1, 2. 1) ¿Kunatsa awisajj jan sum amuyasksna? 2) ¿Kunsa Diosan Reinopat yattanjja?

KUNANAKATÏ paski ukanak uñjirinakajj may maywa amtapjje, inas uk uñjirïsta. Niya ukhamarakiw mä qollayasirejj kuntï doctorajj siskaspa ukjjat jan sumpun amtkaspati. Jan ukajj inas maynejj kawkharus llavepsa jan ukajj lentepsa uchasi uk jan amtaskchispati, ukampis ukajj nayraqatapankaskaspawa. ¿Kunatsa ukanakajj pasi? Kunapachatï maynejj kun lurkasas yaqhanak lurki ukhaw pasi, ukaruw uñanaqkir juykhu sasin cientificonakajj sapjje. Cheqansa, mä horasan may maywa lursnajja, ukampis lajjwejj jan ukajj lejjwejj mä lurañarukiw sum yanaptʼistaspa.

² Kunanakatï akapachan pasaski ukanakatjja, walja jaqenakajj ukhamarakiw juykhüpkaspas ukham jan amuyasipkiti. Khä 1914 marat aksarojj akapachajj qʼalwa mayjtʼawayi sasin inas waljanejj amuyapjjchi, ukampis kunatsa ukanakajj pasaski uk janiw amuyapkiti. Jiwasajj Bibliat yatjjatasaw Diosan Reinopajj 1914 maran jutatap yattanjja, ukhaw Jesusajj alajjpachan Reyit uttʼayatäna. Ukampis “[‘Reinomajj jutpan’, NM]. Munañamasti luratäpan akapachanjja, kunjämatï alajjpachana luratäki ukhama” sasin mayktan ukajj jan phoqatpach phoqasitapsa yatiraktanwa (Mat. 6:10).  Cheqas kunjamatï alajjpachan Diosan munañapajj luraskejja, ukham aka Oraqen munañap phoqasiñapatakejj nayraqatajj aka ñanqha pachaw chhaqtañapa.

3. Bibliat yatjjatasajja, ¿kunsa yattanjja?

³ Bibliat sapür yatjjatatasatwa kunjamsa profecianakajj jichha tiempon phoqasiski uk sum amuytanjja. Ukampis ¡jaqenakajj janiw uk amuyapkiti! Jupanakajj luräwinakaparu ukat munañanakaparukiw chuym uchasipki, ukatwa kunanakatï 1914 marat Cristojj Reyjam apnaqjjatapa ukat akapachar tʼunjir niy jutañampïskatap uñachtʼayki uk jan amuyapkiti. Ukampis walja maranakas Diosar yupaychaskstajja, akham jisktʼasiñamaw wakisispa: “¿Kunanakatï akapachan pasaski ukanakjjat kunjamtï nayra maranakajj amuykayäta ukhamti amuyaskaktjja?”. Ukat jumatï jichhak Jehová Diosan Qhanañchiripäskstajja, ¿kunarus chuym churaskta? Kunjamjjay uka jisktʼarojj jayschïta, ukampis kunatsa Diosan uttʼayat Reyejj Awkipan munañap aka Oraqen phoqaniwa sasin sistan uk jichhajj kimsa toqet yatjjatañäni.

4, 5. 1) ¿Kunsa Jesusajj 1914 marat aksarojj luraski? (27 janankir foto uñjjattʼam) 2) Jesusar arktapki uka kimsa caballonakar latʼjjatatanakajja, ¿kun sañsa muni, ukat kunjamsa uka profeciajj phoqasiwayi?

⁴ Khä 1914 maran Jesucristojj alajjpachan Reyjamaw uttʼayasïna, jupajj mä janqʼo caballor latʼjjatatäkaspas ukhamanwa. Ukat jankʼakiw jupajj caballor latʼjjatatajj Supayan apnaqat ñanqhapachar tukjiri jutäna (Apocalipsis 6:1, 2 liytʼañataki). Kuntï Apocalipsis 6 jaljan parlki uka profeciarjamajja, Diosan Reinop uttʼayasitap qhepat oraqpachan jan waltʼäwinakaw jiljjattañapäna. Guerranaka, machʼanaka, usunaka ukat yaqha ukhamanakajj jaqer jiwayki ukanakaw utjañapäna. Taqe ukanakajja, Jesusan jakʼap kimsa caballonakar latʼjjatat sarapki ukanakamp sasiwa (Apo. 6:3-8).

