1. Nehemiasajj Jerusalenar kuttʼankäna ukhajja, ¿kuna jan walinaksa jikjjati? (Aka janankir foto uñjjattʼäta.)

JERUSALÉN markankir jaqenakaw parlasipki. ¿Kunatsa? Kunattejj yaqha markat jutïr jan walit uñtʼat mä jaqew templon mä utan jakaski. Levitanakajj luräñanakapwa jaytanukusipki. Jilïrinakajj Jehová Diosar yupaychañat sipansa, sábado samarañ urunjja negocionakapakwa lurasipki. Walja israelitanakaw jan judiöpkis ukanakampi casarasisipki. Kuna jan walinaktï Nehemiasajj 443 nayrïr pacha maran Jerusalenar kuttʼanisin jikjjatkäna ukanakatjja, ukanakaw mä qawqhajja (Neh. 13:6).

2. ¿Kunjamsa israelitanakajj Diosar katuyata markar tukupjjäna?

² Israel markajja, Diosar katuyata markänwa. Ukat israelitanakajj 1513 nayrïr pacha maranwa Diosan munañap phoqhañatak akham sapjjäna: “¡Kunanaktejj [Jehová] Tatitojj arski ukanakjja lurapjjäwa!” sasa (Éxo. 24:3). Diosaw jupanakarojj markapäñapatak ajllisïna, mä arunjja, qʼomachäna. ¡Ukajj wali askipunïnwa! Pusi tunka maranak qhepatjja, akham sasaw Moisesajj jupanakar amtayäna: “Jumanakasti [Jehová] Diosatak ajllit markäpjjtawa; Diosaw jumanakarojj taqe markanakat sipansa ajllisipjjtam, ukhamat jumanakajj jupatak yaqhachat markäpjjañamataki” sasa (Deu. 7:6).

3. Nehemiasajj Jerusalenar wasitat kuttʼankäna ukhajja, ¿kunjamsa judionakarojj Diosar yupaychañ toqet jikjjatäna?

³ Israel markajj janiw kuntï arsuwayapkäna ukanak phoqhapkänti, ukajj llakkañapunïnwa. Ukampis Diosar yupaychir jaqenakajj utjapunchïnsa, jila parte judionakatjja janiw Jehová Diosan munañap phoqhapkänti, jan ukasti Diosar katuyatäpkaspasa ukat taqe chuymas yupaychapkaspa ukhamakwa tukupjjäna. Diosar taqe chuyma yupaychirinakajj Babiloniat Jerusalenaru cheqa yupaychäwi mayampi uttʼayir kuttʼanipkäna uka tiempotjja, Nehemiasan wasitat kuttʼaniñapkamajj niya patak maranakaw pasjjäna. Ukampis Israel markajj wasitampiw Diosar yupaychañ toqet aynachtʼaskäna.

4. ¿Kunanakas Dios nayraqatan sum sarnaqaskakiñataki ukat Jupampi askit uñjatäskakiñatak yanaptʼistaspa?

⁴ Israelitanakjamarakiw Jehová Diosan Qhanañchirinakapajj Diosar katuyatätanjja. Ukhamajj ajllit cristianonakasa  ukat ‘walja jaqenakjam’ uñtʼatäpki ukanakasa, Diosamp qʼomachatätanwa ukat Jupar yupaychañatak yaqhachatarakïtanwa (Apo. 7:9, 14, 15; 1 Cor. 6:11). Israelitanakajj janiw Jehová Dios nayraqatan sum sarnaqjjapjjänti, ukatwa Jupampejj jan sum apasjjapjjänti. Jiwasajj janiw ukhamar purtʼasiñ munktanti. Ukampis ukhamar jan purtʼasiñataki ukat Diosampi askit uñjatäskakiñatakejja, ¿kunas yanaptʼistaspa? Nehemías 13 jaljaw uk pusi toqet yatichistu, ukwa aka yatichäwin yatjjataskañäni: 1) Jan wali jaqenakamp jan chikachasiña, 2) Jehová Diosan markapar yanaptʼaña, 3) Diosan Reinop nayrar uchaña, ukat 4) cheqpach cristianjam sarnaqaskakiña. Jichhajj mayat maya yatjjatañäni.

