. Kunapachatï jupajj 120 maranëjjäna ukhaw Nebo sat qollur makhatasin Suma Oraqe jayat uñjäna, ukat uka patanwa jiwjjarakïna. Ukatjja Josué chachaw israelitanakar pʼeqtʼjjäna, jupasti “yatiñ kankaña[ni]” jaqënwa (Deu. 34:1-9). Israelitanakasti Canaán marka katuntañatakejj wakichtʼatäpjjänwa. Ukat Josué chachajj uka markar sum pʼeqtʼañatakejja, Jehová Diosan yatiñkankañap katoqañapaw wakisïna. Ukatsti, Jehová Diosaru confiyatapa, jan ajjsarirïtapa ukat chʼaman saytʼasitapwa uñachtʼayañapäna (Deu. 31:22, 23).

6. 1) Josué 23:6 qellqatarjamajja, ¿kun lurañatakis jan ajjsarirïñasa? 2) ¿Hechos 4:18-20 ukat 5:29 qellqatanakat kuns yateqtanjja?

⁶ Kunapachatï Canaán marka katuntapkäna ukhajja, Josué chachajj yatiñanïña, jan ajjsarirïtapa ukat iyawsäwinïtapwa uñachtʼayäna, uk uñjañajj israelitanakarojj wal chʼamañchtʼpachäna. Ukampis janiw kuntï Josué chachajj jupanakar siskäna uk lurañatakik jan ajjsarirïpjjañapajj wakiskänti, jan ukasti Jehová Diosar istʼañatakis wakisirakïnwa. Janïr jiwkasajja, akham sasaw Josué chachajj jupanakar säna: “Jumanakasti wal chʼamañchtʼasipjjam, uka Moisesan libropan qellqatäki uka arunakar phoqhañataki, janirak chʼeqa toqerusa ni kupi toqerusa uka arunakatjja saraqapjjamti” sasa (Jos. 23:6). Ukhamarakiw jiwasajj Jehová Diosar taqe kunan istʼañatakejj jan ajjsarirïñasa. Yamas kunapachatï jaqenakajj Diosan munañaparjam jan walïki ukanak lurayañ munapkistu ukhaw jan ajjsarirïñasa (Hechos 4:18-20; 5:29 liytʼasiñapawa). Jiwasatï Jehová Diosaru oracionan mayisiñäni ukat taqe chuyma atinisiñäni ukhajja, Jupaw jan ajjsarirïñatak yanaptʼistani.

7. Jan ajjsarirïñapataki ukat taqe kunan sumar sartañatakejja, ¿kunsa Josué chachajj lurañapäna?

⁷ Diosan munañap jan ajjsaras lurañ munstanjja, Bibliatwa yatjjatañasa ukat ukarjamaw sarnaqañasa. Josué chachajj Moisés lanti uttʼayatäkäna ukhajja, Diosajj jupar akham sänwa: “Chʼamani saytʼasim, ukatsti phoqharakim Moisés servirejjajj ley jaytawayktam taqe ukanakaru [...]. Amtasipunïtaw kuntï Diosan leyi libropanjja siski uka, ukhamaraki uruy arumarakiw lupʼirakïta kuntejj librojj siski uka lurañamataki. Ukhamatwa taqe luräwinakamajj sumaru sarani [‘ukat yatiñampiw sarnaqarakïta’, NM]” sasa (Jos. 1:7, 8). Josué chachajj uka ewjjtʼarjamaw sarnaqäna, ukat ‘taqe luräwinakapanwa sumaru sartäna’. Jiwasatï ukham lurañänejja, janiw ajjsarkañäniti ukat Diosar servisajj sumaruw sartarakiñäni.

8. ¿Kuna arunakas 2013 maratakejj Bibliat apstʼasiwayi, ukat kunjamsa uka arunakajj yanaptʼistani?

