Gran Bretaña markat mä qhawqha experiencianakaw kunatsa jan chʼam laqʼjjtayasiñamäki uk amuyañ yanaptʼätam. Ukat ‘umar tʼantʼam uchañataki’ ukat cheqa yupaychäwit janïr saytʼapki ukanakar yanaptʼañatakejj kuns lurasma ukwa yatjjatarakïta (Ecl. 11:1).

Chʼamachasiñajj wakiskiripuniwa. Ukat Jehová Diosaru jan jitheqtas yupaychaskakiñamawa (Deu. 10:20). Ukwa Georgina kullakajj luräna. Jehová Diosan Qhanañchirinakapampi 1970 maran Bibliat yateqañ qalltäna ukhajja, Kyriacos sat chachapajj walpun colertʼasïna. Janiw Bibliat yateqañap munkänti, janipuniw Diosan Qhanañchirinakaparojj utapar mantaykänti ukat Bibliat apstʼat qellqatanaksa jaqtänwa.

Ukat Georginajj tantachäwinakar sarjjäna ukhajja, jukʼampiw chachapajj colertʼasïna. Mä urojja, jiskhisiñatakiw Tantachasiñ Utaru saräna. Ukat mä kullakaw jupan inglés aru jan sum parlatapa ukat griego aru parlatap amuyatayna, ukat yaqha tamankir griego aru parlir mä jilataruw telefonot jawsatayna, jupanakar yanaptʼañataki. Uka jilatajj munasiñampiw Kyriacos chachar parltʼäna, uk uñjasajj jupajj wal muspharäna ukat Bibliatsa mä qhawqha phajjsinak jupampi yateqarakïnwa. Ukat akatjamatakwa jan yateqañ munjjänti.

Georginajj walja maranakaw chachapan jarkʼata uñjasïna. bautisasïtajja, jaytanukümawa sas kunaw satayna. Bautisasiñap urojja, Jehová Diosaruw chachapan jan jaytanukuñapatak mayisïna. Ukat jilatanakajj jachʼa tantachäwir irpañatak purinipjjäna ukhajja, chachapajj akham jupanakar säna: “Nayra sarapkam. Jumanak qhepwa autojat jutapjjä” sasa. Chika urkamaw jachʼa tantachäwinkäna ukat warmiparus bautisasir uñjarakïnwa.

Ukürutjja, chachapajj janiw nayrjam amuyjjänti ukat tiempompejj bautisasjjarakïnwa. Georginajj Jehová Diosan Qhanañchirinakapampi nayrïr kuti parlatapatjja, 40 maranakaw pasjjäna. ¿Kunas Kyriacos chachar yanaptʼpachäna? Jupajj akham siwa: “Warmijan Diosat jan jitheqtatapat walpun kusista”. Georginajj akham sarakiwa: “Jupan jarkʼatpachasa, Jehová Diosat jan jitheqtañatakiw amtawayta. Taqe uka maranakanwa Diosar mayista ukat janiw chʼam laqʼjjtayaskayätti”.

Chachamaru jan ukajj warmimar yanaptʼañatakejj cristianjam sarnaqañaw yanaptʼätam. Pedrojj akham sasaw chachan warminakarojj ewjjtʼäna: “Jumanakajj warminaka, chachanakamar istʼasa sarnaqapjjam, ukhamata inas kawkïri chachas jan Tatitur iyawskchi ukajj jumanakan sarnaqäwinakam toqe Tatitutaki jikjjatatäñapataki jan kuna arumpisa” sasa (1 Ped. 3:1). Christine kullakajj uka ewjjtʼaruw istʼatayna, ukampis walja maranakaw chachapan Diosar iyawsañapatakejj suyawayi. 20 maranak nayrajja, Christine kullakajj Diosan Qhanañchiripäjjäna ukhajja, John chachapajj janiw Diosar iyawsañ wakisitap amuykänti. Ukat janis religión toqet yatiñ munkchïnjja, kuntï warmipajj yateqkäna ukajj warmipatakejj wali askïtapwa amuyäna. Jupajj akham siwa: “Kuntï yateqkäna ukajj warmijar kusisiyätapwa amuyayäta. Chʼamañchtʼataw jupajj jikjjatasïna, ukat ukaw jan walinakan uñjaskayäta ukhajj yanaptʼawayitu”.