⁵ Nehemías 13:4-9 liytʼasiñapawa. Jan wali jaqenak taypinwa jaktanjja, ukatwa Dios nayraqatan qʼomäñajj chʼamäspa. Eliasib ukat Tobías chachanakat amuytʼañäni. Eliasib chachajj jilïr sacerdotënwa ukat Tobiasajj amonita jaqënwa ukat inas Persia markankir reyitak irnaqchïna. Nehemiasajj Jerusalén markan perqanakap wasitat saytʼayaskäna ukhajja, Tobiasampi yanapirinakapampejj janiw uk lurayañ munapkänti (Neh. 2:10). Diosan kamachinakaparjamajja, amonitanakarojj janiw templor mantayasiñapäkänti (Deu. 23:3). Ukhamajj ¿kunatsa jilïr sacerdotejj Tobiasarojj templon mä uta churpachäna?

5, 6. ¿Eliasib chachasa ukat Tobiasas khitinakäpjjänsa, ukat kunatsa jupanakajj sum apasipjjpachäna?

⁶ Tobías chachajj Eliasib sacerdoten suma amigopänwa. Tobiasasa ukat Johanán sat yoqapasa, Judá markankir warminakampiw casarasipjjäna ukat judionakajj Tobiasat sumwa parlapjjarakïna (Neh. 6:17-19). Ukhamarusa, Eliasib chachan mä allchhipajj Samaria marka apnaqeri Sanbalat chachan phuchapampi jaqechatänwa, uka chachajj Tobiasan suma amigoparakïnwa (Neh. 13:28). Ukanakaw kunatsa Eliasib sacerdotejj jan walit uñtʼat Tobías chachar templon mä uta churpachäna, ukat jupan amtaparjam kuns lurpachäna uk amuytʼayistu. Ukampisa Nehemiasajj Tobiasan taqe yänakap uka utat willsusaw Jehová Diosat jan jitheqtirïtap uñachtʼayäna.

7. Irpir chuymaninakasa ukat mayni jilat kullakanakasa, ¿Dios nayraqatan askit uñjatäskakiñatakejj kuns lurapjjañapa?

⁷ Diosar katuyat markjamajja, Jehová Diosar taqe chuyma yupaychañaw nayrankañapa. Ukampis awisajja, familiasar munasakiw Biblian kamachinakap pʼakintsna. Jiwasatï ukham lurañänejja, Jehová Diosajj janiw qʼomat uñj-jjestaniti. Irpir chuymaninakajja, Jehová Diosan arunakaparjamaw kuns amtapjjañapa, janiw amuyupampiki ni chuymapampikis apayasipjjañapäkiti (1 Tim. 5:21). Jupanakajj janipuniw kunanakatï Dios nayraqatan jan walit uñjaykaspa ukanak lurapjjañapäkiti (1 Tim. 2:8).

8. ¿Khitinakampis sarnaqañäni ukanakat kunsa Diosan yupaychirinakapjamajj amtañasa?

⁸ Ak amtañasapuniwa: “Jan wali jaqenakampi sarnaqañajj suma luräwinaka chhaqhayañawa” (1 Cor. 15:33). Familiaranakasat yaqhepajj janiw Diosan kamachinakaparjam sarnaqañatak yanaptʼkistaspati. Mä tiemponjja, Eliasib jilïr sacerdotejj Israel markatakejj wali yateqaskayänwa, kunattejj taqe chuymaw Nehemiasarojj Jerusalenan perqanakap wasitat saytʼayasiñapatak yanaptʼäna (Neh. 3:1). Ukampis qhepatjja, Tobiasampi ukat yaqhanakamp amtayatajj Eliasib sacerdotejj kunanakatï Jehová Dios nayraqatan jan walïkäna ukanakwa lurjjäna, ukat janiw Diosamp askit uñjatäjjänti. Jiwasatï suma yatiñan jaqenakamp chika sarnaqañäni ukhajja, jupanakajj Biblia liyiñataki, tantachäwinakar sarañataki ukat yatiyir sarañatakiw chʼamañchtʼapjjestani. Cheqansa, kunatï askïki uk lurañatak chʼamañchtʼapkistu uka familiaranakasarojj wal munastanjja ukat yuspäraraktanwa.

9. ¿Kunas templon pasaskäna, ukat uk askichañatakejj kunsa Nehemiasajj luräna?

⁹ Nehemías 13:10-13 liytʼasiñapawa. Levitanakajj kuntï templon lurapjjañapäkäna uk jaytawayjjapjjänwa. ¿Kunatsa? Jaqenakajj mä jukʼakwa kunanakampitï yanaptʼapjjañapäkäna ukanak  templor apjjapjjäna. Ukatwa levitanakajj lurañanakap jaytawayasin oraqenakapar yapuchir sarjjapjjäna. Ukham lurapjjatapatjja, Nehemiasajj jilïrinakaruw juchañchäna. Amuyatatjja, jupanakajj janiw kuntï lurapjjañapäkäna uk phoqhapkänti. Inas jupanakajj kuntï markachirinakat apthapipjjañapäkäna ukanak jan apthapipkchïnti, jan ukajj kuntï apthapipkäna ukanak templor jan apapkchïnti (Neh. 12:44). Ukatwa Nehemiasajj diesmonak apthapisiñapatakejj kunatï wakiskäna uk luräna, ukat levitanakar ukanak churapjjañapatakejj atiniskay chachanakaruw uttʼayäna.

