KHÄ 1950 maranwa Brooklyn Betelar katoqapjjetu, septiembre phajjsit 7 urunak saraqataru. Ukanjja, walja markanakat jutïr 355 jilat kullakanakaw servipjjäna, jupanakasti 19 maranit 80 maranïpjjänwa. Niya taqeniw alajjpachar sarañatak ajllitäpjjäna.

Mamajaw ‘kusisit Diosar’ yupaychañatakejj yatichawayitu (1 Tim. 1:11, NM). Nayajj jiskʼäskayätwa, ukhaw jupajj Diosar yupaychjjäna. Tunka maranïkayät ukhaw Columbus (Nebraska, Estados Unidos) markan 1939 maran julio phajjsit mä uru saraqatar bautisasirakta. Joseph Rutherford jilatan grabata arstʼäwipa istʼañatakiw asamblea de zona ukan (jichhajj pä uru jachʼa tantachäwi satäjjewa) tantachasipjjta. “¿Akapach munañanakampi apnaqayasiñti munta jan ukajj librëñcha munta?” (fascismo o libertad) sat arstʼäwip istʼañatakejja, niya patak jaqenakaw mä jiskʼa localan tantachasipjjta. Janïr uka arstʼäwi tukuykipanjja, tantachasipkayäta ukarojj walja jaqenakaw chhukuntanipjjäna. Ukat uka markats alisnukupjjarakitänwa, ukhamaw tantachäwejj chikar jaytasïna. Uk pasipansti, mä jilatan utaparuw sarapjjta, ukanwa taqpach arstʼäwinak istʼjjapjjayäta. Ukhamajja, bautisaskta uka urjja wali sum amtasta.

Mamajajj Diosan arunakap yateqañajatakejj walpun chʼamachasiwayi. Tatajajj suma jaqëkchïnsa, janiw religionat kuns yatiñ munkänti ni Diosats yatichkitänti. Ukampis mamajampi ukat Omaha tamankir jilat kullakanakampiw chʼamañchtʼapjjetäna.

Colegiot mistuñampëjjayäta ukhajja, kunsa luräjja uk amtañajänwa. Sapa vacacionan naya mita jilat kullakanakampiw precursor auxiliarjam irnaqerïta.

John Chimiklis jilatampi Ted Jaracz jilatampejj tamanak tumptʼirjamaw jakapkayäta ukhar jutapjjäna, jupanakajj Galaad Escuelat ukhakiw mistupjjäna (paqallqo yatichäwikis ukata). Kunapachatï 20 marat mä jukʼa jila maranikïpjjatap yatiyäta ukhajja, walpun muspharta. Ukhatakejj 18 maranïyätwa colegiots niya mistuñampirakiyätwa. Mä kutejj Chimiklis jilatajj akham sasaw jisktʼitäna: “¿Kunsa  jutïrin luräta?” sasa. Ukjja janipuniw armtʼaskti. Ukatsti nayajj sayätwa: “Precursorjam irnaqtʼañwa munta” sasa. “Waliki, precursorjam irnaqtʼam, ukham amtatamat kunsa jutïrin katoqäta uk janiw yatktati” sasaw sitäna. Jilatan ewjjtʼapampi jupanakan suma sarnaqatap uñjañaw wal yanaptʼawayitu. Ukhamajj 1948 maranjja, colegiot mistjjasajj precursorjamaw irnaqtʼañ qalltayäta.

Julio phajjsin 1950 maranjja, walja markanakat jachʼa tantachäwiw Nueva York markan apasïna, ukaruw awk taykajampi sarapta, ukasti Yankees sat estadionwa apasïna. Ukanwa Betelar sarañatak mä tantachäwir sarta, ukatsti Betelar sarañatakiw mä solicitud apayta.

