María Isabel kullakitajja, San Bernardo sat cheqanwa Chile markan jakasi. Jupasa ukat familiapasa mapuche kasta jaqëpjjewa. Jupanakasti mapudungún aru parlasipjje, ukat uka aru parlir tama utjañapatakiw yanaptʼawayapjje.

Jesusan jiwäwipa amtañataki tantachäwejj mapudungún arutwa apasini ukat 2.000 invitacionanakwa ukatakejj lurasiwayi sasin taman yatiyasïna ukhajja, María Isabel kullakitajj kunjamsa uka invitacionanak lakirasiñatapakejj yanaptʼirista sasaw jisktʼasïna. Ukat kunjamsa yaqhep wayn tawaq jilat kullakanakajj yateqer masinakaparu ukat yatichirinakapar yatiyasajj askinak jikjjatapjjäna ukwa amtasïna. Ukat awk taykapampiw uka toqet parltʼapjjäna, ukat kunjamsa escuelan invitacionanak lakiraspa uk jupaw amtañapäna. ¿Kunjam lurañsa amtpachäna?

Nayraqatjja, invitacionjja escuela mantañawjaru lipʼkatayañatakiw permiso mayitayna. Ukat escuela uñjirinakajj janiw iyaw sasaki jupar sapkänti, jan ukasti walik ukham lurtajja sasaw sapjjäna. Mä alwajja, lista jawsañ tukuyarojj directoras wali jachʼatwa uka invitacionat yatiyatayna.

Ukatjja, sapa cursor sarañatakiw profesoranakar permiso mayisïna. Ukat iyaw sapkäna ukhajja, ‘¿jumanakat khitis mapuchëpjjta?’ sasaw yateqerinakarojj jisktʼatayna. Jupasti akham siwa: “Escuelanjja, mapuche familianakat mä 10 jan ukajj 15 ukhanikiw utjpacha sasaw amuyayäta, ukampis jukʼampiw utjatayna. ¡150 invitacionwa lakirawayta!” sasa.

Mä warmiw escuela mantañawjan invitación lipʼkatat uñjatayna ukat khitis uka toqet jukʼampi qhanañchtʼitaspa sasaw jisktʼasitayna. Kunapachatï 10 marani wawaru uñachtʼayapkäna ukhajj wal muspharatayna. “Jupajj mä jilïr jaqeruw suyatayna” sasaw lartʼasisin María Isabelajj saraki. Ukat invitación churasa ukat mä qhawqha qhanañchtʼasajja, kawkhansa jakasta sasaw uka warmirojj jisktʼatayna, ukhamata jupajj awk taykapampi uka familiar visittʼañataki ukat Diosan Reinopat jukʼampi parlañataki. Mapudungún arut yatiyapki uka 20 jilat kullakanakajja, Jesusan jiwäwip amtañataki tantachäwir uka warmin jutatapata ukat uka aru parlirinakat 26 jaqenak jutapjjatapatjja wali kusisitaw jikjjatasipjjäna. ¡Jichhajj uka grupojj mä tamäjjewa!

Qhawqha maranïskstansa, Jesusan jiwäwip amtañataki tantachäwiru, taqenitaki arstʼäwiru jan ukajj kimsa uru jachʼa tantachäwiru jutapjjañatakejja, ¿janit yateqer masinakasaru jan ukajj trabajonkir masinakasarus ukham invittʼañajj wakiskaspa? Bibliat apstʼat qellqatanakasat mä jukʼa yatjjatsna ukhajja, suma experiencianakwa jikjjatañäni. Ukanakaw mä suma amtar purisajj askinak jikjjatañataki yanaptʼistani. Ukhamarusa, jaqe masisaru jan ajjsarasa parlañatakejj Jehová Diosaruw qollan ajayup mayisiñasa (Luc. 11:13). Jiwasatï sum amuytʼasin ukarjam lurañäni ukhajja, ukham kusisita ukat chʼamañchtʼataw jikjjatasirakiñäni.