10, 11. ¿Kunjamsa Diosan markapar yanaptʼsna?

¹⁰ ¿Kunsa ukat yateqsna? Ak amtañasapuniwa, Jehová Diosarojj taqe kunatï utjkistu ukanakampiw jachʼañchsna (Pro. 3:9). Kunapachatï Diosan markaparojj ukanakamp yanaptʼtan ukhajja, kunanakatï Jupankki ukanakakwa churasktanjja (1 Cró. 29:14-16). Churañatak janiw waljajj utjkituti sasin inas amuystan, ukampis churañ munañäni ukhajja, utjkistu ukampejj maynit maynikamaw yanaptʼassna (2 Cor. 8:12).

¹¹ Kimsaqallqo wawanakani mä familiat amuytʼañäni: jupanakajj walja maranakaw chuymankipstat precursor especial mä chacha warmir semanan may kuti jupanakamp manqtʼasipjjañapatak jawstʼapjjerïna. Kimsaqallqo wawanïkchïnsa, kullakajj akham sirïnwa: “Tunkanitakiw phaytjja, paninimpitak phayañajj janiw kuna chʼamäkisa” sasa. Semanan may kutiki manqʼa wajjtʼañajj janis kunäkaspa ukham amuyañjamäkchisa, ukham lurapjjatapat uka precursoranakajj wal yuspärapjjäna. Ukat jupanakajja, uka familiatakejj mä bendicionarakïnwa. Chʼamañchtʼkir arunakapampi ukat experiencianakapampejja, wawanakaparojj Diosar yupaychañ toqet nayrar sartapjjañapatakiw yanaptʼapjjäna. Ukat tiempompejja, uka familian wawanakapajj taqeniw Diosatak sapürunjam irnaqtʼjjapjjäna.

12. ¿Tam sarayañatak uttʼayatäpki uka jilatanakajj kunansa yateqaskayäpjje?

¹² Ukatjja, akarakwa yateqsna: jichhürunakanjja, tam sarayañatak uttʼayatäpki uka jilatanakajj Nehemiasjamarakiw Diosar yupaychañ toqet yanaptʼañatakejj nayrankapjje. Ukaw tamankir jilat kullakanakarojj yanaptʼaraki. Ukat irpir chuymaninakajj apóstol Pablot yateqasipjjarakiwa. Jupajj Diosar yupaychañanjja, wal yanaptʼäna ukat kunsa sapa maynejj Diosan markapar yanaptʼañatakejj luraspa uks amuytʼayarakïnwa (1 Cor. 16:1-3; 2 Cor. 9:5-7).

13. ¿Kunjamsa yaqhep israelitanakajj sábado uru jan respetapjjatap uñachtʼayapjjäna?

¹³ Nehemías 13:15-21 liytʼasiñapawa. Jiwasatï yänaka jikjjatañatakik sinti llakisisksna ukhajja, jukʼat jukʼatwa Diosar yupaychañ toqet aynachtʼsna. Éxodo 31:13 qellqatarjamajja, sapa semana samarañ urojja, israelitanakar Diosan ajllit  markapäpjjatap amtayañatakïnwa. Sábado urojja, familiana Diosar yupaychañataki, Diosar mayisiñataki ukat Diosan kamachinakapat lupʼiñatakïnwa. Ukampis Nehemiasajj jakkäna uka tiemponjja, yaqhep israelitanakajj sábado urjja inürükaspas ukhamakwa uñj-jjapjjäna, ukat negocionakakwa lurapjjäna. Ukanak uñjasajja, Nehemiasajj janïr sábado uru qalltkipanwa markan punkunakap jistʼantayäna, ukhamat yaqha markat jutïr alakipanakarojj jan mantaykänti.

14, 15. 1) ¿Qollq jikjjatañaruk chuym churjjsna ukhajj kunas pasaspa? 2) ¿Kunjamsa Diosan samarañ urupar mantsna?

