1, 2. 1) Pusi tunka maranïkäna ukhajja, ¿kunsa Moisesajj amtäna? (Aka janankir foto uñjjattʼäta.) 2) ¿Kunatsa Moisesajj Diosan markapamp chik uñisitäñ ajllïna?

KUNANAKTÏ Egipto markan jikjjataspäna uk Moisesajj sum yatïna. Qamirinakan jachʼa utanakapsa uñjänwa, jupas faraonan utapanwa jakarakïna. “Moisesajj wali suma yatichatän[wa], kawkhakamatejj egipcionakajj yatipkäna ukakama”, inas arquitectura, astronomía, matemática ukat yaqha ukham yatichäwinak katoqchïna (Hech. 7:22). Jupajj qamiri, munañani, wali aytata ukhamäspänwa. Egipcionakajj wal ukhamäñ munapjjäna.

² Ukampisa Moisesajj 40 maranïkäna ukhajja, mä amtaruw purïna. Uka amtapajja, faraonan familiaparojj wal mayjtʼaypachäna. Jupajj janiw faraonjam jakañsa ni aleq egipcionakjam jakañsa munkänti, jan ukasti esclavonakjam jakañwa ajllïna. ¿Kunatsa? Kunattejj Moisesajj Diosaruw iyawsäna (Hebreos 11:24-26 liytʼañataki). Moisesajj Jehová Diosarojj uñjkaspas ukhamänwa. Niyakejjay jupajj Dios chuymächïnjja, Moisesajj ‘jan uñjkañ Diosar’ iyawsäwinïnwa ukat kuntï jupajj arski ukajj phoqasipuniniwa sasaw confiyäna (Heb. 11:27).

3. ¿Kuna kimsa jisktʼanakarus aka yatichäwin qhanañchasiskani?

³ Jiwasajj ukhamarakwa jan uñjktan uk amuyañasajj wakisi.  Cheqas ‘iyawsäwinïñasawa’ (Heb. 10:38, 39). Diosar jukʼamp iyawsañatakejja, Hebreos 11:24-26 qellqatan Moisesat parlki uk yatjjatañäni. Uk yatjjatkasajj aka jisktʼanakan qhanañchäwip thaqapjjañäni: ¿Kunjamsa Moisesarojj jañchin munañanakapar atipañatak iyawsäwipajj yanaptʼäna? Diosat luräwinak katoqkäna uk wali askit uñjañatakejja, ¿kunjamsa jiskʼachat uñjasisin iyawsäwipajj yanaptʼäna? Ukat ¿kunatsa “kuntejj Diosajj churañapäkän” uk suyäna?

4. “Jukʼa tiempo juchanakan” jakañatjja, ¿kunsa Moisesajj amuyäna?

⁴ Moisesajj Diosar confiyasajja, “juchanakan” kusisit jakañajj mä jukʼa tiempokïtapwa amuyäna. Ukampis yaqhepajj janiw jupjam amuyapkänti, Egipto markajj idolonakampi, layqasiñanakampi phoqhantatänwa, ukat taqe markanakjjar munañaniruw tuküna, ukampis Jehová Diosan markapajj esclavokïpjjänwa. Ukhamarus jan wali jaqenakajj nayrarjamas sartapkchïnjja, jupanakajj tukjatäniwa sasaw Moisesajj confiyäna. Ukatwa “mä jukʼa tiempo juchanakan” kusisit jakañamp jan apayaskänti.

5. ¿Kunas “mä jukʼa tiempo juchanakan” jan sarnaqañatak yanaptʼistani?

⁵ “Juchanakan” mä jukʼa tiempo jakañajj mä jukʼa tiempotakikiwa. Diosar confiyañaw “akapachajj tukusirikiwa jan wali luräwinakapamppacha” sasin amuyañatak yanaptʼistani (1 Juan 2:15-17). Juchanakapat jan arrepentisirinakajj jutïrin kunjamakis jikjjatasipjjani ukwa amuyañasa. Jupanakajj ‘llustʼa cheqar uchatäpjjewa’ “ajjsarañamp tukjataw tukusipjjarakini” (Sal. 73:18, 19). Jan walinak lurañ munañäni ukhajja, akham sasin jisktʼasiñasawa: “¿Jupanakjam tukjatäñti munarakta?” sasa.

6. 1) ¿Kunatsa Moisesajj “Egipto reyin phuchapan wawapaw sayasiñjja” jan munkäna? 2) ¿Kunatsa Moisesajj suma amtaruw purïna sasin sasma?

