1, 2. 1) ¿Khitin casarasiñapas alajjpachan wali kusisiñ utjayani? 2) ¿Kuna jisktʼanakatsa yatjjataskañäni?

CASARASIÑATAK wakichtʼasiñatakejja, tiempojj munasipuniwa. Ukampis jichhajja wali wakiskir mä casarasïwitwa parltʼaskañäni, ukajj mä Reyin Yoqapan casarasïwipawa. Uka toqet amuytʼam. Uka casarasïwi apasiñapatakejj niya 2000 maranakaw wakichasiwayi. Ukampis jichhajj casarasiñ urojj wali jakʼankjjewa niyaw noviojj noviapampi casarasjjani. Niyarakiw kʼuchirtʼayir musicanakas Reyin palaciopan phoqaranttani, ukat alajjpachankirinakajj wali jachʼatwa akham sas qʼochupjjani: “¡Aleluya! Taqe munañani Dios Tatitusawa jichhajj aka mundor apnaqaña qallti. Kusisipjjañäni, kʼuchirtʼasipjjarakiñäni, jachʼachapjjarakiñäni Diosaru. Corderon casarasiñapasti purinjjewa. Esposapasti wakichtʼatarakiwa” sasa (Apo. 19:6, 7).

² ‘Corderona’, mä arunjja, Jesucriston casarasïwipatjja alajjpachan wali kusisiñaw utjani (Juan 1:29). Casarasiñatakejj ¿kunjam isthaptʼatasa? ¿Khitis noviajja? ¿Kunjamsa casarasiñatakejj noviajj wakichtʼasiski? ¿Kunapachas casarasini? Uka casarasïwi utjatapat alajjpachan walja kusisiñaw utjani, ¿aka Oraqen wiñay jakañ suytʼäwinïpki  ukanakajja jupanakamp chikajj kusisipjjarakpachäniti? Ukanak yatiñ wal muntanjja, ukhamajj Salmo 45 qellqatat yatjjataskakiñäni.

3, 4. 1) ¿Kamsasis Novion casarasiñ isipatjja, ukat kunas jukʼamp kusisiyi? 2) ¿Khitinakapjjesa ‘reyinakan phuchanakapajja’, ukat Noviomp chika kusisipki uka ‘reinasa’?

³ (Salmo 45:8, 9 liytʼañataki.) Noviojja, mä arunjja, Jesucristojj suma isinakwa casarasiñatakejj uchasi. Kunjamatejj wakiskejja isipajj ‘suma thujsir jan ukajj qʼapkir qoqanakamp’ uchatawa, ukanakajj mirra ukat casia ukanakawa. Ajlliñatak apnaqapkäna uka aceiterojj israelitanakajj ukanak uchapjjarakirïnwa (Éxo. 30:23-25).

⁴ Alajjpachan musicanakajj Palacior phoqantki ukajj casarasiñ uru jakʼachasisinkatap noviorojj amuyayi ukaw jukʼamp kusisiyi. Jupamp chikaw “reinajj”, mä arunjja, Diosan alajjpachankir markapajj kusisiraki. Ukanak taypinsti ‘reyinakan phuchanakapa’, mä arunjja, angelanakaw ukankapjje. ¡Kunja kusiskañas alajjpachankirinakar akham arunak istʼañajja: “Kusisipjjañäni, kʼuchirtʼasipjjarakiñäni [...] corderon casarasiñapasti purinjjewa”!

5. ¿Khitis “Corderon esposapa[jja]”?

⁵ (Salmo 45:10, 11 liytʼañataki.) Noviojj khitïtaynas uk yatjjtanwa, ukampis ¿khitis noviajja? Janiw mä cheqpach jaqëkiti, jan ukasti 144.000 alajjpachar sarir ajllit cristianonakawa, jupanakaruw Jesucristojj Pʼeqtʼaski (Efesios 5:23, 24 liytʼañataki). Jupanakasti Cristojj Diosan Apnaqäwipan apnaqkani uka taypinkapjjarakiniwa (Luc. 12:32). Qollan ajayumpi ajllit uka 144.000 cristianonakajj “Corderorurakiw arkapjje kawkirutejj jupajj sarki ukaru” (Apo. 14:1-4). “Corderon esposapa[r]” tukusajja, jupanakajj alajjpachanwa Corderomp chika jakjjapjjani (Apo. 21:9; Juan 14:2, 3).