⁸ Jehová Diosan aka arunakap istʼasajj wali chʼamachtʼataw Josué chachajj jikjjataspachäna, Diosajj akham sänwa: “Chʼamani saytʼasim, jan ajjsaramti, janirak mayjtʼasimsa. Naya [Jehová] Tatitu Diosamaw jumampïskä kawkharutï sarkäta ukkhanakana” sasa (Jos. 1:9). Diosajj ukhamarakiw jiwasampïski. Jan walinakansa jikjjataskchiñänejja, janiw ajjrañasäkiti ni mayjtʼasiñasäkisa. Ukatakejja aka arunakaw yanaptʼistani: Chʼamani saytʼasim, jan ajjsaramti. Jehová  Diosamaw jumampïski. Ukasti, 2013 maratakiw Josué 1:9 qellqatat apstʼasiwayi. Ukat khitinakatï Diosar iyawsasa ukat jan ajjsarasa sarnaqapkäna ukanakat yatjjatañaw yanaptʼarakistani.

9. ¿Kunjamanakatsa Rahab warmejj iyawsäwinitapa ukat jan ajjsarirïtap uñachtʼayäna?

⁹ Kunapachatï Josué chachajj pä uñaqerinakar Canaán markar khitkäna ukhajja, jan wali sarnaqeri Rahab warmiw jupanakar imantäna ukat enemigonakaparojj yaqha thaknämwa khittʼäna. Ukat Jericó markajj israelitanakamp tukjatäkäna ukhajja, iyawsäwinitapata ukat jan ajjsartʼas luratapatwa jupasa ukat familiapas jan jiwapkänti (Heb. 11:30, 31; Sant. 2:25). Ukat Jehová Diosan chuymap kusisiyañatakejja, jan wali sarnaqäwip apanukjjänwa. Jichhürunakanjja, yaqhep jilat kullakanakasajj ukhamarakiw Diosan chuymap kusisiyañatakejj jan ajjsartʼasa ukat Diosar confiyasisa jan wali luräwinakap apanukuwayapjje.

10. ¿Kunjaman jikjjatasisas Rut warmejj cheqa yupaychäwit saytʼasïna, ukat kuna bendicionanaksa katoqawayi?

¹⁰ Josué chachajj jiwjjäna uka qhepatjja, Moab markankir Rut warmejj jan ajjsartʼasaw cheqa yupaychäwi toqet saytʼasïna. Niyakejjay jupajj mä israelitan warmipächïnjja, Jehová Diosat mä jukʼa yatpachänwa. Noemí viuda suegrapajj Moab markanwa jakäna, ukampis Belén markaparuw kuttʼañ amtäna. Ukat thak sarkasajja, Noemí warmejj walpunwa Rut yojjchʼaparojj Moab markar kuttʼañapatakejj achiktʼäna. Ukampis Rut yojjchʼapajj akham sänwa: “Jan mayistati jumat sarjjañajja, nayasti arkämaw kawkharutï sarkäta ukkharu [...]. Juman markamajj markajjäniwa, Diosamasti, Diosajjarakïniwa” sasa (Rut 1:16). Ukat tiempompejja, Noemin familiapat jutir Booz chachampiw jaqechasïna. Ukatjja, mä wawanïpjjänwa ukat jupan familiapatwa Davitasa ukat Jesusas jutäna. Kunjamtï amuyktanjja, iyawsäwinïpki ukat jan ajjsarirïpki ukanakarojj Jehová Diosajj bendiciwa (Rut 2:12; 4:17-22; Mat. 1:1-6).

11. ¿Kunjamsa Joiadampi Josabampejj jan ajjsarirïtap uñachtʼayapjjäna, ukat ukham lurapjjatapat kunas jikjjatasiwayi?