⁶ Moisesarojja, Diosar iyawsatapaw kunsa jakäwipampejj lurani uk amtañatak yanaptʼäna. “Iyawsäwi laykurakiw Moisesajj jachʼäjjän ukhajj jan munkänti Egipto reyin phuchapan wawapaw sayasiñjja.” (Heb. 11:24.) Moisesajj janiw akham amuykänti: ‘Faraonan palaciopankkasajja, wali wakiskir luräwinïsaw Diosar servirista, ukhamatwa mayni israelitanakar qollqe toqet yanaptʼirista’ sasa. Antisas Jehová Diosar taqe chuymampi, taqe jakañampi, taqe chʼamamp munasiñwa amtäna (Deu. 6:5). Cheqas amtatapajj tʼaqhesiñanakatwa jarkʼaqäna. Egipto markar kuna yänaktï jaytanukkäna ukanakjja, mä qawqha tiempotjja israelitanakaw apasjjäna (Éxo. 12:35, 36). Faraonajj jiskʼachata, jiwayata ukhamaw uñjasïna (Sal. 136:15). Ukampis Moisesajj qhespïnwa ukat juparuw mä markar suma cheqar apañapatak Jehová Diosajj ajllïna. Cheqas ¡Moisesajj jakäwipan nayraruw sartäna!

7. 1) Mateo 6:19-21 qellqatarjamajja, ¿kunatsa kunatï wiñayatakïki uk jikjjatañatak chʼamachasiñasa? 2) Kunanakatï wiñayatakïki ukat kunanakatï tukusirïki ukanakajj kunansa jan kikpäki uk mä experienciamp qhanañchtʼam.

⁷ Wayn tawaqonaka jumanakatï Jehová Diosan yupaychiripäpsta ukhajja, jakäwiman kunsa jutïrin luräta uk amtañamawa. Ukhamarus kunanaktï Diosajj arsuwayki ukar iyawsañamawa, ukatsti kunanakatï wiñayatakïki uk jikjjatañatakiw chʼamachasiñama, janiw kunanakatï tukusirïki uk thaqhañamäkiti (Mateo 6:19-21 liytʼañataki). Sophie sat tawaqot parltʼañäni, juparojj colegion ballet sum thoqtʼañ yatitapatwa becanak churañ munapjjäna. Estados Unidos markpachanwa ukham thoqoñanakan mintat puestor uchañ munapjjäna. Jupajj akham siwa: “Wali sum thoqtʼirit uñtʼatäñajj wali kusiskañänwa, masinakajat sipans jilankkiristsa ukham amuyasiyäta. Ukampis janiw kusisit jikjjataskayätti” sasa. Ukhamaruw Los jóvenes preguntan... ¿Qué haré con mi vida? sat video uñtäna. Jupajj akham saskakiwa: “Akapachan nayraruw mistuyäta ukat waljaniw suma thoqtʼirit uñtʼapjjarakitäna, ukampis Jehová Diosar serviñatwa apaqaskitäna.  Ukatwa Jehová Diosar maytʼasis ukham thoqorïñ apanukuwayta” sasa. ¿Ukham lurasin kunjamsa jikjjatasi? Kullakajj siwa: “Ukham luratajat janiw amtaskti. Wali kusisitätwa, precursorjamarakiw chachajamp servisipkta. Janiw taqenins wali uñtʼatäpkti ukat jukʼa yänakanikïpjjtwa. Ukampis Jehová Diosaw nanakampïski, ukhamarus Bibliat yateqerinakasa ukat Diosan markapan jukʼamp lurañatak amtanakajas utjapjjarakituwa.”

8. Jakäwipan kunsa wayn tawaqonakajj lurapjjani uk amtañatakejja, ¿Biblian kawkïr ewjjapas yanaptʼaspa?

⁸ Jehová Diosajja, kunas jumatak wali wakiskirejja uk sum yati. Moisesajj akham sänwa: “¿Kunsa Tatitu Diosamajj jumanakat mayipjjtamjja? Juparu jachʼañchañanakama, jupan thakipanjam arkañanakama muni, ukatsti munarakiwa juparu munapjjañanakama, yupaychapjjañama taqe chuymampi, taqe jakañamampi, ukhamaraki mandamiento arunakaparjam, leyinakaparjama sum sarnaqapjjañamataki” sasa (Deu. 10:12, 13). Waynäkasina tawaqökasinwa “taqe chuymampi, taqe jakañamampi” Jehová Diosar munasiñataki ukhamarak serviñataki yanaptʼkiristam uk ajlliñama. Ukham amtatamajj ‘sum sarnaqañatakiw’ yanaptʼätam.