6. ¿Kunatsa ajllit cristianonakarojj ‘reyin phuchapa’ sasejja, ukat kunatsa “markamat armasjjam” sasin mayisejja?

⁶ Esposapäkani ukarojja, janiw “phuchajjay” sasakejj uñtʼaskiti, jan ukasti ‘reyin phuchapa’ sasiwa (Sal. 45:13). ¿Khitis uka ‘reyejja’? Jehová Diosawa, Jupaw ajllit cristianonakarojj ‘wawanakaparjam’ uñtʼasi (Rom. 8:15-17). Niyakejjay jupanakajj alajjpachankir esposapar tukupjjchinejja, ajllitanakarojj “markamat armasjjam, wila masinakamat armasjjarakim” sasaw mayisi. Jupanakajj ‘alajjpach yänakat lupʼipjjañapawa, janiw akapach yänakatjja’ (Col. 3:1-4).

7. 1) ¿Kunjamsa Cristojj esposapäkani ukar wakichaski? 2) ¿Kunjamsa noviajj Noviopar uñji?

⁷ Walja maranakaw Cristojj esposapäkani ukarojj alajjpachan casarasiñatak wakichaski. Apóstol Pablojj akham sasaw qhanañchi: “[Cristojj tamaruw] munasi, ukhamarak jakañapsa jupa layku aptʼasiwayi ukhama, akjja [tamaru] Diosatak yaqhachasawa luri, umampi ukhamarak arupampi qʼomachasina, jupan nayraqatapar jachʼañchat [tama] irpkatañataki, jan qʼañuchata, jan kuna phullchʼuni, jan kunamp kamachtʼata, jan ukasti suma qʼoma Diosatak yaqhachata” (Efe. 5:25-27). Ukat Corinto markankir ajllit cristianonakarojj akham sasaw Pablojj säna: “Jumanakatjja nayajj wal llakista, Diosat jutir munasiñampirakiw celapjjsma, jumanakarusti Cristompirakiw parlthapiyapjjsmajja. Ukatsti nayajj jumanakarojj Cristoruw uñstayañ munapjjsma, mä qʼoma jan chach uñtʼir tawaqor uñtata mä sapa chachampi casarasiñataki” sasa (2 Cor. 11:2). Jesucristojj Reyjama ukat Noviojamajja, esposapäkani ukarojj ‘suma uñnaqtʼap’ wali askitwa uñji. Ukat noviajja, chachapäkani ukarojj ‘uywiriparjamaw’ uñji ukat ‘jaysarakiwa’.

8. ¿Kunatsa noviarojj “wali kʼachachata[wa]” sasin sistanjja?

⁸ (Salmo 45:13, 14 liytʼañataki.) Noviarojja, “wali kʼachachataw” Reyin Yoqapamp  casarasiñapatak irpasi. Apocalipsis 21:2 qellqatanjja, noviajj mä markäkaspas ukham amuytʼayi, mä arunjja, Machaq Jerusalenawa ukat “suma isthaptʼataraki[wa] casarasir waynar katoqañatakjama”. Alajjpachankir uka markajja, “Diosan qhanapampiwa qha[ni]” ukat “mä suma qalan qhanapjama, jaspe qalar uñtata, cristalar uñtataraki[w]” qhani (Apo. 21:10, 11). Machaq Jerusalenan qhanatapjja wali sumwa Apocalipsis qellqatajj qhanañchi (Apo. 21:18-21). ¡Ukatwa salmo qellqerejj noviajj “wali kʼachachata[wa]” sasin sispachänjja! Cheqas Reyin Yoqapajj alajjpachanwa casarasini.

9. ¿‘Reyir’ churaski uka noviajj khitisa, ukat noviajj kunjam isthaptʼatasa?

