1. ¿Kunatakis jaqenakajj chʼamachasipjje, ukat kunatsa?

JAQENAKAJJ kunanakatï jupanakatak wali wakiskirïki ukanak jikjjatañatakejj taqe kun lurapjje. Awk taykanakajj wawanakapan nayrar mistupjjañapatakejj tiempopsa, qollqepsa ukat chʼamapsa apsusipjjewa. Tʼijuñar uskusir walja wayn tawaqonakajj amigonakapampi kʼuchirtʼañat sipansa, tʼijuñatakejj sapüruw walja horanak wakichasipjje, kunattejj markapan sutipjjaruw Juegos Olímpicos satäkis ukankañ munapjje. Jesús pachpaw kunatï jupatak wakiskäna ukanakatak chʼamachasïna. Jupajj qamirïña jan ukajj familianïñwa ajllisapäna, ukampis Jehová Diosan Reinopat yatiyañaruw chuym uchäna (Mat. 4:17; Luc. 9:58). Jupan arkirinakapajj ukhamarakiw Diosan Reinopat yatiyañatakejj luräwinakap jaytanukupjjäna. Niyakejjay jupanakatakejj uk lurañajj wali wakiskirïchïnjja, ukar yanaptʼañatakejj luräwinakap jaytañatakis jankʼakipjjänwa (Mat. 4:18-22; 19:27). ¿Jiwasat kamsasirakispasa? Akham sasaw taqenis jisktʼasiñasa: “¿Kun lurañas nayatakejj wali wakiskirejja?” sasa.

2. 1) ¿Kuna toqenakatsa cheqpach cristianonakajj chʼamachasipjjañapa? 2) ¿Kuna toqenakatsa yaqhepajj chʼamachasipjjarakispa?

² Jehová Diosampitï sum apasiñ munstan ukhajja, taqe cristianonakaw chʼamachasiñasa, mä arunjja, sacrificionak lurañasa. Amuytʼañataki, wali wakiskiripuniw Jehová Diosar oración lurañataki, Diosan Arup liyiñataki, familiana Diosar yupaychañataki, tantachäwinakaru ukat Diosan arunakapat yatiyir sarañataki tiempo ukat chʼama apstʼasiñajja (Jos. 1:8; Mat. 28:19, 20; Heb. 10:24, 25). * Chʼamachasitasata ukat Diosan bendicionapampejja, Diosan Arupajj jukʼampiw yatiyasiski ukat waljanirakiw Jehová Diosan markaparojj mantasipki, mä arunjja, ‘Diosan qollupar makatasipki’ (Isa. 2:2). Maysa toqetsti, yaqhepajj yaqha  toqenakatarakwa chʼamachasipjje: Betel utan irnaqasa, Tantachasiñ Utanaka ukat Jachʼa Tantachasiñ Utanak lurasa, jachʼa tantachäwinakatak waktʼayasa jan ukajj jan waltʼäwinakan uñjasipki ukanakar yanaptʼasa.

3. 1) ¿Kuna askinaksa Diosan Reinopatak chʼamachasisajj katoqsna? 2) ¿Kuna jisktʼanaksa jisktʼasiñasa?

³ Jichhürunakanwa Diosan Reinopat saytʼasiñasajj wali wakiskirejja. ¿Jehová Diosar serviñatak taqe chuym chʼamachasisipki ukanakar uñjañajj wali kusiskayajjaya? Salmonak qellqerit maynejj akham sänwa: “Nayasti chuymajjat mistkir loqtäwi katuyäma, aski sutimar yuspagarasaw qʼochüma” sasa (Sal. 54:5, 6). Jiwasatï ukham chuymanïtas Diosan Reinop puriniñapkam uñachtʼayañäni ukhajja, kusisitäñäniwa (Deu. 16:15; Hech. 20:35). Ukhamajj sapa mayniw akham jisktʼasiñasäspa: “¿Diosan Reinopatak jukʼamp chʼamachasiñajäspati? ¿Kunjamsa tiempojsa, qollqejsa, chʼamajsa ukat kunanaktï lurañ yatkta ukanak apnaqasktjja? ¿Kuna lurañanaksa jan jaytañajäkaspa?”. Diosan Arupajj qellqaskäna uka tiemponakan chuymanakapatjam sacrificionak Jehová Diosar loqtapkäna ukatjj kunsa yateqsna uk uñjañäni. Uk yatjjatañaw Jehová Diosar kusisit serviñatak yanaptʼistani.