⁵ Profeciarjamajja, guerranakajj “akapachan suman sarnaqasiña chhaqtaya[ni]” sasaw sasïna, ukat ukajj ukhamapuniw phoqasïna. Walja markanakaw sumankañ utjayañatak inamay chʼamachasiwayapjje. Yaqha chʼajjwawinakat sipansa, Nayrïr Jachʼa Chʼajjwäwiw aka Oraqen sumankañ chhaqtayawayi. Ukampis 1914 marat aksarojj qollqe toqeta ukat ciencia toqeta nayrar sartatapas uñjasiwaykchejja, manqʼat pistʼañanakajj oraqpachan jiljjattaskakiwa. Ukhamarus usunakasa, aka oraqen jan waltʼäwinakapasa ukat yaqha jiwayir usunakas ukhamarakiw millón millón jaqenak sapa marajj jiwarayaski. Ukanakajj jan waltʼayiriwa, sapa kutiw ukajj uñjasi ukat walja jaqenakaruw jiwarayi, janipuniw ukanakajj uñjasirïkänti. ¿Ukanakajj kunsa uñachtʼayistu uk amuytati?

6. ¿Khitinakas Biblian profecianakap phoqasiskatap amuyapjjäna, ukat kunsa lurapjjäna?

⁶ Walja jaqenakajj Nayrïr Jachʼa Chajjwäwi qalltasitapampi ukat gripe española sat usu uñstatapampiw mayjtʼatäsipkäna. Ukampis ajllit cristianonakajj 1914 maranwa markanakar “tiempojj churatäki” ukajj tukusini sasaw yatiyapjjäna (Luc. 21:24). Jupanakajj kunas pasani uk janiw sumpun amuyapkänti. Ukampis 1914 marat Diosan apnaqäwipan mayjtʼäwinak utjañap amuyapjjänwa. Ukat Biblian profecianakap phoqasiskir uñjasajj Diosan Reinopajj jichhaw apnaqañ qallti sasaw jan ajjsartʼas yatiyañ qalltapjjäna. Ukham yatiyapjjatapat wali arknaqataw uñjasipjjäna, ukat walja markanakan ukham arknaqañ utjatapajja, Biblian profecianakap phoqasiskatapwa uñachtʼayarakïna. Ukat ukhamarakiw Diosan Reinop contra saytʼirinakajj Jehová Diosan loqtirinakap contra leyinak apsupjjäna, uksti uka marat aksaruw lurasipkaki. Ukhamarusa, jañchi toqetwa jan waltʼayapjjäna, carcelanakaruw jistʼantayapjjäna ukatsti jaychkatañataki, fusilamp jiwayañataki jan ukajj pʼeq khuchhoqañatakiw apayapjjäna (Sal. 94:20; Apo. 12:15).

7. ¿Kunatsa walja jaqenakajj kunanakatï akapachan pasaski uk jan amuyapki?

 ⁷ Taqe ukanakajj alajjpachan Diosan Reinop uttʼayatäjjatap uñachtʼayi, ukampis ¿kunatsa walja jaqenakajj uka toqet jan amuyasipki? ¿Kunatsa jupanakajj kunanakatï akapachan pasaski ukanakajj Biblian profecianakaparjam phoqasiskatap jan amuyapki? Cheqas uka toqet walja maranakaw Diosan markapajj yatiyaski. ¿Kuntï nayranakapampi uñjapki ukanakarukit istʼañ munapjjpacha? (2 Cor. 5:7.) ¿Kunsa Diosajj luraski uk uñjañat sipansa, munañaparukit chuyma uchasipkpacha? (Mat. 24:37-39.) ¿Supayamp apnaqat akapachan amuyunakapampi ukat amtanakapampit apayasipjjpacha? (2 Cor. 4:4.) Kunsa Diosan Reinopajj luraski uk amuyañatakejj iyawsäwinïña ukat kunjamtï Diosajj amuyki ukham amuyañasarakiwa. Kunanakatï pasaski uk sum amuyasajja ¡wali kusisitaw jikjjatastanjja!

