David reyejj akhamwa qʼochüna: “[Jehová] Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Davitajj kunayman jan walinakansa uñjaskchïnjja, Diosan munañap phoqasajj wali kusisïna. Ukampis janiw David sapakejj Diosan munañap lurasajj kusisit jikjjataskänti.

Apóstol Pablojj Cristot parlkasajja, Salmo 40:8 qellqat amtasajj sänwa: “Cristojj akapachar mantanisinjj Diosarojj sän[wa]: Janiw jumajj animalanakan sacrificionakapjj munkjjtati, ukatwa nayatakejj aka cuerpojja wakichtajja. Sacrificion loqtat animalanakas janiw munaskjjtamti, ni jucha apaqer sacrificionakasa. Ukatwa sista: ‘Dios, nayawa juman munañama phoqher jutta kunjämatejj nayjjat libron qellqatäki ukhamarjama’” sasa (Heb. 10:5-7).

Jesusajj aka Oraqenkkasajja, Diosan luratanakap uñjasinsa, amigonakapamp parltʼasisinsa, jupanakamp manqtʼasisinsa wal kusisïna (Mat. 6:26-29; Juan 2:1, 2; 12:1, 2). Ukampis taqe ukanakat sipansa, Jehová Diosan munañap phoqañawa jupatakejj jukʼamp askïnjja. Ukatwa säna: ‘Nayan manqʼajajj khitankitu ukan munañapa, ukhamarak lurañapa phoqañawa’ sasa (Juan 4:34; 6:38). Kun lurasakis maynejj cheqpach kusisitäspa uk sumwa Jesusan arkirinakapajj yatipjjäna. Ukatwa Jesusat yateqasisajj Diosan Reinopat wali kusisit yatiyapjjäna (Luc. 10:1, 8, 9, 17).

Jesusajj arkirinakaparojj sänwa: ‘Taqe akapachankir jaqenakar yatiyir sarapjjam, nayar arkir tukuyapjjam; bautisapjjam Dios Awkina, Yoqana, qollan ajayun sutiparu. Yatichapjjarakim taqe kuntejj nayajj jumanakar yatichapksma ukanaka phoqaña. Amtasipjjapunim, nayajj sapürupuniw jumanakampïskta akapachan tukusiñapkama’ sasa (Mat. 28:19, 20). Uk  phoqañatakejja, taqe cheqanwa Diosat parlañasa, Bibliat yateqañ munirinakarusa wasitatwa kuttʼañasa, ukhamat sapa kuti Bibliat yatichañataki. Uk lurasajj wali kusisitäñäniwa.

Jaqenakajj istʼistpasa janisa, suma chuymanïñaw kusisitäñatakejj yanaptʼistani. Yaqhepanakajj Diosan Arupat yatiyatajj janiw istʼapkistuti, ni yäqapkistusa, ukhampachas ¿kunatsa Diosan Reinopat yatiyaskaktanjja? ¿Kunatsa Jesusan arkiripar tukupjjañapatak yanaptʼaskaktanjja? Jehová Diosaru ukat jaqe masisar munatas layku. Janitï yatiyksnajja, janiw qhespiyasksnati, ni jaqe masisas qhespiyaskaspati (Eze. 3:17-21; 1 Tim. 4:16). Jichhasti kunas jilat kullakanakarojj kusisit chuymampi yatiyaskakiñatak yanaptʼawayi uk uñjañäni.

Sum amuytʼasa jisktʼañajj wali askiwa. Mä urojja, Amalia sat kullakajj mä chacharuw periódico liyiskir mä plazan uñjäna. Jakʼachasisajj akhamwa jisktʼäna: “¿Kuna suma yatiyäwis utji?” sasa. Ukatsti uka chachajj sarakïnwa: “Janiw kuna suma yatiyäwis utjkiti” sasa. Ukatwa Amaliajj säna: “Nayajj suma yatiyäwinakwa Diosan Reinopat yatiyaskta” sasa. Uka chachajj wal uka toqet yatjjatañ munäna, ukatwa Bibliat yateqañ qalltäna. Kullakajja, uka urojj kimsaniruw plazan yatichañ qalltäna.