¹¹ Diosan munañap lurañataki ukat jupanakan askip thaqhañat sipans mayninakan askip thaqhapki ukanakarojj Jehová Diosajj yanaptʼiwa. Uk uñjasajj janiw ajjsarjjtanti ukat iyawsäwisas chʼollqheptarakiwa. Joiada sat jilïr sacerdotempita ukat Josaba sat warmipampit parltʼañäni. Ocozías reyejj jiwjjäna uka qhepatjja, Atalía taykapaw reyin wawanakapar jiwarayasajj marka apnaqjjäna. Ukampis reyin Joás yoqaparojj janiw jiwaykänti. Jakäwipsa aptʼasirjamäpkchïnjja, Joiada sacerdotempi warmipampiw juparojj qhespiyapjjäna ukat sojjta maranakaw imantapjjarakïna. Paqallqo mararusti, Joiadampi Josabampejj Joasaruw reyit uttʼayapjjäna ukat Atalía warmirojj jiwayapjjänwa (2 Rey. 11:1-16). Ukatjja, Joiada sacerdotejj Joás reyiruw templo askichañ yanaptʼäna. Ukat 130 maranïkas jiwjjäna ukhajja, “Israel markampisa, Diosampisa suma askïna sarnaqatap layk[ojj]” reyinakamp chikaw imatäjjäna (2 Cró. 24:15, 16). Joiada sacerdotempi warmipampi jan ajjsarirïpjjatapatwa, kawkïr familiattï Mesiasajj jutañapäkäna ukajj jan chhaqtawaykiti.

12. ¿Kun lurasasa Ebed-melec chachajj jan ajjsarirïtap uñachtʼayäna?

¹² Ebed-melec sat eunuco jaqejja, Sedequías reyin palaciopan jakasïna, jupajj Jeremiasar arjjatañatakejj niyaw jakäwipsa aptʼasïna. Judá markankir jilïrinakajja, Jeremiasajj marka contra saytʼiriwa sasaw kʼarintapjjäna. Ukatwa reyejj jupanakar katuyjjäna, ukatsti ñeqʼen mä phuchʼuruw jaqontapjjäna, ukan jiwañapataki (Jer. 38:4-6). Ebed-melec chachajj niyaw jakäwipsa aptʼasirjamäna, kunattejj uka cheqanjja Jeremiasarojj wal uñisipjjäna. Ukhamäkchïnsa, yanaptʼañatakejj Sedequías reyimpiw parlir saräna. Reyisti walikiw sänwa, ukat Jeremiasar apsunipjjañapatakejj 30 jaqenakampiruw khithäna. Ukat kunapachatï babilonionakajj Jerusalén mark tukjapkäni ukhajja, janiw jiwkätati  sasaw Jehová Diosajj Ebed-melec chacharojj Jeremías toqejj yatiyäna (Jer. 39:15-18). Kunjamtï amuytanjja, jan ajjsarir servirinakaparojj Diosajj bendiciwa.

13. ¿Kunjamsa kimsa hebreonakajj jan ajjsarirïpjjatap uñachtʼayapjjäna, ukat kunsa uka sarnaqäwit yateqsna?

¹³ Khä 600 nayrïr pacha maranakanjja, Jehová Diosan servirinakapat kimsa hebreonakaw iyawsäwinïpjjatapata ukat jan ajjsarirïpjjatapat bendicitäpjjäna. Nabucodonosor reyejj Babiloniankir jilïrinakaruw qorit lurat jachʼa idolor yupaychañataki tantachthapïna. Ukat khititï jan yupaychkäna ukarojja, aqkir hornoruw jaqontatäñapäna. Kimsa hebreonakajj wali respetompiw Nabucodonosor reyir akham sapjjäna: “Nanakan Dios Awkejjasti, khitirutejj nanakajj yupaychapjjta ukasti nanakarojj uka aqkiri ninatsa apsusinipkakitaspawa, ukhamaraki taqe jan walinakatejj luraski ukanakatsa qhespiyapjjarakitaniwa. Janis qhespiyapkitani ukasa, juma, jachʼa reyejj, yatiñamawa, janipuniw nanakajj uka qorit lurata ídolo nayraqatarojj killtʼasisina yupaychapkiristti” sasa (Dan. 3:16-18). Kunjamsa kimsa hebreonakajj qhespiyatapjjäna ukajja, Daniel 3:19-30 qellqatanwa sum qhanañchasi. Jiwasajj janis ukhaman jikjjataskchiñänejja, Diosaru istʼañ laykojj kunayman jan waltʼäwinwa uñjasiñäni. Ukampis iyawsäwinïtasa ukat jan ajjsarirïtas uñachtʼayañäni ukhajja, Jehová Diosajj bendicipunistaniwa.

