1. Diosat jitheqtiri nayra israelitanak lantejja, ¿kuna markas uttʼayasjjäna? (Aka janankir dibujo uñjjattʼam.)

JEHOVÁ DIOSAW nayrapachajj cristiano tamaru uttʼayäna, juparakiw jichhürunakansa jupan yupaychirinakap wasitat uttʼayaraki. Kunjamtï pasïr yatichäwin siskayätanjja: Diosat jitheqtiri nayra israelitanak lantejja, Diosajj Criston arkirinakaparuw ajllit markapjam uttʼayjjäna. Jehová Diosajj uka markar wal yanaptʼäna, ukatwa 70 maran Jerusalenar tʼunjaskäna ukhajj jupanakar qhespiyäna (Luc. 21:20, 21). Kunanakatï uka tiempon paskäna ukanakajja, kunanakansa Diosan servirinakapajj jutïrin uñjasipjjani ukwa uñachtʼayistu. ‘Qhepa urunakan’ jakjjtanjja, Supayan apnaqata akapachasti niyaw tukusjjani, ukampis Diosan markapajj qhespiyatäniwa (2 Tim. 3:1). ¿Kunatsa ukham sissna?

2. 1) ¿Kunsa Jesusajj ‘jachʼa tʼaqhesiñat’ säna? 2) ¿Kunjamsa ‘jachʼa tʼaqhesiñajj’ qalltani?

² Jesusajj kuttʼaniñapata ukat akapachan tukusiñapata parlkäna ukhajja, akham sänwa: “Ukürunakanjja walja tʼaqhesiñanakaw  utjarakini. Ukham tʼaqhesiñsti janiw jichhürkamajj khitis uñjkiti aka oraqe luraski ukürutpacha, ni uka pasatats utjkarakiniti” sasa (Mat. 24:3, 21). Kunapachatï Jehová Diosajj gobiernonak toqe ‘Jachʼa Babiloniaru’ jan ukajj taqpacha kʼari religionanakar tukjkani ukhaw uka ‘jachʼa tʼaqhesiñajj’ qalltani (Apo. 17:3-5, 16). Ukjjarojj ¿kunas pasarakini?

3. Kʼari religionanakar tukjaskani uka qhepatjja, ¿kunas Diosan markapar pasani?

³ Kʼari religionanakajj tukjatäjjani ukhajja, Supayajj Jehová Diosan servirinakap contraw saytʼani. Biblianjja ‘Magog markankir Gog’ satäkis ukjjat parlkasajj akham siwa: “Jumasti mä chʼamaka qenayjamaw jupanakjjarojj purïta [...], mä jachʼa thayäkasmas ukhamaw uka markarojj ejercitonakamampi nuwantarakïta, ukhamaraki walja yaqha markanakamampisa” sasa. Diosan servirinakapajj janiw nuwasiñatakejj wakichatäpkiti, jan ukasti sumankañ thaqeri markäpjjewa, ukatwa Supayajj jupanakar tukjañajj janis chʼamäkaspa ukham amuyani. Ukampis ukham amuyasajj pantjasiniwa (Eze. 38:1, 2, 9-12).

4, 5. Supayajj Diosan servirinakapar tukjañ munkani ukhajja, ¿Jehová Diosajj kuns lurani?

⁴ Kunapachatï Supayajj Diosan markapar tukjañ munkani ukhajja, ¿Jehová Diosajj kamachanisa? Taqe Kunjjar Munañani Diosajj jankʼakiw servirinakaparojj jarkʼaqani. Markapar qallasipki ukhajj Juparus qallasipkaspa ukhamawa (Zacarías 2:8 liytʼañataki). Ukhamasti Alajjpachankir Awkisajj jankʼakiw qhespiyistani. Ukhamatwa Supayan aka ñanqha pachapajja “taqe chʼaman Diosan jachʼa urupan” qʼala tukjata uñjasini, uka urusti “Armagedón” satawa (Apo. 16:14, 16).