9. ¿Kunatsa Moisesatakejj luräwip phoqañajj chʼamakïpachäna?

⁹ Moisesajj “jukʼamp qamirjamwa amuyasïna Cristo layku jiskʼachatäsajja, taqe Egipto markan utjirininakat sipansa” (Heb. 11:26). Moisesajj “Cristökaspasa” jan ukajj “ajllitäkaspasa” ukham uttʼayatänwa, mä arunjja, Jehová Diosaw juparojj israelitanakar Egipto markat apsuñatak ajllïna. Uk phoqañajj jupatak chʼamänwa ukat ‘jiskʼachatas’ uñjasirakïnwa. Mä israelitaw jiskʼachir arunakamp akham säna: “¿Khitisa jumarojj nanak taypiru jilïrita uchtam, jan ukajj kunatejj walïki, janis walïki ukanak uñjiritsa?” sasa (Éxo. 2:13, 14). Qhepatjja, Moisesajj akhamwa Jehová Diosar säna: “¿Kunjamaraki faraonasti istʼitani?” sasa (Éxo. 6:12). Jiskʼachat uñjaskäna ukamp jan aynachtʼañatakejja, jupajj Jehová Diosaruw kunatï ajjsaraykäna ukanak yatiyäna. ¿Kunjamsa Diosajj Moisesar yanaptʼäna?

10. ¿Kunjamsa Moisesarojj luräwip phoqañapatak Jehová Diosajj yanaptʼäna?

¹⁰ Nayraqatjja, Jehová Diosajj “nayawa jumampïskäjja” sasaw Moisesar säna (Éxo. 3:12). Payïr toqetjja, “kunañtejj nayajj munkäjja ukaruw nayajj tuköjja” sañwa sutijajj muni sasaw Diosajj qhanañchäna, ukaw Diosar confiyañatak Moisesar yanaptʼäna (Éxo. 3:14, NM). * Kimsïr toqetjja, Moisesarojj milagro lurañapatakiw Diosajj chʼam churäna, ukaw Jupan khitanitätap uñachtʼayäna (Éxo. 4:2-5). Pusïr toqetjja, Moisés lanti parlañapatakejja, Aarón chachwa uttʼayäna (Éxo. 4:14-16). Ukat niya jiwañampëjjäna ukhajja, Jehová Diosajj loqtirinakapar kun lurapjjañap mayki ukhajja, yanaptʼirïtapwa Moisesajj amuyäna. Ukatwa Josué chachar akham säna: “Tatitu pachpaw juman nayram sarani, jumampirakïniwa, janirakiw jaytkätamti ni antutkarakïtamsa, ukhamasti jan ajjsaramti” sasa (Deu. 31:8).

11. Kuna luräwtï Moisesajj Diosat katoqkäna ukjja, ¿kunatsa wali askit uñjäna?

¹¹ Jehová Diosan yanaptʼatajja, Moisesajj chʼama luräwi katoqkäna ukjja, “taqe Egipto markan utjirininakat sipansa” wali askitwa uñjäna. Ukajj janiw Taqe Chʼamani Diosar serviñamp kikpäkänti. Egipto markan jilïrit uñtʼatäñat sipansa, Jehová Diosamp “Cristota” jan ukajj “ajllitapat” uñtʼatäñaw wali askïnjja. Moisesajj kuntï katoqkäna uk wali askit uñjasajj bendicionanakwa katoqäna. Jupajj Jehová Diosampiw sum apasïna, ukhamatwa israelitanakar Suma Oraqer irpkasajj “jachʼa luräwinak luräna” (Deu. 34:10-12).

12. ¿Kuna aski luräwinaksa Jehová Diosajj churawayistu?