Awkijajj precursorjam irnaqtʼatajatsa ukhamarak utapan jakatajatsa janiw jarkʼkitänti, ukampis qorpachasiñ utat pagañatakisa manqʼa alañatakis yanaptʼirista ukwa jupajj munäna. Ukhamajj agosto phajjsi qalltaw trabajo thaqer mistuwayta, ukampis janïr mistkasajja, buzón satäkis ukwa uñantta. Ukanjja Brooklyn markat apayanit mä cartwa jikjjatta, ukajj Nathan H. Knorr jilatan firmjjatatänwa. Uka cartajj akham sänwa: “Betelankañatak solicitud apayankta ukwa katoqapjjta. Walja maranak Betelan qheparañ munatamsa amuyaraktwa. Ukhamasti 1950 marat 7 urunak septiembre phajjsit saraqkani ukhaw Betelar jutañam munta, ukajj calle Columbia Heights, 124 (Brooklyn, Nueva York) sat cheqankiwa”.

Trabajot purinjjäna ukhajja, akham sasaw awkijar sista: “Trabaj jikjjatjjwa” sasa. Jupajj akham sasaw sitäna: “Walik jikjjattajja. ¿Kawkinsa trabajïta?” sasa. “Brooklyn markan Betel utanwa irnaqäjja, phajjsin 10 dolarwa pagapjjetani” sasaw yatiyta. Uk istʼasinsti janis cheqäkaspa ukham amuyäna, ukampis jumatï uk munstajja, chʼamachasim uk jikjjatañataki sasaw sitäna. Awkijajj 1953 maran jachʼa tantachäwejj apaskäna ukanwa Yankees sat estadionan bautisasjje.

Alfred Nussrallah sat jilatajj nayamp chikaw precursorjam irnaqtʼäna. Juparojj ukharakiw Betelar sarañapatak invittʼapjjäna. Ukhamajja, panpachaniw viajipjjayäta. Ukatsti jupajj Joan kullakampiw casarasjjäna, ukat Galaad Escuelar sarasinjja, misionerjamaw Líbano markar sarapjjäna, qhepatsti Estados Unidos markarurakiw kuttʼanjjapjjäna, ukanwa tamanak tumptʼirjam sirvjjapjjäna.

Betelan nayrïr luräwijajj taller de encuadernación satäkis ukan libronak chʼukhuñänwa. ¿Qué ha hecho la religión para la humanidad? sat libro nayrïr kuti chʼukhuyäta. Kimsa qallq phajjsi ukan irnaqasinjja, Departamento de Servicio satäkis ukanwa irnaqjjarakiyäta, ukansti Thomas J. Sullivan sat jilataw pʼeqtʼäna. Jupamp irnaqtʼañajj wali khusapunïnwa. Jupajj Diosan Arupat wali yatjjattʼata amuytʼasiri ukhamänwa.

Niya kimsa maranakaw Departamento de Servicio satäkis ukan irnaqtʼjjayäta. Fabrican pʼeqtʼir Max Larson jilatajj akham sasaw mä kutejj situ: “Knorr jilataw thaqasktam” sasa. Ukham satajj akham sasaw lupʼiyäta: “Kunpun jan wal lursta” sasa. Knorr jilatajj akham sasaw jisktʼitäna: “¿Betelat sarjjañcha amtaskta? Mayniruw oficinajan mä qawqha tiempo irnaqtʼañapatak thaqaskta, ¿janit jumajj munkasma?” sasa. Ukham siri istʼasajj janiw sustjatäjjayätti. Ukat akham sistwa: “Janiw Betel jaytañ amtkti” sasa. Oficinapanjja, 20 maranakaw irnaqtʼawayta. Ukajj wali sumapunïnwa.

 Sullivan, Knorr, Milton Henschel, Klaus Jensen, Max Larson, Hugo Riemer, Grant Suiter * sat jilatanakamp Betelan irnaqasajja, wal yateqawayta. ¡Janipuniw uka kikpajj yaqhajj utjkaspati!