Janice sat mä kullakajja, Diosan Arupatjja trabajopanwa yatiyarakïna. Trabajopanjja, uta uñjiri mä guardiaw Yatiyañataki sat revistan mä yatichäwipat wal yatjjatañ munäna, mayni trabajir masipas ukhamaraki. Ukatwa Janice kullakajj säna: “Sapa kuti revistanak mistkani ukhajj apanipunïwa” sasa. Yatiyañataki ukat ¡Despertad! sat revistanakajja, kunayman toqenakatwa parli, ukatwa yaqha trabajir masipajj ukanak mayirakïna. Uk uñjasasti mayni trabajir masipas munarakïnwa. Kullakajj akham siwa: “Jehová Diosajj wal bendiciwayitu” sasa. Jichhajja, 11 trabajir masinakapatakiw revistanak sapa kuti api.

Tamanak tumptʼir mä jilatajja, utat uta yatiyañat parlkasajja, akham sasaw jilat kullakanakar säna: “Janiw ‘yaqha uruw kuttʼanï’ sasakejj yatiyañ tukuyapjjañamäkiti, jan ukasti, akhamwa jisktʼapjjañama: ‘¿Kunjamsa Bibliat yatichapjjta uk yatiñ munasmati? Jan ukajj ¿kunürusa, kuna horasarus kuttʼanirista?’” sasa. Jilatajj saskakiwa: “Ukham lurasinjja, mä tamankir jilat kullakanakajja, mä semananakwa 44 jaqenakar Bibliat yatichañ qalltapjjäna” sasa.

Maysa toqetjja, jankʼakiw kuttʼañasa, yamas wali askïspawa mä qawqha urut kuttʼañajja. Ukhamatwa Bibliat cheqapuni yatichañ munatassa, yanaptʼañ munatassa amuyapjjani. Mä  kutejja, akham sasaw mä warmirojj jisktʼasïna: “¿Kunatsa Jehová Diosan Qhanañchirinakapampejj Bibliat yateqañ qalltta?” sasa. Jupasti sarakïnwa: “Wali munasirïpjjewa, nayatsa llakisipjjarakiwa, ukatwa yateqañ qalltta” sasa.

Madaí sat mä kullakajja, Precursoranakatak Escuelaruw saräna. Uka qhepatsti, tunka phesqaniruw Bibliat yatichjjäna, yaqha phesqanirusti mayni jilat kullakanakaruw pasayäna. Jupanakat mä qawqhanejj tantachäwinakarojj jutjjapjjarakïnwa. ¿Kunas kullakarojja waljanir Bibliat yatichañ qalltañatakejj yanaptʼäna? Precursoranakatak Escuelanjja akham sänwa: “Bibliat yateqañ munapki ukanakar kuttʼañajj wali askiwa, ukat jan utankapkchi ukhajja, jikjjatañkamaw thaqañasa” sasa. Ukhamajj uka arunakwa kullakajj katoqasïna. Bibliat waljanir yatichiri yaqha kullakajja, ukham sarakiwa: “Jaqenakar Bibliat yatichañatakejja, jan qarjtas kutin kutin kuttʼañasawa” sasa.

Biblia yateqañ munirinakar yatichañataki kuttʼañajj chʼamakïspawa, ukampis kuttʼañasapuniwa. Ukhamatwa walja bendicionanak katoqañäni. Jiwasatï Diosan Reinopat wali sum yatiyañäni ukhajja, waljaniruw ‘kunatejj cheqäki uk uñtʼapjjañapatakisa’ qhespipjjañapatakisa yanaptʼañäni (1 Tim. 2:3, 4). Ukhamatwa wali kusisitäñäni.