⁵ Biblianjja uka guerrat parlkasajj akham siwa: “‘Tatitusti jichhajj taqe markanakampiw luratanakapatjama waytʼañ qallti, taqe jaqenakarusti cheqaparjamaw uñjarakini, juchaninakarusti jiwañatakiw katuyarakini. [Jehová] Tatituw ukjja arsu.’ Taqe chʼamani Tatitusti siwa: ‘Tʼaqhesiñajj purinipuniniwa, mä markat mä markaru; mä jachʼa thayaw sarti aka oraqe tukusitjja’ [sasa]. Khitinakarutejj Tatitojj uka urojj jiwaraykani ukanakasti aka oraqenjja mä thiyat mä thiyakamaw liwirtapjjani. Janirakiw khitis jupanakatjja jachkaniti, janirakiw uka jiwatanakjja khitis apthapkaniti imañatakejja; guanjama waranukutaw oraqenkasipkani” (Jer. 25:31-33). Supayan aka ñanqha pachapajj Armagedonanwa tukusini, ukampis Jehová Diosan markapajj qhespiyatäniwa.

6, 7. 1) ‘Walja jaqenaka’ sasin uñtʼatäki uka jaqenakajja, ¿kawkitsa mistupjje? 2) ¿Kunjamsa Diosajj markapar ‘jiltayaski’?

⁶ Jehová Diosajj markapankir servirinakaparojj wali askitwa uñji, ukatwa markapajj nayrar sartaski. Biblianjja akham siwa: “Tatitusti aski jaqenakarojj imiwa, mayisitanakapsa istʼarakiwa” sasa (1 Ped. 3:12). Ukatjja, ‘jachʼa tʼaqhesïwi’ pasaniri ‘walja jaqenakatwa’ Biblian parlaraki, jupanakasti aski jaqet uñtʼatäpjjarakiwa (Apo. 7:9, 14). Jumajj uka walja jaqenakampi chika qhespisajj kunja kusisitas jikjjatasïta ¿uk amuytati?

⁷ Uka walja jaqenakajj taqe markanakatwa mistupjje. Jesusajj uñstaniñapat parlkäna ukhajj akham sänwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw  jutani” sasa (Mat. 24:14). Uka arunakarjamaw walja jaqenakarojj tantachasiski. Ukatakirakiw Diosan markapajj aka qhepa urunakan wal chʼamachasisipki. Ukhamatwa walja millón jaqenakajj ‘ajayuna, ukhamarak cheqana’ Diosar yupaychañ yateqawayapjje (Juan 4:23, 24). Amuytʼañataki, 2003 marat 2012 marakamajja, 2.707.000 jaqenakatsa jilaw bautisasiwayapjje. Jehová Diosan Qhanañchirinakapajj niya kimsaqallq millonäjjtanwa. Ukat walja millón jaqenakaw tantachäwinakasarojj jutapjjaraki, yamas Jesusan jiwäwip amtañatakejj jukʼampi waljaniw jutapjje. Jehová Diosaw markaparojj sapa mara ukham ‘jiltayaski’, ukatwa wal kusistanjja (1 Cor. 3:5-7).

8. ¿Kunatsa Diosan markapajj jukʼamp jiljjattaskaki?

⁸ Jehová Diosajj servirinakaparojj wal yanaptʼaski ukatwa markapajj wal jiljjattaski (Isaías 43:10-12 liytʼañataki). Uka toqetjja mä profeciajj akham sänwa: “Aka mä jukʼa jaqenakasti waranqanakaruw tukupjjani, aka mä qawqha jaqenakasti mä jachʼa markaw tukupjjarakini. Nayätwa [Jehová] Tatitojja, nayaw taqe ukanakjja horasaparu phoqhasiyarakï” sasa (Isa. 60:22). Ajllit cristianonakata aka oraqenkasipki uka jilat kullakanakajja, qalltan ‘mä jukʼanikïpjjänwa’, ukampis Jehová Diosaw jupanakarojj yanaptʼawayi ukatwa jukʼamp jiljjattawayapjje (Gál. 6:16). Tiempompejja, khitinakatï aka Oraqen jakasipkani uka jilat kullakanakaw Diosan arunakapat yateqawayapjjaraki, ukhamatwa Diosan markapajj jukʼamp jiljjattawayi.

