Kenia markanjja, pä precursor regularanakaruw visittʼapjjañapatak utar irpantapjjatayna, ukar mantasinsti mä chachar ikiñan uñjasin walpun uka jilatanakajj musparapjjatayna. Kunattejj jiskʼa cuerponikïnwa ukat amparanakapas jiskʼakïnwa. Kunapachatï “suchunaka[jj] taruja qallunakjamaw sinkʼusipjjani” sasaw Diosajj arsuwayi sasin sapkän ukhajja, uka chachajj wal kusisïna (Isa. 35:6).

Uka precursoranakajj Onesmus sat chachajj nasïwitpun osteogénesis imperfecta, (ukajj enfermedad de los huesos de cristal satarakiwa) sat usunïtap yatipjjäna, jichhajj Onesmus chachajj niya 40 maranakanëjjewa. Chʼakhanakapajj pʼakjtirjamakiwa. Niyakejjay uka usojj jan qollanïkchitejja, jakäwipan wali usuta ukat silla de ruedan jiwañwa suyäna.

Qhepat Bibliat yateqañwa qalltäna. Ukampis mamapajj janiw tantachäwinakar sarañap munkänti, kunattejj “usuchjasispawa ukat jukʼampiw usuyasispa” sasaw amuyäna. Ukhamajj kunanaktï tantachäwin arstʼaskäna ukanakwa jilatanakajj grabarapipjjerïna, ukhamat utan istʼañapataki. Ukat phesqa phajjsinak Bibliat yateqjjäna ukhajja, jan walins uñjaskchispänjja, tantachäwinakar sarañ wal munäna.

¿Tantachäwinakar saratapat jukʼampit usuntpachäna? Cheqas janiw ukhamäkanti. Jupajj akham amti: “Janis sinti usjjetaspa ukhamwa tantachäwinakan amuyasiyäta” sasa. Jutïr pachan mä suytʼäwinïtapatwa ukham jikjjatasïna. Yoqapajj kunjamsa jikjjatasïna uk uñjasajj mamapajj Bibliat yateqañwa qalltäna. Jupajj akham sirïnwa: “Diosar serviñaw wawajan qollapajja” sasa.

Mä jukʼa tiempotjja, Onesmus chachajj Diosan arunakap yatiyirëjjänwa, ukat bautisasjjarakïnwa. Jichhajj irpir chuymanin yanapiripäjjewa, janisay kayunakapas ni amparanakapas yanaptʼirjamakchejja, Jehová Diosatakejj jukʼamp lurañwa munäna. Ukat precursor auxiliarjam irnaqtʼañ munäna, ukampis ajjsartʼayasïnwa, ¿kunatsa? Kunatejj sapakutiw maynejj silla de ruedapat nuknaqañapäna. Ukat kunatï llakisiykäna uk jilat kullakanakar siskäna ukhajja, “yanaptʼapjjämawa” sasaw sapjjäna. Uka jilat kullakanakan yanaptʼapampejj Onesmus jilatajj precursor auxiliarjamaw irnaqtʼäna.

Ukat precursor regularjam irnaqtʼañ munjjän ukhajj ukhamarakiw ajjsartʼayasïna. Ukampis sapürutak Bibliat apstʼat qellqatat liytʼaski ukaw wal chʼamachtʼäna. Ukajj Salmo 34:8 qellqatat apstʼatänwa, ukan akham siwa: “Yantʼapjjam, uñjapjjarakim, Tatitun munasir kankañapa”. Uka toqet lupʼikiptʼasajj precursor regularjam irnaqtʼañwa amtäna. Jichhajj semanan pusi kutiw yatiyir mistu, ukat waljanirurakiw Bibliat yatichaski, jupanakajj nayraruw sartasipki. Ukat 2010 maran Precursoranakatak Escuelaruw saräna. Ukansti, khitinakatï jupar nayraqat visittʼapkäna ukanakat maynïr jilataru ukan yatichir uñjasajj wali kusisitaw jikjjataspachäna.

Awk taykapajj jiwatäjjewa, ukampis tamankir jilat kullakanakaw kunantï yanap munki ukan sapür yanaptʼasipki. Kuna bendicionanaktï katoqki ukampejj wali kusisitapuniwa, ukat aka arunaka phoqhasirwa kusisit suyaski “janiw khitis siskaspati: ‘Usutätwa’ sasajja” (Isa. 33:24).