4. ¿Kuna askinaksa israelitanakajj sacrificionak loqtasajj katoqapjjerïna?

⁴ Nayra Israel markanjja, Jehová Diosampi juchanak perdonayasiñataki ukat Jupamp askit uñjatäñatakejj sacrificionak loqtañajj wali askïnwa. Yaqhep sacrificionakajj loqtasiñapapunïnwa, ukat yaqhasti chuymapan amtki ukarjamaw loqtasiñapäna (Lev. 23:37, 38). Taqe naktʼayat ofrendanak chuymapan amtki ukarjamaw Jehová Diosar churapjjaspäna. Ukat kunapachatï Salomonan lurat templojj Diosar katuyasjjäna, ukhaw israelitanakan Diosar sacrificionak loqtapjjatapajj qhan amuyasïna (2 Cró. 7:4-6).

5. ¿Kunsa pisinkirinakajj Jehová Diosar loqtapjjasapäna?

⁵ Taqenejj jan mä kikpa sacrificionak loqtirjamäpjjatap Jehová Diosajj sum amuyäna, ukatwa kunanaktï churirjamäpkäna uk churapjjañapak suyäna. Diosan Leyiparjamajj animalanakaw loqtasiñapäna ukat wilapasti wartasiñaparakïnwa, kunattejj uka sacrificionakajj “mä chʼiwjamakïnwa, taqe kunanakatejj” Jesusar phoqasiñapäkäna ukanakata (Heb. 10:1-4). Ukampis Jehová Diosajj janiw uka mayitarjam phoqayañpun munkänti ukat kunjamansa uñjasipjje uk  sum amuyarakïna. Amuytʼañataki, mä israelitatï uwijsa jan ukajj waksa sacrificiot jan loqtirjamakäna ukhajja, uka lanti mä qawqha palomanak loqtatapjja Jehová Diosajj katoqasïnwa. Ukhamatwa pisinkirinakas sacrificionak kusisit loqtapjjarakïna (Lev. 1:3, 10, 14; 5:7). Ukampisa, animalanak sacrificiot loqtapkäna ukajj janis mä kikpäñapakchïnjja, chuymatpach sacrificionak loqtapkäna ukanakatjja Jehová Diosajj aka pä toqet phoqapjjañapwa munäna.

6. Sacrificio loqtirinakatjja, ¿kuna pä toqet phoqapjjañapsa Jehová Diosajj mayïna, ukat ukanak phoqañajj kunatsa wali wakiskirïna?

⁶ Nayraqatjja, maynejj kuna askinakapatï utjkäna ukwa churañapäna. Jan usuchjata, kʼumara animalanakakwa sacrificiot Jehová Diosajj katoqäna (Lev. 22:18, 20). Ukat animalatï usuchjatächïnjja, janiw katoqkänti. Payïr toqetjja, Diosan Leyiparjamajj khititï sacrificio loqtkäna ukajj qʼomäñapänwa. Ukampis jan qʼomäkchïna ukhajja, nayraqat Jehová Diosamp sumat uñjatäñatakiw jucha luratapat mä ofrenda churañapäna (Lev. 5:5, 6, 15). Kunattejj chuymatpach sacrificionaka ukat sumankthapiñ sacrificionak loqtaskäna ukanak jan qʼomäkasin manqʼasapäna ukhajja, Leyirjamajj jiwayatäñapänwa (Lev. 7:20, 21). Ukampis sacrificio loqtiritï Dios nayraqatan qʼomäspäna ukat sacrificiot loqtkäna uka animalas jan usuchjatäsapäna ukhajja, kusisita ukat chuymapans sumaw jikjjatasirakisapäna (1 Crónicas 29:9 liytʼasiñapawa).

7, 8. 1) Diosan Reinopatak chʼamachasisajja, ¿kunjamsa walja jilat kullakanakajj jikjjatasipjje? 2) ¿Kunsa taqe cristianojj Jehová Diosar churaspa?

