1, 2. 1) Wayn tawaqonakatakejja, ¿kuna ewjjtʼanaksa Salomón reyejj Diosan amuytʼayatäsin qellqäna? 2) ¿Kunatsa 50 jila maranakanëjjapjje uka jilat kullakanakatakejj Salomonan ewjjtʼapajj wali askejja?

SALOMÓN reyejj Diosan amuytʼayatäsin akham sasaw wayn tawaqonakar säna: “Waynäkasina jumar irnoqer Diosamat amtasim, janïra chʼama tukuña urunakajj [...] purinkipana” sasa. ¿Kunanakäpachas uka “chʼama tukuña urunakajj[a]”? Ukham sasinjja Salomón reyejj chuymankipstañatwa parlaskäna, sañäni: kunapachatï amparanakas khatatjje, kayunakas jan sumäjje, laka chʼakhanakas janirak utj-jjeti, juykhöjje, janirak istʼjjeti, janqʼo ñikʼutanëjje ukat atis kʼumuptjjaraki ukatwa parlaskäna. Diosar yupaychañ qalltañatakejj janiw khitis ukar puriñkam suyañapäkiti (Eclesiastés 12:1-5 liytʼañataki).

² Walja cristiano jilat kullakanakaw 50 jila maranakanïpkchi ukhas wali chʼamanïsipki. Janqʼo ñikʼutanëjjapjjchi ukhas kuntï Salomonajj siskäna ukhampun inas jan jikjjatasipkchiti. “Jumar irnoqer Diosamat amtasim” sasin wayn tawaqonakar ewjjtʼaski ukatjj  jilïr jilat kullakanakajj ¿askinak apsupjjarakispati? Ukat ¿uka ewjjtʼajj kun sañs muni?

3. Taqe kun Luriri Diosat amtasiñajja, ¿kun sañsa muni?

³ Walja maranakas Jehová Diosar servjjstanjja, kunja munasiris Jehová Diosajj ukjjat lupʼiñajj awisajj wali askïspawa. Animalanakaru, alinakaru ukat jaqenakar lurtʼatapajj ¿janit wali muspharkañäki? Cheqas kunjamtï lurtʼawayki ukjja janiw sum amuytʼksnati. Jehová Diosajj kunaymananakwa churistu, ukanakajj kusisita jakasiñatakiw yanaptʼistu. Kunapachatï luratanakap uñjtan ukhajja, munasiñapsa, yatiñanïtapsa ukat chʼamaps wali askirjam uñjaskakiñatakiw yanaptʼistu (Sal. 143:5). Jehová Diosajj Taqe kun Luriri Diosätap amtasajja, kunsa jiwasanakat muni uka toqenakat lupʼiñasawa. Ukham lupʼisajja, taqe jakäwisan Juparu yupaychasin taqe chuyma yuspärañatakiw chʼamañchistu (Ecl. 12:13).

4. Experienciani jilat kullakanakajja, ¿kunsa jisktʼasipjjaspa, ukat kunatsa?

⁴ Jumatï walja maranak jakasin walja experiencianïstajja, akhamwa jisktʼasisma: “¿Kunsa chʼamanïkasajj jakäwijamp jichhajj luräjja?” sasa. Jilïr jilat kullakjamajja, kuntï mayni jilat kullakanakajj lurapkaspa ukwa lurasma. Sañäni: kuntï Jehová Diosat yateqawaykta ukwa wayn tawaqonakar yatichasma. Ukhamarus Diosar yupaychasajj kuna experiencianakamatï utjktam ukanakampiw mayni jilat kullakanakarojj chʼamañchtʼasma. Ukhamäñatakiw David reyejj Jehová Diosar mayïna. Akham sänwa: “Diosajjay, wayna kankañajjatpach yatichasista [...] Diosajjay, chʼama qarit pachan uñjaskasasa, janqʼo ñikʼutan pachankkasasa, janikiy jaytanuktʼasistati, jutir mita jaqenakar chʼamamat yatiyañajjaw waktʼaskitu” (Sal. 71:17, 18).

