Jan walinakajj amuyunakaswa jan waltʼayaspa, jan chʼaman tukuyistaspa ukat janirakiw jakäwis sum uñjjsnati. David reyejj ukhamanwa uñjasïna, jupajj kunayman jan waltʼäwinakanwa jikjjatasïna. ¿Kunjamsa ukanakar saykatäna? Uka jisktʼarojja, David pachpaw mä salmo qellqatapan akham qhanañchi: “Tatiturojj wali jachʼat artʼasta, jachʼat khuyapayasiñ mayista. Jupan nayraqatapan llakinakajj arsusta, nayraqatapan llakejjat yatiyasta, ukchañkamasti samanajj tukstituwa. Tatay, jumaw sarnaqäwejj yattajja”. Cheqas David chachajj altʼat chuymampiw Diosar yanap mayisïna (Sal. 142:1-3).

Yaqha salmo qellqatapan akham sänwa: “Tatitut mä mayisiñajjakiw utji, ukakirak thaqä: jakañ urunakajjan utapan utjasiña; utapan jupar yupaychañataki, qhapaq kankañap [uñjañataki ukat templop wali askita, NM] uñjasin kusisiñataki” (Sal. 27:4). Davitajj janiw levitäkänti, ukampis tabernaculon patiop kunjamsa uñchʼukiski uk amuytʼam, ukajj Diosar yupaychañatak utanwa. Ukhamäkchïnsa yuspäratap uñachtʼayañatakejj jukʼamp urunakwa uka cheqan qheparañ munäna ukat Jehová Diosan “qhapaq kankañap uñja[ñ]” munarakïna.

“Qhapaq kankañap” siski uka arojja, Diosan jachʼañchatäñapa sañ munarakispa, uk lupʼiñajj wali askiwa. Jehová Diosajj kuntï Jupar yupaychapjjañapatak uttʼaykäna ukjjat Davitajj yuspärapunirïnwa.

Jichhürunakanjja, Jehová Diosarojj janiw cheqpach templo toqejj jakʼachasktanti, jan ukasti Jehová Diosan jachʼa templop toqew servirinakapajj jakʼachastanjja, ukwa Diosajj Jupar yupaychañasatakejj uttʼayawayi. * Jehová Diosan uka jachʼa templop ‘wali askirjam uñjañäni’ ukhajja, Davitjamarakiw Jehová Diosan “qhapaq kankañap uñjasin kusisi[ñäni]”.

Sacrificionak nakhantayañataki altarajja, jan ukajj cobremp lipʼsuyat altarajj kun sañs muni uk amuytʼañäni, ukajj tabernaculor mantañäkis uka cheqankänwa (Éxo. 38:1, 2; 40:6). Jesusajj sacrificiot loqtaskäna uk Diosajj katoqañatak jankʼakïtapwa uka altarajj uñachtʼayäna (Heb. 10:5-10). ¿Ukajj jiwasatak kun sañs muni? Apóstol Pablojj akham sänwa: “Diosan uñisiripäkasinsa Dios kipkaw sumankthapiyistu jupan Wawapan jiwatap toqe” (Rom. 5:10). Jiwasatï Jesucriston loqtasïwipar iyawsatas uñachtʼayañäni ukhajja, Jehová Diosampejj askit uñjatäsnawa ukat Jupampis sumarak apassna. Ukaw cheqpach suma amigopar tukuyistani (Sal. 25:14).

Niyakejjay juchanakasat perdonatästanjja, “Diosajj [...] kusiskañ urunak chur[istu]” (Hech. 3:19). Kunjamantï jikjjatasktan ukajja, khititï jiwañapatak juchañchatäki ukat janïr jiwayatäkasin jan wali luratanakapat arrepentisisin jan wali luräwinakap aparpayki ukamp sasiwa. Ukhamätap uñjasinjja, wali sinttʼasiri mä juezaw jan wali luräwinakap perdoni ukat janiw jiwayatäkaniti sasin arsuraki. ¡Juchañchatäkäna ukajj wali kusisita ukat sumaw jikjjatasi! Jehová Diosajj uka juezjamarakiwa, kunattejj arrepentisirinakat khuyaptʼayasiwa ukat jiwayañ amtkäna uksa mayjtʼayiwa.

