1, 2. 1) ¿Khitirus Jehová Diosajj nayraqat lurtʼawayi? 2) ¿Kunsa Diosan nayrïr Yoqapajj luräna? 3) Angelanakajj ¿kunjam uttʼayatäpjjesa?

AKAPACH alajjpach Lurir Jehová Diosajja, taqe kunsa sum luräna, suma organizatwa uttʼayawayäna. Nayraqatjja, Jilïr Yoqaparuw lurawayi. Juparuw Diosajj Jupa lanti parlañapatakejj khitirïna, ukatwa jupajj “Aru” satajja. Ukhamajj ‘Arojj’ walja millón millón maranakaw Diosar yanaptʼawayi. Biblianjja akham siwa: “Kunapachatejj taqe kuna qalltkäna ukkhajja, Arojj utjapunïnwa; khä Arusti Diosampïnwa [...]. Jupa toqew Diosajj taqe kuns luri, jan jupampejj janiw kuna luratas utjkiti” sasa. Ukatsti, Diosajj Arurojj aka Oraqeruw khitanïna, akanwa Diosan munañap taqe chuyma phoqawayi, jupasti Jesucristowa. Jupan jutatapatjja pä waranqa maranak jilaw pasawayjje (Juan 1:1-3, 14).

² Jesusajj janïr aka Oraqer jutkäna ukhajja, Jehová Diosan yanapiripänwa (Pro. 8:30, NM). Diosajja jupa toqew millón millón angelanak alajjpachan luräna (Col. 1:16). Biblianjja akham siwa: “[Jehová Dios] nayraqatatsti mä nina jawirjamaw misturakïna. Waranqa waranqanakarakiw juparojj servipjjäna, millón millonanakarakiw jupa nayräjjan saytʼatäpjjäna” sasa (Dan. 7:10). Uka angelanakasti wali suma organizatäpjjewa, ukatwa Jehová Diosan ‘ejercitonakapa’ satäpjjaraki (Sal. 103:21, NM).

3. 1) ¿Qawqha planetanakasa, warawaranakas utjpacha? 2) Warawaranakajj ¿kunjam organizatäpjjesa?

 ³ Jehová Diosajja walja warawaranaka ukhamarak planetanaka lurawayi. El Universal sat periodiconjja, warawaranakat parlkasajj akham siwa: ‘Kuntï nayrajj sapkäna ukat sipansa, kimsa ukhampiw jichhajj utji sasaw cientificonakajj sapjje. Tantiyatajja, 300 waranqa trillonaw utji’ sasa. Warawaranakajja, galaxianakaru suma organizatäpjjewa: sapa galaxiasti walja planetanakani ukat walja millón millón warawaranakaniwa. Ukat walja galaxianakajj mä tamaru tantachatäpjjewa, uka walja tamanakasti jukʼamp jachʼa tamanakaru tantachatäpjjarakiwa.

4. ¿Kunatsa Diosan servirinakapajj suma uttʼayatäpjjewa sasajj sissna?

⁴ Angelanakasa, warawaranakasa, planetanakasa wali suma uttʼayatäpjjewa (Isa. 40:26). Aka Oraqenkir servirinakapajja, ukham suma organizatäpjjarakiwa. Niyakejjay Diosar serviñan walja lurañanakajj utjchejja, markapajj suma uttʼayatäspa ukwa Jehová Diosajj muni. Cheqansa Jehová Diosajj khä nayra maranakatpachwa markaparojj sum uttʼayäna, ukhamata jan jitheqtasa Jupar yupaychapjjañapataki. Jichhas nayrasa kunjamsa Jehová Diosajj servirinakaparojj yanaptʼäna ukat kunjamsa ‘jan pejjtuntir Diosätap’ uñachtʼayäna ukajj qhanaw amuyasi (1 Corintios 14:33, * 40 liytʼañataki).

5. ¿Kunatsa Diosan amtapajj jan phoqaskäna?