Christine kullakajj janipuniw chachaparojj jupampi chika Diosar yupaychañatak jariykänti. Chachapajj siwa: “Religionapat nayar jan parlañapätapjja qalltatpachaw Christinejj amuyasïna, ukatawa munkayäta ukarjam yateqañajatak jaytitu” sasa. Christine kullakajj Yatiyañataki jan ukajj ¡Despertad! revistanakan chachapatakjam yatichäwinak uñjäna ukhajja, juparuw uñachtʼayäna ukat akham sarakïnwa: “Ak liytʼañajj wali sumäniw jumatakejja”.

Jubilasjjasajja, chachapajj jardinapwa uñjäna. Ukat tiemponëjjasajja, wali wakiskir jisktʼanakatwa lupʼïna, akham jisktʼasïna: “¿Jaqenakajj ukhamatakti uñsttanjja, jan ukajj mä amtampi luratäpachätancha?” sasa. Mä urojja, mä jilataw jupampi parlaskäna ukat Bibliat yateqañ munasmati sasaw jisktʼäna. “Niyakejjay Diosan utjatap amuyjjchïyatjja, iyaw sasaw sista” siw jupajja.

¡Christine kullakan jan chʼam laqʼjjtayasitapajj wali wakiskiripunïnwa! Jehová Diosaru 20 maranak mayisitapatjja, chachapajj Diosan cheqa yatichäwinakapar iyawsjjänwa ukat bautisasjjarakïnwa. Jichhajj panpachaniw Diosar taqe chuyma yupaychapjje. John jilatajj siwa: “Akanakaw iyawsañajatakejj yanaptʼawayitu: nayraqatjja, Diosan Qhanañchirinakapajj munasiñ chuymanïpjjatapa. Ukat Jehová Diosan mä yupaychiripampi jaqechatäña, kunatejj jan jaytasiri, confiykaña ukat yanaptʼasiri warminïtwa”. Christine kullakajj 1 Pedro 3:1 qellqatan  ewjjtʼaparjam sarnaqasajj uka arunakan cheqätapwa uñjäna.

Bibliat yateqeritï qalltan Bibliat sum yateqkasin jan yateqañ munjjaspa ukhajj ¿kamachsnasa? Salomón reyejj akham sänwa: “Alwatajja yapucham, jaypʼusa yapucharakim, janiw jumajj yatktati kunjamäkanitejj nayra, ukhamarak qhepa yapuchatasa, jan ukajj paypach satas mayak jilapjjchini” (Ecl. 11:6). Awisajja, Diosan arunakapajj maynin chuymapan jiltañapataki ukat kunja wakiskiris Diosar jakʼachasiñajj uk amuyañapatakejj walja maranakaw pasaspa (Sant. 4:8). Ukhamawa, inas mä urojj suma yatiyäw katoqchisma.

Ukaw Alice tawaqorojj pasatayna. India markatwa Inglaterra markar jutäna, ukat 1974 maranwa Bibliat yateqañ qalltäna. Ukat hindi arwa parläna, ukampis inglés arwa sum parlañ munäna. Walja maranakaw Bibliat yateqäna ukat inglés aru parlir tamarus mä qhawqha kut sararakïnwa. Kuntï yateqkäna ukajj cheqätap yatiskchïnsa, janiw askirjam uñjkänti. Maysa toqetsti, jupajj wal qollqe jikjjatañ munäna ukat fiestanakarus sarañ munäna. Tiempompejj janiw Bibliat yateqañ munjjänti.