⁹ Khitimpitï noviajj casaraskani ukajj apnaqer Cristowa. Jupajj “umampi ukhamarak arupampi qʼomacha[saw]” wakichaskatayna. Noviajj “jan kunamp kamachtʼata” “qʼoma” ukhamawa (Efe. 5:26, 27). Ukat noviapajj casarasiñ urutakjamarakiw wali suma isthaptʼasiñaparaki. ¡Cheqas ukhamawa! “Isipas qorimp kʼachachatawa” ukat ‘Reyin ukarojj muspharkay isthapit irpatäniwa’. Corderomp casarasiñapatakejj noviaruwa “suma lino lliphipkir qʼoma isinakampi isthapisim satajja. Uka suma lino isisti Diosar ajjsartasa sarnaqapki ukanakan cheqa jakatanakaparuw uñtasi” (Apo. 19:8).

10. ¿Corderon casarasiñapajj kunapachatak amtatasa?

¹⁰ (Apocalipsis 19:7 liytʼañataki.) ¿Corderon casarasiñapajj kunapachatak amtatasa? Casarasiñatak ‘esposapajj wakichtʼatäkchisa’, kuntï ukjjarojj siski ukajj janiw kunjamänis casarasïwejj ukak qhanañchkiti. Jan ukasti, jachʼa tʼaqhesiña uru tukuyarojj kunanakatï paskani ukwa wali sum qhanañchistu (Apo. 19:11-21). Uka arunakajja, ¿atipjäwip janïr phoqachkasinwa Reyejj casarasini sañti munpacha? Janiwa. Apocalipsis qellqatan utjki uka visionanakajja, janiw kunas nayraqat pasi ukat ukjjarojj kunanakas pasaraki ukarjam uñstkiti. Salmo 45 qellqatarjamajj Reyin yoqapajja, mä arunjja, Jesucristojj espadap wakʼantaski ukat enemigonakapar ‘atipjañatak sarantaski’ uka qhepatwa casarasi (Sal. 45:3, 4).

11. ¿Kunanak lurasas Cristojj atipjäwip phoqachani?

¹¹ Ukhamajja, akarjamaw phoqasini: nayraqatajj “qʼañu lurañanakan” sarnaqer warmiru, mä arunjja, Oraqpachankir kʼari religionanak apnaqer Jachʼa Babiloniaruw juchañchasini (Apo. 17:1, 5, 16, 17; 19:1, 2). Ukatjja, Cristojj Supayan apnaqata aka ñanqhapacharuw Diosan arsutaparjam juchañchas Armagedonan tʼunjani, ‘Taqe chʼaman Diosan jachʼa chʼajjwäwi urupana’ (Apo. 16:14-16; 19:19-21). Ukjjarusti, Nuwasir Reyejj Supayaru ukat sajjranakapar mikʼayar jaqontasaw atipjäwip phoqachani, ukanjj jiwatäkaspas ukhamaw jan kuns lurapkaniti (Apo. 20:1-3).

12, 13. 1) ¿Kunapachas Corderojj casarasini? 2) ¿Khitinakas Corderon casarasitapat alajjpachan kusisipjjani?

¹² Diosar jan jitheqtas aka Oraqen yupaychiri ajllit cristianonakajj Cristojj Diosan Apnaqäwipan apnaqaski ukapachan jiwapki ukanakajja, alajjpachan jakañatak jaktayatawa. Jachʼa Babiloniajj tʼunjatäkani uka qhepatjja, Jesusajj noviapjam uñtʼatäpki ukanakat aka Oraqen jiltʼapki ukanakaruw tantachthapini (1 Tes. 4:16, 17). Ukhamajja, Armagedón chʼajjwäwi janïr qalltkipanwa taqe khitinakatï alajjpachar sarañatak ajllitäpki ukanakajj alajjpachankjjapjjani. Uka chʼajjwäwi qhepatwa Corderojj casarasini. ¡Kunja kusiskañakïkani uka casarasïwi urojja! Apocalipsis 19:9 qellqatajj akham siwa: “Kusisiñanïpjjewa khitinakatejj Corderon casarasïwi fiestaparu jawsayatäpki ukanakajja”. Noviapjam uñtʼatäpki uka 144.000 ajllitanakajj wal kusisipjjani. Ukat Jesucristo Reyejj Noviojamajja, jupamp chik apnaqanipkani ukanak phoqachatäjjepan wal kusisini ukat ‘reinopan manqʼapkaspasa, umapkaspas’ ukhamäniwa (Luc. 22:18, 28-30). Ukampis janiw noviokisa ni noviakisa kusisipkaniti.

