Inés * sat 30 maranakani soltera mä kullakajja, irpir chuymaninakaruw ajjsartʼayasis suytʼaski. Chuymankipstat jaqenakar jornal uñjasajj wali qaritawa ukatwa mä qhawqha tantachäwinakarojj jan sarkiti. Ukat yaqha llakinakapat sipansa, mamapan usutätap uñjasaw wal llakisi.

Inés kullakar tumptʼir sarasma ukhajja, ¿kunjamsa chʼamañchtʼasma? (Jer. 31:25.) Uka kullakjam taman “jan chʼamani sarnaqasipki” ukanakar chʼamañchtʼañatakejja, ¿kunjamsa wakichtʼasisma?

Awisajj taqeniw trabajonsa jan ukajj taman luräwinak utjipans qarit uñjastanjja. Daniel profetajj mä visión uñjasin jan amuytʼjjasajja, “qʼala chʼama thayjtataw uñjasïyäta” sasaw säna (Dan. 8:27). Ukampis Gabriel angelaw jupar yanaptʼäna. Diosajj kuntï siskäna uk amuytʼayäna, Jehová Diosajj mayisïwinakam istʼiwa ukat “walpun munaraktam” sasaw chʼamañchtʼäna (Dan. 9:21-23). Qhepatjja, yaqha angelaw chuymankipstatäjjän ukhajj chʼamañchtʼarakïna (Dan. 10:19).

Aynachtʼata, qarita jilatar jan ukajj kullakar chʼamañchtʼir janïr sarkasajja: kuna jan waltʼäwinakansa jikjjatasi, kunjamatsa uka jan waltʼäwinakajj aynachtʼayaski ukat kunjam chuymanisa ukanakatwa lupʼiñama. Irpir chuymanjam 20 jila maranak irnaqtʼir Richard jilatajj akham siwa: “Janïr chʼamañchtʼir sarkasajja, kunansa  jupanakajj wali sum irnaqtʼapjje ukwa nayraqat amuyta. Ukat kunjamanakansa jikjjatasipjje uks amuytʼaraktwa, ukhamatwa jupanakar sum chʼamañchtʼta” sasa. Yaqha irpir chuymanimpi sarätajja, kunjamsa yanaptʼapjjasma uk panimaw amuykiptʼapjjañama.

Juma pachpat maynir parlañajj mayjtʼayasiñjamawa uk amuypachätawa. Ukhamajj kunjamas jikjjatasi uk irpir chuymaninakar sañajj jilatatakisa kullakatakis chʼamäspawa. ¿Kun lurañas wakisispa? Munasiñampi kusisita uñkattʼasa ukat chʼamañchtʼkir arunakamp parltʼañaw wakisispa. 40 jila maranak irpir chuymanjam loqtir Michael jilatajj akham arunakampiw parlañ qalltañ yati: “Irpir chuyman jilatanakatakejj jilat kullakanakar sum uñtʼañataki utapar visittʼir sarañaw wali kusiskañajja. Ukatwa jichhüru jumar tumptʼirejj wali kusisit jutta” sasa.

Visittʼkasajja, nayraqat oración taqe chuyma maytʼasiñajj wali askïspawa. Pablojj cristian jilat kullakanakapajj kunja iyawsäwimpis Diosatak irnaqapjje, kunja munasiñampis loqtapjje ukat kunjamsa jan waltʼäwinkkasas aguantapjje ukanakwa oracionapan aytirïna (1 Tes. 1:2, 3). Kunjam chuymanïpkitï uk wali askit uñjatam oracionan aytasajja, sum parltʼasiñatakiw chuymamsa ukat jilat kullakan chuymaps wakichtʼaskta. Ukampis arunakamampejj sum jikjjatasiñapatakiw yanaptʼasma. Experienciani irpir chuyman Ray jilatajja, akham siwa: “Diosar loqtasajj kuna askinaks jikjjattan uk awisajj armastanwa, ukampis ukanak maynejj amtayistu ukhajj chʼamañchtʼataw jikjjatastanjja” sasa.