⁵ Kunapachatï Jehová Diosajj Adanampi Evampi lurkäna ukhajja, akhamwa jupanakar säna: “Jichhajj wali mirantapjjam, aka oraqerusti phoqhantapjjarakim, apnaqapjjarakim; taqe chawllanakarusa, jamachʼinakarusa apnaqapjjam, ukhamaraki oraqenjam qatatnaqtir animalanakarusa” sasa (Gén. 1:28). Ukhamajj jaqenakajj aka Oraqen suma organizataw mirantapjjañapäna, mä suma paraisor tukuyañkama. Ukampis Adanampi Evampin jan istʼasitapatwa uka amtajj jan phoqasjjänti (Gén. 3:1-6). Walja maranak qhepatjja, Jehová Diosajj ‘jaqenakan sinti jan walinaka lurapjjatapa ukhamarak ñanqha lurañaki amtaskatapa uñjäna’. ‘Aka oraqejj ñanqha lurañampi kunayman casta jan wali lurañanakampi phoqantatänwa’. Ukatwa Jehová Diosajj uka jan wali jaqenakar Uma Juiciomp tukjañ amtäna (Gén. 6:5, 11-13, 17).

6, 7. 1) ¿Kunatsa Diosajj Noé chachar ‘suma jaqet’ uñjäna? (21 janankir foto uñjjattʼam.) 2) ¿Kunas jan wali jaqenakarojj pasäna?

⁶ Noé chachajj “wali suma jaqënwa”, “jaqenak taypinsti jupa sapakiw Diosan munañaparjamajj sarnaqäna”, ukatwa Jehová Diosajj ‘Noerojj wali sum uñjäna’. ‘Jaysasapuni sarnaqatapatjja’ Jehová Diosajj mä jachʼa arca luram sasaw säna (Gén. 6:8, 9, 14-16). Uma Juiciot jaqenakaru animalanakaru qhespiyañatakiw ukjja sum lurañapäna. Noesti “kunjämtejj Diosajj siskäna ukhamwa luräna”. Uka jachʼa arca tukuyañatakejja, sumwa organizasïna ukat familiapas yanaptʼarakïnwa. Tukuyjjasasti Noejj animalanakaruw arcar anantäna, ukat Jehová Diosaw ‘arcan punkupjja jistʼantjjarakïna’ (Gén. 7:5, 16).

⁷ 2370 nayrïr pacha maranwa Uma Juiciojj pasäna, “Noempi, ukat khitinakatejj jupampi chika arcankapkän ukanakakiw qhespipjjäna, ukat uksarusti qʼala tukjatänwa” (Gén. 7:23). Jichhürunakan jakapki uka jaqenakajja, Noé chachan familiapat jutirkamakïpjjewa, uka tiempon jakir jan wali jaqenakajj qʼalaw jiwarjjapjjäna. Kunattejj janiw Noen ‘cheqa arunakaparojj’ istʼapkänti (2 Ped. 2:5).

8. Diosajj ‘Canaán oraqer mantapjjam’ siskäna ukhajja, ¿kunas suma organizatätap uñachtʼayäna?

⁸ Uma Juiciotjja, kimsaqallq patak jila maranakaw pasjjäna, ukhaw Jehová Diosajj israelitanakarojj  mä suma markar tukuyäna. Kunjamsa jakapjjani ukhamarak kunjamsa Diosar yupaychapjjani ukanakajj suma organizatänwa. Sañäni: Diosajja israelitanakatakejj sacerdotenaka, levitanaka uttʼayäna, ukat ‘Tatitumpi Jikisiñ Carpa punkuparusti yanaptʼir warminaksa’ uttʼayarakïnwa (Éxo. 38:8). Ukampis Jehová Diosajj ‘Canaán oraqer mantapjjam’ siskäna ukhajja, israelitanakajj ajjsarañat janiw istʼapkänti. Ukatwa Diosajj Jupar jan confiyir jaqenakarojj akham säna: “Caleb chachampi Josueyampikwa jiltʼayäjja. Janiw kawkïrisa jumanakatjja mantkaniti, kawkïri oraqtejj arojjampi arskta churañataki ukarojja” sasa. Caleb chachampi Josueyampikiw Suma Oraqe uñaqer sarasajj suma yatiyäwinak apanipjjäna, ukatwa ukham säna (Núm. 14:30, 37, 38). Qhepatsti, Jehová Diosajj Josué chacharuw Israel marka irpañapatakejj uttʼayjjäna (Núm. 27:18-23). Janïra israelitanakar Canaán markar irpantkasajja, Jehová Diosajj akham sasaw Josué chachar säna: “Chʼamani saytʼasim, jan ajjsaramti, janirak mayjtʼasimsa. Naya [Jehová] Tatitu Diosamaw jumampiskä kawkharutï sarkäta ukkhanakana” sasa (Jos. 1:9).

