MÄ QHAWQHA maranak nayrajja, niya 50 marani Roald ukat Elsebeth chacha warmejj wali sumaw Bergen markan jakasipjjäna, ukasti Noruega markan payïr jachʼa markapawa. Tamanjja, Isabel phuchhapampi ukat Fabian yoqapampiw servipjjäna. Roald jilatajj irpir chuymanïnwa, warmipasti precursoraraki. Ukat wawanakapajj sumwa taman yanaptʼapjjarakïna.

Ukampis markapat jaya cheqar mä semana yatiyir sarañwa amtapjjäna. Ukhamasti, Roald ukat Elsebeth chacha warmejj Fabian, 18 marani yoqapampejja, 2009 septiembre phajjsinwa Nordkinn markar sarapjjäna, ukasti Finnmark markanwa jikjjatasi, círculo polar ártico alay cheqana. Nordkinn markanjja, Kjøllefjord sat jiskʼa markaw jikjjatasiraki, uka cheqaruw yaqha markanakat jutiri jilata kullakanakampejj yatiyir sarapjjäna. Roald jilatajj akham siwa: “Qalltanjja, semanpacha yatiyañataki lurañanakajat tiempo apstʼasitajat walpun kusisiyäta” sasa. Ukampisa uka semananjja mayaw llasiyäna. ¿Kunäpachänsa?

Roald jilatajj akham siwa: “Finnmark markan precursorjam irnaqtʼiri Mario jilatajj akham jisktʼapjjetu, ‘Lakselv jiskʼa markanjja 23 jilat kullakakiw utji, ¿uka tamar yanaptʼañatakejj janit ukar jakir sarapkasma?’ sasa. Ukham jisktʼañap janiw suykayätti”. Roald jilatajja, uk istʼasajj janiw kamachtʼirjamäkänti. Jupajj akham siwa: “Warmijampejja, yatiyirinakajj munaski uka cheqar sarañ munapjjayätwa. Ukampis wawanakajajj utat sarjjapjjani ukhaw uk lurañ amtapjjayäta” sasa. Uka cheqan mä qhawqha urunaka yatiykasajja, jaqenakajj Diosat wal yatiñ munapjjatap jupajj amuyäna. Uka jaqenakajj ukhaw yanaptʼatäñ munapjjäna janiw qhepatjja. Roald jilatajj akham amti: “Mariojj kuntï jisktʼkitäna uka toqetakwa lupʼiskayäta, janiw ikis purkitänti” sasa. Ukatsti Roald jilatampiru ukat familiapamperojj Lakselv jiskʼa markaruw Mario jilatajj tam uñtʼayañatak autot apäna, ukasti Kjøllefjord markat 240 kilometronak aynach toqen jikjjatasi.

Uka taman pä irpir chuymaniw utjäna, ukat jupanakat Andreas jilataw marksa ukat Tantachasiñ Utsa uñtʼayäna. Jilat kullakanakasti munasiñampiw katoqtʼapjjäna ukat familiamampi jutjjapjjasma ukajj walipunïspawa sasaw jupanakar sapjjäna. Ukat Roald ukat Fabian jilatanakatakis trabajojj utjiwa sasaw Andreas jilatajj lartʼasis säna. ¿Uka familiajj kuns lurpachäni?

Fabian yoqapajj akham sänwa: “Janiw akan jakañ munkti” sasa. Mä jiskʼa markar sarañsa ukat jupamp chika jilsuwayapki uka amigonakapar jaytañsa janiw munkänti. Ukhamarus electricistäñatak yateqaskäna uk janïraw tukuykänti. Ukampis 21 marani Isabelarojj uka markar sarañ munasmati sapkäna ukhajja, jupajj akham sänwa: “¡Jïsa, ukpunwa munaskayäta!” sasa. Ukat akham sarakiwa: “Wal lupʼkayäta ukhajja, amtatajajj walikïskpachäniti sasaw jisktʼasiyäta. ¿Amigonakajat llakisïti? ¿Jilat kullakanakar uñtʼkta ukat sumäki jikjjatasta uka taman qhepharañajäspati?” sasa. Elsebeth kullakajj akham sarakïnwa: “Jehová Diosas uka luräwi churapkitaspa ukham amuyasiyäta. Ukampis jichhak askichat utajata ukat 25 maranakan yänak jikjjatapkta ukanakatwa lupʼiyäta” sasa.