¹² Jiwasarojj ukhamarakiw mä luräwi Jehová Diosajj churistu. Kunjamtï Pablorusa mayni  cristianonakarus churkäna ukhama. Uksti Yoqap toqew churistu (1 Timoteo 1:12-14 liytʼañataki). Uka luräwejja suma yatiyäwinak yatiyañawa (Mat. 24:14; 28:19, 20). Yaqhepajj Diosatakiw sapürunjam irnaqtʼapjje. Experienciani jilatanakajj tamanakanwa irpir chuymaninakan yanapiripjama jan ukajj irpir chuymanjam mayninakar yanaptʼapjje. Ukampis yaqha jaqenakasa jan ukajj familiasat jan cristianöpki ukanakas inas uka luräwinak jan askit uñjapkchispati, ukat taqe chuyma chʼamachasitassa jiskʼachapjjarakchispa (Mat. 10:34-37). Ukhamanak toqe aynachtʼayapjjestani ukhajja, inas akham jisktʼassna: “¿Chʼamachasiñajajj wakisiskakispati? Jan ukajj ¿Diosan markapan luräwinak katoqasajj phoqeristti?” sasa. Ukhamäni ukhajja, ¿kunjamsa Diosar iyawsañajj nayrar sartaskakiñatak yanaptʼistani?

13. ¿Kunjamsa Jehová Diosajj markapan luräwinak katoqtan uk phoqañatak yanaptʼistu?

¹³ Jehová Diosaruw yanaptʼita sasin mayisiñasa. Kunanakatï ajjsaraykistu ukanak Juparuw yatiyañasa. Cheqas Jehová Diosaw markapan mä luräwi churistu, Juparakiw uk phoqañatak yanaptʼistani. ¿Kunjamsa? Kunjamtï Moisesar yanaptʼkäna ukhamarakwa yanaptʼistani. Nayraqatjja, Jehová Diosajj akham sistuwa: “Nayäsktwa juman Diosamajja. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” sasa (Isa. 41:10). Payïr toqetjja, Jupan arsutanakapar confiyañatakiw yanaptʼistu: “Arstwa, ukham lurarakëjja; amtastwa, uka amtatanakajjsti phoqharakïwa” sasa (Isa. 46:11). Kimsïr toqetjja, Jehová Diosaw suma yatiyäwi yatiyañasatakejj ‘chʼama’ churistu (2 Cor. 4:7). Pusïr toqetjja, Diosajj kuna luräwinaktï markapan churkistu uk phoqaskakiñatakejja, oraqpachankir jilat kullakanakwa jiwasar yanaptʼañatak churistu. Jupanakajj ‘maynit maynikamaw’ chuymachtʼasipjje, ‘chʼamañchtʼasipjjaraki’ (1 Tes. 5:11). Jehová Diosajj servirinakapar luräwinak churasajja, kunjamsa uk phoqañatak yanaptʼi uk uñjasin jukʼampiw Jupar confiytanjja. Ukatsti kuna luräwinaktï katoqktan ukanak taqe kunat sipans wali askit uñjtanjja.

14. ¿Kunatsa Moisesajj kuntï jutïrin katoqkani ukjjat jan pächaskäna?

¹⁴ Moisesajj “kuntejj Diosajj churañapäkän” ukwa uñjäna (Heb. 11:26). Cheqas jupajj janis jutïr urunakat sum amuykchïnjja, kuntï yatkäna ukarjamaw irpayasïna. Moisesajja Jehová Diosajj jiwatanakar jaktayapuniniwa sasaw Abraham  nayra awkipjam confiyäna (Luc. 20:37, 38; Heb. 11:17-19). Jupajj jutïr urunakan kuna bendicionanaksa katoqani uk yatisajja, 40 maranak imanaqasis sarnaqatapasa ukat 40 maranak wasaran sarnaqatapas jan inamayätapwa amuyäna. Diosajj kunjamsa arsutanakap phoqani uk janisay sum yatkchïnjja, Diosar confiyasaw kuna bendicionanaktï katoqkani ukanak uñjäna.

15, 16. 1) Jutïrin katoqkañäni uka bendicionanakat ¿kunatsa lupʼiñasa? 2) ¿Kuna bendicionanaksa Diosan Reinopan katoqañ munta?

¹⁵ ¿‘Kuntejj Diosajj churañapäki’ uk katoqañatak suyasktanti? Moisés chachjamarakiw kunjamsa Diosan arsutanakapajj phoqasini uk jan sum amuyktanti. Sañäni, jachʼa tʼaqhesiñ urunakajj “kuna horasar[us]” purinini uk janiw yatktanti (Mar. 13:32, 33). Ukampis Moisesat sipansa, Paraíso toqet sumpach yattanjja. Ukanakaw kunanaktï Diosajj arsuwayki ukar confiyañatak yanaptʼistani. Paraisonksnasa ukham amuyañaw Diosan Reinop nayrar uchañatak yanaptʼistani. ¿Kunjamsa? Amuytʼañataki: mä uta jan sum uñjasajj janiw alasksnati, ukhamarakiw kuntï jan uñjktan uk jikjjatañatak jan chʼamachasksnati. Cheqas Diosar confiyañaw Diosan Reinopan kunjamsa jakasiñäni uk amuyañatak yanaptʼistu.