⁷ Jichhürunakan walja jilat kullakanakaw Jehová Diosar taqe chuyma servipjje, ukhamatwa Juparojj wal kusisiyapjje. Uka jilat kullakanak pachpaw mayninakar yanaptʼasajj kusisitäpjje. Tantachasiñ Utanak lurañana ukat kawkhantï oraqen jan waltʼäwinakapajj jan walin uñjasiyki ukanakan yanaptʼir mä jilatajj akham siwa, ‘ukanakan yanaptʼasajj kunja kusisitätsa uk sañatakejj janiw arus utjkituti’. Ukat akham saskakiwa: “Mä machaq Tantachasiñ Utanïsasa jan ukajj oraqen jan waltʼäwinakapamp jan walin uñjasisin yanap katoqapki uka jilat kullakanakan kusisita ukat wal yuspärtʼapjjatap uñjasajja, chʼamachasitajajj jan inamayätapwa amuyta” sasa.

⁸ Jehová Diosan markapajja, Diosan Reinoparojj kunaymanit yanaptʼapjje. Khä 1904 maranjja, Charles T. Russell sat jilatajj akham sasaw qellqäna: “Taqe cristianoruw tiempopsa, qollqepsa ukat yaqha ukhamanaksa amtaparjam  sum apnaqañapatak Diosajj jaytawayi, ukat kunjamsa ukanak Diosar jachʼañchañatak apnaqaspa uk sapa mayniw sum amtjjañapa”. Jehová Diosatak chʼamachasiñajj walja askinak apani, ukampis uk lurañajj chʼamakïspawa (2 Sam. 24:21-24). Ukatwa akham jisktʼasiñasa: “¿Tiempojsa, chʼamajsa ukat kunanakatï utjkitu ukanak sumti apnaqasktjja?” sasa.

9. Kuntï Lucas 10:2-4 qellqatan Jesusajj siskäna ukatjja, ¿kuna aski yatichäwsa apssna?

⁹ Tiemposa. Bibliat apstʼat qellqatanakas yaqha arur jaqokipasiñapatakisa, imprimisiñapatakisa, Tantachasiñ Utanak lurasiñapatakisa, jachʼa tantachäwinak waktʼayañatakisa, jan walin uñjasipki uka jilat kullakanakar yanaptʼañatakisa ukat yaqha ukham wakiskir luräwinakan yanaptʼañatakis walja tiempo ukat chʼamaw munasi. Ukampis urojj 24 horanakanikiwa. Ukhamajj ¿kunjamsa tiempos sum apnaqsna? Kuntï Jesusajj arkirinakapar yatiyir khitkasajj siskäna uk amtañäni. Jupajj akham sänwa: “Thakinsti janirak khitirus tiempo apaqasiñkama aruntapjjamti” sasa (Luc. 10:2-4). Uka arunakampejj ¿kamsañsa munäna? Bibliat yatjjattʼat mä jaqejj uka toqet akham siwa: “Khä Israel uksa markanakanjja janiw jiwasjam pʼeqe altʼasakisa jan ukajj amparampikis aruntasipjjerïkänti, jan ukasti walja kutiw qhomanttʼasipjjerïna, yäqasiñampiw arunttʼasipjjerïna, qonqortʼasipjjerïn kunawa, taqe ukanak luraskañatakejj walja tiempow munasïna” sasa. Jesusajj uka arunakampejj janiw jan aruntasis sarnaqapjjañap arkirinakaparojj maykänti, jan ukasti jukʼa tiemponikïpjjatapa ukat kunatï wali wakiskirïki uka lurañar uskusipjjañapajj kunja wakiskiris uk amuyapjjañapatakiw chʼamañchtʼaskäna (Efe. 5:16). ¿Uka aski yatichäwirjam phoqsnati, ukhamat Diosan Reinopatak jukʼamp tiemponïñataki?

10, 11. 1) ¿Kunjamsa oraqpachan Diosan Reinopar yanaptʼañatak churaski ukanakajj apnaqasiski? 2) ¿Kunjamsa 1 Corintios 16:1, 2 jiskʼa tʼaqanakajj yanaptʼistaspa?