14. Daniel 6 jaljarjamajja, ¿kunsa Danielajj jan ajjsartʼas luräna, ukat kunjamansa uñjasïna?

¹⁴ Daniel profetan uñisirinakapajj Darío reyin ukar sarasin mä decreto apsuyapjjäna ukhajja, jupajj iyawsäwinitapa ukat jan ajjsarirïtap uñachtʼayarakïnwa. Uka decreton akham sänwa: “Kimsa tunka urunjja janipuni khitis kuna casta diosatsa mayispati, ni kuna jaqerusa, jan ukasti jachʼa rey saparuki mayispan. Khititejj jani uka arsutaru phoqkani ukajj, leonanakan putuparu jaqontatäpan” sasa. Uk yatisajja, Danielajj “utaparuw saräna, uta ventananakapa jistʼarasïna, uka ventananakasti Jerusalén marka toqer uñtanitänwa, killtʼasisinwa Diosat mayisïna, ukhamaraki yupaycharakïna. Uksti Danielajj kimsa kutiw urunjja luräna, kunjämatejj luririkän ukhamarjama” (Dan. 6:6-10). Ukat jan ajjsarirïtapatjja “leonanakan putuparu jaqontat[aw]” uñjasïna, ukampis Jehová Diosaw qhespiyäna (Dan. 6:16-23).

15. 1) ¿Kunjamsa Aquilampi Priscilampejj iyawsäwinïpjjatapa ukat jan ajjsarirïpjjatap uñachtʼayapjjäna? 2) ¿Jesusan arunakapajj Juan 13:34 qellqatan jikjjataski ukajj kamsañs muni, ukat kunjamsa walja jilat kullakanakajj uka munasiñ uñachtʼayapjje?

¹⁵ Kunjamansa Aquilampi Priscilampejj jikjjatasipjjäna uk janis Bibliajj siskchejja, Pablor yanaptʼañatak jakäwipsa niyapuniw aptʼasipjjäna (Hech. 18:2; Rom. 16:3, 4). Ukat jan ajjsartʼasaw Jesusan aka arunakaparjam lurasipkäna: “Aka machaq mandamientwa churapjjsma: Maynit maynikama munasipjjam. Kunjämtejj  nayajj munasipjjsma, ukhama jumanakajj maynit maynikam munasipjjañamarakiwa” (Juan 13:34). Moisesajj katoqkäna uka Leyirjamajja, maynejj ‘jaqe masiparojj jupa kipkarjamaw munasiñapäna’ (Lev. 19:18). Ukampisa, Jesusan mandamientopajj “machaq[änwa]”. Ukarjamajja, kunjamtï Jesusajj jaqenakar munasitapat jakäwip aptʼasiwaykänjja, ukhamarakiw arkirinakapajj lurapjjañapäna. Jichhürunakanjja, walja cristianonakajj mayni jilat kullakanak laykojj uñisirinakampi jan tʼaqhesiyatäpjjañapataki, jan ukajj jan jiwayatäpjjañapatakejj jakäwipsa niyaw aptʼasiwayapjje (1 Juan 3:16 liytʼasiñapawa).

16, 17. 1) ¿Kuna jan waltʼäwinakarus nayrïr cristianonakajj saykatapjjäna? 2) ¿Kuna jan waltʼäwinakansa jichha tiempon jakasir cristianonakajj uñjasiwayapjjaraki?

