1. ¿Kunsa Diosar uñtasit lurtʼatätasat lursna?

“KHÄ wawajj awkipjamapuniwa jan ukajj taykapjamapuniwa.” Ukham arunakajj sapa kutiw istʼasi. Ukhamapunïskiwa walja wawanakaw awk taykapar uñtasitäpjje. Kunjamäpkanitï ukanakat mä qawqhanak awkipata ukat taykapatwa katoqapjje. Cheqas alajjpachankir Jehová Dios Awkisaw jakäwi churirisajja (Sal. 36:9). Wawanakapjamajja, jiwasajj Jupar uñtasitarakïtanwa. Niyakejjay Jupar uñtasit luratästanjja, amuytʼasiri, suma amtar puriri ukhamarak amigonïñataki ukat jupanakamp sum apasiñatak lurtʼatätanwa (Gén. 1:26).

2. ¿Kun utjatapatsa Jehová Diosajj cheqpach Amigosäspa?

² Jehová Diosajj cheqpach Amigosäspawa. Diosajj jiwasar munasistu ukat jiwasajj Juparu ukat Yoqapar iyawstan ukatwa ukham sum apastanjja. Jesusajj akham sänwa: “Akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki” (Juan 3:16). Jehová Diosampejj waljaniw sum apasipjjäna. Ukanakat paninit yatjjatañäni.

3, 4. ¿Kunansa Abrahamana ukat wawanakapan Jehová Diosamp sum apasiñan jan kikpäpkäna?

³ Israelitanakan nayra awkipat Jehová Diosajj akham sänwa:  ‘Abraham munat amigojja’ (Isa. 41:8). ¿Kunjamatsa Diosat jan jitheqtir uka chachajj Luriripampejj wali sum apaspachäna? Cheqas Abrahamaw Diosar iyawsäna (Gén. 15:6; Santiago 2:21-23 liytʼañataki).

⁴ Abraham chachan wawanakapajj nayra Israel markjam uñtʼatäpjjänwa, jupanakajj Jehová Diosarojj Awkiparjama ukat Amigoparjamaw qalltan uñjapjjäna. Ukampis Jehová Diosamp sum apasiñjja aptʼasipjjänwa, ¿kunatsa? Kunattejj kuntï Diosajj arskäna ukarojj janiw confiyjjapjjänti.

5, 6. 1) ¿Kunjamatsa Jehová Diosajj Amigomar tukuwayi? 2) ¿Kunanaksa jisktʼasiñasäspa?

⁵ Jehová Diosat jukʼamp yatjjatäta ukhajja, iyawsäwimajj jukʼampiw jiljjattani ukat jukʼampiw Juparojj munasirakïta. Kunapachatï Diosajj cheqpachapuni utjaskatapa ukat Jupampis sum apasirakisma uk amuykayäta uk amtam. Ukat Adán chachan jan istʼasitap layku taqeni jucharar nacitaswa yateqarakiyätajja. Ukhamarus taqenis Diosat jayarstʼatätaswa amuyarakiyätajja (Col. 1:21). Ukjjarusti, alajjpachankir wali munasir Awkisajj jan jayankatapa ukat jiwasat llakisitapwa amuyjjarakiyäta. Ukat Diosajj Jesusar jiwasanak layku loqtasiñapatak khitanitap yateqkayäta ukat ukar iyawsayäta ukhajja, Jehová Diosamp sum apasiñwa qalltayätajja.

⁶ Ukanakat amtasajja, akham jisktʼasiñasäspawa: “¿Jehová Diosamp sum apasiñajajj jukʼampit jiljjattaski? Ukat ¿wali munat Jehová Dios Amigojaru confiyatajasa ukat munasitajas urut urutjamat jiljjattaski?” sasa. Khä nayra pachan jakir Gedeón chachajj ukhamarakiw Jehová Diosampejj wali sum apasïna. Jichhajj jupat yateqasiñatak jupar jukʼamp uñtʼañäni.