 ¹³ Kunjamtï yatjjataniwayktanjja, alajjpachankirinakajj mä wawakiw akham sas qʼochupjjani: “Kusisipjjañäni, kʼuchirtʼasipjjarakiñäni, jachʼachapjjarakiñäni [Jehová] Diosaru. Corderon casarasiñapasti purinjjewa. Esposapasti wakichtʼatarakiwa” (Apo. 19:6, 7). ¿Jehová Diosan aka Oraqenkir servirinakapat kamsasirakispasa? ¿Jupanakajj uka kʼuchirtʼäwi taypinkapjjarakiniti?

14. Salmo 45 qellqatarjamajja, ¿khitinakas noviamp chik sarapki uka ‘virgen tawaqonakajja’?

¹⁴ (Salmo 45:12, 14, 15 liytʼañataki.) Zacarías profetajj qhepa urunakat parlkasajja, akapachankir jaqenakajj Diosan Israelapankirinakat aka Oraqenkasipki ukanakampiw chikachasipjjani sasaw profecía arsüna. Jupajj akham sänwa: “Khä urunjja, tunka jan uñtʼatanakaw yaqha markankirinakata mä judío jaqerojj isipat katuntasipjjani, sapjjarakiniwa: ‘¡Jumanakamp saraña munapjjta, nanakasti istʼapjjtwa Diosajj jumanakampïtapa!’” sasa (Zac. 8:23). Salmo 45:12 qellqatanjja, ‘tunka jan uñtʼatanakajj’ ‘Tiro markankir phuchapäkaspasa’ ukat ‘markankir qamirinakäpkaspas’, (NM) ukham qhanañchi. Jupanakajj ajllit cristianonakat aka Oraqenkasipki ukanakatakiw regalonak apanipjje, ukhamat jupanakamp sum uñjatäñataki ukat ajay toqet yanaptʼayasiñataki. Khä 1935 marat millón millón jaqenakaw “cheqa thakinjam irpa[yasipjje]” (Dan. 12:3). Jupanakajj ajllit cristianonakat jan jitheqtasaw jakäwinakap qʼomachawayapjje, ukhamatwa Diosar yupaychañ toqet jan qʼañuchasipkiti. Novian “qhepap nayrap sarir [virgen] tawaqona[kajja]”, Jehová Diosaruw jakäwinakap katuyasiwayapjje ukat Noviompi apnaqatäñ munapjjatapwa uñachtʼayapjje.

15. ¿Kunjamsa aka Oraqenkasipki uka ajllit cristianonakamp chikajj ‘virgen tawaqonakajj’ irnaqapjje?

 ¹⁵ Ajllit cristianonakat aka Oraqenkasipki ukanakajja, “Diosan reinopat suma yatiyäwi” aka oraqpachan taqe chuyma yatiyapjjatapatjja, uka ‘virgen tawaqonakarojj’ wal yuspärapjje (Mat. 24:14). Janiw ‘qollan ajayumpi ukat Corderon noviapampikejj “jutam”’ sapkiti, jan ukasti khitinakatï istʼapki ukanakas “jutam” sapjjarakiwa (Apo. 22:17). Cheqas “yaqha ovejanakajja” ajllitäpki uka noviaruw “jutam” sasin siri istʼapjje, ukat jupanakamp chikarakiw mä wawaki aka Oraqenkir jaqenakarojj “jutam” sasin sapjje (Juan 10:16).

16. ¿Kuna aski churäwsa Jehová Diosajj yaqha uwijanakar churi?

