BIBLIAJJ akham siwa: chachajj ‘warmiparuw munasiñapa kunjamatï jupa pachpajj munaski ukhama’. Warmisti ‘chachaparuw istʼañaparaki’. Ukhamajj mä “sapa jaqekïpkaspasa” ukhamwa kuntï phoqapjjañapäki uk phoqapjjañapa (Efe. 5:33; Gén. 2:23, 24). Ukhamatwa tiempompejj panpachanejj sum apasipjje ukat jukʼampirak munasipjje. Jupanakan sum apasipjjatapajj kunjamtï pä qoqan saphinakapajj chikthapit sum jilapki ukar uñtasitäspawa. Kusisit chacha warminakajja, chuymanakapan mä kikpakiw jikjjatasipjje.

Ukampis chachata jan ukajj warmita jiwjje ukhajja, ¿kunas pasi? Ukhaw jan tukusirjamakäna uka suma apasitanakapajj tukusjjaspa. Ukat viudasa jan ukajj viudos chuyma ustʼata, saparstʼataw jikjjatasispa ukat inas colerata jan ukajj jupa pachpa juchañchaschispa. Daniela sat warmejj 58 maranak jaqechatäsin waljaniruw chachaparu jan ukajj warmiparu aptʼasipjjatap uñtʼawayi. * Ukampis chachap jiwjjäna uka qhepatjja, akham sänwa: “Chachajajj jan jiwatäkäna ukhajj janipuniw kunjamsa jikjjatasipjje uk sum amuykayätti. Ukampis jichhajj sum amuyta”.

Chachapas jan ukajj warmipas jiwjje ukhajj walpun llakisipjje sasaw yaqhep yatjjattʼatanakajj sapjje. Khitinakatï ukham aptʼasiwayapki ukanakajj ukhamapunïskiwa sasinwa sapjje. Ema sat warmejj  25 maranak jaqechatänwa ukat walja maranakas chachapajj jiwatäjjchejja, “chuymajajj ususkakituwa” sasaw arstʼi.

Viudanakajj chachanakapat walja maranak jachapjjatapajj añchapunïkaspas ukhamwa Susana warmejj amuyirïna. Ukampis chachapaw jiwjjäna, jupampejj 38 maranakaw jaqechatäna. Jichhajj 20 jila maranakas pasawayjjchejja, akham siwa: “Sapürupuniw jupat lupʼta” sasa. Sapa kutiw jachaqtʼasi, kunattejj wal chachapat chʼusayasi.

Biblia pachpaw ukhamapunïskatap uñachtʼayi, kunapachatï chachata jan ukajj warmita jiwki ukhajj armañajj chʼamawa ukat mara maraw uk amtasiskakispa. Kunapachatï Sarajj jiwjjäna ukhajja, Abrahamajj “jiwatapatjja wal jacharakïna” (Gén. 23:1, 2). Jiwatanakan jaktaniñapat yatkchïnsa, Saran jiwatapat wali chuyma ustʼataw jikjjatasïna (Heb. 11:17-19). Ukat Jacobojj Raquel warmipajj jiwjjäna ukhajj janipuniw jupat armaskänti. Wali munasiñampiw warmipat wawanakapar parläna (Gén. 44:27; 48:7).

¿Kuns uka sarnaqäwinakajj yatichistu? Viudonakasa ukat viudanakas walja maranakaw chuyma ustʼata jikjjatasipjjaspa. Ukhamajj jachaqtʼasitanakapsa ukat llakisitanakapsa janiw janis kunäkaspa ukham uñjañasäkiti, jan ukasti kunatsa ukham jikjjatasipjje uk sum amuyañasawa. Inas chuymachtʼatäña ukat walja tiempo yanaptʼatäña munapjjchini.

Viudöñasa jan ukajj viudäñasa janiw solter jakäwir kuttʼañäkaspas ukhamäkiti. Walja maranak jaqechatäsinjja, chachajj kunjamsa warmiparojj llakitäki ukhajj chuymachtʼani ukat chʼamañchtʼani uk sumwa yatjje. Chachatï jiwjjchi ukhajj warmejj janiw munasiñapsa ukat chuymachtʼäwipsa katoqjjeti. Niya ukhamarakiw warmejj chachapar suman jikjjatasiyaña, kusisiyaña yateqe. Janiw jupan munartʼasiñapjamasa, suma arunakapjamas utjkiti ukat kuntï munki ukat wakiski uk jupjam uñjirejj janiw utjkarakiti. Jupatï jiwjjaspajja chachapajj wal chʼusayasispa. Ukatwa yaqhep viudonakasa ukat viudanakas jutïrit llakisipjje. ¿Biblian kawkïr aski yatichäwipas taqe kunas walikïskañapataki ukat sumankañ utjañapatakejj yanaptʼaspa?