9. ¿Kunsa Diosan bendicionap katoqañatakejj lurañasa?

⁹ Ajllit cristianonakasa, aka Oraqen jakañ suyasipki uka cristianonakasa jutïrin suma bendicionanakwa katoqapjjani sasaw Bibliajj qhanañchi. Ukampis ukatakejj Diosan mayitanakap phoqapjjañapawa (Isa. 48:17, 18). Israelitanakat amtapjjañäni. Jupanakatï Moisesan Leyinakapa istʼapjjasapäna ukhajj sumakiw jakapjjaspäna, jan walinakatsa jarkʼaqatapjjaspänwa. Leyinakajja, chacha warmi sarnaqañatsa, negocionak lurañatsa, wawanak uywañatsa, jaqe masir sum uñjañatsa wali sumwa qhanañchäna (Éxo. 20:14; Lev. 19:18, 35-37; Deu. 6:6-9). Jichhürunakanjja, ukhamarakiw Diosan leyinakapasa yatichäwinakapasa wali sum jakasiñ yanaptʼistu. Diosan uka mayitanakap phoqañajj janiw chʼamäkiti (1 Juan 5:3 liytʼañataki). Jiwasatï istʼasirïñäni ukhajja, Diosajj jan walinakatwa jarkʼaqestani, ukat juparus sumwa yupaycharakiñäni (Tito 1:13).

10. ¿Kunatsa Bibliat yatjjatañatakisa sapa semana Familian Diosar Yupaychañatakisa tiempo apstʼasiñasa?

¹⁰ Diosan markapajj kunayman toqetwa nayrar sartaski. Amuytʼañataki, marat mararuw Biblian yatichäwinakapajj jukʼamp sum qhanañchasiski. Kunjamtï Bibliajj siskejja, “aski jaqenakan sarnaqäwinakapasti willjta qhanjamawa; phoqhatpach qhantañkamaw jukʼat jukʼat qhanti” (Pro. 4:18). Ukampis akham jisktʼasiñaw wakisispa: “Biblian yaqhep yatichäwinakapajja, nayrajj kunjamsa amuyasïna ukat jichhajj kunjamsa amuyasjjaraki ¿uk sumti nayajj yatiskta? ¿Sapüruti Biblia liyiskta? ¿Jichhak mistki uka qellqatanak walti liytʼañ muntjja? ¿Sapa semana familian Diosar yupaychañatakejj tiempo apstʼasiskti?” sasa. Ukanak phoqañajj janiw sinti chʼamäkiti, awisajj tiempo apstʼasiñakiw wakisi. Cheqas Bibliat yatjjatañasa, ukarjam sarnaqañasa, Diosan markapamp chika nayrar sartañasa wali askiwa. Yamas ‘jachʼa tʼaqhesiña’ jakʼachasisinkipanjja jukʼamp wakiskiriwa.

11. Diosan markapajj ¿kuna askinaksa tantachasisajj jikjjatapjje?

 ¹¹ Diosan markapajj sum jakasiñaswa muni, ukatwa sapa kuti Pablon arunakap amtayistu. Pablojj sänwa: “Thaqañasaw maynit maynikama kunjäman yanaptʼasiñasataki munasiñanïñasataki, ukhamarak suma luräwinak uñachtʼayasa. Janirakiw tantachasïwinakasar janejj sarañasäkiti kunjämtejj yaqhepanakajj jan sarapkiti ukhama, jan ukasti maynit mayniruw wayttʼasiñasa, Tatitun jutäwipa jakʼankjjatapa yatisinsti jukʼampïñapawa” sasa (Heb. 10:24, 25). Israelitanakajj sapa kutiw tantachasipjjerïna, Jehová Diosar yupaychañataki ukat yatichäwinakapa istʼañataki. Ukhamarus tantachasirinakajj wal kusisipjjerïna. Sañäni, Nehemiasajj jakkäna uka tiempon Enramada fiesta amtirinakajj wal kusisipjjäna (Éxo. 23:15, 16; Neh. 8:9-18). Jichhürunakanjja, ukhamarakiw tantachäwinakasansa jachʼa tantachäwinakansa wali kusisita jikjjatastanjja. Uka tantachäwinakaw Diosar jakʼachasiñatakis wal yanaptʼarakistu. Ukhamasti, jan faltasisa sarapuniñäni (Tito 2:2).