Uka semana tukuyatarojja, Roald jilatajj familiapampiw Bergen markar kuttʼjjäna. Ukat Lakselv jiskʼa markankir jilat kullakanakajj 2.100 kilometronak jayansa jakapkchïnjja, jupanakat amtasisipkakïnwa. Elsebeth kullakajj akham siwa: “Jehová Diosar wal mayista. Ukat uka jilat kullakanakampi parlasisipkakiyätwa, fotonaksa, experiencianaksa purapat apayasipjjerïta” sasa. Chachapajj sarakiwa: “Uka markar saräti janicha uk amuytʼasiñatakejj tiempow munasïna. Ukat kunampis jakapjjäjja uka toqetsa lupʼiñajjänwa. Diosar wal mayisiyäta, familiajampisa ukat experienciani jilat kullakanakampis parltʼarakiyätwa” sasa. Yoqapajj akham sarakiwa: “Uka toqet lupʼkasajja, jan kunas jarkʼatapwa amuyasiyäta. Jehová Diosar wal mayisiyäta ukat sarañ wal munjjarakiyäta” sasa. ¿Isabelajj kuns luräna? Uka markar sarañatak wakichtʼasiñatakejja, precursorjamaw irnaqtʼjjäna. Ukat sojjta phajjsi precursorjam irnaqtʼjjatapata ukat Bibliat walja tiempo yatjjatatapatjja, wakichtʼatäjjatapwa amuyasïna.

Kawkhantï yatiyirinakajj munaski ukar wal sarañ munapjjäna, ukat uk lurañatakejj kunanaktï wakiskäna ukwa familpach lurapjjäna. Roald jilatajj suma trabajonïkchïnsa ukat sumsa pagapkchïnsa, mä maratakiw permiso mayisïna. Ukampis trabajot jan sarjjañapatakejja, patronapajj akham sänwa: “Sapa sojjta semana samarasajj pä semanakiw trabajäta” sasa. Ukat Roald jilatajj sarakiwa: “Jukʼa qollqeksa katoqjjchiyätjja nayar sartasipkakiyätwa” sasa.

Elsebeth kullakajj sarakiwa: “Lakselv cheqan mä uta jikjjatam ukat Bergen markankir utas alquiljarakim sasaw esposojajj sitäna. Ukajj chʼamakïnwa ukat tiempow munasirakïna, ukhampachas uk lurapjjtwa. Qhepatjja, phuchhajampi yoqajampejj chika uru trabajwa jikjjatapjjäna, ukat autotakisa, manqʼatakisa yanaptʼjjapjjarakitänwa”.

Isabelajj akham amtaraki: “Kawkharutï sarapkta uka markajj jiskʼakiwa, ukatwa precursorjam irnaqtʼaskiñatakejj trabajo jikjjatañajj chʼamakïnjja. Awisajj janiw jikjjatañjamäkänti”. Ukhampachasa, Isabelajj kawkïr trabajotï chika uruk irnaqtʼaski ukjja taqwa katoqäna, ukhamatwa gastopatakejj utjjäna, nayrïr maranjja llätunka trabajwa katoqäna. ¿Kunjamakïpachänsa  Fabian yoqapampejja? “Yateqañ tukuyañatakejja, mä trabajo jikjjatañajaw wakisïna ukat Lakselv cheqanwa jikjjatta. Examen pasjjasajj electrisistjam chikür irnaqtʼañatakiw mä trabajo jikjjatta” sasaw jupajj säna.