“Jan llakisipjjamti kunatï qharürojj paskani ukatjja, qharürusti taqe uka llakisiñanakapampi phoqtʼatarakïniwa, sapürurakiw ukham llakinakan phoqhantatäski.” (Mat. 6:34.) Jesusan uka arunakapajj kunatï jakañatak munaski ukatwa parlaski, ukampis walja jaqenakaruw chachaparu jan ukajj warmiparu aptʼasiwayapki ukanakar aguantañatak yanaptʼawayi. Carlos chachajj mä qawqha phajjsinak warmipan jiwatapatjja akham siwa: “Mónica warmijat chʼusayasiskaktwa ukat awisajj jukʼampikiw llakisjjta. Ukham jikjjatasiñajj walikïskchisa, tiempompiw ukajj jukʼat jukʼat chhaqtaskitani” sasa.

Cheqas Carlos chachajj kunanakantï uñjasiñapäkäna ukanak aguantañapänwa. ¿Kunjamsa? Jupajj akham siwa: “Jutïr urunakat jan llakisis jakañwa Jehová Diosan yanaptʼapampejj yateqawayta” sasa. Carlosajj ukhaman uñjasisajj janiw aynachtʼkänti. Janis llakipampejj aynachtʼkchïnjja, uka llakipajj janiw mäki chhaqtkänti. Juman warmimasa jan ukajj chachamas jiwjjchi ukhajja, urut urutjamaw jan añcha llakisiñatak chʼamachasiñama. Yaqha urojj kuna askinakas utjani uk janiw maynejj yatkiti.

 Jehová Diosajj qalltan janiw jiwañatak lurkistänti. Jan ukasti, “Supayan luratanakap[awa]” (1 Juan 3:8; Rom. 6:23). Supayajj jaqenakaru esclavopar tukuyañataki ukat kuna suytʼäwinïpkitï uk apaqañatakejj jiwañampi ukat ukar ajjsarañamp apnaqe (Heb. 2:14, 15). Cheqpach kusisiñas ukat suman jakasiñas janiw paraisonsa utjkaniti sasin amuyañaswa Supayajj muni. Ukhamasti chachaman jan ukajj warmiman jiwatapat llakit jikjjataskta ukajj Adanan pantjasitapata ukat Supayan Dios contra saytʼasitapat ukhaman uñjasiskta (Rom. 5:12). Supayajj kuna jan walinaktï lurawayki ukanakwa Jehová Diosajj chhaqtayani, ukanakat mayajj jiwañawa. Supayajj kunanakampitï ajjsarayki ukanakat qhespirinakat waljanejj chachapa jan ukajj warmipa aptʼasiwayapki ukanakawa, inas jumajj ukhaman uñjasiraksta.

Ukat aka Oraqen jakañatak jaktanipkani ukanakatakejj janiw nayrjamäjjaniti, jan ukasti jaqenakajj sum apasjjapjjani. Awk taykanakata, achachilanakata ukat nayra tiempon jakawayapkäna ukanakan jaktanipjjañapat amuytʼam ukat wawanakampi ukat allchhinakapamp chikaw jan juchanir tukupjjani. Kunanakatï awk taykaptañar apki ukanakajj chhaqtjjaniwa. Jichha tiempo wawanakajj nayra achachilanakaparojj inas jan jichha tiemponjam uñj-jjapchiniti. Ukhamajj ukham mayjtʼäwinakajj jaqenakan mä familjama suma jakasipjjañapwa uñachtʼayi.

Jiwatat jaktanipkani ukanakat kunaymaninakwa jisktʼassna. Amuytʼañataki, ¿khitinakatï chachap jan ukajj warmip jiwjjepan walj kuti jaqechasi ukanakampejj kunas pasani? Niya ukhamarakwa  saduceonakajj jisktʼapjjatayna, mä warmin nayrïri chachapasa, payïri ukhamarak mayni phesqa chachanakapas jiwjjapjjataynawa (Luc. 20:27-33). Jaktanjjapjjani ukhajj ¿kunjamsa apasipjjani? Uk janiw jiwasajj yatktanti ukat uka jisktʼanakan qhanañchäwip jikjjatañatsa janiw llakisiñasäkiti, Diosaruw confiyañasa. Ukampis akat janipun pächasipjjañäniti: kuntï Jehová Diosajj jutïrin lurkani ukajj wali askïniwa ukat munkañarakïniwa, janiw kunar ajjsarañas utjjaniti.