¹⁰ Qollqesa. Kuna lurañanakatï Diosan Reinopar yanaptʼañatakejj utjki ukatakejj walja qollqew munasi. Sapa maraw tamanak tumptʼirinakataki, precursor especialanakataki ukat misioneronakatakejj walja millón dolaranak irtasi. Maysa toqetsti, 1999 marat aksarojj 24.500 Tantachasiñ Utanakaw jichhak nayrar sartasipki uka markanakan lurasiwayi, ukampis 6.400 Tantachasiñ Utanakaw munasiskaki. Ukhamarusa, Yatiyañataki ukat ¡Despertad! sat revistanakajj sapa phajjsiw niya 100 millón qellqatanakajj imprimisiraki. Taqe ukanakajj yanaptʼañ munirinakan churatapampiw lurasi.

¹¹ ¿Kunsa Diosan Reinopar yanaptʼañatakejj amtañasa? Apóstol Pablow uka toqet mä aski yatichäw churawayistu (1 Corintios 16:1, 2 liytʼasiñapawa). Diosan amuytʼayatäsin Corinto markankir jilat kullakanakarojja, semana qallta urunwa qawqjjay qollq churirjamäpchi ukarjam iraqtʼapjjañapatak chʼamañchtʼäna, ukhamat seman tukuyan jan jiltʼanak thaqhaskañataki. Jichhürunakan ukhamarakiw sapa maynejj qawqsa churañäni uk utjatasarjam janïr churkasin amuytʼastanjja (Luc. 21:1-4; Hech. 4:32-35). Ukham chuymanïtas Jehová Diosajj wali askitwa uñji.

12, 13. ¿Kunanakas chʼamassa ukat kuntï lurañ yatktan ukanak Diosan Reinopar yanaptʼañat jarkʼistaspa, ukat kunjamsa Jehová Diosajj yanaptʼistaspa?

¹² Chʼamasa ukat kuntï lurañ yatktan ukanaka. Kunapachatï chʼamasampi ukat kuntï lurañ yatktan ukanakamp Diosan Reinopar yanaptʼktan ukhajja, Jehová Diosajj yanaptʼistuwa. Jan chʼaman uñjasipjjäta ukhajj chʼamañchtʼämawa sasaw Jupajj sistu (Isa. 40:29-31). Mayninakaw nayat sipansa jukʼamp wakichtʼatäpjje sasin amuystan ukhajja, ¿kuns lursna? Ak amtapjjapuniñäni, Jehová Diosaw kuntï lurañ yatktan uk sum phoqañatak yanaptʼistani, kunjamtï Bazaleel ukat Aholiab sat chachanakar yanaptʼkäna ukhama (Éxo. 31:1-6, aka yatichäwin 11 janan utjki uka foto uñjjattʼäta).

¹³ Kunanakatï utjkistu ukanakamp yanaptʼañasatakiw Jehová Diosajj chʼamañchtʼistu (Pro. 3:27). Templojj wasitat saytʼayaskäna ukhajja, Jerusalenankir judionakarojj akham sasaw Jehová Diosajj säna: “Amuytʼasipjjam sarnaqäwinakamata” sasa, mä arunjja, templo lurañan  yanaptʼasipkatapwa amuytʼasipjjañapäna (Hag. 1:2-5). Jupanakajj kunatï wakiskirïkäna ukanak lurañat sipansa, yaqha luräwinakampikiw apayasjjapjjäna. Ukatwa akham jisktʼasiñasa: “¿Jehová Diosan munañap lurañat nayatak nayranki? ¿Aka qhepa urunakan Diosan Reinopar yanaptʼañatakit chʼamachasisktjja?” sasa.

14, 15. 1) ¿Kunjamsa pisin jakasipki uka jilat kullakanakan sarnaqäwipajj yanaptʼistu? 2) ¿Kun lurañsa amtañasa?

¹⁴ Walja jilat kullakanakaw kawkhantï jan walinakasa ukat pisin jakasiñas utjki uka markanakan jakasipjje, ukat Jehová Diosan markapajj khitinakatï yanaptʼa munapki ukanakar ‘churañatakiw’ chʼamachasipjje (2 Cor. 8:14). Ukhamanakansa uñjasipkchejja, uka jilat kullakanakajj kunanakanïpkitï ukanakamp yanaptʼañ wali askit uñjapjje. ¡Kuntï churirjamäpki ukanakamp taqe chuym yanaptʼapjjatap uñjasajj Jehová Diosajj wal kusisi! (2 Cor. 9:7.)