¹⁴ ¿Kunsa Nehemiasat yateqsna? Mayajj akäspawa: janiw qollq jikjjatañaruk chuym churañasäkiti ni uk jikjjatañatakis tiemp aptʼasiñasäkiti. Ukampis awisajj trabajorukiw chuym churjjsna, yamas trabajosatï sumächi ukhajj jukʼampïspawa. Ak amtapuniñäni: “Janiw khitis pä patronarojj sirvkaspati” (Mateo 6:24 liytʼasiñapawa). Nehemiasajj wal qollq jikjjataspäna ukat Tiro markankirinakampi ukat yaqhanakamp negocio lurañatakiw tiempo apsusispäna, ukampis ukanak lurañat sipansa ¿kuns luräna? (Neh. 5:14-18.) Jupajj taqe chuymaw jilat kullakanakar yanaptʼañataki ukat Jehová Diosan sutip jachʼañchañatak irnaqtʼäna. Jichhürunakanjja, ukhamarakiw irpir chuymaninakasa ukat irpir chuymaninakan yanapirinakapas tamar yanaptʼañatak tiemp apstʼasipjje. Ukham lurapjjatapat jilat kullakanakajj wal jupanakar munasipjje. Ukatwa Diosan markapanjja maynit maynikam munasipjje, jupanakkamas sum apasipjje ukat ajjsarayasiñas janiw utjkiti (Eze. 34:25, 28).

¹⁵ Cristianonakajj janis semanan sábado samarañ uru imkstanjja, “mä aski samarañaw Diosan markapatakejj utjaski” sasaw apóstol Pablojj säna. Ukat saskakïnwa: “Khititejj Diosa[n] sama[rañapar] mantki ukajj samariw irnaqäwipatjja, kunjämtï Diosajj irnaqäwipat samarkäna ukhama” sasa (Heb. 4:9, 10). Cristianonakjamajja, Jehová Diosar istʼasa ukat amtap phoqhasiñapatak irnaqtʼasaw Diosan samarañ urupar mantsna. ¿Familjama Diosar yupaychañsa, tantachäwinakar sarañsa ukat yatiyir sarañsa jumasa ukat familiamas nayrarut uchasipkta? Ukanakajj janis askïkaspa ukhamwa patronasa jan ukajj khitinakampitï irnaqtan ukanakas amuyapjjaspa. Ukampis trabajosat sipansa, Jehová Diosar yupaychañaw nayranki sasaw qhan amuyayañasa. Mä arunjja, ‘Tiro markankirinakan sarjapjjañapatakis punkunak jistʼantksna ukhamwa lurañasa’, ukhamat kunanaktï Diosar yupaychañatak lurañasäki uk nayrar uchañataki. Ukatakiw Diosajj markapjam yaqhachasistu, ukatwa akham jisktʼasiñasa: “¿Sarnaqäwijampejj Jehová Diosar yupaychañatak yaqhachatätaj uñachtʼayaskti?” sasa (Mat. 6:33).

16. Nehemiasajj jakkäna uka tiemponjja, ¿kunjamatsa israelitanakajj Diosar katuyat markapäñ niy aptʼasirjamäsipkäna?

¹⁶ Nehemías 13:23-27 liytʼasiñapawa. Nehemiasajj jakkäna uka tiemponjja, Israelitanakajj yaqha markankir warminakampiw casarasisipkäna. Kunapachatï Nehemiasajj Jerusalenar nayrïr kuti sarkäna ukhajja, jilïrinakarojj yaqha markankir warminakamp jan casarasipjjañapatakiw jurameto lurayäna (Neh. 9:38; 10:30). Ukat mayampi kuttʼkäna ukhajja, judío chachanakajj janiw yaqha markankir warminakampik casarasipkänti, jan ukasti Diosar katuyat markjam sarnaqañ niyaw aptʼasirjamäsipkäna. Wawanakapasa janiw hebreo aru parlañsa ni leyiñsa yatipkänti. Jupanakajj chuymanëjjapjjani ukhajj ¿israelitäpjjtwa sapjjpachäniti? ¿Jan ukajj asdonitätwa, amonitätwa jan ukajj moabitätwa sapjjpachänicha? Hebreo aru jan yatisajj janiw Diosan kamachinakap amuyapkaspänti. Ukhamajj ¿kunjamarak Jehová Diosar uñtʼapjjaspäna, ukat kawkïr kʼari diosanakarutï taykanakapajj yupaychapkäna ukanakar yupaychañat sipansa Jehová Diosar yupaychañ ajllipjjaspänsti? Ukham uñjasajj jankʼakiw Nehemiasajj israelitanakan Diosar katuyat markapäskakiñapatakejj kunatï lurañ wakiskäna uk luräna (Neh. 13:28).