Biblian amuykay yatichäwinakapat mayajja, munat familiäranakasan jiwatat jaktaniñapawa. Nayra tiempon jiwatatwa jaktanipjjäna sasin Bibliajj qhanañchki ukajja, “taqe jiwatanakasti [Jesusan] arupjj istʼapjjaniwa. Ukatsti uka jiwatanakajj jaktapjjaniwa” siski ukan phoqasiñapätapwa uñachtʼayi (Juan 5:28, 29). Khitinakatï jiwatat jaktanipkani ukanakar katoqapkani ukanakajj wal kusisipjjani. Maysa toqetjja, jaktanipkani ukanakajj kunja kusisitak jikjjatasipkani.

Uka tiemponjj aka Oraqen wali kusisiñaw utjani. Cheqansa millón millón jiwatanakaw jaktanipjjani (Mar. 5:39-42; Apo. 20:13). Khitinakantï munat familiäranakapajj jiwki ukanakarojja, kunatï jutïrin paskani uka toqet lupʼiñaw chuymachtʼaspa.

Kunapachatï jiwatanakajj jaktanipkani ukhajja, ¿llakisisipkakiñapäspati? Janiwa sasaw Bibliajj qhanañchi. Isaías 25:8 qellqatanjja, Jehová Diosajj “wiñayatakiw jiwañarojj tʼunjani” sasaw qhanañchi. Ukham sasinjja, taqe llakinak chhaqtayañatwa parlaski. Profeciajj akham saskakiwa: “[Diosajj] taqe jaqenakana nayranakapatsti jachanakapsa pichararakiniwa”. Jumatï chachamana jan ukajj warmimana jiwatapat llakita uñjastajja, jiwatanakataki mä suytʼäwi utjatap yatisajj kusisitäsmawa.

Jehová Diosajj Paraison kunsa lurani uk janiw khitis taqpach amuykaspati. Diosajj akham siwa: “Kunjamatejj alajjpachajj akapachat wali altonkejja, ukhamarakiw amtatanakajjasa, luräwinakajjasa, jumanakan amtatanakamatsa, luräwinakamat sipansa wali altorakiwa” (Isa. 55:9). Jesusajj jutïrin jiwatanakajj jaktanipjjaniwa sasin sawayki ukajja, Abraham chachjama Jehová Diosar jukʼamp confiyañatakiw yanaptʼistu. Ukampis taqe cristianonakaw  Diosar istʼañasa, ukhamatwa khitinakatï ‘jiwatat jaktanipkani’ ukanakampejj Paraison jakasiñäni (Luc. 20:35).

Llakisiñat sipansa, suytʼäwinïñatak chʼamachasim. Jaqenakan amuyuparjamajja, janis suytʼäwejj utjkaspa ukhamawa. Ukampis Jehová Diosajj mä suma suytʼäwi churistu. Diosajj kunanakatï jakañatak wakiski ukat kuntï munktan uk kunjamanakatsa churistani ukjja janiw sumpun yatktanti, ukampis Jehová Diosajj churistaniwa, ukjjat janiw pächasiñasäkiti. Pablojj akham sänwa: “Maynitejj uñtʼchi kuntejj suyaski ukjja, ukasti janiw suytʼañäkjjeti, jupan uk uñj-jjatap layku. Ukampis kuntejj suyapktan ukjja janiw uñjktanti, ukampis llampʼu chuymampiw suytʼapjjañasa” (Rom. 8:24, 25). Kuntï Jehová Diosajj arsuwayki ukar taqe chuyma confiyañajj aguantañatakiw yanaptʼätam. Ukhamatwa Jehová Diosajj jutïrin ‘chuyma manqhaman mayisitamarjam churkätam’ uk uñjarakïta. Jupaw ‘taqe jakirinakarojj askinak jilarkir churani’ (Sal. 37:4; 145:16; Luc. 21:19).

Jesusan jiwañapajj niya jakʼankjjäna ukhajja, apostolonakapajj llakitäsipkänwa. Ukat aka arunakampiw jupanakar chuymachtʼäna: “Jan jumanakajj llakisipjjamti. Iyawsapjjam Diosaru, nayarus iyawsapjjarakita”. “Janiw wajcha jaytapkämäti, nayajj kuttʼanïwa jumanakampïskañataki.” (Juan 14:1-4, 18, 27.) Jesusan arunakapaw alajjpachar sarañatak ajllit arkirinakaparojj mä suytʼäwinipjjañatapataki ukat walja maranak aguantapjjañapatak yanaptʼäna. Ukhamarakiw munat familiäranakapamp wasitat jikisiñ munapki ukanakajj jan sinti llakisipjjañapäkiti. Jehová Diosasa ukat Jesusasa, janiw jaytanukkistaniti. ¡Ukjjat janiw pächasiñasäkiti!