Uka jilatanakajja, Jehová Diosan markapar yanaptʼañatakejj wali suma organistʼatäpjjänwa. Knorr jilatajj wali irnaqtʼirïnwa, jupajj Diosan Reinopat taqe cheqan yatiyasiñapwa munäna. Khitinakatï jupamp irnaqapkäyäta ukanakajja, janiw jupamp parltʼañ ajjsarapkayätti. Ukhamajj janisay jupjampun amuyapjjerïkstjja, kuntï amuyapjjerïkta ukjja jan ajjsartʼasaw arsupjjerïta.

Mä kutejj akham sasaw Knorr jilatajj sitäna: “Kuna jiskʼa luräwis wali wakiskiriwa, kunapachatï nayajj fabrican pʼeqtʼirjam irnaqtʼkayäta ukhajja, Rutherford jilataw telefonot jawsanitäna, akham sasa: ‘Jilata Knorr chika uru manqʼasir jutkäta ukhajja, gomanakwa apanirapitäta’ sasa. Ukham satajj jankʼakiw goma jikjjatasin bolsillojar irantasirïta. Ukat chika uruw Rutherford jilatan oficinapar apjjerïta. Janis jachʼa luräwjamäkchïnjja, jilatatakejja wali wakiskirïnwa”. Knorr jilatajj akham saskakitänwa: “Robert ‘qellqañ mesajan suma tajstʼat lapisanak utjañappunwa munirïta. Amp suma ¿janit sapa alwatak ukham tajstʼarapkitasma?” sasa. Ukhamwa walja maranakajj lurawayta.

Amuyump istʼirïñajj kunja wakiskirisa ukwa Knorr jilatajj parlirïtäna. Mä kutejja, mä lurañ churitäna, ukampis janiw sum katoqaskayätti, jan sum istʼatajatjja jilataruw jan walin uñjasiyta. Ukham luratajat janipuniw sum jikjjataskayätti. Ukatwa akham sas mä carta jaytawayta: “Disculpitätawa, janjamakiw akan irnaqkiristi, yaqha luräwi churjjeta” sasa. Uka alwpachaw jilatajj oficinajar jutasin akham sitäna: “Robert, cartam liytʼtwa. Pantjasiñajj utjiwa, ukampis uka toqet parljjtänwa. Wali amuyumpiw jichhajj lurjjäta, jichhajj irnaqtʼaskakiñäni” sasa. Ukham khuyaptʼayasitapat walpun yuspärta.

Kimsaqallqo maraw Betelan irnaqjjayäta, ukankaskakiñwa munarakiyäta. Qhepat ukajj mayjtʼjjänwa. 1958 maran Yankees ukat Polo Grounds sat estadionanakan walja markanakat jachʼa tantachäwi apaskäna ukanwa, Lorraine Brookes kullakamp jikisiyäta, juparojj 1955 maranwa uñtʼayäta, jupajj Canadá cheqan Montreal markanwa serviskäna. Jupajj Diosatak sapürunjam irnaqtʼañ askirjam uñjatapasa ukat yatiyirinakajj munaski ukar sarañatak jankʼakïtapas wal musparayitäna. Jupajj Galaad Escuelaruw sarañ wal munäna. 1956 maran 22 maranëjjäna ukhaw 27 yatichäwir invitapjjäna. Mistjjasinsti Brasilaruw khitapjjäna. Ukampis 1958 maranwa wasitat jikisipjjayäta. Uka maranwa casarasiñatak uñtʼasiñ qalltapta. Jupampejj 1959 maranwa casarasiña ukat misionerjam irnaqañ munapjjayäta.