5. Jilïr jilat kullakanakajja, ¿kunjamsa experienciapampejj mayninakar yanaptʼapjjaspa?

⁵ Kuna experiencianaktï walja maranakajj jikjjatawaykta ukampejja, ¿kunjamsa yaqhanakar yanaptʼasma? ¿Janit wayn tawaqonakar utamar jawstʼkasma ukhamat jupanakamp kusisit jikjjatasiñataki? Jehová Diosar yupaychasin kusisiñ utjatap amuyapjjañapatakejja, ¿janit jupanakarojj jumamp chik yatiyir sarapjjañapatak invittʼkasma? Khä nayra pachan Eliú chachajj akham sänwa: “Aka jaqenakajj wali amuytʼanïpjjewa jilïrïpjjatap laykojja, walja maranaka jakapjjatapampisti wali yatiñanïpjjarakiwa” (Job 32:7). Apóstol Pablojj arsutanakamampi ukat sarnaqatanakamampi mayni kullakanakar chʼamañchtʼapjjam sasaw experienciani kullakanakar säna. Jupajj akham sänwa: “Jilïri warminakajj [...] mayninakatakisti mä sumar uñtatäpjjañapawa” (Tito 2:3).

6. ¿Kunatsa experienciani cristianonakajj wali sum yanaptʼapjjaspa?

⁶ Jumatï experienciani cristianöstajja, jukʼampiw yanaptʼasma. Kimsa tunka jan ukajj pusi tunka maranak nayrajj kunanaksa jan yatkayäta uk amuytʼam. Jichhajja, kunjamsa Biblian yatichäwinakapajj yanaptʼiristam uk sumwa yatjjtajja. Ukhamarusa kunjamsa cheqa yatichäwinakampejj jaqenakar yanaptʼasma uksa yatjjaraktawa. Jumatï irpir chuymanïstajja, kunjamsa jucharu puripki uka jilat kullakanakarojj yanaptʼasma uksa yatjjaraktawa (Gál. 6:1). Inas taman utjki uka luräwinak uñjaña, jachʼa tantachäwinakan kuna lurañanakatï utjki uk uñjañsa jan ukajj Tantachasiñ Utanak lurañanak uñjañsa yateqawaysta. Jan ukajj inas wila jan uchasin qollapjjañapatak doctoranakar chʼamañchtʼañ yatsta. Ukat jichhaki cheqa yatichäwinak yateqawaystajja, jakäwiman walja experiencianïtawa. Amuytʼañataki, jumatï wawanak uywawaystajja, suma experiencia jikjjatawayta. Kunjamtï uñjawayktanjja, jilïr cristianonakajj Jehová Diosan markapan yatichasina, amuytʼayasina ukat jilat kullakanakapar chʼamañchtʼasinwa wali sum yanaptʼapjjaspa (Job 12:12 liytʼañataki).

7. ¿Kunsa jilïr jilat kullakanakajj wayn tawaqonakar yatichapjjaspa?

 ⁷ ¿Kunjamsa experienciamampejj jukʼamp sum yaqhanakar yanaptʼasma? Inas wayn tawaqonakar Bibliat yatichañ qalltañapataki ukat sarayañapatak yanaptʼchisma. Jumatï kullakästajja, ¿wawani tawaqonakarojj wawanakar uñjasa Diosar yupaychañ toqet jan jaytañapatakejj kunanakas yanaptʼaspa uka toqet amuytʼayasmati? Jumatï jilatästajja, ¿wayna jilatanakarojj kusisit chuymampi arstʼäwinak arstʼapjjañapataki ukat sum yatiyapjjañapatakejj yanaptʼasmati? ¿Diosar yupaychañ toqet chuymankipstat jilat kullakanakar chʼamañchtʼañatak tumptʼir sarasajj kuns lurta uk sasmati? Janis nayrjam chʼamanëjjstajja, wayn tawaqonakarojj kunayman toqenakatwa yanaptʼasma. Bibliajj akham siwa: “[Wayn tawaqonakan jachʼañchäwipajj chʼamapankiwa, NM], chuyman awkinakanjja janqʼo ñikʼutanakapawa mä jachʼañchäwejja” (Pro. 20:29).

8. ¿Kunsa Pablojj jilïrëjjasin luräna?