8-10. 1) ¿Kunjamsa 2 Timoteo 3:1-5 jiskʼa tʼaqanakajj phoqasiski? 2) ¿Kunas urut urutjam jan walir saraskatap uñachtʼayi?

⁸ Payïr toqetjja, jaqenakan jan wali luräwinakapajj urut urutjam jukʼamp jiljjattaskatapatwa Diosan Reinopaw aka Oraqjjar apnaqjjani sasin sissna. Niya patak maranakaw kuntï 2 Timoteo 3:1-5 jiskʼa tʼaqanakan siski uk phoqasir uñjasktanjja, ukat taqe aka oraqpachanwa ukajj uñjasiraki. Uk ¿amuytati? Kunas ukanakan phoqasiskatap uñachtʼayi uk jichhajj uñjañäni (2 Timoteo 3:1, 13 liytʼañataki).

⁹ Khä 1940 ukat 1950 maranakan trabajona, jichhak uñstir isinakamp isisiñata ukat kusistʼañanakat ukat anatañanakat jan walit uñjaskäna ukanakajj jichhürunakan kunjam uñjatäjjesa uk amuytʼam. Jan sinttʼasis usuchjasiñanakasa ukat wachoq jucha qʼañu luräwinakas sapüruw uñjasi. Yaqhepanakajj khitis jukʼamp qhorojja, munañanejja jan ukajj khitis mayninakat sipans jukʼamp jan sinttʼasirejja uk atip atipaw lurapjje. Ukat 1950 maranakan televisionan wakichäwinakapajj jan walit uñjatäkän ukajja, jichhürunakan familpachatak luratäjjewa. Ukat chacha pura jan ukajj warmipura sarnaqatanakapasa ukat isisitanakapasa, taqe jaqenakan walikïkaspas ukham uñjapjjañapatakiw chʼamañchtʼapjje, ukwa waljanejj amuyapjje. ¡Jehová Diosajj kunsa ukanakat amuyi uk yatisajj wal kusistanjja! (Judas 14, 15 liytʼañataki.)

 ¹⁰ Khä 1950 maranakan wayn tawaqonakan jan istʼasiña jan ukajj kutkatasiñajj jan walit uñtʼatäkäna ukajj jichhürunakan janiw ukhamäjjeti. Ukat uka maranakan wawanakar cigarro pitaña jan ukajj fumaña, machjayir umañanak umaña jan ukajj mayninakar munapayirjam thoqhoñanakajj awk taykanakarojj wal llakisiyirïna. Ukhamarus jichhürunakan akham yatiyäwinakajj sapüruw istʼasi: “Escuelankir 15 maran mä yateqeriw masinakapar fusilamp fusiltʼas paninir jiwayatayna ukat tunka kimsan usuchjatanak jaytawayi”. Ukat “machantat qʼajjo waynanakaw llätunka maran mä jiskʼa imillar jan sinttʼasis jiwayapjjatayna ukat awkiparusa ukhamarak mä familiaraparus lawanakampiw jawqjjapjjatayna” sasa. Aka qhepa tunka maranakanjja, Asia toqenkir mä markan kuna jan walinakatï utjki ukanakat chikatajj wayn tawaqonakan luratawa sasaw yatisi. Akapachan jukʼamp jan walir saraskatapat ¿janiw ukhamäkiti sasin mä amuytʼasir jaqejj saspati?

11. ¿Kunatsa walja jaqenakajj jan walinakan jiljjattaskatap jan amuyasipki?

¹¹ Apóstol Pedrojj akham sasaw qellqatayna: “Qhepa urunakanjja Tatitun yänakapat [jan ukajj cosasanakapat] phiskasiri jaqenakaw sartapjjani, jan wali amtatanakaparjamarakiw sarnaqapjjani, ukatsti jisktʼapjjarakiniwa: ‘¿Kawkirak Criston “Jutäw” satapasti? Awkinakasas jiwarawayjjewa, taqe kunas pachpakïskarakisä, aka oraqes utjkis ukkhatpacha’” (2 Ped. 3:3, 4). ¿Kunatsa jaqenakajj ukham chuymanïpjje? Jan walinak sapa kuti uñjasajj janis kunäkaspa ukham amuyañjamakëjjewa. Ukat kunjamtï jaqenakajj sarnaqapki ukanakajj jukʼat jukʼat mayjtʼki ukhajj inas jan amuyañjamäkchispati, ukat mä amigosar mä akatjamat mayjtʼir uñjasajj jankʼakiw amuysna. Ukampis sarnaqäw toqen jukʼat jukʼat aynachtʼaskatapajj jan waltʼayiriwa.