7-9. 1) ¿Kunsa Gedeonajj uñjäna, ukat ukampejj kuns jikjjatäna? (21 janankir foto uñjjattʼam.) 2) ¿Kunjamatsa Jehová Diosan amigopäsna?

⁷ Gedeón juezajj jan wali tiemponwa Jehová Diosar servïna, israelitanakajj Suma Oraqer mantapkäna uka qhepata. Ofrá markanwa Jehová Diosan angelapajj Gedeonar visittʼir saräna sasaw Jueces 6 jaljan qhanañchi. Uka tiempon uka jakʼankir madianitanakajj israelitanakatakejj jan walir puriyirjamapunïnwa. Ukatwa Gedeón chachajj taqenin uñjkata trigo jan jawqʼskänti, jan ukasti jamas cheqanwa uk luräna, ukhamat trigop jankʼak imantañataki. Ukat kunapachatï mä angelajj jupar uñstkäna ukat “chʼamani, jan ajjsarir jaqe” sasin siskäna ukhajj wal muspharäna. Ukatwa akham jisktʼäna, ‘kunjamtï Jehová Diosajj israelitanakarojj Egipto markat qhespiykäna ¿ukhamti jichhajj qhespiyarakitani?’ sasa. Angelajj Jehová Diosan sutipjjar parlasajja, Jehová Diosajj yanapaskätamwa sasaw Gedeonar säna.

⁸ Kunjamaraki ‘madianitanakan tʼaqhesiyatäñat’ israelitanakar qhespiyiriststi sasaw Gedeonajj jisktʼasïna. Jehová Diosajj akham sasaw jupar säna: “Nayawa jumampiskäjja jumasti atipjätawa madianitanakarojja” (Jue. 6:11-16). Kunjamarak ukajj lurasispa sasin Gedeonajj jisktʼasiskakïnwa, ukatwa mä uñachtʼäwi mayïna. Kunjamtï uñjktanjja, Gedeonajj Jehová Diosajj cheqapuni utjaskatapwa amuyäna.

⁹ Kunatï ukjjar paskäna ukajja, Gedeonan iyawsäwiparuw chʼamañchtʼäna ukat Jehová Diosaruw jukʼamp jakʼachasiyäna. Gedeonajj manqʼwa wakichäna ukat angelaruw churarakïna. Ukat kunapachatï angelajj thujrupampi uka manqʼar ayjjatkäna ukhajj uka manqʼajj mä milagro toqew ninamp nakhantäna, ukhaw Gedeonajj uka angelajj Jehová Diosan khitanitätap amuyäna. Gedeonajj wali sustjataw akham säna: “¡Dios Tata! ¡Nayasti Diosan angelaparojj ajanuy ajanuw uñkatjja!” sasa (Jue. 6:17-22). Ukajj ¿Gedeonar Diosamp sum apasitapti mayjtʼaypachäna? ¡Janiw ukhamäkanti! Gedeonajj Jehová Diosaruw sum uñtʼäna ukat ukhamatwa Jupampejj suman jikjjatasïna. ¿Kunatsa ukham sistanjja? Kunattejj kawkhantï altar lurkän uka cheqarojj akham sasaw sutichäna: “Jehová-salom”, uka sutejj Hebreo arunjja “Jehová Diosajj sumankañawa” sañ muni (Jue. 6:23, 24 NM). Kunsa Jehová Diosajj jiwasatak  sapüru luri uk lupʼktan ukhajja, Diosajj cheqpach Amigosätapwa amuytanjja. Jupar sapa kuti mayisiñäni ukhajja, sumankañwa jikjjattan ukat Jupampis sumarakwa apastanjja.