Kimsa tunka maranaka pasatatjja, Alicejj akham sasaw Stella kullakar qellqatayna: “Khä 1974 maran jumampi Bibliat yateqkäna ukajj aka qhepa kimsa uru jachʼa tantachäwinwa bautisasiwayi, uk yatiñajj jumatakejj kusiskañapunïniwa. Jumajj nätakejj wakiskiripunïtawa. Jumaw cheqa yatichäwinak yatichawayista, ukat janis bautisasiñatakejj wakichtʼatäkchiyätjja, chuymajaruw imaskayäta” sasa.

¿Kunas pasatayna? 1997 maran chachapan jiwatapatwa llakimpi aynachtʼatayna. Ukat Diosaruw mayisitayna, janiw tunka minutonakas paskataynati, ukhaw Jehová Diosan pä Qhanañchirinakapajj punku leqtʼanisajj ¿Jiwatanakataqix kuna suytʼäwis utji? sat tratado jaytawayapjjatayna. Diosar mayisitapajj istʼatätap amuyasajja, Jehová Diosan Qhanañchirinakapar thaqhañ horasätapwa amtäna. ¿Kawkinsa jikjjatpachäni? Mä thantha cuadernonwa panjabí tamankir direccionap jikjjatatayna, uksti Stella kullakaw churatayna. Tantachasiñ Utar saräna ukhajja, munasiñampiw jilat kullakanakajj katoqapjjäna. Jupajj akham amti: “Munasiñampi katoqtʼapjjatapat amtasiskaktwa, ukat janiw añcha llakita jikjjatasjjti” sasa.

Alecejj taqe tantachäwinakaruw sarjjäna, wasitatwa Bibliat yateqjjäna ukat panjabí arsa sumwa parlañsa liyiñsa yateqäna. 2003 maranwa bautisasïna. Stella kullakar carta qellqkäna ukajj akham tukuyäna: “Diosan cheqa yatichäwinak 29 maranak nayra yatichatamata ukat nätakejj wali yateqaskayatamatsa walpin yuspärsma” sasa.

“Diosan cheqa yatichäwinak 29 maranak nayra yatichatamata ukat nätakejj wali yateqaskayatamatsa walpin yuspärsma.” (Alice)

¿Kunsa uka experiencianakat yateqtanjja? Munktan ukarjampun inas maynejj jan nayrar sartkchiniti, ukampis cheqa chuymanïni, altʼat chuymanïni ukat Diosar yupaychañ toqet yatjjatañ munani ukhajja, Jehová Diosaw cheqa yatichäwinak chuymapan jiltayani. Kuntï Jesusajj mä uñachtʼäwipan siskäna uk amtapuniñäni: “Jathasti ukchañkamajj alsunisinjja jiltiwa, ukampis yapunejj janiw yatkiti jathan kunjäm jiltatapsa. Jathajj oraqenjja jupapachaw jilaski; nayraqatajj aliw mistu, ukjjarusti amuchrantiwa, ukatsti poqorjjarakiwa” sasa (Mar. 4:27, 28). “Jathajj oraqenjja jupapachaw jilaski” ukat jilsutapajj jukʼat jukʼatawa. Janipun ak armamti, kunjamsa jiltani uk janiw khitis yatkaspati. Ukatwa, Diosan arunakap jathäkaspas ukham yapuchaskakiñama, inas walja cosecha apthapchïta.

Ukat janiraki Diosat mayisiñsa armasimti. Georgina ukat Christine kullakanakajja Diosar wal mayisipjjäna. Jumatï oracionan mayisiskakïta ukat janirak chʼam laqʼjjtayaskäta ukhajja, ‘mä qhawqha tiempotjja’ inas kawkïr ‘tʼanttï’ umar uchta uk jikjjatchïta (Rom. 12:12; Ecl. 11:1).