⁸ Jilïrëjjäna ukhajja, Pablojj jan inaktʼasaw Diosarojj servïna. Roma markan katuntatäñat niya 61 maran qhespkäna ukhajja, misionerjam irnaqtʼkasajj kunayman jan walinakwa aguantjjatayna ukat inas uka markan jakasjjarakchïna (2 Cor. 11:23-27). Uka markan jakapkäna uka jilat kullakanakajj Pablon jupanakamp chik yatiyañapatak qheparañapwa munapjjpachäna. Ukampis yaqha cheqanakan yanaptʼañ wakisitapwa jupajj uñjäna. Timoteompi ukat Titomp chikaw wasitat misionerjam Éfeso, Creta ukat inas Macedonia markanakar viajchïna (1 Tim. 1:3; Tito 1:5). Ukat España markar saratap janis yatkstanjja, ukampis uka markar sarañwa munäna (Rom. 15:24, 28).

9. ¿Kunapachas Pedrojj kawkhantï jukʼamp yanaptʼkaspa uka cheqar sarpachäna? (22 janankir foto uñjjattʼam.)

⁹ Apóstol Pedrojj kawkhantï jukʼamp yanaptʼkaspäna uka cheqar saräna ukhajj inas 50 jila maranëjjchïna. ¿Kunatsa ukham sistanjja? Jupatï Jesusan mitapächïna jan ukajj jupat mä jukʼa jilïripächïna ukhajja, Jerusalén markan mayni apostolonakamp 49 maran tantachasir sarkäna ukhajja niya 50 maranïpachänwa (Hech. 15:7). Uka qhepatjja, Pedrojj Babilonia markaruw sarjjäna, ukhamat uka markan Diosan arunakap walja judionakar yatiyañataki (Gál. 2:9). Diosan amuytʼayatäsin nayrïr cartap 62 maran qellqkäna ukhajja, ukanwa jakjjäna (1 Ped. 5:13). Yaqha markan utjanoqañajj chʼamäspawa, ukampis Pedrojj jilïrëjjchïnsa maranakapajj janiw Diosar taqe chuyma kusisit yupaychañat jarkʼkänti.

10, 11. Kawkhantï yanaptʼa munaski uka cheqar jilïrëjjasin Diosar serviñatak sarki ukan mä experienciap qhanañchtʼam.

¹⁰ Jichhürunakanjja, 50 jila maranakan cristianonakaw utji, jupanakajj janiw kunjamäpkänti nayrajj ukhamäjjapjjeti ukat Jehová Diosarojj yaqha toqenakatwa yupaychapjjaspa. Yaqhepanakajja, kawkhantï jukʼamp yanaptʼapkaspa uka cheqanakaruw sarjjapjje. Amuytʼañataki, Robert jilatajj akham siwa: “Warmijasa ukat nayas 55 maranïpkayäta ukhajja, yaqha toqenakat yanaptʼañ utjatapwa amuyapjjayäta. Mä sapa wawanïpkayäta ukajj janiw nanakamp chikajj jakjjänti, janirakiw chuymankipstat awk taykanakajar uñjañas utjjänti ukat jupanakatwa mä herencia katoqapjjarakiyäta. Ukat utaj aljasin hipotecat kuttʼayirjamäpjjataja ukat uka qollqempi jubilasiñ qollqe katoqañkam yanaptʼasirjamäpjjatajwa amuyapjjayäta. Ukat Bolivia markan walja jaqenak cheqa yatichäwinak istʼañ munapjjatapa ukat ukan jakañas jan sinti chʼamätapwa istʼapjjayäta. Ukatwa uka markar sarjjapjjta. Ukan yatinoqtañajj chʼamakïnwa. ¡Estados Unidos markan jakasiñat sipansa akan wali mayjänwa! Ukampis Jehová Diosajj ukham chʼamachasipjjatajat jukʼamp bendiciwayapjjetu”.

¹¹ Jilatajj akham saskakiwa: “Jichhajj kuna lurañanakatï taman utjki uka lurañanakaruw chuym uchapjjta. Bibliat yatichapkayäta ukanakat yaqhepajj bautisasiwayapjjewa. Ukanakatjja  pisin jakasir mä familiawa, jupanakajj markat walja kilometronak jayanwa jakasipjje. Ukat niyakejjay tantachäwinakajj markan apaschejja, ukar sapa semana sarañatakejj wal chʼamachasipjje. Jupanakar nayrar sartatap uñjasasa ukat jilïr yoqapar precursorjam irnaqtʼir uñjañas wali kusiskañawa”.