Biblian mä jiskʼa tʼaqapaksa liytʼarapïta ukhajja, apóstol Pabljamarakiw jilat kullakanakar ‘ajayu toqen chʼamañchtʼasma’ jan ukajj chuymachtʼasma (Rom. 1:11). Amuytʼañäni, maynejj llakimp wali aynachtʼat jikjjataski ukhajja janis kunatak askïkaspa ukham amuyasispa, inas salmonak qellqerjam jikjjataschispa, jupajj akham sänwa: “Nayajj armanukut jan yäqkañ chʼama  qari[tätwa]” sasa. Ukhams jikjjataskchïnjja, akham sänwa: “Janiw leyinakamat armaskti” sasa (Sal. 119:83, 176). Uka tʼaqanakat mä jukʼa qhanañchtʼasajja, Diosan kamachinakap janirakiw armasktati sasaw jilatarojj sarakisma.

Ajay toqet aynachtʼat jikjjatasi jan ukajj tamat jitheqtawayjje uka kullakarojja, qollqe chhaqhayasir warmit Jesusajj parlkäna uka uñachtʼäwiw chuymapar purtʼaspa (Luc. 15:8-10). Chhaqhayaski uka qollqejja, qollqet lurat jila alani collaran uchatäpachänwa. Uka uñachtʼäwit kullakar qhanañchkasajja, tama taypin jupajj kunja wakiskirisa uk amuyañapatakiw chʼamachasiñama. Ukatjja, Jehová Diosajj jumar wal munastamjja, Jupan uwijaparakïtawa sasaw sañama.

Jilat kullakanakajj Biblian jiskʼa tʼaqanakapat qhanañchtʼañ wal munapjje, ukhamajja janiw jumak parlañamäkiti. Ukat jupatakjam Bibliat liytʼasajja, wakiskir mä aru jan ukajj mä qhawqha arunakwa ajlltʼañama, ukat kuns amuyi uk arsuñapatakiw mayiñama. Sañäni, 2 Corintios 4:16 qellqat liytʼasajja, irpir chuymanejj akham sasaw jisktʼaspa: “¿Kunjamsa Diosajj nayrar sartañatak chʼamañchtʼawaytam uk uñjawaytati?” sasa. Ukham jisktʼaw maynit maynikam chʼamañchtʼasiñatak yanaptʼaspa (Rom. 1:12).

Ukat Diosan nayra loqtirinakapat khitis jupjam jikjjatasïna jupat parltʼasaw chʼamañchtʼarakisma. Sañäni, wali aynachtʼatäki uka jilatas jan ukajj kullakasa, Ana warmjam jan ukajj Epafrodito chachjamaw amuyasipjjaspa, jupanakajj llakimp aynachtʼataw awisajj jikjjatasipjjerïna. Ukhamäkchïnsa Jehová Diosajj jupanakar wali askit uñjaskakïnwa sasaw amuytʼayasma (1 Sam. 1:9-11, 20; Fili. 2:25-30). Ukat wakiskani ukhajja, Biblian utjki uka sarnaqäwinakat yatjjatapjjarakisma.

Tumptʼasin qhepatsa jilat kullakanakat llakisitam uñachtʼayaskakiñamawa (Hech. 15:36). Sañäni, utapat janïr sarkasajja, jupamp yatiyir mistuñatakiw amtawayapjjasma. Experienciani irpir chuyman Bernard jilatajj kunjamsa yanaptʼi uk amuytʼañäni. Visittʼkäna ukamp wasitat jikisisajja, wali amuyumpiw ewjjtʼkäna uka toqet akham sasin jisktʼi, ¿pasïrin parltʼawayktan ukajj yanaptʼawaytamti? sasa. Jilat kullakanakattï llakistajja, kunansa yanaptʼaskakisma ukwa amuytʼäta.

Jichhaw jilat kullakanakajj munatäñsa, jarkʼaqatäñsa ukat kunjamsa jikjjatasipjje uk amuyatäñsa munapjje (1 Tes. 5:11). Ukhamajja, janïr tumptʼir sarkasaw kunjamsa jikjjatasipjje uk lupʼiñama. Jehová Diosar mayisim ukat Biblian jiskʼa tʼaqanakap sum ajlltʼam. Ukhamatwa “qarjata, jan chʼamani sarnaqasipki” ukanakar chʼamañchtʼañatakejj wakiskir arunak jikjjatäta.