¹⁶ Diosan Reinopat sum amuyañatakejja, Paraison kunjamsa jakasiñäni ukwa amuyañasa. Nayra tiempon Diosar servirinakat yatjjatkasajja, jaktanipkani ukhajj kunsa jupanakar jisktʼañäni ukwa amuyañasa. Ukhamarus aka qhepa urunakat jisktʼapjjestani ukhajja, kamsañänisa ukwa amuyañasaraki. Nayra tiempon Diosar servipkäna uka jaqenakar uñtʼañasa, ukhamarak kunsa Diosajj jupanak layku lurawayi ukanak yatiyañas wali kusiskañapunïniwa. Montenkir animalanakar sum apasir uñjasas kusisirakiñäniwa. Jukʼat jukʼata jan juchanir tukusinjja, kunjamsa Jehová Diosampi jukʼamp sum apasiñäni uka toqetsa amuytʼañasarakiwa.

17. Jutïrin kuna bendicionanaktï katoqkañäni uk amuyañajja, ¿kunjamsa yanaptʼistu?

¹⁷ Paraison niyas bendicionanak katoqjjsna ukham amuyañäni ukhajja, nayrar sartañataki, kusisitäñataki ukat suma amtar puriñatakiw yanaptʼistani. Pablojj akham sasaw ajllit cristianonakar qellqäna: “Janiw uñjktanti, ukampis llampʼu chuymampiw suytʼapjjañasa” sasa (Rom. 8:25). Uka arunakajj taqe cristianonakatakiwa. Ukhamarus janïras wiñay jakañ katoqkstanjja, “kuntejj Diosajj chura[pjjämawa]” siskistu uk katoqañatakejja, Diosar confiyasaw pacienciamp suyasktanjja. Moisés chachjamarakiw amuytanjja, Jehová Diosar servitasajj jan inamayätapa. Cheqas kunanakatï “uñjaski ukanakasti tukusirikiwa, ukampis jan uñjaski ukanakasti [...] wiñayatakiwa” (2 Corintios 4:16-18 liytʼañataki).

18, 19. 1) ¿Kunatsa Diosar iyawsatas jan aynachtʼañapatak chʼamachasiñasa? 2) ¿Kunsa jutïr yatichäwin yatjjataskañäni?

¹⁸ Diosar iyawsañaw “kuntejj jan uñjtan ukajj cheq[apunïtap]” amuyañatak yanaptʼistu (Heb. 11:1). Diosar jan yupaychir jaqejja, Jehová Diosar serviñajj kunja askisa uk janiw amuykiti. Uka jaqetakejj “loqhe kankañäkaspas” ukhamawa (1 Cor. 2:14). Ukampis jiwasajj wiñay jakañ katoqañwa suytanjja, jiwatanakar jaktanir uñjañs munaraktanwa, ukanaksti jaqenakajj janiw amuyapkiti. Apóstol Pablorojj filosofía toqet yatjjatat jaqenakajj “ancha parliri[t]” uñtʼapjjäna. Jichha tiemponsti ukhamarakiw walja jaqenakajj kuntï jutïrit yatiyktan ukajj janis cheqäkaspa ukham amuyapjje (Hech. 17:18).

¹⁹ Niyakejjay Diosar jan iyawsir jaqenak taypin jakstanjja, Diosar iyawsatasajj jan aynachtʼañapatakiw chʼamachasiñasa. Ukhamarus “jan iyaw[säwis] pistʼañapataki” Jehová Diosar mayisiñäni (Luc. 22:32). Juchajj kunanakarus puriyistaspa ukanak Moisés chachjamaw amuyañasa, Jehová Diosar serviñsa wali askit uñjañasawa, ukhamarus wiñay jakañatsa lupʼiñasarakiwa. Ukampis Moisesat jukʼampinak yateqsna. Jutïr yatichäwinwa kunjamsa iyawsäwipajj “jan uñjkañ Diosarojj uñjkaspas” ukham uñjañatak yanaptʼäna uk yatjjataskañäni (Heb. 11:27).