Marelius ukat Kesia esposapampejj ukhamarakiw kawkhantï Diosan Arupat yatiyirinakajj wal munaskäna ukhar sarañ munapjjäna. Jichhajj Marelius jilatajj 29 maranëjjewa, akham siwa: “Jachʼa tantachäwinakan precursoranakar entrevistaski uka jilat kullakanakan experiencianakapaw kawkhantï yatiyirinakajj munaski uka cheqar sarañatak amuytʼayitu”. Ukampisa, Kesia kullakajj 26 maranëjjewa, jupatakejj familiapat jayankañaw chʼamänjja. Jupajj akham siwa: “Khitinakarutï wal munaskta ukanakat jayankañaw wal llakisiyitäna”. Yaqhajj akarakïnwa: Marelius jilatajj utapat hipoteca pagañatakiw jurnalpach trabajäna. Jupajj akham siwa: “Ukatakejj Jehová Diosaruw wal mayisipjjta, ukat Jupan yanaptʼapampirakiw yaqha cheqar sarjjapjjayäta”. Nayraqatjja, Bibliat sum yatjjatañaruw uchasiwayapjje. Ukatsti utap aljawayapjje, trabajotsa mistjjapjjänwa. Ukat 2011 agosto phajjsinwa Noruega markat alay toqenkir Alta sat markar sarjjapjjäna, ukanwa precursorjam irnaqtʼapjjäna. Ukat jakasiñatakejj Marelius jilatajj contadoratwa trabajäna ukat Kesia kullakajj mä tiendanwa trabajarakïna.

Knut ukat Lisbeth chacha warmejja kimsa tunka jila maranïpjjewa, ukat kawkhantï Diosan Arup yatiyirinakajj wal munaski ukhan irnaqtʼir jilat kullakanakan experienciapa Anuario libron leytʼasajj chuymaruw purtʼayasipjjäna. Lisbeth kullakajj akham siwa: “Uka experiencianak liytʼasajj akham lupʼiyäta, ‘¿nänakajj yaqha markar sarapjjeristi?’ Nayjam aleq jaqejj janiw uk lurkaspati sasaw pächasiyäta”. Ukhamäkchïnsa uk lurañatakiw chʼamachasipjjäna. Knut jilatajj sarakiwa: “Kawkïr utantï jakasipkayäta uk aljasajj mamajan utaparuw sarjjapjjayäta ukhamat qollqe imasiñataki. Ukatjja, kunjamsa yaqha cheqan Diosatak irnaqtʼasi uk sum amuytʼasiñatakejja, mä maratakiw Bergen markan inglés arut tantachasipki uka tamar sarapjjta, ukat warmijan mamapan utapanwa qheparapjjta”. Mä qhawqha phajjsitjja, jupanakajj amtap phoqhañatakejj wakichtʼatäjjapjjänwa. ¡Uganda yaqha markar jakir sarañataki! Ukajj África markankiwa. Jakasiñatakisa ukat precursorjama irnaqtʼaskakiñatakisa, ¿kunsa lurapjje? Noruega markaruw sapa marajj pä phajjsi irnaqtʼañataki kuttʼapjje.

¿Kunjamakis uka jilat kullakanakajj jikjjatasipjje? Roald jilatajj siwa: “Jichhajja familjamajj jukʼampi mayachtʼatäpjjtwa, Bergen markan jakapkayäta ukhajj janiw ukhamäpkayätti. Ukat kunjamsa Diosar yupaychañ toqet wawanakajajj nayrar sartawayapjje uk uñjañajj nänakatakejj mä bendicionapuniwa” sasa. Ukat saskakiwa: “Qollqetsa ukat yänakatsa janiw llakisjjapjjti, ukhamarusa ukajj janiw añcha wakiskirïkataynati”.

 Elsebeth kullakajj yaqha aru yateqarakïna. ¿Kunataki? Lakselv sat tamajj Karasjok sat markwa yatiyaraki, uka markasti sami sat kasta jaqenakajj jakasipki uka taypinkiwa. Uka jaqenakajja, Noruega alay toqena, Suecia, Finlandia ukat Rusia markanakanwa jakasipjje. Ukat jupanakar yatiyañatakiw sami aru yateqatayna, ukat jichhajj uka arutjja mä jukʼa parljjarakiwa. Ukat ¿kuna askinaksa uka arut yatiyasajj jikjjati? Wali kusisitaw jupajj akham sejja: “Sojjtaniruw Bibliat yatichaskta. ¡Janiw yaqha cheqankañ munkti!” sasa.