9. ¿Kunjamsa Rahab warmejj Jehová Diosarusa, Diosan markaparus uñjäna?

⁹ Cheqas Jehová Diosajja, Josueyarojj janiw jaytanukkänti. Kunas khä 1473 nayrïr pacha maran pasäna uk amtañäni. Israelitanakajja, cananeonakan Jericó markap jakʼankasipkänwa, ukhaw Josueyajj pä uñaqerinak Jericó markar khitäna. Ukansti, Rahab sat warmiruw uñtʼapjjäna, jupaw kunapachatï reyin khitanakapajj uka pä israelitar katuntir jutapkäna ukhajja, utapar imantäna. ¿Kunatsa yanaptʼpachäna? Uka pä israelitarojj akham sasaw uka warmejj säna: “Nayasti yattwa Diosan jumanakaru aka oraqe churatapa [...]. Nanakasti yatipjjaraktwa kunapachatï Egipto markat mistunipkta ukkhajja, Diosasti uka Mar Rojo sat qotsa wañtʼayatapa jumanakan pasapjjañanakamataki. Ukatsti yatipjjaraktwa [...], amorreonakan reyinakaparusa tukjanipjjatama [...]. Jumanakan [Jehová] Tatitu Diosamasti  pachpakïskiwa alajjpachansa ukhamarak akapachansa” sasa (Jos. 2:9-11). Rahab warmejj Jehová Dios toqeta ukhamarak Diosan markap toqetwa saytʼasïna. Ukatwa Jericó markar israelitanakajj tʼunjapkäna ukhajja, Diosajj juparusa familiaparus qhespiyäna (Jos. 6:25). Rahab warmejj Jehová Diosaruw iyawsäna, Juparurakiw ajjsaräna, Diosan markaparus wali respetompiw uñjarakïna.

10. ¿Kunsa Jesusajj judionakan pʼeqtʼirinakaparojj säna, ukat kunatsa?

¹⁰ Kunapachatï Josué chachajj israelitanakar pʼeqtʼkäna ukhajja, Canaán oraqwa markat marka katuntapjjäna. Ukampis ¿kunas qhepat pasäna? Israelitanakajj walja maranakaw kutin kutini Jehová Diosarojj jan istʼapkänti. Jehová Diosajj Yoqapar aka Oraqer khitankäna ukhajja, jukʼamp jan istʼasirinakaw tukupjjäna, janiw Diosarusa ni profetanakaparus istʼapkänti, ukatwa Jesusajj Jerusalén markarojj ‘profetanakar jiwayiri’ sasin säna (Mateo 23:37, 38 liytʼañataki). Ukham jan istʼasipjjatap laykuw Jehová Diosajj judionakan pʼeqtʼirinakaparojj apanuküna. Ukatwa Jesusajj akham säna: “Jumanakatjja Diosan reinopajj apaqatäniwa, churasirakiniw khitinakatejj horasapar achunak churkis ukanakaru” sasa (Mat. 21:43).

11, 12. 1) ¿Kunatsa Jehová Diosajj machaq tamaruw yanapjjäna sasajj sissna? 2) ¿Khitinakas uka machaq tamar mantapjjäna?

