Chuymachäwjja, familiata, amigonakata ukat jilat kullakanakatwa jikjjatsna.

Mä amigon wali suma arunakapajja, chuymar purtʼkiriwa ukat “cuerporus chʼamañcharakiwa” (Pro. 16:24; 18:24; 25:11). Ukampis cheqpach cristianonakajj janiw chuymachtʼatäñak munktanti. Jan ukasti jiwasaw nayraqat “tʼaqhesirinakar chuymach[tanjja], kunjamtï Diosajj jiwasar chuymachkistu ukhama” (2 Cor. 1:4; Luc. 6:31). Ukajj cheqäskapuniwa sasaw México markan tamanak tumptʼirinakan uñjiripa Antonio jilatajj säna.

Doctoranakajj jañchi pʼusutatayiri usunïtawa (limfoma), uka usojj wilankiwa sasin jupar sapjjäna ukhajja, wali llakitapuniw uñjasïna. Ukhamäkchïnsa, llakiparojj atipjänwa. ¿Kunjamatsa? Qʼochunak amtañataki ukat qʼochun qellqatanakapat lupʼiñatakiw chʼamachasïna. Taqen istʼkaya Diosar mayisiña ukat Biblia liytʼañarakiw chuymachtʼäna.

Ukampis Diosar iyawsiri jilat kullakanakatwa jukʼamp yanaptʼa katoqawayta sasaw Antoniojj saraki. Ukat saskakiwa: “Warmijampejj wali llakita uñjasipkayäta ukhajja, Jehová Diosat oración mayiñapatakejja, mä familiarajaru jan ukajj mä irpir chuyman jilataruw jawsapjjerïta. Jupanakan yanaptʼapampiw uka llakirojj atipjawayapjjta”. Ukham munasiri ukat sinttʼasir amigonakanïtapat ¡wal yuspäräna!

Ukat jan wali tiemponakan yaqha yanaptʼirejja, qollan ajayuwa, ukasti Diosan “churä[wipawa]” sasaw apóstol Pedrojj säna (Hech. 2:38). Ukjja, kunapachatï Pentecostés 33 maran walja jilat kullakanakajj ajllitäpjjäna ukhaw uñachtʼayasïna. Uka qollan ajayojj taqenitakirakiwa. Ukat qhawqtï munaski ukwa Diosar maysna. Ukhamasti, ¿janit jukʼampi mayksna? (Isa. 40:28-31.)

Apóstol Pablojj kunayman jan waltʼäwinakwa aguantäna, ukat walj kutiw niya jiwañampïna (2 Cor. 1:8-10). Ukampis janiw ukar ajjsarkänti, ¿kunatsa? Jehová Diosan jupar yanaptʼaskatapwa amuyäna. Ukatwa akham qellqäna: “Yupaychañäni Jesucristo Tatitusan Dios Awkiparu. Jupaw jiwasar khuyapayasir Awkisajja, ukhamarak chuymachirisasa. Taqe tʼaqhesiñanakasanwa Diosajj chuymachistu” (2 Cor. 1:3, 4). Ukham jan walinakan uñjasisajja, Pablojj janiw jupat llakisiñampikejj apayaskänti; ukajj mayninakar yanaptʼiri sinttʼasiri chuymanïñatakiw yanaptʼäna. Ukhamatwa chuymachtʼatañ munapki ukanakar chuymachtʼañatak wakichtʼatäna.

Usut waliptasajja, wasitampiw Antonio jilatajj tamanak tumptʼirjam irnaqtʼjjäna. Jupanakajj wal jilat kullakanakar munasipjjäna, ukampis qhepatjja, jukʼampiw usut jilat kullakanakar visittʼañataki ukat chuymachtʼañatak chʼamachasipjjäna. Mä kutejja, usurnukstata mä jilatar visittʼasajja, uka jilatan tantachäwinakar jan sarañ munatap yatïna. Antoniojj akham siwa: “Jupajj Jehová Diosarusa ukat jilat kullakanakarus janiw jan munaskänti jan ukasti usutätapatwa janis kunatak walïkaspa ukham amuyasïna” sasa.

Jupar chuymachtʼañatakejja, jilat kullakanakampi mä kʼuchirtʼäwi tantachäwinwa, Diosar mä oración maytʼam sasin Antoniojj säna. Ukatakejj janis wakichtʼatjam amuyaskchïnjja, iyaw sänwa. Antoniojj akham amti: “Diosar mayisitapajj sumapunïnwa, ukat janiw jupaw sañjamäkänti. Janis kunatak walïkaspa ukham janiw amuyasjjänti”.

Ak amtapuniñäni, mä jukʼaksa jan ukajj sinti jan waltʼäwinakansa uñjasiwaytanwa. Ukampis kunjamtï Pablojj siskejja, ukham jan walinakan uñjasisaw mayninakar chuymachtʼañataki wakichtʼatätanjja. Ukhamasti, tʼaqhesiñanakan jilat kullakanakajj uñjasipki ukanakat sintʼasirïtas uñachtʼayapjjañäni, ukat yaqhanakaru chuymachtʼas Jehová Diosat yateqasipjjañäni.