12, 13. ¿Kunsa Brian jilatajj jubilasjjasajj warmipamp lurapjjäna?

¹² Yaqha aru parlir tamansa ukat gruponakansa jilïr jilat kullakanakan sarnaqäwinakapajj mayninakar wal yanaptʼaspa. Ukhamarusa ukan kusisitaw yatiyapjje. Brian jilatat amuytʼañäni, jupajj akham siwa: “Kunapachatï 65 maranïpjjayäta ukhajja, janis kunatakis askïpkirista ukhamwa amuyasipjjayäta, ukja maraniw Gran Bretaña markan jubilasipjje. Wawanakajajj janiw nanakamp chikäjjänti ukat yatiyapkayäta ukhans awisakiw Bibliat yateqañ munirinakarojj jikjjatapjjayäta. Qhepatjja, China markat jutir mä waynaruw uñtʼta, jupajj markan utjki uka jachʼa yateqañ utan yatjjatiritwa trabajïna. Jupajj tantachäwir invittʼatajj jutänwa ukat nayampiw Bibliat yatjjatañ qalltawayaraki. Mä qawqha semananak qhepatjja, China markat jutir jupamp chik trabajir masiparuw irpanïna. Pä semana qhepatsti yaqharuw irpanïna ukat ukharojj maynimp kun irpanïna”.

¹³ Ukat “ukjjar jutkäna ukajj nayar Bibliat yatichita siskitäna ukhajja, akham amuytʼayäta: ‘Nayajj 65 maranïksta ukasa Jehová Diosar yupaychañat janiw jubilaskiristi’ sasa. Ukatwa warmijarojj ‘¿chino aru yateqañ munasmati?’ sasin jisktʼta, jupajj nayat pä mara sullkawa. Uka aru caseter grabat yatichapki ukwa istʼapjjayäta. Ukhat jichhakamajj tunka maranakaw pasawayjje. Yaqha arut yatiyasajj waynarus kuttʼapkirista ukhamawa. Jichhakamajja, China markat jutirinakat 112 ukhaniruw Bibliat yatichawayapjjta. Jupanakat waljaniw tantachäwinakar jutapjje ukat maynejj nanakjamaw precursorjam irnaqtʼaski”.

14. ¿Kunatsa jilïr cristianonakajj kusisitäpjjaspa, ukat Pablon sarnaqäwipajj kunjamsa jupanakarojj chʼamañchtʼaspa?

¹⁴ Diosarojj 50 jila marani cristianonakajj  yaqha toqenakatsa yupaychirjamäpkchejja, yaqhepanakajj janiw ukham yupaychirjamäpkiti. Yaqhepajj janiw kʼumarapkiti, jan ukajj inas awk taykaparu uñjjapjjañapächi ukat wawanakapar uywapjjañapächi. Jumatï ukhaman uñjastajja, kuntï Jehová Diosatak lurkta uk Jupajj wali askitwa uñji ukatwa kusisitäñama. Ukhamajj kuntï jan lurirjamäkta ukjjat aynachtʼañat sipansa, kuntï lurirjamäkta ukamp kusisim. Pablon sarnaqäwipat amuytʼam. Jupajj walja maranakaw utapan katuntat uñjasïna, ukatwa misionerjamajj jan viaj-jjänti. Khitinakatï jupar tumptʼir sarapkäna ukanakarojj Diosat parlapunirïnwa ukat iyawsäw toqetsa chʼamañchtʼarakïnwa (Hech. 28:16, 30, 31).

15. ¿Kunatsa jilïr jilat kullakanakarojj wali askit uñjasi?

¹⁵ Jehová Diosajj jilïr jilat kullakanakan luratanakap wali askitwa uñjaraki. Salomonajj chʼama tukuña urunakan jakañajj chʼamakiwa sasins siskchïnjja, Jehová Diosajj jilïr jilat kullakanakan luratanakap wali askitwa uñji (Luc. 21:2-4). Ukat tamanakas uka yateqaskay jilat kullakan walja maranak Jehová Diosar yupaychapjjatap wali askitwa uñjapjje.