¹¹ Jehová Diosajja, khä nayra patak maranakanwa jan istʼasir israelitanakarojj jaytanukjjäna. ¿Ukhamajj Diosan uttʼayat markapajj janit aka Oraqen utj-jjäna? Diosajj yaqha markwa uttʼayäna, jupanakajj Jesusan yatichäwiparuw arkapjjäna. Uka tamajj 33 maran Pentecostés urunwa uñstäna. Jerusalén markanwa Jesusan 120 arkirinakapajj tantachasisipkäna, “ukatsti akatjamatwa alajjpachat istʼasïna mä jachʼa thayan thaytʼatapjama. Uka thayasti uka utpacharurakiw phoqhantäna [...]. Ukatsti sapa maynjjana lajjrar uñtata ninanakaw uñstaräna. Jupanakasti sapa mayniw qollan ajayumpi phoqtʼatäpjjäna. Ukatsti yaqha arunak parlaña qalltapjjäna, kunjämarutejj qollan ajayojj parlaykäna ukhamarjama” (Hech. 2:1-4). Ukhamatwa Jesusan arkirinakaparu Jehová Diosan yanapaskatapajj qhan amuyasïna.

¹² “Ukürusti mä kimsa waranq jaqenakjamaw iyawsirinakarojj yapjjattäna”. “[Jehová] Tatitusti sapüruw tamar yapjjattayäna khitinakatejj qhespiyasiñapäkän ukanakampi” (Hech. 2:41, 47). “Diosan arunakapasti jukʼampiw parlatäna Jerusalenanjja. Ukhamarakiw iyawsirinakas waljaniraki yapjjattarakïna. Walja sacerdotenak kunaw [Jehová] Tatiturojj iyawsapjjarakïna” (Hech. 6:7). Uka machaq tamankirinakan yatichataparojj walja judionakaw istʼapjjäna. Qhepatsti ‘jan judiöpkis uka jaqenakas’ uka tamar mantapjjarakïnwa, ukat Jehová Diosajj wasitampiw jupanakar yanaptʼaskatap uñachtʼayarakïna (Hechos 10:44, 45 liytʼañataki).

13. ¿Kunsa Diosan machaq tamapajj lurapjjañapäna?

¹³ ¿Kunsa Criston arkirinakapajj lurapjjañapäna? Jesús pachpaw ukjja uñachtʼayäna. Bautisasjjäna uka qhepatjja ‘Diosan Reinopat’ yatichañwa qalltäna (Mat. 4:17). Ukham lurapjjañapatakiw Jesusajj arkirinakapar yaticharakïna. Jupajj akham sänwa: “Jumanakasti nayat qhanañchapjjetäta Jerusalén markana, Judeana, Samariana, taqe aka oraqpachana” sasa (Hech. 1:8). Nayrïr cristianonakajj kunjamsa lurapjjañapäna uk sum amuyapjjäna. Ukatwa Pablompi Bernabeampejj Pisidiankir Antioquía markankkasajja, kutkatasir judionakar akham sapjjäna: “Wakisipunïnwa nayraqata jumanak judionakar Diosan arunakapa parlañajja. Ukampis jumanakajj janiw katoqañ munapktati. Janirakiw wiñay jakañatakjam amuyasipktasa. Ukatpï jichhajj nanakajj  jan judionakäpkis ukanak taypirojj sarjjapjjäjja. [Jehová] Tatitusti akham sasaw nanakarojj sapjjetu: ‘Markanakan qhanapatakiw jumarojj uchsma. Ukhamarakiw juma toqe taqe akapachankir jaqenakan qhespiyasiñapataki’” sasa (Hech. 13:14, 45-47). Jehová Diosan aka Oraqenkir markapajja, nayra patak maranakatpachwa, kuntï Diosajj jaqenakaru qhespiyañatak lurawayki ukanak yatiyasipki.

14. ¿Kunas Jerusalén markampejj pasäna, ukat khitinakakis qhespipjjäna?

