Siria markankir reyejj Diosan Eliseo profetaparuw jiwayañatak jachʼa perqanakani Dotán markakam arkäna. Uka markajj qollu patankänwa. Reyejj mä tama caballería, nuwasiñ carronaka ukat walja soldadonakwa Dotán markar khitäna. Uka markajj qʼala muyuntataw qhantatïna (2 Rey. 6:13, 14).

Eliseon yanapiripajj anq uñtasajj uñisirinakaparuw uñjäna ukat akhamwa Eliseor säna: “¡Jichhastï yatichiri! ¿kuns kamachañäni?” sasa. Eliseojj akham saränwa: “Jan ajjsaramti, jiwasampïki ukanakasti jukʼampiwa, jupanakampïki ukanakata sipansa” sasa. Ukatsti, “oracionan mayïna, akham sasa: ‘[Jehová Dios] Tatitu achiktʼassmawa, nayranakapa jistʼaram uñjañapataki’ sasa. Tatitusti uywatapan nayranakapjja jistʼaränwa, ukatsti uywatajj uñjänwa qolluna phoqantata caballerianaka, ukhamarak nina nakkiri carronaka Eliseor muytata” (2 Rey. 6:15-17). ¿Kunsa Eliseon uka sarnaqäwipatsa ukat yaqha sarnaqäwinakapatsa yateqsna?

Siria markankir ejercitop uñjasajja, Eliseojj janiw ajjsarkänti, Jehová Diosaruw confiyasïna ukat Diosan jarkʼaqer chʼamapsa qhanwa uñjarakïna. Jiwasajj janiw milagronak suyktanti, ukampis kunjamsa Diosajj markapar jarkʼaqaski uk sum amuytanjja. Ukat caballerianakampi nina nakkiri carronakamp muyuntatäksnas ukhamarakïtanwa. Jiwasatï, Jehová Diosarojj markapar jarkʼaqaskatap uñjañäni ukat Jupar confiyarakiñäni ukhajja, jan ajjsarasaw sumaki jakasiñäni ukat bendecitarakiñäniwa (Sal. 4:8). Kunjamsa Eliseon yaqha sarnaqäwinakapajj yanaptʼistaspa uk yatjjatarakiñäni.

Mä kutejja, Eliseojj qholliskäna ukhaw Elías profetajj jikjjatäna ukat “jupa patjjaruwa capapa liwjjatäna”. Kunatsa uk luräna uk Eliseojj sum yatïna. Ukatwa mä manqʼäwi wakichäna, ukat awkip taykapar jampʼattʼasajj Eliasar serviñatakiw utapat sarjjäna (1 Rey. 19:16, 19-21). Eliseojj Diosar taqe chuyma serviñatak tiempo apsusitapatjja, Jehová Diosan suma loqtiriparuw tukuwayäna, qhepat Elías lantiw profetjam loqtjjäna.

 Eliseojj inas sojjta maranak Elías profetar yanapchïna. Ukha maraw ‘Eliasan yanapiripjam’ loqtäna (2 Rey. 3:11). Uka tiemponjja jaqejj amparampikiw manqʼapjjerïna, janiw cucharanakamp manqʼapjjerïkänti. Ukat manqʼañ tukuyatarojja, servirejj umampiw uywiripan amparapar jareqasiñapatak warjjattʼirïna. Ukhamajj Eliseon luräwinakapat yaqhepajj jan yäqañjamakïnwa. Ukampis Eliasan serviripjam irnaqañajj jupatakejj wali askïnwa.

Jichhürunakanjja, ukhamarakiw walja cristianonakajj Diosatak kunaymanit sapürjam irnaqasipki. Uksti iyawsäwinïpjjatap layku ukat Diosar taqe chʼamapampi serviñatakiw lurapjje. Ukampis yaqhep luräwinak phoqhañatakejja, utap jaytapjjañapaw wakisi, sañäni: Betel utan irnaqañataki, Tantachasiñ Utanak lurañataki jan ukajj yaqha ukhamanakan irnaqañataki. Ukampis ukajj janis kunäkaspa ukhamwa yaqhepajj uñjapjje. Mä cristianojj janipuniw ukham amuyañapäkiti, kunattejj Jehová Diosajj wali askitwa uka luräwinak uñji (Heb. 6:10).

Diosajj mä tutuka toqe Eliasar alajjpachar janïr apkasajja, Gilgal cheqat Betelkamaw profetar khitäna. Ukampis Eliasajj janis Eliseomp sarañ amtkchïnjja, Eliseojj akham sänwa: “Janiw nayajj sapaki jumarojj jaytkämati” sasa. Ukat Eliasajj sarkasajj pay kutiw qheparakim säna, ukampis janiw istʼkänti (2 Rey. 2:1-6). Kunjamtï Rut warmejj Noemí suegraparojj jan jaytañ munkänjja, ukhamarakiw Eliseojj Eliasar jan jaytkänti (Rut 1:8, 16, 17). ¿Kunatsa? Jupajj uka luräw wali askit uñjäna, kunattejj Diosaw Eliasar serviñapatak uttʼayäna.

Eliseotwa yateqasiñasa. Diosan markapan luräwinak katoqasajja, wali askitwa uñjañasa ukat Diosar serviskatas janiw armañasäkiti (Sal. 65:4; 84:10).