12. ¿Kunjamsa Diosan Reinopat yatiyañarojj uñjañasa?

¹² ‘Qhespiyasiñ arunakwa’ Diosan markapankkasajj yatiytanjja, ukajj wali kusiskañawa (Rom. 15:16). Uka arunaka yatiyasajj ‘Qollana’ Diosana, mä arunjja, ‘Jehová Tatitun yanapirinakaparuw’ tuktanjja (1 Cor. 3:9, MT; 1 Ped. 1:15). Diosan sutipa qʼomachasiñapatakis yanaptʼaraktanwa. ¡‘Kusisir Diosan suma yatiyäwinakapa’ apañajj wali kusiskañapuniwa! (1 Tim. 1:11, NM.)

13. ¿Diosar sum yupaychaskakiñatakisa sum jakasiñatakis kunsa lurañasa?

¹³ Diosajj markapar yanaptʼsna ukat janirak Jupatsa jitheqktsnati ukwa muni, ukhamatakwa Jupar sum yupaychsna. Moisesajj israelitanakar akham sänwa: “Jichhüruw nayajj uchta alajjpachampiru akapachampiru jumanakat testigöñapataki; jumanakaru jakañampita jiwañampita ajllisiñamatak churapjjsma; ukhamaraki bendicionampita, maldicionampita ajllisipjjañamataki. Ukampis jakaña ajllisipjjam, jumanakampi, wawanakamampi jakapjjañamataki. [Jehová] Tatitu Diosamarusti munapjjam, istʼapjjarakim, suma iyawsañampi arkapjjarakim, jakañajj jupat jutatap layku, jumanakan walja maranak jakapjjañamataki, kawkïri oraqtï Tatitu Diosajj arupampi arsusin Abrahamaru, Isaacaru, ukhamarak Jacob awkinakamaru churä siskatayna ukanjja” sasa (Deu. 30:19, 20). Ukhamajj jiwasatï Jehová Diosar munasiñäni, jupar istʼañäni, janirak jupatsa jitheqtkañäniti ukhajja, sum jakasiñäni.

14. ¿Kunjamsa mä jilatajj Diosan markapar uñjäna?

¹⁴ Pryce Hughes sat jilatat parltʼañäni. Jupajj janïra 1914 marajj purinkäna ukhaw Diosan arunakap yateqawayäna. Jupajj janiw Diosatsa markapatsa jitheqtkänti. Jakäwipat parlkasajj akham sänwa: ‘Janipuniw Diosan markapat jitheqtañasäkiti, janirakiw jaqen amuyunakapampis apayasiñasäkiti ukwa jakäwijan yateqawayta’ sasa. Ukham amuyañaw kunayman jan waltʼäwinakar saykatañatakejj yanaptʼawayäna. Hughes jilatajj akham saskakiwa: ‘Kuntï Diosan markapajj siskistu ukarjam lurtan ukhajja, Diosajj bendicistuwa ukat chuymapsa kusisiyaraktanwa’ sasa.

