PISINKIR mä viuda warmiw mä sapa wawapar qhomantaski. Kuntï uñjki ukajj janiw cheqaw sañjamäkiti. Kunattejj niya ukawrsakiw jiwat wawapar ichjjaruskäna. Ukampis jichhajj jiwatäkäna uka wawaparuw jaktayat uñkati ukat lartʼasir uñjasajj wal kusisi. Ukat qorpachasiripajj akham siwa: “Uñtam wawamajj jakaskiwa” sasa.

Ukajj khä niya 3.000 maranakan pasäna. Uksti 1 Reyes 17 jaljanwa liytʼasma. Qorpachasirejj Eliasawa, jupajj Diosan profetapawa. Ukat taykasti Sarepta markan jakasir mä viuda warmiwa, sutipajj janiw yatiskiti. Ukat wawapar jaktayaskäna ukaw iyawsäwipar jukʼamp chʼamañchtʼäna. Kunsa uka warmit yateqsna uk jichhajj uñjañäni.

Israel marka apnaqeri Acab qhoru reyin tiempopanjja, manqʼat pistʼañaw walja maranak utjani sasaw Jehová Diosajj arsüna. Manqʼat pistʼañat Eliasajj yatiykäna uka qhepatjja, Diosajj Acab reyitwa imantäna, ukat mä milagro toqew tʼantʼa ukat aycha manqʼayäna, uk cuervonak toqew churäna. Ukat Jehová Diosajj Elías profetarojj akham sänwa: “Sartasim, ukatsti Sarepta markaru saram, ukasti Sidón cheqankiwa, ukatjja ukanraki jakañataki qhepararakim. Nayajj sistwa ukan jakiri mä ijma warmiru, manqʼa jumar churañapataki” (1 Rey. 17:1-9).

Elías profetajj Sarepta markar purkäna ukhajja, mä viuda warmir phäñanak apthapiskir uñjäna. ¿Uka warmit profetar manqʼa churaspäna? ¿Kunjamarak pisin jakkasin manqʼa churaspänsti? Ukampis pächaskchïnsa, Eliasajj uka warmimp akham sasaw parlañ qalltäna: ‘Ruwtʼasmawa’ “mä jukʼa umamay wajjtʼita umtʼañataki”. Ukat uma aptir sarkipanjja, Eliasajj akham saskakïnwa: “Mä jiskʼa tʼantʼampiy wajjtʼita” sasa (1 Rey. 17:10, 11). Jupatakejj uka jan uñtʼat jaqer uma churañajj janiw chʼamäkänti, ukampis tʼantʼa churañaw chʼamäjjäna.

 Viuda warmejj akham sänwa: “Nayajj juramentompiw arsta Tatit Diosam layku janiw qhathit tʼantʼajj utjkituti. Ukhamarus mä jachʼi jakʼukiw tinajana utjitu, ukhamarak chatojjan mä jukʼa aceitekiraki, jichhasti nayajj mä jukʼa lawanakwa apthapisiskäyäta phayir sarañataki nayan wawajjataki, ukhamarak nayataki. Ukwa manqʼtʼasiwayapjjäjja, ukatjja jiwjjapjjäwa manqʼatjama” sasa (1 Rey. 17:12). ¿Kunsa ukat yateqsna? Uk uñjañäni.

Eliasajj Diosar ajjsartʼir israelitätapwa viuda warmejj amuyäna. Uk aka arunakapanwa amuysna: “Nayajj juramentompiw arsta Tatit Diosam layku” sasa. Inas Israel markan Diosapat mä jukʼa yatchïna, ukampis ‘Diosaja’ sasajj janiw Jehová Diosar sirïkänti. Kunattejj Sarepta markanwa jakäna, uka markajj Fenicia markampi apnaqatänwa, Fenicia markasti Sidón cheqan jikjjatasi. Ukampis Sarepta markankirinakajj inas Baal diosar yupaychapjjchïna. Ukhamäkchïna ukasa Jehová Diosajj uka viudan chuymapan kunas utjäna ukwa uñjäna.

Uka warmejj idolonakar yupaychir taypinsa jakchïnjja, Diosar iyawsäwinïnwa. Jehová Diosajj Eliasaruw uka warmir yanaptʼañataki, ukat jupan askipatak khitäna. Uka sarnaqäwit mä wakiskir yatichäw yateqsna.

Sarepta markan Baal diosar yupaychirinakat janiw taqenejj jan wali jaqenakäpkänti. Viuda warmin utaparu Eliasar khitasajja, Diosajj Jupar janïra servipki, ukampis suma chuymanïpjje ukanakar askit uñjatap uñachtʼayäna. Cheqas Jupajj “kuna cast jaqerus katoqakiwa, khitinakatejj jupar ajjsarki, ukhamarak aski lurapki taqe ukanakarusa” (Hech. 10:35).