Thakin sarkasajja, Eliasajj akhamwa Eliseor säna: “Sita, kuns munta juma layku nayan lurañajja janïra nayajj jumampi jaljtkasinjja” sasa. Ukat Eliseojj akham sänwa: “Nayajj muntwa juman ajayumata pä ukkhampi katoqaña” sasa. Kunjamtï Salomonajj nayrajj maykänjja, ukhamarakiw Eliseojj kunatï Diosar sum serviñatak yanaptʼkaspa uk mayïna (1 Rey. 3:5, 9; 2 Rey. 2:9). Israel markanjja, jilïr yoqajj herenciat pä ukhampwa katoqañapäna (Deu. 21:15-17). Ukhamasti, Eliseojj Elías lanti profetäñatakiw mayiskäna. Ukat Eliasjam jan ajjsarir jaqëñwa munäna. Cheqansa, Eliasajj ‘taqe chuymaw Jehová Diosar munasïna’ (1 Rey. 19:13, 14, NM).

¿Kunjamsa Eliasajj serviripan mayitaparojj jaysäna? “Janiw jukʼaki mayktati. Ukajj churatäyätawa jumatejj uñjitäta nayajj jumat jaljtayatäkä ukkhajja, ukampis jan uñjkitäta ukkhasti janiw churatäkätati” sasaw Eliseor säna (2 Rey. 2:10). Amuyatajj Eliasan jaysatapajj akanakwa sañ munäna: 1) Jehová Diosakiw kuntï Eliseojj maykäna uk churaspäna, ukat 2) Eliseotejj mayitap katoqañ munchïnjja, Eliasampejj qhepakamaw qheparañapäna.

¿Eliseon mayitapar Diosajj jaysänti? Bibliajj akham siwa: “Jupanakajj parlasisa sarasipkäna ukkhasti, akatjamatwa mä nina nakhaskiri carrojj uñstanïna nina caballonakani, ukatsti jaljtayänwa, Eliasasti alajjpacharuw makhatjjäna mä thaya tutukanjama [uksti Eliasajj uñjaskarakïnwa]” sasa. * Ukhamwa Jehová Diosajj Eliseon mayitapar jaysäna. Eliasajj kunjamsa alajjpachar aptatäjjäna uk uñjänwa. Ukatsti, Eliasan ajayupat pä ukhampiw katoqäna, ukat Elías lantiw profetäjjäna (2 Rey. 2:11-14).

Eliasat jalaqtkäna uka isi aptasaw Eliseojj usktʼasïna. Ukat uka isiw Jehová Diosan profetapjam uñtʼayjjäna. Ukat kunapachatï mä milagro toqe Jordán jawira jaljtaykäna ukhaw Diosan profetapjam uttʼayatäjjatapajj jukʼamp qhan amuyasjjäna.

Eliasar mä tutuka taypi alajjpachar makatir uñjkäna ukajj chuymaparupuniw Eliseorojj purtʼpachäna. Cheqansa janiw mä jaqejj nina nakhaskiri carronaka, caballonak sapüru uñjkiti. Taqe ukanakajja, Jehová Diosajj Eliseon mayitapar askirjam jaysatapwa uñachtʼayäna. Jehová Diosajj mayisitanakasar jayskistu ukhajja, janiw nina nakhaskiri carronaksa ni caballonaksa uñjktanti. Ukampis kunjamsa Jehová Diosajj munañap phoqhañatakejj chʼamap apnaqe ukwa amuysna. Ukat kunjamsa Jehová Diosajj  aka oraqenkir markaparojj bendiciski uk uñjasajja, alajjpachankir carropajj kunjamsa saraski uks “uñjksna” ukhamawa (Eze. 10:9-13).

Eliseojj kunaymaninakatwa Jehová Diosan jachʼa chʼamapjja uñjäna. Cheqansa Diosan qollan ajayupaw 16 milagronak lurañapatakejj yanaptʼäna. Eliasat sipansa pä ukhampwa luräna. * Aka yatichäw qalltan parlaniwayktan ukhaw Eliseojj payïr kutin Dotán markan nina nakhaskiri carronaka ukat caballonak uñjäna.

Dotán markan uñisirinakapamp muyuntatas uñjaskchïnjja, Eliseojj janiw ajjsarayaskänti. ¿Kunatsa? Kunatejj Jehová Diosar confiyañwa yateqäna. Jiwasajj jupjam iyawsäwinïñasawa. Ukhamasti iyawsäwinïtasa ukat qollan ajayun mayni luräwinakap uñachtʼayañatakisa, Jehová Diosan qollan ajayup mayisipjjapuniñäni (Luc. 11:13; Gál. 5:22, 23).

Kunatï Dotán markan paskäna ukajja, Jehová Diosaru ukat jan uñjkay ejercitopar confiyañatakiw Eliseorojj yanaptʼäna. Kunjamsa Jehová Diosajj angelanakapamp uka markaru ukat uñisirinakapar muyuntaykäna ukwa jupajj uñjäna. Uñisirinakapar juykhuptayasaw Diosajj Eliseoru ukat serviripampir qhespiyäna (2 Rey. 6:17-23). Ukham jan walina ukat yaqha ukham jan walinakan uñjasisaw Eliseojj Jehová Diosar iyawsatapa ukat taqe chuyma confiyatap uñachtʼayäna.

Eliseo profetjamarakiw Jehová Diosar taqe chuyma confiyañasa (Pro. 3:5, 6). Ukhamtï lurañänejja, Diosajj khuyaptʼayistaniwa ukat bendicirakistaniwa (Sal. 67:1, Aymar Biblia). Jichhürunakanjja, janiw cheqpach nina nakhaskiri carronakampi ukat caballonakampi muyuntatäktanti, ukampis ‘jachʼa tʼaqhesïwi’ jutkani ukhajja, Jehová Diosajj oraqpachankir markaparojj jarkʼaqaniwa (Mat. 24:21; Apo. 7:9, 14). Ukañkamasti, ak amtapjjapuniñäni: “Diosaw jiwasan imantasiñasajja” (Sal. 62:8).