¹⁶ Aka Oraqenkasipki uka ajllit cristianonakajj jupanakar yanaptʼapki ukanakar wal munasipjje. Ukat Novion Awkipajja, mä arunjja, Jehová Diosajj yaqha uwijanakar Corderon alajjpachan casarasitapat jupanakamp chik kusisipjjañapwa munaraki uk yatisaw wal kusisipjje. Uka ‘virgen tawaqonakajj’ “wali kusistʼasisaw sarantap[jjani], reyin utaparuw mantapjjaraki[ni]”, mä arunjja, Diosan temploparu sasaw arsusïna. Cheqas yaqha uwijanakajj aka Oraqen wiñay jakañ suytʼäwinïpki ukanakajja, kunapachatï Corderon jaqechasïwipajj alajjpachan apaskani ukhajj jachʼa familiapampiw kusisipjjarakini. Ukatwa Apocalipsis qellqatajj ‘walja jaqenakajj’ “trono nayräjjan ukhamarak Cordero nayräjjapan saytʼatäsip[kaspas]” ukham qhanañchi. Jupanakajj Diosan templop patiopanwa, mä arunjja, aka Oraqenwa Jehová Diosar yupaychapjje (Apo. 7:9, 15).

17, 18. ¿Kunjamsa Corderon casarasïwipajj walja askinak apanini, ukat Waranqa maranak Apnaqäwipanjja khitinakatakis Cristojj mä awkjamani?

¹⁷ (Salmo 45:16 liytʼasiñapawa.) Criston alajjpachankiri noviapan yanapirinakapajja, mä arunjja, ‘virgen tawaqonakajja’, kunapachatï uka casarasïwejj Paraison walja askinak apanitap uñjapjjani ukhajj jukʼampiw kusisipjjani. Noviojja, aka Oraqeruw apnaqanini ukat ‘nayra awkinakaparuw’ jaktayani, jupanakasti aka Oraqenkir ‘wawanakaparuw’ tukupjjani (Juan 5:25-29; Heb. 11:35). Jupanakatjja, ‘oraqpachanwa jilïrinak uttʼayarakini’. Ukat Diosat jan jitheqtir irpir chuymaninakajj jichha tiempon utjki ukanakat mä qawqhaniruw Cristojj Paraison sarayapjjañapatak uttʼayarakini (Isa. 32:1).

¹⁸ Waranqa maranak Apnaqäwipanjja, Cristojj mayninakan awkiparuw tukurakini. Cheqas taqe khitinakatï aka Oraqen wiñay jakañ katoqapkani jupanakaw wawanakapjam uñtʼatäpjjani, kunattejj jupanakajj Jesusan loqtasïwiparuw iyawsapjje (Juan 3:16). Ukhamajja, jupajj ‘Wiñay Awkiruw’ tukuni (Isa. 9:6, 7).

19, 20. Kunanaktï Salmo 45 qellqatan qhanañchki ukajja, ¿kunjamsa cristianonakar yanaptʼi?

¹⁹ (Salmo 45:1, 17 liytʼañataki.) Salmo 45 qellqatan kunanakattï parlki ukajj taqe cristianonakatakiw wali askejja. Aka Oraqenkasipki uka ajllitanakajj Noviompi ukat mayni ajllitanakampi alajjpachan jankʼaki mayachtʼasiñwa suyasipki. Yaqha uwijanakajj atipjir Reyin apnaqäwipampi apnaqatäñwa munapjje ukat aka Oraqenkasipki uka ajllitanakar yanaptʼasajj wal yuspärapjje. Casarasitap qhepatjja, Cristosa ukat Apnaqäwipan jupamp chikäpki ukanakas jan jaktʼkay walja bendicionanakwa aka Oraqen jakirinakar churapjjani (Apo. 7:17; 21:1-4).

²⁰ Apnaqer Cristojj kawkïr “mojjsa arunak[tï]” jutïrin phoqkani uk suykasajja, ¿janit ‘sutip aytañataki chʼamachasiñ’ amtktanjja? Ukhamajj ¡‘wiñayan wiñayapatak Reyirojj jachʼañchapjjañäni’!