10. Salmo 15:3, 5 qellqatanakarjamajja, ¿kunsa Jehová Diosajj amigopäñatakejj mayistu?

¹⁰ Jehová Diosajj jiwasan Amigosäñapatakejj mayitanak phoqañasawa. Kunanakas Jehová Diosan ‘qollan utapan jakañatakejja’, mä arunjja, Diosan amigopäñatakejj munasi ukwa Davitajj Salmo 15 qellqatan qʼochüna (Sal. 15:1). Kuna mayitanak phoqañas wakisi uk pä toqet uñjañäni: janiw kʼarintirïñasäkiti ukat taqe kunsa cheqaparjamaw lurañasa. Uka toqet parlkasajj Davitajj ‘khititï Jehová Diosan qollan utapan jakaski’ ukjjat akham sänwa: “Khititejj jaqe masipar jan kʼarintki [...] jan juchanir aynachtʼayañatak qollq jan katoqaski uka” sasa (Sal. 15:3, 5).

11. ¿Kunatsa mayninakar jan kʼarintañasäki?

¹¹ Yaqha Salmo qellqatan akham sasaw Davitajj ewjjtʼäna: “Ñanqha arsuñat lajjram jarkʼaqam” (Sal. 34:13). Janitï uka ewjjtʼar istʼksna ukat mayninakar kʼarintasksna ukhajja, alajjpachankir Awkisampejj janiw sum apasksnati. Cheqas kʼarintasirïñajj Jehová Diosan enemigopana, mä arunjja, Supayan uñstayatawa. “Diablo” siski ukajj griego arun “kʼarintasiri” sañwa muni. Ukhamajj mayninakjjat jan parlasiñajj Jehová Diosamp sum apasiñatakiw yanaptʼistu. Cheqas taman sarayañatak Jehová Diosajj uttʼayawayki uka jilatanakjjat janiw jan walinak parlañasäkiti (Hebreos 13:17; 1 Tesalonicenses 5:12 liytʼañataki).

12, 13. 1) ¿Kunatsa taqe kuns cheqaparjam lurañasa? 2) ¿Kunjamsa cheqaparjam sarnaqatasajj mayninakar yanaptʼaspa?

¹² Jehová Diosan Qhanañchirinakaparojj taqe kunsa cheqaparjam lurirïtwa uñtʼasi. Apóstol Pablojj akham sasaw qellqäna: “Orapjjamay nanakataki. Yatisipjjaraktwa nanakan chuymanakajajj walikïskatapa taqe kunans sum sarnaqañ munapjjatanakajj layku” (Heb. 13:18). Niyakejjay ‘taqe kunans sum sarnaqañ munstanjja’, jilat kullakasäskchejjay sasak janiw ukham uñjañasäkiti. Amuytʼañataki, mä jilatatï jan ukajj kullakatï jiwasatak trabajchi ukhajja, jupar cheqaparjam uñjañataki ukat kunjamsa jupampejj amtawaytan ukarjamaw trabajitapat qollq churañasa. Cristianonakjamajja, trabajirinakasampisa ukat mayninakampisa cheqaparjamaw kuns lurtanjja. Jichhajj jiwasatï mä jilatataki jan ukajj kullakatak trabajirapstan ukhajja, janiw jupanakamp mayninakat sipans sum uñjatäñ mayiñasäkiti.

¹³ Kunjamsa Jehová Diosan Qhanañchirinakapat jaqenakajj wali sum parlapjje uk niya sapa kutiw istʼtanjja. Amuytʼañataki, kuntï Jehová Diosan Qhanañchirinakapajj arsupki uk phoqapjjapunitapwa utanak luriri mä jachʼa empresa pʼeqtʼirejj amuyäna. Jupajj akham sänwa: “Jumanakajj kuntï arsupkta uk phoqapjjapuntawa” sasa (Sal. 15:4). Ukham sarnaqatasaw Jehová Diosamp sum apasiñatak yanaptʼistu. Ukat alajjpachankir Awkisarus jachʼarurakiw apti.

14, 15. ¿Kunjamsa yatiykasajj mayninakar Diosan amigopäpjjañapatak yanaptʼsna?