15. Diosan markapan yaqhep yatichäwinakajj mayjtʼayaski ukhajja, ¿kunjamsa uñjañasa? Mä uñachtʼäwimpi uk qhanañchtʼam.

¹⁵ Jehová Diosan bendicionap katoqañatakejja, markapar yanaptʼañasawa ukat kawkïri yatichäwinakatï mayjtʼayasiwayki ukanaksa suma chuymampiw iyawsañasa. Amuytʼañatakejj nayra cristianonakat parltʼañäni. Jesusajj jiwjjäna uka qhepatjja, walja judío  cristianonakajj janiw Moisesan Leyinakapa jaytirjamäpkänti (Hech. 21:17-20). Ukatwa Pablojj Hebreos sat carta qellqkasajj akham amuytʼayäna: Diosajj janiw leyinak phoqatasat qollanaptaykistu, jan ukasti ‘Cristo Jesusana Diosan munañap phoqatap laykuw qollanaptayistu, mä kuti wiñayatak jupa pachpa cuerpop sacrificiot loqtasitapata’ sasa (Heb. 10:5-10). Ukanak istʼasajja, walja judío cristianonakaw kunjamtï nayrajj amuyapkäna uk jaytasajj nayrar sartasipkakïna. Jichhürunakanjja, ukhamarakiw Bibliatsa qellqatanakasatsa sum yatjjatañasa. Ukatjja, kuna yatichäwinakatï Diosan markapan mayjtʼayaski ukanaksa suma chuymampiw katoqañasaraki.

16. 1) ¿Kunatsa paraisonkañajj wali sumapunïni? 2) ¿Paraison kun phoqasiñapsa munasma?

¹⁶ Taqe khitinakatï Diosatsa markapatsa jan jitheqtapkani ukanakajj walja bendicionanak katoqapjjani. Ajllit cristianonakajj alajjpacharuw sarapjjani, Jesucristomp chik apnaqaniñataki (Rom. 8:16, 17). Ukat mayni cristianonakasti aka Oraqen mä suma paraison jakasipjjarakini. ¡Kunjamsa ukanakajj phoqasini uka toqet yaqhanakar parlañajj wali kusiskañapuniwa! (2 Ped. 3:13.) Ukanjja, “llampʼu chuymaninakasti oraq katoqapjjani, jilarkir sumankañampiw kusisipjjarakini” (Sal. 37:11). “Utanak utachasipjjani, ukan jakasipjjarakini”, ‘kuntejj amparapampi lurapkani ukwa manqʼasipjjani’ (Isa. 65:21, 22). Janiw tʼaqhesiñasa, manqʼat pistʼañasa, ni pisin jakañasa utj-jjaniti (Sal. 72:13-16). ‘Jachʼa Babilonias’ qʼala tʼunjatäniwa, janirakiw khitirus pantjasiyjjaniti (Apo. 18:8, 21). Jiwatanakasti jaktanipjjaniwa, istʼasirinakasti wiñayaw jakasipjjani. Ukhamajj ¡walja bendicionanakwa katoqañäni! (Isa. 25:8; Hech. 24:15.) Cheqansa, Diosar jakäwip katuyasirinakajj walja millonätanwa. Ukampis uka bendicionanak katoqañatakejja, sapa mayniw Diosar jukʼamp suma yupaychaskakiñataki ukat Diosan markapamp chika nayrar sartaskakiñataki chʼamachasiñasa.

17. ¿Kunjamsa Jehová Diosarus markaparus uñjañasa?

¹⁷ Akapachajj niyaw tukusjjani. Ukhamasti, janipun Diosat jitheqtapjjañäniti, ukat kunanaktï Diosajj jupar yupaychañatakejj churkistu ukanaksa wali askit uñjapjjañäni. Davitat yateqasipjjañäni, jupajj akham sirïnwa: “[Jehová] Tatitut mä mayisiñajjakiw utji, ukakirak thaqä: jakañ urunakajjan utapan utjasiña; utapan jupar yupaychañataki, [suma Diosätap] uñjasin kusisiñataki” sasa (Sal. 27:4). Ukhamajja, ¡janipuni Jehová Diosatsa ni markapatsa saraqapjjañäniti, markapamp chik nayrar sarasipkakiñäni!