¹⁷ Jichhürunakanjja, wawanakasarojj cheqpach  cristianjam sarnaqapjjañapatakiw yanaptʼañasaraki. Awk taykanaka, akham jisktʼasipjjam: “¿Wawanakajajj ‘qʼoma aru’ parlañ sumti yatipjje, mä arunjja, Biblian yatichäwinakapat sumti yatipjje? (Sof. 3:9, NM.) ¿Kuntï wawanakajajj parlapki ukajj Diosan amuyunakapti jan ukajj akapachan amuyunakapcha uñachtʼayi?” sasa. Wawanakamarutï uka toqet jukʼamp yanaptʼañ wakisitap amuysta ukhajj jan aynachtʼamti, chʼamachasiskakim. Mä aru yateqañatakejj tiempow munasi, yamas tiempo apaqanakajj utji ukhajj jukʼamp tiempow munasispa. Ukhamarakiw wawanakaman Diosan kamachinakaparjam sarnaqañapatakejj tiempojj munasi, kunattejj akapachajj Diosan kamachinakaparjam jan sarnaqapjjañapatakiw amtayi. Ukhamajja, Familiana Diosar Yupaychañataki Arumansa jan ukajj yaqha urunakas wawanakamarojj Jehová Diosampi sum apasipjjañapatak pacienciamp yanaptʼapjjam (Deu. 6:6-9). Supayan apnaqat akapachankirinakjam jan sarnaqañajj kunja wakiskiris uk amtayapjjapunim (Juan 17:15-17). Ukat chuymapar purtʼañatakis chʼamachasipjjarakim.

18. Janiw khitis jumanakjamajj wawanakamarojj Jehová Diosar jakäwip katuyasipjjañapatakejj yanaptʼkaspati sasajja, ¿kunatsa sissna?

¹⁸ Cheqpachansa, Jehová Diosar yupaychapjjaniti janicha uk wawanakamaw amtapjjañapa. Ukampis awk taykjamajja, jumanakaw ukatakejj yanaptʼapjjañama. Ukat ukjja, sarnaqäwinakamampiw yatichapjjañama, kunanakas jan walïki uk qhanwa qhanañchtʼapjjañama ukat jan wali amtar puripjjani ukhajj kuna jan walinakansa uñjasipjjaspa uks sum amuytʼayapjjañamaraki. Awk taykanaka, janiw khitis jumanakjamajj wawanakamarojj Jehová Diosar jakäwip katuyasipjjañapatakejj yanaptʼkaspati. Jupanakajj cheqpach cristianjam sarnaqasipkakiñapatakejj jumanakan yanaptʼamwa munapjje. Niyas taqeniw ukham sarnaqañatakejj chʼamachasiñasa, ukat ukjja Diosan kamachinakaparjam sarnaqasa ukat kunjam jaqëñastï Jupajj munki ukham sarnaqasaw uk lursna (Apo. 3:4, 5; 16:15).

19, 20. Jehová Diosajj jiwasar askitak amtañapatakejja, ¿kunsa lurañasa?

¹⁹ Nehemiasan urunakapan jakapkäna ukanakat maynejj Malaquías profetänwa, jupajj akham sänwa: ‘Kawkïri jaqenakatï Diosaru ajjsarapki, ukhamaraki jupatsa jan armasipki’ ukanakarojj Jehová Diosajj janiw armaskiti, ukat sutinakapas ‘mä libroru qellqatarakiwa’ sasa (Mal. 3:16, 17). Jehová Diosajj janipuniw khitinakatï Jupar ajjsarapki ukat sutip munasipki ukanakarojj armaskaniti (Heb. 6:10).

²⁰ Nehemiasajj akham sasaw Diosat mayisïna: “¡Nayan Diosajja, amtasitaya nayar aski lurañamataki!” sasa (Neh. 13:31). Nehemiasajj Jupan serviripjam amtatäñwa munäna. Jiwasatï jan wali jaqenakamp jan chikachaskañäni, Jehová Diosan markapar yanaptʼañäni, Diosan Reinop nayrar uchañäni ukat cheqpach cristianjam sarnaqañäni ukhajja, sutinakasajj Jehová Diosan libropan qellqatarakïniwa. Ukhamasti, jiwaspachaw ‘yantʼasiñasa, iyawsañanakasanjja suma chʼamanïpjjtanti janicha uk yatiñataki’ (2 Cor. 13:5). Jiwasatï Jehová Diosar katuyat markjam sarnaqaskakiñäni ukhajja, Jupajj askitakiw amtasistani.