¹⁴ Diosan arunakapat yatiyktan ukhajja, Diosajj utjaskapuniwa sasajj waljaniw sapjje, ukampis janiw Amigoparjam uñjapkiti. ¿Kunjamsa jupanakar yanaptʼsna? Jesusajj 70 arkirinakapar yatiyir sarapjjañapatak panin panin khitkäna ukhajj kuna ewjjtʼanaksa churäna uk amuytʼañäni: “Mä utar mantapkäta ukkhasti, nayraqat aruntapjjam: ‘Sumankañajj utjpan aka utana’ sasa. Ukantejj sumankañani jaqejj utjchi ukajja, jupanakatakïniw uka aruntajja; jan ukhamäkchi ukajja jan jupanakatakïkjjpanti” (Luc. 10:5, 6). Jiwasatï taqenimpis sum apasiñäni ukhajja, jaqenakajj cheqa yatichäw yateqañwa munapjjaspa. Ukat  khitinakatï jan istʼañ munapkistu ukanakarojj munasiñ uñachtʼayasaw jan colerasiñapataki ukat mayan kuttʼkañäni ukhajj sum katoqañapatak yanaptʼsna.

¹⁵ Khitinakatï kʼari religionar yatinoqtatäpki jan ukajj kuntï Bibliajj yatichki ukarjama jan sarnaqapki ukanakarojj munasiñampi ukat sumankañampiw uñjaraktanjja. Ukat akapachan jan sum jikjjatasipki ukat Diosat jukʼamp yatjjatañ munasajj tantachäwinakasar jutapki ukanakarus munasiñampiw katoqaraktanjja. “Bibliat yatjjatasaw nayra jakäwinakapjja jaytawayapjje” sat yatichäwinakajj revistan uñstki ukanwa ukham suma sarnaqäwinak jikjjattanjja.

16. ¿Kunjamanakatsa Jehová Diosan amigopata ukat ‘yanapirinakapat’ uñtʼatäsna?

¹⁶ Khitinakatï chik trabajipki ukanakajj jilapartejj wali sum apasipjje. Taqe khitinakatï Diosar katuyatäktan ukanakajja, Jehová Diosan amigonakapata ukat ‘yanapirinakapat’ uñtʼatätanwa (1 Corintios 3:9 liytʼañataki). * Cheqas jaqenakar suma yatiyäwinak yatiyasa ukat Jesusan arkirinakap tukuyasajja, alajjpachankir Awkisajj kunjamäkitï uk sumwa amuytanjja. Ukat kunjamsa qollan ajayupajj suma yatiyäwinak yatiyañasatak yanaptʼistu uksa uñjaraktanwa.

17. ¿Kunjamsa jachʼa tantachäwinakan yatichaski ukajj Jehová Diosajj Amigosätap uñachtʼayi?

¹⁷ Yatiyir jukʼamp sarasajja, Jehová Diosar jukʼamp jakʼachasitaswa amuyastanjja. Amuytʼañataki, kunjamsa Jehová Diosajj Jupa contra saytʼapki ukanakan amtap mayjtʼayi ukwa amuytanjja. Aka qhepa urunakat amuytʼam. ¿Kunjamsa Jehová Diosajj yanaptʼaskistu uk qhanti amuyasktan? Jehová Diosajj Bibliat apstʼat qellqatanak sapa kuti churatap uñjasajj wal kusistanjja. Wali munasir alajjpachankir Awkisajj jan walinakan uñjasitasa ukat kunanakatï jiwasatak wakiski uk amuyatapwa jachʼa tantachäwinak wakichasajj uñachtʼayistu. Kimsa uru jachʼa tantachäwi apasitap qhepatjja, akham sasaw mä familiajj yuspärañatak mä carta qellqäna: “Uka jachʼa tantachäwin wakichäwipajj chuymarupuniw purtʼapjjetu. Kunjamsa Jehová Diosajj taqeniru ukat sapa mayniru munasistu, ukat taqenis sum jikjjatassna uk munatapwa amuyapjjarakta” sasa. Irlanda markan asamblea especial satäkis ukaruw Alemania markat mä chacha warmejj sarapjjäna, ukan wali suma katoqtʼapjjatapata ukat sum uñjapjjatapatjja wal yuspärapjje. Jupanakajj akham sapjjewa: “Jehová Diosaru ukat Jesucristoruw jukʼamp yuspärapjjta. Jupanakaw mä wawaki apasir markapar irpasinipjjetu. Janiw mä wawaki sum apasiñatak parlktanti, jan ukasti sapüruw ukarjam sarnaqtanjja. Dublín cheqan apaskän uka jachʼa tantachäwin kunjamsa jikjjatasipjjayäta  ukajja, jumanakamp chik mä wawaki Diosar serviñajj kunja askisa ukwa amtayapjjetu”.