16. ¿Kuna bendicionanaksa Ana warmejj jan katoqawaykpachäna, ukat kunsa Diosar yupaychañatak lurpachäna?

¹⁶ Bibliajj chuymankipstat Ana sat sutin mä warmitwa parli, jupajj chuymanëjjchïnsa Jehová Diosarojj yupaychaskakïnwa. Kunapachatï Jesusajj naskän ukhajja, uka viuda warmejj 84 maranïnwa. Inas Jesusan arkiripar tukuñataki, qollan ajayump ajllitäñataki ukat Diosan Reinopat yatiyir sarañatakis jan jakawaykchïnti. Ukampis kuntï lurirjamäkän ukampejj wali kusisitänwa. Jupajj “templotjja janiw misturïkänti, jan ukasti arumay uruwa Tatitur servïna” (Luc. 2:36, 37). Sapa alwa ukat sapa aruma sacerdotejj incienso templon loqtkäna ukhajja, anqäjjanwa Anajj walja jaqenak taypin Diosarojj chuymapan mayisirïna, inas 30 minutonak mayisirïchïna. Jiskʼa Jesusar uñjasajja, “parlañ qall[tarakïna] taqe khitinakatï Jerusalén markan qhespiyasiñapa suytʼasipkän ukanakaru” (Luc. 2:38).

17. ¿Kunjamsa usutäpki jan ukajj jilïr jilat kullakanakäpki ukanakar jiwas chika Diosar yupaychapjjañapatak yanaptʼsna?

¹⁷ Jichhürunakanjja, kawkïr jilat kullakanakatï jilïripki jan ukajj usutäpki ukanakar yanaptʼañatakejj jankʼakïñasawa. Jupanakat yaqhepajja, tantachäwinakaru ukat jachʼa tantachäwinakar sarañatakejj kuns lurapjjaspawa, ukampis mä qawqha tantachäwinakarukiw sarirjamäpjje. Yaqhep tamanakanjja, kuntï tantachäwinakan arstʼaski uk teléfono toqe istʼayañatakiw munasiñat waktʼayapjje. Ukat yaqhep cheqanakan janiw ukajj lurañjamäkiti. Ukhamäkchi janisa, uka jilat kullakanakajj cheqa yupaychäwir yanaptʼapjjaspawa. Jumanakan Diosat mayipjjatamajj cristian taman nayrar sartañapatakiw yanaptʼi (Salmo 92:13, 14 liytʼañataki).

18, 19. 1) Jilïr jilat kullakanakajj inas jan amuyasipkchiti ukampisa, ¿kunjamanakatsa mayninakar chʼamañchtʼapjje? 2) ¿Khitinakas “jumar irnoqer Diosamat amtasim, janïra chʼama tukuña urunakajj [...] purinkipana” siski uka arunakar istʼapjjaspa?

¹⁸ Jilïr jilat kullakanaka, qawqsa mayni jilat kullakanakar yanaptʼasipkta uk inas jan amuyasipkstati. Ukampis Ana warmit amtapjjam. Jupajj sapa maraw jan qheparas templor saräna. Sarnaqäwipasa ukat qawqsa Jehová Diosar munasïna ukajj Biblian qellqatäsïna jichhürunakkam jiwasar chʼamañchtʼañap janiw yatkpachänti. Ukhamarakiwa, jumanakajj qawqsa Jehová Diosar munasiwayapjjta uk jilat kullakanakajj amtapjjani. ¡Ukatwa Diosan Arupajj akham sispacha: “Janqʼo ñikʼutanëjjañajja mä suma coronjamawa, cheqa thakin sarnaqatata jikjjatatajja”! (Pro. 16:31.)

¹⁹ Kuntï Jehová Diosar yupaychkasajj lurktan ukajj horasanikiwa. Ukampis khitinakatï chʼamanïskstan ukanakajj aka arunakar istʼapjjañasawa: “Jumar irnoqer Diosamat amtasim, janïra chʼama tukuña urunakajj [...] purinkipana” (Ecl. 12:1).