Yatiyktan uka cheqanakan ¿qawqhanis Sarepta markankir viudjamäpjje? Kʼari religionanakar saririnak taypinsa jakapkchejja, inas jukʼamp yanaptʼatäñ munasipkchi. Ukat inas mä jukʼa jan ukajj ni akchʼsa Jehová Diosat yatipkchiti, ukatwa cheqpach yupaychäwi uñtʼañatak yanaptʼa munapjje. ¿Ukham jaqenakar thaqasktanti ukat yanaptʼasktanti?

Kuntï Elías profetajj viuda warmir maykäna uka toqet sum amuytʼañäni. Ukat jupataki ukat wawapatak manqʼa waktʼayasajja, manqʼtʼasiwayapjjä, ukatjja jiwjjapjjäwa manqʼatjama sasaw viuda warmejj säna. Ukat Eliasajj akham sänwa: “Jan ajjsaramti, saram kuntï sisktajj uka wakichtʼiri. Ukampis nayraqatjja nayataki mä jiskʼa torta lurtʼanirapita uka jakʼumata, ukatsti apanirapita, ukatjja jumataki, wawamataki ukjjarojj lurtʼasinirakim. Israelan Tatit Diosapasti akham siwa: ‘Janiw tukuskaniti tinajana jakʼumajj utjki ukajja, ni chatuman aceites utjki ukasa, kunürutejj Tatitojj aka oraqeru jallu puriykani ukürkama’” (1 Rey. 17:11-14).

‘¿Kunjamarak tukusiñampïski uka manqʼa churästi?’ sasaw yaqhepajj sapjjaspa. Ukampis viudajj janiw ukham siskänti. Janis Diosar sum uñtʼkchïnjja, jupajj Eliasan arunakapat janiw pächaskänti ukat kuntï maykäna ukwa luräna. ¡Qawqha iyawsäwinis ukwa uñachtʼayäna! Cheqansa suma amtaruw purïna.

Diosajj uka pisinkir viuda warmirojj janiw jaytjkänti. Kunjamtï Eliasajj arskäna ukhamwa phoqasïna, Jehová Diosaw jukʼa manqʼanakap waljaptayäna, ukhamat Elías profetatakisa, jupatakisa ukat wawapatakis pisinkañ tiempo tukuykam manqʼajj utjaskakiñapataki. Cheqas “janiw tinajänkkäna uka jakʼojja tukuskänti, ni chatunkki uka aceitesa, kuntï Tatitojj siskäna Elías toqe ukhamapunïnwa” (1 Rey. 17:16;  18:1). Uka viuda warmitï jan ukham lurkasapäna ukhajja, inas jukʼa jakʼuta ukat jukʼa aceitet tʼantʼa lurkäna ukajj tukusjjchispäna. Ukampis jupajj iyawsäwinïtap uñachtʼayäna, Jehová Diosaruw confiyäna ukat Eliasaruw nayraqat manqʼa churäna.

¿Kunsa uka sarnaqäwit yateqsna? Jehová Diosajj Jupar confiyapki ukanakarojj bendiciwa. Ukat Diosar jan jitheqtas servitasajj yantʼat uñjasini ukat Diosar confiyatas uñachtʼayarakiñäni ukhajja, Jupajj yanaptʼistaniwa. Ukat aguantañatakejj Jehová Diosajj mä Churirisarjama, Jarkʼaqerisarjama, ukat Amigosarjamaw tuku (Éxo. 3:13-15).

Khä 1898 maran Zionʼs Watch Tower (La Torre del Vigía de Sión) sat revistanjja, uka viuda warmit aka yatichäwiw apsusïna: “Viuda warmitï Diosar istʼañatak iyawsäwinïtap uñachtʼayaspäna ukhajja, jupajj Diosan profetap toqew yanaptʼa katoqaspäna; ukampis jan iyawsäwinïtap uñachtʼayaspäna ukhajja, inas yaqha viuda warmiru ukatak jikjjataschispäna. Jiwasampejj ukhamarakiwa, sarnaqäwisan yantʼat uñjasiñäni ukhajja, Jehová Diosajj Jupar iyawsäwinïtanti janicha uk uñachtʼayañaswa suyi. Jiwasatï iyawsäwinïtas uñachtʼayañänejja bendicionanak katoqañäni, janitï ukhamäkanejja aptʼasiñäniwa”.