Jehová Diosan utapanjja, kunanakas cheqa yupaychäwin lurasirïna ukanakat walj Davitajj uñjpachäna. Ukanakatjja, israelitanakar tantachthapiña, Diosan Leyip taqen istʼkat liytʼaña ukat qhanañchtʼasitapa,  encienso naktʼayasitapa ukat sacerdotenakasa ukat levitanakas Diosar yupaychapjjatapawa (Éxo. 30:34-38; Núm. 3:5-8; Deu. 31:9-12). Jichhürunakan ukhamanakarakwa uñjtanjja.

“¡Kunj munkayasa jilanak pur mä wawak suman jakasiñajja!” siski uka arunakajja, nayra tiempon wali wakiskirïnwa jichhürunakans ukhamarakiwa (Sal. 133:1). Jilat kullakanakasajj oraqpachanwa jiljjattawayi (1 Ped. 2:17). Ukhamarusa tantachäwinakanwa Diosan Arupajj liytʼasi ukat qhanañchtʼasi. Maysa toqetjja, Jehová Diosajj markap toqew Biblian suma yatichäwinakap yatichistu. Ukat familiana Diosar yupaychañatakisa ukat Bibliat sapak yatjjatañatakisa, Bibliat apstʼat walja qellqatanakaw utjistu. Oraqpachan Jilïr Irpirinakat mä jilatajj akham sänwa: “Jehová Diosan Arupat lupʼiñasa, kunsa ukajj sañ muni uk amuytʼañasa ukat yatiñkankaña thaqañasa chuymas chuyma jikjjatasiñataki ukat Diosar yupaychañ toqet sum jikjjatasiñatakiw yanaptʼitu”. Cheqas ¡yatiñkankañajj jakäwisatak wali askïspawa! (Pro. 2:10.)

Jichhürunakanjja, nayra tiemponjamarakiw Diosan servirinakapajj Jehová Diosat sapür mayisipjje. Diosatakejj ukham mayisitanakasajj mä suma thujstʼir inciencior uñtatawa (Sal. 141:2). ¡Altʼat chuymampi mayisitanakas Jehová Diosan istʼatap yatiñajj wal chʼamañchtʼistu!

Moisesajj akham sasaw mayisïna: “Tatitun munasiñapajj jiwasanakampïpan. Tatay, luräwinakajjarojj jukʼampiy jiljjatayam” sasa (Sal. 90:17). Yatiyir sarktan uk Jehová Diosajj bendiciwa, kunattejj taqe chuymaw yatiytanjja (Pro. 10:22). Inas maynir cheqa yatichäwi uñtʼañapatak yanaptʼawaystan, jan ukajj jaqen jan istʼañ munatpachasa, usutpachasa, chuymasan jan walin uñjasisasa, jan ukajj arknaqat uñjaskasas inas walja maranak yatiyawaystan (1 Tes. 2:2). Ukampis Jehová Diosan ‘qhapaq kankañapwa’ uñjawaytanjja ukat alajjpachankir Awkisajj chʼamachasitas uñjas kusisitapwa uñjawayaraktanjja.

Davitajj akham qʼochüna: “Tatay, jumaw nayan taqe kunajjätajja; jumaw askinakamamp phoqhantista; jakañajjajj amparamar katuyatawa. Mä suma cheqawjaw nayarojj waktʼitu” (Sal. 16:5, 6). Jupajj ‘taqe kuna’ katoqatapata, mä arunjja, Jehová Diosar servisa ukat Jupamp askit uñjatäsajj wal yuspäräna. Inas David chachjam jan walinakan uñjassna. Ukampis jupjamarakiw Diosar yupaychañ toqet bendicionanak katoqawaytanjja. Ukhamasti, cheqa yupaychäwiru ukat Jehová Diosan alajjpachapankir templopar wali askit uñjaskakiñäni.