18. Jehová Diosamp parltʼasitasajj kunjamäskisa uka toqetjja, ¿kunsa jisktʼassna?

¹⁸ Suma parltʼasiñajj utjki ukhaw suma apasiñajj utji. Jichhürunakanjja waljaniw Internetar mantapjje ukat mensajenaks qellqtʼasipjje. Ukampis ¿kunjamäskisa Amigosampi, mä arunjja, Jehová Diosampi parltʼasitasajja? Cheqas Jupajj ‘mayisitanakasar istʼirïtapwaʼ yattanjja (Sal. 65:2). ¿Qawqha kutis Jehová Diosamp parltʼastanjja?

19. Kunatï chuymasan utjkistu uk Jehová Diosar sañajj chʼamächi ukhajja, ¿kuns lursna?

¹⁹ Jehová Diosan yaqhep servirinakapatakejj kunjamtï chuymanakapan jikjjatasipki uk sañajj chʼamakiwa. Ukampis oración mayiskasajj uk lurañaswa Jehová Diosajj muni (Sal. 119:145; Lam. 3:41). Ukampis kunjamsa chuymasan jikjjatastan uk sañatakejj janis arunak jikjjatkstanjja, janiw jan yanapirinïktanti. Pablojj Roma markankir cristianonakarojj akham sasaw qellqäna: “Ukhamarakiw qollan ajayojj janchi kankañasan yanapistu. Jiwasanakajj janiw wakiski ukhamarjam Diosat mayisiñ yatipktanti, ukampis pachpa ajayuw jiwasanakat Diosar achiktʼi, jan arskay ayqoñanakampi. Chuymanakas uñantir Diosasti, kuntejj ajayojj sañ munki uk yati, ajayojj Diosan munañaparjamaw qollan markapatak mayi” (Rom. 8:26, 27). Kuna arunakatï Job, Salmo ukat Proverbios qellqatanakan utjki ukanakat lupʼiñajja, kunatï chuymasana utjkistu uk Jehová Diosar sañatakiw yanaptʼistani.

20, 21. Pablon arunakapajj Filipenses 4:6, 7 qellqatan jikjjataski ukajja, ¿kunjamsa chuymachtʼistu?

²⁰ Jan walinakan uñjasiñäni ukhajja, Jehová Diosan amuytʼayatäsin kuna ewjjtʼanaktï Pablojj Filipo markankir cristianonakar ewjjtʼkäna uk amtañäni: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim”. Ukhamtï Jehová Diosar mayisiñänejja chuymachtʼata ukat chʼamañchtʼataw jikjjatasiñäni. Pablojj saskakiwa: “Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpjjatam layku” sasa (Fili. 4:6, 7). Ukhamajj Diosan ‘samarañap’ wali askit uñjapjjañäni ukaw chuymassa ukat amuyussa imi.

²¹ Oracionaw Diosamp sum apasiñatak yanaptʼistu. Ukhamajj ‘jan inaktʼas orapjjapuniñäni’ (1 Tes. 5:17). Aka yatichäwejj Jehová Diosamp sum apasiñataki ukat mayitanakaparjam sarnaqañatak chʼamañchtʼistpan. Ukhamarus kuna bendicionanaksa Jehová Diosajj cheqpach Awkisjama, Diosasjama ukat Amigosjama churkistu ukanakat lupʼiñatak tiempo apstʼasipjjapuniñäni.