Yantʼanakan uñjasktan ukhajja, Diosan yanapap Biblia toqe ukat Bibliat apstʼat qellqatanak toqew yanaptʼanak thaqañasa. Ukatsti wali chʼamäkchini ukasa Jehová Diosan ewjjanakap katoqasiñasawa ukat ukarjamaw sarnaqañasaraki. Aka ewjjtʼarjamtï sarnaqañänejja, bendición katoqañäni: “Tatitur taqe chuymamampi katuyasim; juman chʼikhi kankañamarukejj jan alkatasimti. Taqe luräwinakamanjja [Jehová] Tatitutjja amtasipunim, ukatsti jupajj cheqa thakinjamwa irpaskätam” (Pro. 3:5, 6).

Uka viudan iyawsäwipajj yaqha yantʼanwa uñjasiñapäna. “Mä qawqha tiemporusti viuda warmin wawapawa usuntjjäna, ukatjja sintipuni usuntjjasinjja jiwjjänwa” sasaw Bibliajj qhanañchi. Ukat wali llaktʼataw kunatsa ukajj pasi uk yatiñatakejj Eliasar akham säna: “¿Kuna lurañajjasa jumampejj utjitu, Diosankir jaqe? ¿Jumajj juchanakajja amtayiriti juttajja, ukatjja wawajjaru jiwayiriraki?” sasa (1 Rey. 17:17, 18). ¿Uka arunakajj kamsañs muni?

¿Kuna jan waltï lurawayki ukti viuda warmejj amtpachäna? ¿Wawapan jiwatapatjja Diosan castigopawa ukat Eliasaruw uk yatiyañapatakejj khitani sasat amuypachäna? Bibliajj janiw uka toqet qhanañchkiti, ukampis viudajj janiw jan walinakan uñjasitapat Diosar juchañchkänti.

Elías profetajj viudan wawap jiwatap uñjasina ukat jupan ukankatapatsa jiwkaspa ukham amuyasisaw wal sustjaspachäna. Ukat kawkhantï qorpachaskän ukar uka jiwat apkatasinjja, Eliasajj akham sasaw jachʼat mayisïna: “[Jehová] Tatit Diosajja, ¿jumajja aka ijmarojja llakisiyätati wawapa jiwayasinjja, nayajj utapana qorpachatäkasinjja?”. Uka munasiri ukat suma katoqtʼasir warmin ukham jukʼamp tʼaqhesiñap janiw profetajj munjjänti, ukatwa akham sas wal mayisïna: “Nayan [Jehová] Diosajja, ¡achiktʼassmawa aka wawaru jakañapa kuttʼayjjañama!” sasa (1 Rey. 17:20, 21).

Jehová Diosajj istʼänwa. Ukat viudajj Diosar iyawsatap uñachtʼayäna ukat profetaruw kunatï wakiskäna uk churäna. Amuyatajja, Diosajj wawan usuntatap ukhamak uñjäna, kunattejj jaktañapwa yatïna, Biblian jaktayatanakat parlki ukanakat ukaw nayrïrejja, ukat ukaw jutïrin mä suytʼäwi utjatap uñachtʼayaraki. Eliasajj Diosar wal achiktʼasïna ukhajja, Jehová Diosajj uka wawarojj jaktayänwa. Elías profetajj akham siskäna ukhajj kunja kusisitak viuda warmejj jikjjataskäna: “¡Uñjam, wawamajj jaktjjewa!” sasa. Ukat viudajj akham sasaw Eliasar säna: “Jichhakuchawa yattjja jumajj cheqpachansa Diosan jaqepätama, ukhamarak kuntï siskta ukajja Diosan cheqa arunakapätaparaki” (1 Rey. 17:22-24).

Janiw viuda warmit jukʼampejj 1 Reyes 17 jaljan parljjeti. Niyakejjay Jesusajj viudat wali askinak parlchïnjja, inas uka warmejj Jehová Diosar jan jitheqtas jiwañapkam serviwaychïna (Luc. 4:25, 26). Diosan servirinakapar wali sum uñjapki ukanakarojj Diosajj bendiciwa, ukwa uka sarnaqäwejj uñachtʼayistu (Mat. 25:34-40). Ukat Diosajj Jupat jan jitheqtas servipki ukanakarojj jan walinsa uñjasipkchi ukasa, kunanakatï munaski uksa churarakiwa (Mat. 6:25-34). Ukhamarus qawqsa Jehová Diosajj jiwatanakar jaktayañ muni ukat qawqha chʼamanisa jiwatanakar jaktayañatakejja, uksa uka sarnaqäwejj uñachtʼayarakiwa (Hech. 24:15). Ukatwa Sarepta markankir viuda warmit amtañajj wali askejja.