¹⁴ Jilapart judionakajja, janiw Diosan Arup istʼapkänti, janirakiw Jesusan aka arunakaparus yäqapkänti: “Kunapachatï Jerusalén markaru ejercitonakan muyuntata uñjapkäta ukkhajja, yatipjjam uka markajj jankʼaki tʼunjatäñapa. Ukapachasti Judeankirinakajj qollunakar jaltjjapjjañapawa; Jerusalén markankirinakasti ukatjja mistjjañanakapawa, ukhamarak pampankirinakajja janiw markarojj kuttʼapjjañapäkiti” sasaw Jesusajj säna (Luc. 21:20, 21). Kuntï siskäna ukajj ukhamapuniw phoqasïna. Kunapachatï judionakajj Roma marka contra saytʼapkäna ukhajja, romano soldadonakajj Jerusalén markaruw 66 maran muyuntapjjäna, jupanakarusti Cestio Galo chachaw pʼeqtʼäna. Ukampis akatjamatwa ukhamak sarawayjjapjjäna. Ukapachaw Jesusan arkirinakapajj Jerusalenata ukhamarak Judeata mistjjapjjañapäna. Sarnaqäwinakat yatjjattʼat Eusebio chachajj akham siwa: “Waljaniw Jordán sat jawira makatasin Perea toqenkir Pela markar sarjjapjjäna” sasa. 70 maranjja, wasitampiw romano soldadonakajj Jerusalén markar kuttʼapjjäna, ukat qʼal tukjapjjäna. Jupanakarojj Tito sat generalaw pʼeqtʼäna. Ukampis ¡Diosat jan jitheqtir cristianonakajja, Jesusan arunakapar istʼasajj qhespipjjänwa!

15. ¿Kunatsa cristian tamajj jiljjattaskakïna?

¹⁵ Nayrïr cristianonakajja, Diosar iyawsapjjatap laykojj kunayman jan walinakanwa tʼaqhesipjjäna, uñisiñat arknaqatas uñjasipjjarakïnwa. Ukhamäkchïnsa, tamajj jukʼamp jiljjattaskakïnwa (Hech. 11:19-21; 19:1, 19, 20). ¿Kunatsa? Jehová Diosaw bendiciskäna (Pro. 10:22).

16. ¿Kunsa nayrïr cristianonakajj Diosat jan jitheqtañatakejj lurapjjañapäna?

¹⁶ Diosat jan jitheqtañatakejja, sapa mayniw chʼamachasipjjañapäna. Jupanakatakejj Qollan Qellqatanakat sum yatjjatañasa, tantachäwinakar jan faltasis sarañasa, Diosan Reinopat taqe chuyma yatiyañasa wali wakiskirïnwa. Ukanakaw Diosar sum yupaychañatakisa, tamjam mayachtʼatäñatakisa yanaptʼäna, jichhürunakansa ukhamarakiwa. Uka tiemponjja, cristian tamanakajj suma organizatäpjjänwa. Irpir chuymani jilatanakasa, yanapirinakapasa, taqe chuymaw jilat kullakanakar yanaptʼañatakejj chʼamachasipjjäna (Fili. 1:1; 1 Ped. 5:1-4). Ukhamarakiw tamanak tumptʼirinakas jupanakar chʼamañchtʼäna, kunjamtï apóstol Pablojj visittʼirïkäna ukhama (Hech. 15:36, 40, 41). Nayra tiempjamarakiw jichhürunakan Jehová Diosar yupaychasktanjja. Diosajj nayrasa jichhasa wali sumwa organizawayi, ukatwa ¡wal yuspärtanjja! *

17. ¿Kunsa jutïr yatichäwin yatjjataskañäni?

¹⁷ Qhep qhepa urunakanwa jakasktanjja, Supayan aka ñanqha pachapajj niyaw qʼala tukjatäni, ukampis Jehová Diosan markapajj jukʼampiw nayrar saraski. ¿Uka chikat jiwasajj sarasktanjja? ¿Diosar sum yupaychañatakejj chʼamachasisktanti? Kunjamsa uk lursna ukwa jutïr yatichäwin yatjjataskañäni.