12, 13. 1) Akapachan kunanakatï paski ukanak uñjasajja, ¿kunatsa jan aynachtʼañasäki? 2) “Jan wali tiemponakaw jutani” sasin apóstol Pablojj siskäna ukanakar saykatañatakejja, ¿kuna toqet lupʼiñas yanaptʼistaspa?

¹² Apóstol Pablojj “qhepa urunakanjja jan wali tiemponakaw jutani” sasaw säna (2 Tim. 3:1). Ukampis akapachar imantasiñasajj janiw wakiskiti. Jehová Diosana, qollan ajayupana ukat cristian taman yanaptʼapampejj uka ajjsarañanakarojj atipsnawa. Diosat janiw jitheqtksnati. ‘Jachʼa chʼamajj Diosatwa juti, janiw jiwasatjja.’(2 Cor. 4:7-10.)

¹³ Apóstol Pablojj qhepa urunakat parlkasajj aka arunakampiw qallti “yatiñamarakiwa” sasa. Uka arumpejja, kuntï ukjjarojj siskäna ukajj phoqasiñapätapwa uñachtʼayi. Ukhamajj jan walinak Jehová Diosajj tukjkani ukhakamajj jukʼamp jan wali jaqenakajj jiljjattaskakiniwa. Akat amuytʼañäni: sarnaqäwit yatjjatirinakajj yaqhep markanakan janïr chhaqtkasajj sarnaqäw toqet aynachtʼañaw jukʼamp jiljjattiri sasaw sapjjerïna. Cheqas jaqenakan sarnaqäwinakapajj janipuniw jichjam jan walïkänti. Inas waljanejj kunatsa ukanakajj utji uk jan amuyapkchiti, ukampis 1914 marat aksarojj kuna jan walinakatï utjawayki ukajj Diosan Reinopajj niya akapach tukjañampïskatapwa uñachtʼayi.

14-16. ¿Kunatsa Diosan Reinopajj purininiwa sasin sistanjja?

¹⁴ Kimsïr toqetjja, kunanakatï Diosan markapan pasawayki ukanak uñjasaw akapachan tukusiñapajj jakʼankjjewa sasin sissna. Amuytʼañataki, alajjpachan Diosan Reinop janïr uttʼayaskipanjja, Diosat jan jitheqtas servir ajllit cristianonakajj taqe chuymaw Diosar loqtasipkäna, jupanakajj mä jiskʼa grupokipjjänwa. Kunanaktï 1914 maran phoqasiñap suyapkäna ukanak jan phoqasir uñjasajja, ¿kuns lurapjjäna? Jupanakat waljanejj Jehová Diosar yupaychasipkakïnwa, yantʼata ukat arknaqat  uñjaskasas aguantasipkakïnwa. Ukat uka ajllitanakat waljaniw jiwañkamajj Diosat jan jitheqtas aka Oraqen serviwayapjjäna.

¹⁵ Akapachan tukusiñapat profecía arskasajja, Jesusajj akham sänwa: “Taqe akanakasti pasaniwa janïr jichha pacha jaqenakajj jiwarkipana” (Mateo 24:33-35 liytʼañataki). “Jichha pacha jaqena[ka]” sasinjja, Jesusajj ajllit cristianonakat pä grupotwa parlaskäna. Nayrïr grupojja, kunanakatï 1914 maran pasawaykäna ukanakwa uñjawayapjjäna ukat uka maran Cristojj alajjpachan apnaqañ qalltatap amuyapjjarakïna. Jupanakajj janiw aleq ukhamak jakapkänti, jan ukasti uka marana jan ukajj uka marat nayraw qollan ajayumpi Diosan wawanakapjam ajllitäjjapjjäna (Rom. 8:14-17).