¹⁵ África uksa toqenkirinakat mä markan wali pisin jakasipjje, ukat yaqhep jilat kullakanakajj yapunakapat mä cheqa chimptʼapjje jan ukajj marktʼapjje ukat achoqjje ukhajja, ukanak aljasaw Diosan Reinopat yatiyasiski ukar yanaptʼapjje. Uka pachpa markan mä machaq Tantachasiñ Utaw wal munasïna. Uka lurañan jilat kullakanakajj wal yanaptʼañ munapjjäna, ukampis satañ horasan lurasiñapatakiw ukajj waktʼayasïna. ¿Ukhamajj janit jilat kullakanakajj yanaptʼjjapjjpachäna? Janiw ukhamäkänti. Urojj Tantachasiñ Uta lurañwa yanaptʼapjjerïna, arumasti yapunakap satapjjerïna. ¡Ukapï cheqpach chʼamachasiñajja! Jupanakajj nayra patak maranakan Macedonia markan jakapkäna uka jilat kullakanakat amtayistu. Jupanakajj “jan kunanïpkch[ïna] ukasa” yanaptʼa munapkäna uka jilat kullakanakar yanaptʼayapjjakitaya sasaw ruwtʼasipjjäna (2 Cor. 8:1-4). Ukhamarakiw jiwasat sapa maynejj ‘taqe yänakampi jan ukajj cosasanakampi Jehová Diosajj bendiskistu’ ukanak churañasa (Deuteronomio 16:17 liytʼasiñapawa).

16. ¿Kunjamatsa Jehová Diosajj chʼamachasitas askit uñjaskatap yatsna?

¹⁶ Ukampis ak amtañasapuniwa. Israelitanakjamarakiw chuymatpach churktan uka sacrificionakasajj Jehová Diosar kusisiyañapa. Kunanakatï wali wakiskirïki ukanak jan maysar apanukuñatakejj amuyasiñasawa, mä arunjja, familiasar sum uñjañata ukat Diosar yupaychañ toqet amuyasiñasawa. Mayninakar qollqe toqeta jan ukajj yaqha ukham toqenakat yanaptʼañasa ukat jupanakatak tiempo apstʼañasa, janipuniw familiasar Diosar yupaychañ toqeta ukat jañchi toqet yanaptʼañjj aynachtʼayañapäkiti. Ukhamtï lursna ukhajja, kunatï jan utjkistu uks churksna ukhamäspawa (2 Corintios 8:12 liytʼasiñapawa). Yaqha toqetsti kunanak lurañatï Diosamp sum apasiñatak yanaptʼkistu uk janiw jaytañasäkiti (1 Cor. 9:26, 27). Ukampis Diosan aski yatichäwinakaparjam sarnaqañäni ukhajja, wali kusisita ukat chuymas chuymaw chʼamachasitasat jikjjatasiñäni, ukat Jehová Diosas wali askit ‘katoqasirakini’.

17, 18. Diosan Reinopatak chʼamachasipki uka jilat kullakanakarojja, ¿kunjamsa uñjtanjja, ukat kunsa taqenis amuyañasaraki?

¹⁷ Jilat kullakanakasat waljaniw Diosan Reinopar yanaptʼañatakejj taqe chuym chʼamachasisipki, mä arunjja, pachpa ‘jakañapsa sacrificiot’ loqtapkaspa ukhamawa (Fili. 2:17). Ukham lurapjjatapat ¡wali askitwa uñjtanjja! Ukat ¿Diosan Reinopatak kuna lurañanakatï utjki ukan sarayasipki uka jilatanakan warminakapata ukat wawanakapat kamsasirakispasa? Ukham chʼamachasipjjatapata ukat yanaptʼasirïpjjatapat wal yuspärtanjja.

¹⁸ Diosan Reinopatakejj walja lurañanakaw utji, ukhamajj Jehová Diosar mayisiñäni ukat kunjamanakatsa jukʼamp ukar yanaptʼsna ukanakats amuykiptʼarakiñäni. Ukham lurasajj walja bendicionanak jichhürunakan katoqañäni ukat jutir “pachanjja” jukʼampinak katoqañäni (Mar. 10:28-30).