¹⁶ Jesusjamarakiwa, nayrïr cristianonakajj Jehová Dios saparuk yupaychapjjäna (Mat. 4:8-10). Janipuniw Roma markankir emperadorar jachʼañchañatakejj incienso nakhayapkänti. (Foto uñjjattʼam.) Uka toqetjja, akham sasaw Daniel P. Mannix chachajj qellqatayna: “Incienso naktʼayañatakejj estadionan nina aqtata mä altaras utjkchïnjja, mä qhawqha cristianonakakiw uk lurapjjäna. Preso katuntatäpkäna ukanakajja, uka ninaruw mä jukʼa incienso willtʼapjjañapäna, ukhamatwa Certificado de Sacrificio katoqasajj librëpjjaspäna. Ukhamarusa, ukajj janiw emperadorar yupaychañäkiti, jan ukasti Roma markankir pʼeqtʼiriparjamajja, mä diosarjamas uñjksna ukhamakiwa sasaw jupanakar qhanañchtʼasïna. Ukhamäkchïnsa, janipuniw cristianonakajj tʼaqhesiñat qhespiñatakikejj uk lurapkänti” sasa (Those About to Die).

¹⁷ Hitler chachajj apnaqkäna uka tiemponjja, preso katuntat cristianonakajj janiw Jehová Diosar yupaychjjäti sasin mä documento firmasakiw tʼaqhesiñat qhespipjjaspäna. Ukampis mä qhawqhanikiw uk lurapjjäna. Ukat qhepa maranakanjja, Ruanda markan jiwarayasiñajj utjkäna ukhajja, jakäwipsa aptʼasirjamäpkchïnsa tutsi ukat hutu jilat kullakanakajj maynit maynikamaw arjjatasipjjäna. Uk lurañatakejj jan ajjsarirïña ukat iyawsäwinïñaw wakisïna.

18, 19. ¿Diosan arunakap yatiyaskakiñatakejj khitinakan sarnaqäwipas yanaptʼistaspa?

¹⁸ Jichhürunakanjja, aka Oraqenjj Diosan servirinakapajj mä jachʼa luräwinïtanwa. Ukasti jaqenakaru Diosan Reinopata yatiyaña ukat Jesusan arkirip tukuyañawa (Mat. 24:14; 28:19, 20). Uka lurañanjja, Jesusaw yateqaskayajja, ukatwa walpun yuspärtanjja. “Jesusajj jachʼa markanakana, ukhamarak jiskʼa markanakanwa sarnaqäna Diosan arunakap yatichasa, ukhamarak Diosan reinopat parlasa.” (Luc. 8:1.) Jiwasajj jupjamarakiw Diosan Reinop yatiyañatakejj iyawsäwinïñasa ukat jan ajjsarirïñasa. Diosan yanaptʼapampejj Noé chachjamarakiw jan ajjsarkañäniti, jupasti jan inaktʼasaw “jan wali jaqenakarojj” Uma Juiciot “cheqa arunak parl[äna]” (2 Ped. 2:4, 5).

¹⁹ Jaqenakar yatiyañatakejj Diosat mayisiñaw yanaptʼistani. Jesusan arkirinakapajj arknaqat uñjasipjjäna ukhajja, Diosan ‘arunakapat jan ajjsaras parlasipkakiñatakejj’ Diosaruw mayisipjjäna, ukat Jupajj istʼarakïnwa (Hechos 4:29-31 liytʼasiñapawa). Jumatï utat uta yatiyir sarañataki ajjsarirïstajja, iyawsäwinïñataki ukat jan ajjsarirïñatakejj Jehová Diosaruw mayisiñama, Jupajj istʼätamwa (Salmo 66:19, 20 liytʼasiñapawa). *

20. ¿Jehová Diosan Qhanañchirinakapjamajj kuna yanaptʼanakanïtansa?

²⁰ Aka ñanqha pachanjja, Diosan munañap phoqhañajj chʼamakiwa. Ukampisa janiw sapakïktanti. Diosaw jiwasampïski. Ukat Yoqapaw tama Pʼeqtʼirjamajj yanaptʼaskarakistu. Ukhamarusa oraqpachanjja, 7.000.000 jilat kullakanakaw utjistu. Jupanakampi chikaw iyawsäwi uñachtʼayasin Diosan suma yatiyäwinakap yatiyaskakiñäni. Ukat 2013 maratak Bibliat apstʼat arunakajj uk luraskakiñasatakiw yanaptʼarakistani. Chʼamani saytʼasim, jan ajjsaramti. Jehová Diosamaw jumampïski (Jos. 1:9).