Fabian jilatajj precursorjama ukat irpir chuymaninakan yanapiripjamaw taman irnaqtʼaski. Jupampi kullakapampejja, kimsa jilat kullakanakaruw taman kusisita irnaqtʼapjjañapataki yanaptʼapjjatayna. Jichhajja, uka kimsanejj jukʼampiw yatiyir mistjjapjje. Jupanakat paninejja bautisasipjjewa ukat 2012 marzo phajjsinjja, precursor auxiliarjamaw irnaqtʼawayapjje. Jupanakat maynïrejja, ukham yanaptʼatäsajj walpunwa Isabelaru ukat Fabian jilatarojj yuspäratayna. Fabian jilatajj siwa: “Arunakapajj chuym chʼalljjtayapunituwa. ¡Maynir yanaptʼta ukhajj wali kusisitapuniw jikjjatastajja!” sasa. Isabelasti akham sarakiwa: “Aka cheqanwa kuntï Salmo 34:8 qellqatajj siski ukajj cheqätap uñjawayta. Jehová Diosajj wali munasiripunïskiwa. Ukhamarusa, aka cheqan Diosar serviñajj wali kusiskañawa”.

Marelius ukat Kesiajj kunatï wakiski ukampikiw jakasipjje, ukampisa wali kusisitäpjjewa. Alta sat tamaru kawkharutï sarjjapjjäna ukanjja, jichhajj 41 yatiyirinakaw utjje. Marelius jilatajj akham siwa: “Kunjamsa jakapjjayäta uk amtasisajja, qhawqsa jakäwisajj mayjtʼawayi uk uñjasajj walpun kusisipjjta. Aka cheqan precursorjam servipjjatajat walpun Jehová Diosaru yuspärapjjta”. Ukat Kesiajj akham sarakiwa: “Jehová Diosaru taqe chuyma atinisiñwa yateqawayta, Jupaw wali munasiñampi uñjasiwayapjjetu. Ukat awk taykat jayan jakasajja, kunja sumänsa jupanakampïñajj uk jukʼampi askitwa uñjta. Janipuniw akar jutapjjatajat chuym pisayaskti”.

¿Knut ukat Lisbeth jilat kullakajj kunjamsa Uganda markan jikjjatasipjjaraki? Knut jilatajj akham siwa: “Aka cheqar yatinoqtañajj mä jukʼa chʼamakiwa. Awisajj purak usumpiw jikjjatasipjjta ukat janiw umasa ukat lusas utjapunkiti, ukampisa qhawqhanirutï yatichañjamäki ukhaniruw Bibliat yatichapjjta”. Lisbeth kullakajj sarakiwa: “Kawkhantï jakasipjjta uka cheqat mä 30 minutonak sarañanjja mä markaw utji, uka cheqanjja janipuniw Diosan Arupat yatiyaskataynati. Uka cheqar puripkta ukhajja, Biblia liyiri jaqenakaruw jikjjatapjjta ukat jupanakar yatichapjjañajatakiw mayipjjetu. Uka llampʼu chuyman jaqenakar yatichasajj kunja kusiskañasa uk sañatakejj arunakas janiw utjkiti”.

Jesucristo pʼeqtʼirisajja, kuna luräwtï Jupajj qalltawayki ukajj Oraqpachan yatiyasiskatap uñjasajj walpun kusispacha. Ukat “taqe akapachankir jaqenakar yatiyir sarapjjam, nayar arkir tukuyapjjam” siski uka ewjjtʼapar taqe chuyma istʼktan ukhajja, Diosan markapajj wali kusisitarakiw jikjjatasi (Mat. 28:19, 20).