¹⁶ “Jichha pacha jaqena[kat]” payïr grupojja, alajjpachar sarañatak ajllitäpki uka nayrïr grupompejj uñtʼasiwayapjjewa. Uka payïr grupojj janiw nayrïr gruponkirinakamp chikajj mä tiempon jakawayapkiti, jan ukasti nayrïr gruponakat mä qawqhanejj aka Oraqen jakasipkäna ukhaw qollan ajayump ajllitapjjäna. Ukhamasti, jichha tiempon ajllitanakajj janiw taqenejj “jichha pacha jaqena[ka]” sasin Jesusajj parlkäna uka taypinkapkapuniti. Jichha tiempon jakapki uka payïr gruponkirinakajja, chuymanëjjapjjewa. Ukampis “janïr jichha pacha jaqenakajj jiwarkipana” sasin Jesusajj Mateo 24:34 qellqatan siskäna ukajja, jachʼa tʼaqhesiña uru qalltkipan jan taqeni jiwapjjañapwa amuytʼayistu. Ukajj Diosan Reinopan Apnaqeripajj aka ñanqhapach niya tukjañampïtapa ukat machaq jutïrpachajj niya qalltasiñampïskatap uñachtʼayistu (2 Ped. 3:13).

17. Biblian kimsa profecianakapat yatjjatawayktan ukanakatjja, ¿kunsa amuysna?

¹⁷ Biblian kimsa profecianakapat yatjjatawayktan ukanakatjja, ¿kunsa amuysna? Akapachan tukusiñapajj kuna urünisa jan ukajj kuna horas jutani uk janiw khitis yatipkaspati sasaw Jesusajj säna, cheqas janiw yatktänti (Mat. 24:36; 25:13). Ukampis kuntï Pablojj siskäna ukarjamajj “kuna urunakantejj” jakktan uk yattanwa (Romanos 13:11 liytʼañataki). Cheqas qhepa urunakanwa jaktanjja. Biblian profecianakapata ukat Jehová Diosasa ukat Jesucristos kunsa lurasipki ukanak wali amuyump yatjjatañäni ukhajja, akapachan tukusiñap jakʼachasisinkatapwa amuyañäni.

18. Khitinakatï Diosan Reinopampi jan apnaqayasiñ munapki ukanakampejja, ¿kunas pasani?

¹⁸ Khitinakatï janqʼo caballor latʼjjatat atipjiriru, mä arunjja, Jesucristor jan confiyapki ukanakajj niyaw pantjasipjjatap amuyasipjjani. Janiw kawkhar imantasiñanakapas utjkaniti. Kunapachatï ukajj purinkani ukhajja, “¿khitirak jichhasti saytʼasispa?” sasaw waljanejj arnaqasipjjani (Apo. 6:15-17). Cheqas Apocalipsis libron paqallqo jaljapanwa uka jisktʼar qhanañchi. Uka ajllit cristianonakasa ukat khitinakatï aka Oraqen jakañ suytʼäwinïpki ukanakajj janiw jiwapkaniti, mä arunjja, ‘saytʼatäsipkani’ ukanakajj Dios nayraqatan askit uñjatäpjjaniwa. Ukatsti “walja jaqenaka” sasin uñtʼatäpki ukanakaw jachʼa tʼaqhesïwi urut qhespipjjani (Apo. 7:9, 13-15).

19. Akapachan tukusiñap jakʼankjjatap amuyirinakjamajja, ¿kunsa wali kusisit suytanjja?

¹⁹ Biblian profecianakapat jichhürunakan kunanakatï phoqasiski ukanakat sum amuyañäni ukhajja, Supayan apnaqat akapachampejj janiw apayaskañäniti ukat kunanakatï akapachan pasaski ukanakats sumwa amuyañäni, mä arunjja, janiw uñanaqkir juykhükañäniti. Cristojj niyaw atipjäwip phoqachani ukat jan wali jaqenakarojj niyaw Armagedonan chhaqtayani (Apo. 19:11, 19-21). ¡Kunja kusisitak uka qhepat jakaskañäni! (Apo. 20:1-3, 6; 21:3, 4.)