 Knorr jilataruw kuntï lurañ amtkayäta uk yatiyta, jupajj akham sitänwa: “Kimsa maramp suytʼapjjam, ukatwa casarasisin aka Brooklyn markan Betelan irnaqapjjäta” sasa. Uka tiemponjja, maynitï casarasisin Betel utan irnaqtʼaskakiñ munaspäna ukhajja, casarasiñatak uñtʼasipkäna ukanakat mayniw 10 maranak betelitjam irnaqañapäna, maynisti kimsa mararaki. Ukhamajj Lorrainejj Brasilankir Betelar pä maratakiw mantäna, ukatsti mä mararakiw Brooklyn Betelar jutjjäna.

Pä maraw carta taypnam uñtʼasipta. Telefonot parlañajj wali jilänwa, ni Internetas utjkarakïnti. 1961 maran septiembre phajjsit 16 uru saraqataruw casarasipjjta, ukanjja Knorr jilataw discurso arstʼirïnjja. Kimsa marajj wali jayapunïnwa. Jichhajj 50 maranakaw casaratäjjapjjta, nayra maranakat amtasin “walikpunjjay kimsa maranak suytʼchiyätan” sasaw amtapta.

Khä 1964 maranjja, superintendente de zona satäkis ukatakiw uttʼayapjjetäna, ukat yaqha markanakar visitiriw sarañajäna. Uka tiempon chacha sapakiw sarapjjerïna. Ukasti 1977 maratwa mayjtʼawayi. Uka maranjja, Lorrainempiw Grant jilatampiru Edith Suiter kullakampir Alemania, Austria, Grecia, Chipre, Turquía ukhamarak Israel markanakan utjki uka Betel utanak visittʼir sarapjjayäta. Cheqas 70 markanakaruw visittʼawayapta.

Mä kutejj Brasil markaruw 1980 maran visittʼir sarapjjta, ukat Ecuador jakʼankir Belém cheqaruw sarapjjta, ukanwa Lorrainejj misionerjam nayrajj irnaqäna. Ukjjarusti, Manaos markankir jilat kullakanakar visittʼiriw sarapjjarakiyäta. Estadionan mä arstʼäwi churkayäta ukhajja, Brasil markankir kullakanakajj ajanut jampʼattʼasisaw aruntasipjjeri, jilatanakasti qʼapirtʼasipjjarakiriwa. Ukampis mä qawqha jilat kullakanakajj janiw ukham aruntasipkänti, ¿kunatsa?

Jupanakajj chʼumi chʼumi taypin jakasir lepra usun jilat kullakanakänwa. Usump jan apkatañatakiw mayninakar jan aruntapkänti. Wal jupanakat sinttʼasipjjta. ¡Kunja kusisitas jikjjatasipjjäna uk janipuniw armapkäti! Kuntï Isaías 65:14 qellqatajj siski ukajj cheqapunïskiwa ukan siwa: “[Servirinakajajj] kusisiñatsa qʼochusipjjaniwa, chuymanakapan kusisiñajj utjatap layku” sasa.

Warmijampejj 60 maranak jilaw Jehová Diosar sirvjjapta. Walja bendicionanak katoqasajj wali kusisitapunïptwa, Diosaw markap toqejj wali sum irpawayapjjetu. Jichhajj janiw nayrjam taqe cheq sarirjamäjjti, ukampis Oraqpachan Jilïr Irpirinakaruw aka luräwinakan yanaptʼaskta: Comité de Coordinadores, Comité de Servicio satäkis ukanakana. Uka luräwinakan Diosan markapar yanaptʼasajja, wali kusisitätwa. Walja jilat kullakanakaw sapürunjam Jehová Diosar serviñ amtawayapjje, jupanakajj Isaías profetjamarakiw akham sapjje: “Akankasktwa nayajj, nayar khitasita” sasa (Isa. 6:8). Diosan markapan wal jiljjattatapajj aka arunakan cheqapunïskatapwa uñachtʼayi “waliki, precursorjam irnaqtʼam, ukham amtatamat kunsa jutïrin katoqäta uk janiw yatktati” ukjja tamanak tumptʼir mä jilataw sitäna.